ပိူင်လိူင်း:ႁဝ်းၶႃႈ တေၶတ်းၸႂ် ႁႂ်ႈလီ တိူဝ်းမႃးသေၼႆႉ

"'ႁဝ်းၶႃႈ တေၶတ်းၸႂ် ႁႂ်ႈလီ တိူဝ်းမႃးသေၼႆႉ"'

ပေႃးလုၵ်ႉဢဝ်တီႈၽဝယၢမ်းလဵဝ်ၼႆႉသေ ၼင်ႇႁိုဝ် တေႁွတ်ႈၵႂႃႇလႆႈ တီႈၸၢတ်ႈပၢၼ် ဢၼ်လီလိူဝ်ၼႆႉၼၼ်ႉ ႁဝ်းတေလႅၵ်ႈလၢႆႈသေ ၶိုၼ်ႈသဵၼ်ႈ တၢင်းၽၢႆႇၼႆႉဢမ်ႇလႆႈၵေႃႈ ၵႃႈတေလႆႈၵႂႃႇၶိုၼ်ႈတၢင်းပုၼ်ႉလႄႈ တေထုၵ်ႇ ပိူၼ်ႈဝႃႈ ၵိူမ်ႈလိူမ်ႈ ၵိူဝ်ႉ ႁဝ်းယူႇ။ သင်ဝႃႈ ၵၢမ်ႇဢမ်ႇပၼ်ၽွၼ်းလီႁဝ်း၊ ဢမ်ႇပၼ်ၼႃႈလီတေႃႇႁဝ်းသေ လၢမ်ႈၽၢႆး ႁဝ်းႁၵ်းၵႂႃႇပႅတ်ႈၼႆၵေႃႈ ႁဝ်း တိုၵ်ႉဢဝ်မိုဝ်းႁဝ်းသေ ၶတ်းၸႂ် ဝၵ်ႉဝၢႆး ၽၢႆးမိုဝ်း ၵႂႃႇလႆႈယူႇ။ ႁဵတ်းႁႂ်ႈမၼ်း ပဵၼ်မႃးလႆႈယူႇ။

ပေႃးတူဝ်ႁဝ်း ႁွတ်ႈထိုင်တီႈ ၸၢတ်ႈပၢၼ်လီၼၼ်ႉယဝ်ႉၵွၼ်ႇ ၸင်ႇ တေၸၢင်ႈၸုင်ၸၼ် ဢဝ်ပေႃႈမႄႈႁဝ်းမႃးၸွမ်းလႆႈ ဢမ်ႇၸႂ်ႈႁႃႉ။ ၸင်ႇဝႃႈ တွၼ်ႈတႃႇတူဝ်ၵဝ်ႇ၊ ပုၼ်ႈတႃႇပေႃႈမႄႈႁဝ်းၼၼ်ႉ ႁဝ်းလူဝ်ႇလႆႈ ၶတ်းၸႂ် လိူဝ်ၵဝ်ႇထႅင်ႈ သွင်ပုၼ်ႈ၊ သၢမ်ပုၼ်ႈ၊ သီႇႁႃႈပုၼ်ႈၵႂႃႇထႅင်ႈ ၼမ်ၼမ်ယဝ်ႉ။

ငဝ်းလၢႆးႁဝ်းၶႃႈယၢမ်းလဵဝ်၊ သင်ၵုမ်ႇပဵင်းပေႃးၸႂ်ၸွမ်း ငိုၼ်းလိူၼ် ငိုၼ်းတွင်း ဢၼ်လႆႈယူႇမိူဝ်ႈလဵဝ်ၼႆႉတႄႉ တိုၼ်းဢမ်ႇပႆႇလႆႈသေဢိတ်း။

ႁဝ်းၶႃႈ မီးယူႇတီႈၼႆႈ၊ မီးဝႆႉယူႇၼႂ်း Comfort Zone (ပဵၼ် ဢွင်ႈ တီႈ ဢၼ်ၵတ်းယဵၼ်ၸႂ်တီႈၼိုင်ႈသေတႃႉ ဢမ်ႇၸႂ်ႈဢွင်ႈတီႈ တေ ၶိုၼ်ႈယႂ်ႇ မႂ်ႇသုင်ဢွင်ႇမၢၼ်) ၼႆႉ ႁိုင်ႁိုင် ဢမ်ႇလႆႈ။ ပေႃးႁဝ်းၸုၵ်းယူႇတီႈၼႆႈ ႁိုင်ၼႃႇ ၸိုင် လိုၼ်းသုတ်းမႃး ႁဝ်းတေ လူႉလႅဝ်ၵႂႃႇ ၵမ်းသိုဝ်ႈယဝ်ႉ။

ပေႃးဝႃႈ ၸဝ်ႈၵဝ်ႇ ပဵင်းပေႃးၸႂ်ၸွမ်းငိုၼ်းလိူၼ် 5,000 ၼႆ ႁဝ်းၶႃႈ ၵေႃႈ တေၵိုင်ႇတၢၼ်ႇ ငိုၼ်းလိူၼ် 5,000 ၼၼ်ႉၵူၺ်ႈ။ ပေႃးႁဝ်းပဵင်းပေႃးၸႂ် ၸွမ်း ငိုၼ်းလိူၼ် 10,000 ၵေႃႈ ႁဝ်းမီးၵႃႈၶၼ်တၢၼ်ႇ 10,000 ပျႃးသေ သင်ဝႃႈ ႁဝ်းပဵင်းပေႃးၸႂ် ငိုၼ်းလိူၼ် 100,000 ၵေႃႈ ႁဝ်းတေမီးၵႃႈၶၼ် ၵိုင်ႇတၢၼ်ႇ 100,000 ပျႃးယဝ်ႉ။ ပေႃးၼၼ် ၽွင်းမိူဝ်ႈ ၸဝ်ႈၵဝ်ႇ ဢၢၼ်ႇ လိၵ်ႈၼႆႉဝႆႉယူႇၼႆႉ ၸဝ်ႈၵဝ်ႇလႆႈငိုၼ်းလိူၼ်ၵႃႈႁိုဝ်ၼႆ လူဝ်ႇလႆႈၶိုၼ်းဝူၼ်ႉ တူၺ်းဝႃႈ ၵဝ်လႆႈငိုၼ်းလိူၼ်တၢၼ်ႇႁိုဝ် လႄႈ ၵဝ်မီးၵႃႈၶၼ်တၢၼ်ႇႁိုဝ် ၼႆ ၽွင်ႈယူႇယဝ်ႉ။

မိူဝ်ႈဝူၼ်ႉဝႃႈ “ၵဝ်ႁဵတ်းၵၢၼ်ပၢႆးမၢၵ်ႈမီးယူႇၼႃႇ” ၼႆၼၼ်ႉၵေႃႈ ၶႂ်ႈ ႁႂ်ႈၵိုတ်းယိုတ်း လွင်ႈဝူၼ်ႉၸိူဝ်းၼၼ်ႉၵမ်းလဵဝ်သေ ဝူၼ်ႉဝႃႈ “ၵဝ်တေႁဵတ်း သၢင်ႈ ၼႃႈၵၢၼ်သင်ထႅင်ႈ” ၼႆပၼ်လႄႈ။ ပေႃးပဵၼ်လႆႈ တီႈဢေႇသုတ်း မၼ်း ၶႂ်ႈႁႂ်ႈၵူၼ်းၼုမ်ႇၵေႃႉၼိုင်ႈ မီးၵၢၼ်သွင်ဢၼ် ၶိုၼ်ႈၼိူဝ်ၼႆႉ။

ပေႃးႁဝ်းဢမ်ႇတဵၵ်းၸႂ်ႉ တူဝ်ႁဝ်းၶိုၼ်းမိူဝ်ႈလဵဝ်ၼႆႉၸိုင် ပေႃးဢႃႇ ယုႁဝ်းယႂ်ႇမႃး ႁဝ်းတေမိူၼ်ပူႇမွၼ်ႇၼၢႆးယႃႈ ဢၼ်ႁဝ်းႁၼ်ယူႇၼိူဝ်ဢွၼ်ႇ လၢႆးမိူဝ်ႈလဵဝ်ၼႆႉ၊ တေထူပ်းတၢင်းယၢပ်ႇၽိုတ်ႇ မိူၼ်ၼင်ႇပူႇမွၼ်ႇ ၼၢႆးယႃႈ ဢၼ်ႁဝ်းႁၼ်ယူႇ တေႃႈလဵဝ်ၼႆႉ ဢမ်ႇႁၢင်ႉယဝ်ႉ။

ပေႃးမိူဝ်ႈၼႆႉ ၶတ်းၸႂ်လႆႈၵႃႈႁႅင်း 50 ပျႃးၼႆ ထႅင်ႈဝၼ်းၼိုင်ႈ ၶတ်းၸႂ် ႁႂ်ႈလႆႈၵႃႈႁႅင်း 100 ပျႃးလႄႈ။ ဢမ်ႇၸႂ်ႈဝႃႈ ၸဝ်ႈၵဝ်ႇၵူၺ်း ပေႃႈ မႄႈၸဝ်ႈၵဝ်ႇၵေႃႈ တေလႆႈၽွၼ်းလီၸွမ်း ဢၼ်ၸဝ်ႈၵဝ်ႇၶတ်းၸႂ်ၼၼ်ႉ ဢမ်ႇႁၢင်ႉ။ ဢဝ်တၢင်းဝူၼ်ႉၼႆႉ ဝႆႉၼႂ်းၸႂ်သေ ႁႃငိုၼ်းၶဝ်ႈ တီႈဢေႇသုတ်း မၼ်း ႁႂ်ႈမီးထႅင်ႈသွင်ဢၼ်ၼႆႉလႄႈ။ (ၵဝ်ၶႃႈၵေႃႈ တိုၵ်ႉၶတ်းၸႂ် ႁႃလွၵ်းလၢႆး တႃႇတေမီးငိုၼ်းၶဝ်ႈ လၢႆလၢႆတၢင်း ၸိူင်ႉၼၼ်ဝႆႉယူႇ)

လႆႈႁဵတ်းၵၢၼ်ၼမ်သေ ႁိူဝ်ႉယူႇသေတႃႉ ၵၢၼ်ဢၼ်ၸဝ်ႈၵဝ်ႇႁဵတ်း ၼၼ်ႉ တေႁဵတ်းႁႂ်ႈၸဝ်ႈၵဝ်ႇလႆႈငိုၼ်းၼမ်၊ ယွၼ်ႉၼၼ် လွင်ႈႁိူဝ်ႉၼၼ်ႉ ယင်းတေမိူၼ်ၼင်ႇ လွင်ႈမူၼ်ႈသိူဝ်းၸႂ်မႃး ဢၼ်ၼိုင်ႈယူႇယဝ်ႉ။

မိူၼ်ၼင်ႈ ၽူႈတႅမ်ႈလိၵ်ႈၵေႃႉၼိုင်ႈ လၢတ်ႈဝႆႉဝႃႈ-- မိူဝ်ႈတိုၵ်ႉပဵၼ် ၵူၼ်းၼုမ်ႇၼႆႉ ယႃႇပေၵူဝ် လွင်ႈၶတ်းၸႂ်။ ယႃႇပေၵူဝ် ႁဵတ်းၵၢၼ်၊ ယႃႇပေၵူဝ်ဝႃႈ တႃႇတေဢဝ်ပုၼ်ႈၽွၼ်းသင် ၼႆ။

ၵူႈလွင်ႈလွင်ႈၼႆႉ သင်ဝႃႈ ၶၢဝ်းယၢမ်းမၼ်းလႆႈမႃးၸိုင် ဝူၼ်ႉတူၺ်း ၶိုၼ်းမိူဝ်ႈလႂ်ၵေႃႈ တေပဵၼ်လွင်ႈၵျေႃႇ သိူဝ်းၸႂ်မိူဝ်ႈၼၼ်ႉ ၵွပ်ႈၼၼ် တေႇ ဢဝ်ယၢမ်းလဵဝ် ၽွင်းတိုၵ်ႉလူလိၵ်ႈဢၼ်ၼႆႉၵႂႃႇ ဝူၼ်ႉတႃႇတေ ႁဵတ်းၵၢၼ် ၼမ်ၼမ်လႄႈ။ ႁဵတ်းၵၢၼ်လၢႆလၢႆဢၼ် ႁဵတ်းၵၢၼ် ၼမ်ၼမ်လႄႈ။ ႁႃ လၢႆး တၢင်းငိုၼ်းၶဝ်ႈ လၢႆၽၢႆႇလႄႈ။ ဝၼ်းၼႃႈမႃး ႁဝ်းၸင်ႇၵႂႃႇ ႁူပ်ႉထူပ်းၵၼ် တီႈ သုင်သုင်ပုၼ်ႉ။

"မိူဝ်ႈၶႃႈမီးလွင်ႈသုၵ်ႉသၵ်ႉ လုသုမ်း တူၵ်းသုမ်း ဢမ်ႇပႆႇၶိုၼ်ႈယႂ်ႇ ၼၼ်ႉ လႆႈႁူပ်ႉထူပ်း ပီႈၼွင်ႉၸိူဝ်းဢၼ် ဢမ်ႇၸွႆႈထႅမ်ၶႃႈသေဢမ်ႇၵႃး ထိပ်ႇ ႁဝ်းဢွၵ်ႇပႅတ်ႈၼၼ်ႉ ႁဝ်းၶႃႈတေၶတ်းၸႂ် ႁႂ်ႈၸိူဝ်းၶဝ် ပေႃးမႃး ယွမ်းၼွမ်း ၽၢႆႇၼႃႈၽၢႆႇတႃ ပေႃႈမႄႈၸဝ်ႈၵဝ်ႇလႄႈ။