ပၢႆးမၢၵ်ႈမီး ထုင်ႉသၼ်လွႆၶိူဝ်း

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

ၵၢၼ်ပၢႆးမၢၵ်ႈမီး ထုင်ႉသၼ်လွႆၶိူဝ်းၼႆႉ တေလႆႈၸႅၵ်ႇ ႁဵတ်းပဵၼ်လၢႆတွၼ်ႈလၢႆပၢၼ်သေ ၶႆႈၼေတႅမ်ႈၼေၵႂႃႇယူႇ ။ ပေႃးဢဝ်ပၢၼ်မၼ်းဝႃႈၵေႃႈ မၢႆ (႑) ပၢၼ်မိူဝ်ႈပၢႆႇတႄႇဝၢၼ်ႈ တႄႇမိူင်း၊ မၢႆ(႒) ပၢၼ်မိူဝ်ႈတႄႇဝၢၼ်ႈမီးပူႇၵၢင်ႉပူႇၵႄႇ ဝၢၼ်ႈၽႂ်ဝၢၼ်ႈမၼ်း၊ မၢႆ(႓) ပၢၼ်မိူဝ်ႈ ပူႇႁဵင် ပူႇမိူင်းဢုပ်ႉပိူင်ႇဝၢၼ်ႈမိူင်း၊ မၢႆ(႔) ပၢၼ်လႅၵ်ႈလၢႆႈၸၼ်ႉပူႇႁဵင် ႁွင်ႉၵွၼ်းဢိူင်ႇ မီးဝႆႉသီႇပၢၼ်ယဝ်ႉ။

ပၢၼ်မိူဝ်ႈပၢႆႇတႄႇဝၢၼ်ႈတႄႇမိူင်း ၼၼ်ႉ ထိူၼ်ႇလွႆတူၼ်ႈမႆႉတူၼ်ႈတွၵ်ႇ ဢွၵ်ႇမႃးဢမ်ႇမီးၽႂ်ယႃႉၽႂ်ၵဝ်းမၼ်းလႄႈ ပဵၼ်တီႈပႃႇတူဝ်ထိူၼ်ႇၸၢင်ႉ သိူဝ် မီ ၼူၵ်ႉ ၽၢၼ်း တိုင် ယိူင်း မူႇ ၵႆႇ ၼႆႇ ၸွၼ်ႈ ငူးတႄႇၵႂႃႇ ၶဝ်ယူႇသဝ်း မူၼ်ႈသိူဝ်း ၶိုၼ်းၶၢမ်ႈဝၼ်းၼႂ်ဝႆႉယဝ်ႉ။ ထိူၼ်ႇမႆႉ ၵေႃမႆႉႁူၵ်း မႆႉသၢင်း မႆႉပူၵ်ႇ မႆႉမွင် မႆႉၵေႃႇမတ်း မႆႉၵေႃႇယုမ် မႆႉႁၢၵ်ႉ မႆႉပဝ်း မႆႉၶမ်တႄႇၵႂႃႇၸိူဝ်းၼႆႉ ပေႃးၶဵဝ်လူင်ၵႂႃႇတင်းလွႆယဝ်ႉ။ တူၼ်ႈၵွၼ်ႇတူၼ်ႈယိူဝ်ႈ တူၼ်ႈယူး တူၼ်ႈၶႃးလႂ်ၵေႃႈ သုင်ပေႃးပူၼ်ႉႁူဝ်ၵူၼ်းယဝ်ႉ။ ၸွမ်းၼင်ႇၼိူဝ်လိၼ်ၼႂ်းလိၼ်ၵေႃႈ မီးဢၼ်လီၵိၼ် လႆဢၢၼ်လႆယင်ႇ ၼိူဝ်လိၼ်ၵေႃႈ မီးၸဵမ်မုၵ်း မွၼ် တွင်ၸိင် တွင်ၵူၺ်ႈ ၊ ၼႂ်းလိၼ်ၼႆၵေႃႈ မီးၸဵမ် ႁူဝ်မုၵ်း ႁူဝ်မၼ်း ဢႃႇလူး ထူဝ်ၵိၼ်ႁူဝ် တႄႇၵႂႃႇၸိူဝ်းၼႆႉယဝ်ႉ။

ၽွင်းမိူဝ်ႈၸိူင်ႉၼၼ် ဢၼ်ၵႆႉဢႅဝ်ႇလႄႇ ယူႇၸိူဝ်းၼၼ်ႉတႄႉ ပဵၼ်ၵူၼ်းလႄႇထိူၼ်ႇ ပူႇမူးသိူဝ်းဢွၼ်ႇ ၶဝ်လိုပ်ႈလမ်းတူဝ်ထိူၼ်ႇသေ လႄႇႁွတ်ႈၽႅဝ်မႃး ၽွင်ႈမိူဝ်ႈဢမ်ႇလႆႈ တူဝ်ထိူၼ်ႇသင်ၼၼ်ႉၵေႃႈ လႄႇ ၶုတ်းၵိၼ်ႁူဝ်မၼ်း ႁူဝ်မုၵ်း ထူဝ်ႇၵိၼ်ႁူဝ် မၢၵ်ႇ ၵေႃႇယုမ် ယွတ်ႈၽၢၵ်းၵုတ်ႇ ယွတ်ႈၵူႇတူၵ်ႈ ဢွၼ်ႇၸိူဝ်းၼႆႉ သေတူမ်ႈ ၵိၼ် သုမ်ၵိၼ်မႃးယူႇယဝ်ႉ။

ထိုင်မႃးပၢၼ်ဢင်းၵိတ်ႉၶဝ် တႄႇၶဝ်ႈမႃးမိူင်းတႆးၼၼ်ႉ မိူင်းတႆးၵေႃႈ သုၵ်ႉယုင်ႈဝႆႉ ပဵၼ်တီႈ ႁဵတ်းၼၼ်သေ ၸိူဝ်းၶႂ်ႈၶႆႉတီႈယူႇမႂ်ႇၼႆၵေႃႈ ဢွၼ်ၵၼ်ၶႆႉမႃးယူႇမႃးၶူဝ်ႇ မႃးပိုင်ႈဝႃႈၼႆသေ ဢဝ်ႁဵတ်းပဵၼ်တီႈယူႇတီႈသဝ်း ထႃႇဝရၵႂႃႇ။ မိူဝ်ႈမႃးပႃးမႃး မၢၵ်ႇၶဝ်ႈ တဝ်ႈၼမ်ႉၼႆၵေႃႈ ပဵၼ်မဵဝ်းၸင်ႈမူတ်းလႄႈ ၽွင်းမိူဝ်ႈမၢၵ်ႇ ၶဝ်ႈတဝ်ႈၼမ်ႉမူတ်းသေ ပၢႆႇမီးဢၼ်တႅၼ်းတၢင်ၼၼ်ႉ ဢွၼ်ၵၼ်ႁႃၶုတ်းၵိၼ်ႁူဝ်မၼ်း ႁူဝ်မွၼ် ႁူဝ်မုၵ်း ႁူဝ်ဢႃႇလူး ႁူဝ်တွင်ၸိင် မၢၵ်ႇၵူၺ်ႈ မၢၵ်ႇၵေႃႇယုမ် လႄႇႁႃၽၢၵ်းၵုတ်ႇ ၽၢၵ်းၼမ် ၽၢၵ်းတိတေႃႉ ယွတ်ႈၽၢၵ်းဝႃႈ ယွတ်ႈၽၢၵ်းႁိ ယွတ်ႈၽၢၵ်းပိင်ႈ ယွတ်ႈၽၢၵ်းၶူမ်းၶႅမ်း ဢွၼ်ႇၸိူဝ်းၼႆႉသေ ပဵၼ်တႃႇၶဝ်ႈၵႂႃႇဝၼ်းလႂ် ဝၼ်းၼၼ်ႉယူႇယဝ်ႉ။ ဝၢႆးမႃးၵဵဝ်ႇလူၺ်ႈ ၵၢၼ်ၵိၼ်ၵၢၼ်ယႅမ်ႉၼႆႉ ၵပ်ႉၵိၼ်းမႃးလႄႈ ၸင်ႇဢွၼ်ၵၼ်ႁဵတ်းႁၢႆႈ ႁဵတ်းသူၼ်ၽုၵ်ႇၶဝ်ႈ ၽုၵ်ႇၽၢၵ်းၵၢတ်ႇ ၽၢၵ်းၼွႆး ၽၢၵ်းပၢၵ်ႉ တႅင်တွမ်ႇ တႅင်လိူင် တႅင်ယၢဝ်း တႅင်မူၼ်း ၶဝ်ႈၵၢပ်ႇ တူၼ်ႈမွၵ်ႇ တူၼ်ႈမၢၵ်ႇ ၸွမ်းႁၢႆႈၸွမ်းသူၼ်ၸွမ်းဝၢင်း ႁိူၼ်းၽႂ်ႁိူၼ်းမၼ်းမႃးယူႇယဝ်ႉ။ ဢွၼ်ၵၼ်ၽုၵ်ႇၵူႈႁေႃၵူႈႁိူၼ်းမႃးလႄႈ တူၺ်းၵႂႃႇ တင်းလႂ် ပၢင်ႇသႂ်ၵႂႃႇပဵၼ်သူၼ်ပဵၼ်ႁၢႆႈ လူင်ဝႆႉလႄႈ ယူႇယူႇၼိုင်ႈလိူၼ်လႂ် ၼိုင်ႈပွၵ်ႈ မႃးဢုပ်ႇၵုမ်ၵၼ် ဢဝ်ၵၢင်ၸႂ်ၵူၼ်းတၢင်းၼမ်လိူၵ်ႈၶိုၼ်ႈပဵၼ်ပူႇၵၢင်ႉ ပူႇၵႄႇ သေ တႄႇမၢၵ်းမၼ်ႈ သႂ်ႇၸိုဝ်ႈဝၢၼ်ႈၵႂႃႇၸွမ်းၼင်ႇတင်းၼမ်လႆႈၸႂ် ႁဵတ်းၼၼ်ယဝ်ႉ။ ပေႃး ထိုင်ႁူင်းၶဝ်ႈဢွၼ်ႇလိူင်မႃးလႆႈမႃး ဢွၼ်တၢင်းသုတ်း ႁႂ်ႈလႆႈပဵၼ်တီႈလူႇ တီႈတၢၼ်း ၵႂႃႇၼႆသေ ၸင်ႇမႃးဢုပ်ႇၵုမ်ၵၼ် ႁဵတ်းၵၼ်ႇ ႁဵတ်းၵျွင်းသၢင်ႇၶမ်းဢွၼ်ႇဝႆႉ ၸွမ်းၼင်ႇ ႁႅင်းပွင်ပဵၼ်လႆႈ။ ၸွမ်းၼင်ႇၽိင်ႈလိူၼ်လႂ်လိူၼ်ၼၼ်ႉ ဢွၼ်ၵၼ်ဢွၵ်ႇၸႂ်ၶႂ်ႈႁဵတ်း ၸွမ်းၼင်ႇ ၾိင်ႈထုင်းယၢမ်ႈတႄႇမႃးႁဵတ်းမႃးၸဵမ်မိူဝ်ႈပၢႆႇၶႆႉမႃးယူႇတီႈမႂ်ႇၼႆႉၼ ႆ လႄႈၸင်ႇၽွမ်ႉၵၼ်ႁဵတ်းပွႆးလူႇပွႆးတၢၼ်းဢွၼ်ႇမႃးၸွမ်းၼင်ႇပွင်ပဵၼ်လႆႈၼၼ်ႉယဝ်ႉ။ ၼႆႉပဵၼ်တွၼ်ႈ မိူဝ်ႈပၢၼ်ပၢႆႇတႄႇတင်ႈဝၢၼ်ႈတင်ႈမိူင်း လႄႈ တေႃႇပေႃးပဵၼ်ဝၢၼ်ႈ လုၵ်ႈၼိုင်ႈ မႃးယူႇယဝ်ႉ။

ပၢၼ်တႄႇဝၢၼ်ႈမီး ပူႇၵၢင်ႉပူႇၵႄႇ ဝၢၼ်ႈၽႂ်ႇဝၢၼ်ႈမၼ်း[မႄးထတ်း | မႄးထတ်းငဝ်ႈငႃႇ]

ပေႃးဝႃႈယူႇႁိုင်သွင်သၢမ်ပီမႃး ႁိူၼ်းၶႃးဢွၼ်ႇၵေႃႈ ၽၢင်ႉယွၵ်းၶၢတ်ႇ ဢွၼ်ၵၼ်ႁႃပတ်ႇ ယႃႈၵွၼ်ႇ သဵၼ်ႈၶႃးဢွၼ်ႇမႃးၽႆး ႁဵတ်းပဵၼ်တႅပ်းသေ မုင်း။ လၢႆးမတ်ႉလၢႆးၽႆးၶႃး ၼၼ်ႉၵေႃႈ သွၼ်ၵၼ်ႁႂ်ႈပေႃးမေႃ ၸဵမ်ယိင်းၸဵမ်ၸၢႆး ဢဝ်ဝၼ်းၵၼ် ၶိုၼ်းတႅၼ်း ဝၼ်းၵၼ် ဢမ်ႇၵိၼ်ၸၢင်ႈၵိၼ်ငႃၵၼ် ဢမ်ႇဢဝ်ၼမ်ႉမႅတ်ႈၼမ်ႉ တွၼ်းၵၼ်သင်မႃး။

ပေႃးဝႃႈလင်ႁိူၼ်းၼမ်မႃးၵေႃႈ သူၼ်ႁၢႆႈၵေႃႈ လူဝ်ႇၶႂၢၵ်ႈၵႂၢင်ႈမႃးထႅင်ႈ ၸူးဢဝ်ၵၢၼ် ၵိၼ်ၵၢၼ်ယႅမ်ႉၼၼ်ႉပဵၼ်ယႂ်ႇသေ ၵႂႃႇတႄႇတီႈလႂ်ၵေႃႈ ႁဵတ်းႁၢႆႈႁဵတ်း သူၼ် ဝၢႆးမႃး သိုပ်ႇႁဵတ်းထႅင်ႈၼႃး သႂ်ႇသႂ်ႇမႃးၼႃးၵေႃႈ ဢမ်ႇၶႂ်ႈၵုမ်ႇတႃႇၵိၼ် ႁၢႆႈၵေႃႈ ဢမ်ႇၶႂ်ႈၵုမ်ႇ တႃႇၵိၼ်ယဝ်ႉလႄႈ ၸိူဝ်းယူႇႁိမ်းၸၢမ်ၵၼ်ၵေႃႈ ၽွတ်ႈပဵၼ်မူႇဝၢၼ်ႈ လိူၵ်ႈတင်ႈပူႇၵၢင်ႉ ပူႇၵႄႇ ႁဵတ်းၼႆသေ ဝၢၼ်ႈၵေႃႈၼမ်မႃး သႂ်ႇသႂ်ႇမႃးပူႇၵႄႇ ၼႂ်းဝၢၼ်ႈၽႂ်ႇဝၢၼ်ႈမၼ်းၵေႃႈ ႁႃလၢႆးႁဵတ်းၵိၼ်ႁႃၵိၼ်ၼႆႉ ဝူၼ်ႉယၢပ်ႇမႃး ၸင်ႇမႃးႁွင်ႉပူႇၵၢင်ႉပူႇၵႄႇ ဝၢၼ်ႈၽႂ်ဝၢၼ်ႈ မၼ်း မႃးၵုမ်ၵၼ်သေ ပၼ်ပုၼ်ႈၽွၼ်းၵၼ် ၸိူဝ်းဢၼ်ၵႂႃႇၵႆပၢႆယၢဝ်းလႆႈၼႆၵေႃႈ ၵႂႃႇႁႃမႃးၸိူဝ်ႉၽၢၼ်း တႃႇၽုၵ်ႇတႃႇသွမ်ႈ ႁဵတ်းၼႆမႃး ၵမ်ႈၽွင်ႈၵေႃႈ ၵႂႃႇႁႃလႆႈမႃးၸိူဝ်ႉငႃးလေႃႇ ငႃးလမ်၊ ၸိူဝ်ႉထူဝ်ႇလိၼ်၊ ၸိူဝ်ႉၵႃႇၽီႇ ၊ၸိူဝ်ႉတူၼ်ႈတွင်လႅၼ်းယႃႈ၊ ၸိူဝ်ႉတူၼ်ႈၼဵင်ႈၼႆသေ ဢွၼ်ၵၼ်မႃးၽုၵ်ႇၸမ်းတူၺ်း ၸိူဝ်းၽုၵ်ႇၼမ်ၵေႃႈ လႆႈၼမ် ပဵၼ်ၵူၼ်းၶႅၼ်းၸႂ်မႃး ႁဵတ်းၼႆသေ ၵဝ်ၶေႉမႂ်းမႂ်းၶေႉၵဝ် ဢဝ်ၸိူဝ်ႉႁႃမႃးၸိူဝ်းၼၼ်ႉမႃးၽေႈတိူၼ်းထုင်ႉသၼ်လွႆၶိူဝ်းၼႆႉဝႆႉ၊မီးၸဵမ် မၢၵ်ႇၵႃႇၽီႇ၊ တူၼ်ႈတွင်၊ တူၼ်ႈၼဵင်ႈ၊ တူၼ်ႈငႃးလေႃႇငႃးလမ်ငႃးလၢႆး၊ ဢဝ်မႃးၽုၵ်ႇသႂ်ႇၼႂ်းသူၼ ်ၼႂ်းဝၢင်းႁိူၼ်းပေႃးဢမ်ႇၶႂ်ႈမီးတီႈပႅတ်ႈလၢႆယဝ်ႉ။ ၼႂ်းႁၢႆႈၵေႃႈ ႁႃမႃးၽုၵ်ႇသႂ်ႇ မင်တီႈ တႄႇ တီႈႁၢႆႈ လႆႈပဵၼ်ၵႂႃႇသူၼ်ၼဵင်ႈသူၼ်တွင်ၵေႃႈမီး သႂ်ႇသႂ်ႇမႃးဢွၼ်ၵၼ် ၽုၵ်ႇဝႆႉ ၸွမ်းႁူၺ်ႈ ၸွမ်းႁွင်ႈၸွမ်းလွႆၵေႃႈၸပ်း၊ ၸွမ်းၵုင်းၸွမ်းၵွင်းၵေႃႈပဵၼ်ၸိူဝ်းပဵၼ် ၵုၼ်ႇၵႃႉ ငိုၼ်းသႃးၵေႃႈမႃးႁႃသိုဝ်ႉမႃးႁႃလႅၵ်ႈမႃးႁႃၵူး တႄႇဢဝ်ၼၼ်ႉမႃး ထုင်ႉသၼ်လွႆၶိူဝ်းၼႆႉ လႆႈၸိုဝ်ႈႁၢင်ႈလီဝႃႈ ထုင်ႉၼဵင်ႈၶူမ်ဝၢၼ် သၼ်လွႆၶိူဝ်း ၼႆယဝ်ႉ။

ပၢၼ်မိူဝ်ႈပူႇႁဵင်ပူႇမိူင်းဢုပ်ႉပိူင်ႇဝၢၼ်ႈမိူင်း[မႄးထတ်း | မႄးထတ်းငဝ်ႈငႃႇ]

ပၢၼ်ပူႇႁဵင်ပူႇမိူင်းၶဝ် ဢုပ်ႉဝၢၼ်ႈဢုပ်ႉမိူင်းမႃးၼႆႉၵေႃႈ ၵၢၼ်တိတ်းတေႃႇၵပ်းသိုပ်ႇ ၵၼ်ယိုင်ႈၶႅၼ်ႈၶႅမ်ႉမႃး လႄႈ ၸိူဝ်းပဵၼ်ၵူၼ်းၵႃႉၸဝ်ႈၵုၼ်ႇၶဝ်ၵေႃႈ မိုတ်ႈထုင်ႉသၼ ်လွႆၶိူဝ်း မႃး ၵမ်ႈၽွင်ႈမႃး ပၼ်ငိုၼ်းၶဵဝ်ဝႆႉၵေႃႈမီး။ ယွၼ်ႉပိူဝ်ႈဝႃႈ ၵၢၼ်ႁၢႆႈၵေႃႈမႃး ၵၢၼ်ၼႃးၵေႃႈၸွႆႈ ၵၢၼ်သူၼ်ၵေႃႈ ၵုမ်ႉ လႄႈ ၸိူဝ်းပဵၼ်ႁိူၼ်းသုမ်ႉဢွၼ်ႇၵေႃႈ ပဵၼ်ႁိူၼ်းလူင် ၸိူဝ်းပဵၼ်ႁိူၼ်းလူင်ၵေႃႈ သိုပ်ႇႁဵတ်းႁိူၼ်းပႅၼ်ႈမုင်းႁဵၵ်ႇမုင်းလဵၵ်းမႃး ၵၼ်ႇၵျွင်းၽွင်သႅင်ဝၢၼ်ၽႂ်ဝၢၼ်ႈမၼ်းၵေႃႈ ဢွၼ်ၵၼ်ၵေႃႇသၢင်ႈႁႂ်ႈၶိုတ်း ၸွမ်းၵၢပ်ႈ ၸွမ်းပၢၼ်မႃးၽႂ်မၼ်း။ ၵူၼ်းဝၢၼ်ႈၼိုင်ႈလႄႈ ဝၢၼ်ႈၼိုင်ႈၵေႃႈ ၸၢမ်ၸႂ်ၵၼ်မႃး ၸိူဝ်းႁဵတ်းၼႃးၵေႃႈ ၵမ်းၵမ်း ထူပ်း ၺႃးၸဝ်ႈၶူၵ်ႉၸၢၵ်ႈတမ်ၶဝ်ႈ သေ ပဵၼ်မိၵ်ႉသူၺ်ႇလီၵၼ်၊ ၸိူဝ်းႁဵတ်း သူၼ်ၵေႃႈ ၵမ်းၵမ်းလေႃႈၵႂႃႇႁႃ ၸဝ်ႈငိုၼ်းသႃးၶဝ်လႄႈ ဢဝ်ပဵၼ်မိၵ်ႉသူၺ်ႇလီၵၼ်ၵႂႃႇ ၸိူဝ်းႁဵတ်း ႁၢႆႈၵေႃႈ တေႃႉဢဝ်ၶူဝ်းႁၢႆႈၶဝ်ႈၵၢတ်ႇၶဝ်ႈသႃး ႁဵတ်းၼၼ်သေ လႆႈမႃးၵူႈၽၢႆႇၵူႈ တၢင်းလႄႈ ပၢၼ်ပူႇႁဵင်ပူႇမိူင်းၶဝ် ဢုပ်ႉဝၢၼ်ႈ ဢုပ်ႉမိူင်းၼႆႉၵေႃႈ လႆႈဝႃႈၵၢၼ်ပၢႆးမၢၵ်း မီးထုင်ႉသၼ်လွႆၶိူဝ်းၶိုၼ်ႈ ယႂ်ႇမႂ်ႇသုင်မႃးဝႆႉယူႇ။

ပၢၼ်ၵွၼ်းဢိူင်ႇ[မႄးထတ်း | မႄးထတ်းငဝ်ႈငႃႇ]

လိုၼ်းလၢႆးဝၢႆးမႃး ပၢၼ်ပူႇႁဵင် ပူႇမိူင်းၼၼ်ႉသုတ်းသဵင်ႈၵႂႃႇယဝ်ႉ ၸင်ႇထိုင်မႃးပၢၼ်ၵွၼ်း ဢိူင်ႇၼႆယဝ်ႉ။ ထိုင်မႃးပၢၼ်ၵွၼ်းဢိူင်ႇၼႆၵေႃႈ ၵၢၼ်ပၢႆးမၢၵ်ႈမီး ဢွၵ်ႇၽၢင်ႁၢင်ႈလႅၵ်ႈ လၢႆႈမႃး ၵၢၼ်ၼဵင်ႈၵၢၼ်တွင်ၼႆၵေႃႈ ၵႃႈၶၢၼ်လူင်းမႃး ၵုၼ်ႇၵႃႉတင်းၶၢႆ ဢၼ်ၶဝ်ႈ ဝၢၼ်ႈမႃးၵေႃႈ ၵႃႈၶၼ်သုင်မႃး ၵၢၼ်သဵၼ်ႈတႃႈသၢႆတၢင်းၵေႃႈ လူတ်ႉၵႃး လူတ်ႉၶိူင်ႈ ထိုင်မႃးလႆႈ ၵၢၼ်ႁဵၼ်းၵၢၼ်သွၼ်ၵေႃႈ ၶိုပ်ႈၼႃႈမႃးလႄႈ ၵႃႈၸရိၵ်ႈၸၵ လုၵ်ႈလၢင်း ၸိူဝ်းၵႂႃႇၶိုၼ်ႈႁဵၼ်းလႂ်ၵေႃႈသုင်မႃး ၸိူဝ်းလုၵ်ႈလင်းဢၼ်ပွႆႇၶဝ်ႈဝဵင်းၸိူဝ်းၼၼ်ႉၵေႃႈလႅတ်းမႃး ႁဵတ်းၼၼ်သေ ၸိူဝ်းပဵၼ် ၽူႈယႂ်ႇၵူၼ်းလူင်ဝၢၼ်ႈ ဢိူင်ႇ ၸိူဝ်းပဵၼ်ၸဝ်ႈသိုၵ်း ၸဝ်ႈသိုၵ်းလူင်ၶဝ် ဢၼ်ႁူၵႂၢင်ႈ တႃၵႂၢင်ႈၸိူဝ်းၼၼ်ႉလႂ် မႃးပၼ်တင်းၶႆႈၸႂ်တင်းႁၼ်ထိုင်ၸွမ်းၵၢၼ် ၼဵင်ႈၵၢၼ် တွင်ၸိူဝ်းၼႆႉသေ မႃးဢွၼ်ႁဵတ်းလၢႆးၸၢၵ်ႈၼူတ်ႈၼဵင်ႈလႂ်ၸိူဝ်ႈၼႆႉယဝ်ႉ။ ဝၢႆးသေၼၼ်ႉ ၶၢၼ် ၼဵင်ႈၵေႃႈ ၶိုၼ်းၶိုၼ်ႈမႃး ၵုမ်ႇတႃႇၵိၼ်တႃႇယႅမ်ႉသေ ဢမ်ႇၵႃးပႃးလႆႈ သူင်ႇလုၵ်ႈၽႂ်လင်းမၼ်း သူင်ႇၵႂႃႇယူႇၼႂ်းဝဵင်းဢွၼ်ႇဝဵင်းလူင် ၸဵမ်သီႇပေႃႉ မၼ်းတလေး ပႃႇၵိူဝ် တႃႈၵုင်ႈလႂ်ၸိူဝ်းၼႆႉလႂ်ယဝ်ႉ။ လိုၼ်းလၢႆးဝၢႆးမႃး ၵႃႈဢၼ်လႂ်ၵေႃႈၶိုၼ်ႈၵူႈ ၸိူဝ်ႉၵူႈလွင်ႈလႄႈ ၵၢၼ်ၼဵင်ႈၵၢၼ်တွင် ၵၢၼ်ႁၢႆႈၵၢၼ်ၼႃးၵူၺ်းၵေႃႈ ဢမ်ႇၶႂ်ႈၵုမ် ႇၵၼ်လႆႈယဝ်ႉ။ ပေႃးလႆႈငိၼ်းဝႃႈ မိူင်းၶေႇသိုဝ်ႉမွၵ်ႇၶမ်းလမ် မွၵ်ႇမႆႉဢၼ်ၼႆႉ ဢၼ်ၼၼ်ႉၼႆၵေႃႈ ဢွၼ်ၵၼ်ၵႂႃႇသွၵ်ႈၵႂႃႇတဝ်ႈၼႂ်းထိူၼ်ႇပေႃးဢမ်ႇၵိုတ်းယဝ်ႉ။ ထိုင် မႃးပၢၼ်ပိူၼ်ႈလေႉ ၵၼ်ၽုၵ်ႇဢၼ်ၼၼ်ႉဢၼ်ၼႆႉၼႆၵေႃႈ ထုင်ႉသၼ်လွႆၶိူဝ်း ဢမ်ႇလႆႈ တူၵ်းလိုၼ်းတိုၼ်းတၼ်းမိူဝ်ႈပိူၼ်းမႃးယူႇၵူႈၶၢဝ်းယၢမ်းယဝ်ႉ။