ပႃးၵႅမ်ႉ

ပႃးၵႅမ်ႉ(Barcamp)

ပႃးၵႅမ်ႉဢၼ်ဝႃႈၼႆႉ ဢမ်ႇၸႅၵ်ႇဢွၵ်ႇ လၢႆးႁဵတ်းပၢင်တၢၼ်ႈၶႆႈ ၸိူင်ႉၼင်ႇယၢမ်ႇႁဵတ်းမႃး ၵူႈပွၵ်ႈၼၼ်ႉသေ မၼ်းပဵၼ်ပွႆး "လႅၵ်ႈလၢႆႈတၢင်းႁူႉတၢင်းမေႃ" ဢၼ်ၵူၼ်းၵူႈၵေႃႉ ၸၢင်ႈၶဝ်ႈႁူမ်ႈပႃးသေ ႁဵတ်းပဵၼ်ပွႆးဢုပ်ႇဢူဝ်းလႅၵ်ႈလၢႆႈတၢင်းႁူႉ ၵၼ်ၼၼ်ႉယဝ်ႉ။ တီႈပႃးၵႅမ်ႉၼႆႉ ဢိၵ်ႇလူၺ်ႈၵူၼ်းၵေႃႉလႂ်ၵေႃႉၼၼ်ႉ မၼ်းႁူႉဝႆႉ မၼ်းမီးဝႆႉ တၢင်းႁူႉတၢင်းမေႃသင်ၵေႃႈ ၸၢင်ႈဢဝ်ဢွၵ်ႇၼႄ၊ ၶႆႈၼႄ၊ ဢုပ်ႇဢူဝ်းတေႃႇၵၼ်လႆႈယဝ်ႉ။ ပႃးၵႅမ်ႉၼႆႉ မၼ်းမီးလွင်ႈပွင်ႇလႅင်း (Open) သေ ၽူႈလႂ်ၽႂ်သေဢမ်ႇဝႃႈ ၸၢင်ႈၶိုၼ်ႈႁွတ်ႈလႆႈ၊ ၽူႈလႂ်ၽႂ်သေဢမ်ႇဝႃႈ ၸၢင်ႈၶဝ်ႈသေၵေႃႈ ပိုၼ်ၽႄႈ လႅၵ်ႈလၢႆႈတၢင်းႁူႉၵၼ်လႆႈ။ ၸဝ်ႈၵဝ်ႇၸၢင်ႈဢဝ်ႁူဝ်ၶေႃႈ ဢၼ်ၸဝ်ႈၵဝ်ႇ ၶႂ်ႈလၢတ်ႈၼၼ်ႉ ၵႂႃႇၸပ်းပႃႉဝႆႉတီႈ ပူတ်ႉ လွၵ်းမၢႆၶၢဝ်းယၢမ်း Topic board လႆႈယူႇ။ ပႃးၵႅမ်ႉၼႆႉ မၼ်းဢမ်ႇမီး ၽူႈဢွၼ်ႁူဝ် (Organizer) ၼႆတေႉတေႉသေ မၼ်းၵွၺ်းမီး ၸိူဝ်းပဵၼ် ၽူႈသူင်ၸႂ် ၶႂ်ႈႁဵတ်းပႃးၵႅမ်ႉ (Barcamper) တီႈဝဵင်းဢၼ်ၶႂ်ႈႁဵတ်းၼၼ်ႉ လႄႈ တင်း ၽူႈၶိုၼ်ႈႁွတ်ႈပႃးၵႅမ်ႉၶဝ် ႁူမ်ႈၵၼ်သေၵေႃႈ ႁဵတ်းပဵၼ်ပၢင်ပွႆးၵူၺ်း။ ယွၼ်ႉပိူဝ်ႈႁဵတ်းပႃးၵႅမ်ႉသေလႄႈ လႆႈမီးတင်းၸမ်ၸႂ်ၵၼ်တင်း ၽူႈၸိူဝ်းမီးလွင်ႈသူင်ၸႂ် မိူၼ်ၵၼ် ၸိူဝ်းယူႇတီႈ ၵူႈဝဵင်းဝဵင်းၼၼ်ႉၼႆယဝ်ႉ။

ပႃးၵႅမ်ႉဢၼ်ဝႃႈၼႆႉ မၼ်းဢမ်ႇမိူၼ်ၼင်ႇ ပၢင်တၢၼ်ႈၶႆႈ၊ ပၢင်ၵုမ်၊ ပၢင်ႁူပ်ႉထူပ်း ဢၼ်မီးႁူဝ်ၶေႃႈ၊ လွင်ႈတၢင်းတႃႇဢုပ်ႇၵၼ်လူင်ႈၼႃႈၸိူင်ႉၼၼ်။ ၸိူဝ်းပဵၼ်ၽူႈၶိုၼ်ႈႁွတ်ႈမႃးၸိူဝ်းၼၼ်ႉ ၽႂ်ၶႂ်ႈလၢတ်ႈလွင်ႈတၢင်းသင်ၼႆၵေႃႈ ႁႂ်ႈလၢတ်ႈလႆႈ ၶၢဝ်းလဵဝ်၊ ယၢမ်းလဵဝ်​ၵၼ်ၼႆလႄႈ ပဵၼ်ပွႆးဢၼ်ႁၢင်ႈႁႅင်းဝႆႉပၼ်ဢွင်ႈတီႈဝႆႉၼမ်ၼမ်ၼၼ်ႉယဝ်ႉ။

ပႃးၵႅမ်ႉဢၼ်ဝႃႈၼႆႉ ႁူမ်ႈဝႃႈမၼ်းပဵၼ်ပွႆး ဢၼ်ၵပ်းၵၢႆႇလူၺ်ႈ ပၢႆးပႆႇၺႃႇတၢင်းႁူႉတၢင်းမေႃသေတႃႉ လွင်ႈႁဵတ်းလွင်ႈသၢင်ႈပၢင်ပွႆးတႄႉၵေႃႈ မၼ်းပႅၵ်ႇပိူင်ႈ ၸႅၵ်ႇဢွၵ်ႇၵႂႃႇထႅင်ႈ လၢႆးၼိုင်ႈ ႁင်းမၼ်းယူႇ။ မၼ်းပဵၼ်ပွႆး ၵူၼ်းသူင်ၸႂ်မိူၼ်ၵၼ်၊ ၵူၼ်းယိူင်းဢၢၼ်းမိူၼ်ၵၼ် ႁူမ်ႈၵၼ်သေၵေႃႈ ၸႅၵ်ႇၽႄလႅၵ်ႈလၢႆႈတၢင်းႁူႉၵၼ်ယဝ်ႉ။ ပႃးၵႅမ်ႉဢၼ်ဝႃႈၼႆႉ မၼ်းဢမ်ႇၸႂ်ႈ ပၢင်ႈတၢၼ်ႈၶႆႈ၊ မၼ်းဢမ်ႇၸႂ်ႈ ပၢင်ဢဝ်ႁၢင်ႈတူင်ႉၼိုင်ၼႄ၊ မၼ်းၵေႃႈဢမ်ႇၸႂ်ႈ ပၢင်ဢုပ်ႇဢူဝ်းလူင်လူင်လၢင်လၢင်ၼင်ႇၵဝ်ႇ။ ယွၼ်ႉမၼ်းဢမ်ႇၸႂ်ႈ Conference ၼႆလႄႈ ပိူၼ်ႈယင်းႁွင်ႉဝႃႈ Un-conference ၼႆၵွၼ်ႇဢေႃႈ။ တီႈပႃးၵႅမ်ႉၼႆႉ ၵေႃႉၵတ်ႉၶႅၼ်ႇလူင်ႉလႅၼ်ႇ ႁဵတ်းသြႃႇ ၽူႈဢမ်ႇပႆႇလူင်ႉလႅၼ်ႇသေ ႁဵတ်းၼင်ႇ သြႃႇလႄႈတပေး သွၼ်လိၵ်ႈၵၼ်ၵေႃႈ ဢမ်ႇၸႂ်ႈ။ ယွၼ်ႉပိူဝ်ႈဝႃႈ ပႃးၵႅမ်ႉၼႆႉ မၼ်းယုမ်ႇယမ်ဝႆႉဝႃႈ ၵူၼ်းၼိုင်ႈၵေႃႉ မၼ်းမီးၼမ်ႉၵတ်ႉၼိုင်ႈမဵဝ်း၊ မၼ်းမီးလွင်ႈတၢင်း ဢၼ်တေၸၢင်ႈ ၸႅၵ်ႇၽႄပၼ် ပိုၼ်ႈယူႇသေဢၼ်ဢၼ်ၼႆယဝ်ႉ။ မၼ်းပဵၼ် ပၢင်ပွႆးတူင်ႉၼိုင် ဢၼ်တေဢဝ် လွၵ်းလၢႆးပိုၼ်ၽႄႈတၢင်းႁူႉၼႆႉ ႁႂ်ႈပေႃးပိၼ်ႈၽိူၼ်ၵႂႃႇၼႆယဝ်ႉ။

တီႈပႃးၵႅမ်ႉၼႆႉ ဢမ်ႇမီးၶွပ်ႇ၊ ဢမ်ႇမီးလႅၼ်၊ ဢမ်ႇမီးၶပ်ႉမၢႆသင်သေ ၸၢင်ႈဢုပ်ႇ​ဢူဝ်းလႅၵ်ႈလၢႆႈတၢင်းႁူႉၵၼ်လႆႈ လွတ်ႈလွတ်ႈလႅဝ်းလႅဝ်းယဝ်ႉ။ ႁဝ်းၵူၺ်းလူဝ်ႇမေႃၸွမ်းတင်းလင် ဢၼ်ပၢင်ပွႆးတေၸုင်ႁဝ်းၵႂႃႇၼၼ်ႉၵူၺ်း။ ဢၼ်ပဵၼ်သၢႆၸႂ် လွၼ်ႉၵႅၼ် ပႃးၵႅမ်ႉၼႆႉတႄႉ ပဵၼ် လွင်ႈတူဝ်ၸဝ်ႈၵဝ်ႇ ၶဝ်ႈႁူမ်ႈတူင်ႉၼိုင် “Participating” ၼႆယဝ်ႉ။ မၼ်းတေဢမ်ႇပႃး ၵူၼ်းဢၼ်တေပႂ်ႉယူႇႁိမ်းၶၢင်ႈသေ ၼင်ႈတူၺ်းၼင်ႇထွမ်ႇလၢႆလၢႆၼၼ်ႉၵူၺ်း။ ၵူၼ်းဢၼ်ၽႅဝ်မႃးတီႈ ပႃးၵႅမ်ႉ ၽူႈလႂ်ၽႂ်သေဢမ်ႇဝႃႈ ႁဝ်းပၼ်ဢၼ်ႁဝ်းႁူႉဝႆႉသေ ႁဝ်းဢဝ် ဢၼ်ႁဝ်းပႆႇႁူႉၼၼ်ႉၼႆယဝ်ႉ။

မိူင်းဢၼ်တႄႇႁဵတ်း ပႃးၵႅမ်ႉ

မိူဝ်ႈပႃးၵႅမ်ႉဢမ်ႇပႆႇဢွၵ်ႇပဵၼ်မႃးၼၼ်ႉ တႄႇဢဝ် Foobar, လုၵ်ႉၼၼ်ႉပဵၼ် Foo Camp ႁဵတ်းၼႆသေ တေႃႇပေႃးလႅၵ်ႈလၢႆႈၸိုဝ်ႈမႃးပဵၼ် ဢၼ်ဝႃႈ BarCamp သေ ၸွမ်းၼင်ႇၸိုဝ်ႈ ပႃးၵႅမ်ႉၼႆႉသေလႄႈ ဢၼ်ပဵၼ် ပႃးၵႅမ်ႉပွၵ်ႈၵမ်းဢွၼ်တၢင်းသုတ်း တီႈၼႂ်းလူမ်ႈၽႃႉၼႆႉ ႁဵတ်းတီႈ ဝဵင်းပလူဝ်ႇဢတူဝ်ႇ၊ တီႈၸေႈမိူင်း ၵႄႇလီႇၽူဝ်းၼီးယႃး၊ မိူဝ်ႈပီ 2015 လိူၼ်ဢေႃးၵၢသ်ႉ 19 တေႃႇ 21 ဝၼ်းသေ ၵူၼ်းၶိုၼ်ႈႁွတ်ႈမၼ်း မီးၵႂႃႇ 200 ပၢႆၼႆယဝ်ႉ။ ဝၢႆးသေၼၼ်ႉ တီႈ ဢမေႇရိၵၢၼ်ႇႁွင်ႇ၊ ဢမေႇရိၵၸၢၼ်း၊ ဢႃႇၽရိၵ၊ ယူးရူပ်ႉတွၼ်ႈပွတ်းဢွၵ်ႇၼႂ်းၵၢင်၊ ဢေႃးသတြ​ေးလျ လႄႈ ၸိူဝ်းပဵၼ်ဝဵင်းလူင် တီႈၵုၼ်ဢေးသျႃးၼႆႉၵေႃႈ တႄႇႁဵတ်းပၢင်ပွႆး ပႃးၵႅမ်ႉမႃးယူႇယဝ်ႉ။ မိူဝ်ႈပီ 2006 လိူၼ်ဢေႃးၵၢသ်ႉ 25 တေႃႇ 27 ၼၼ်ႉ မၵ်းမၼ်ႈပဵၼ် BarCamp Earth ၼႆသေ ၸိူဝ်းပဵၼ် ဝဵင်းလူင် တီႈၼႂ်းၵမ်ႇၽႃႇၼႆႉ ဢွၼ်ၵၼ် ႁဵတ်းမိူဝ်ႈလဵဝ်ၵၼ်မူတ်းမူတ်းယဝ်ႉ။ ပႃးၵႅမ်ႉပွၵ်ႈဢွၼ်တၢင်းသုတ်း ၼႆႉ ႁဵတ်းမိူဝ် ပီ 2005 လိူၼ်ဢေႃးၵၢသ်ႉ 19 တေႃႇ 21 သေ ဝၢႆးလႆႈမႃးသွင်ပီတဵမ် ၽိူဝ်ႇ ပီ 2007 လိူၼ်ဢေႃးၵၢသ်ႉ 18 တေႃႇ 19 ၼၼ်ႉ ၶိုၼ်းမၵ်းမၼ်ႈဝႃႈပဵၼ် BarCampe Block ၼႆသေ ၶိုၼ်းႁဵတ်းတီႈ ဝဵင်းပလူဝ်ႇဢတူဝ်ႇ၊ ၸေႈမိူင်းၵႄႇလီႇၽူဝ်းၼီးယႃးၼၼ်ႉၵူၺ်းၼင်ႇၵဝ်ႇ။ ၽူႈၶိုၼ်ႈႁွတ်ႈမၼ်းမီးမႃး 800 ပၢႆႇၼႆယဝ်ႉ။

လွင်ႈယိူင်းဢၢၼ်း ပႃးၵႅမ်ႉ

ပႃးၵႅမ်ႉတၢင်းမူတ်းမူတ်းၼႆႉ ဢမ်ႇၸႂ်ႈဝႃႈ ၽွတ်ႈႁဵၼ်းပဵၼ်ၸုမ်းလဵဝ် ဢၼ်လဵဝ်၊ မိူင်းၼိုင်ႈလႄႈ မိူင်းၼိုင်ႈ ၸၢင်ႈႁဵတ်းလွတ်ႈလွတ်ႈလႅဝ်းလႅဝ်း ႁင်းၽႂ်ႇႁင်းမၼ်းယဝ်ႉ။ ႁူမ်ႈဝႃႈ ႁဵတ်းလႆႈႁင်းၽႂ်ႇႁင်းမၼ်းၸိူင်ႉၼၼ်သေတႃႉၵေႃႈ လွင်ႈယိူင်းဢၢၼ်း ပႃးၵႅမ်ႉဢၼ်လႂ်သေဢမ်ႇဝႃႈ ၵေႃႈမၼ်းမိူၼ်ၵၼ်ယဝ်ႉ။ တႄႇဢဝ် ၼိုင်ႈၵေႃႉတေႃႇ ပေႃးပဵၼ် ၸုမ်းတေႃႇၸုမ်း၊ ၸဝ်ႈၵဝ်ႇၶဝ် လူင်ႉလႅၼ်ႇ၊ ႁူႉမေႃပၢႆးပႆႇၺႃႇလႂ်ၵေႃႈ ဢိၵ်ႇလူၺ်ႈတွၼ်ႈၵၼ် တၢင်းႁူႉတင်းမေႃ လွင်ႈၸိူဝ်းၼၼ်ႉ ၼင်ႇႁိုဝ်မၼ်းပေႃးတေဢမ်ႇလႆႈ ယၢၼ်ၵႆသေ၊ ႁႂ်ႈပေႃးၸၢင်ႈ ႁူမ်ႈႁွမ်း တူင်ႉတိုၼ်ႇၸွမ်းၵၼ်ၼႆယဝ်ႉ။ တႄႇဢဝ် တၢင်းႁူႉၸိူဝ်းၼႆႉသေ ႁႂ်ႈပေႃးၶဝ်ႈၸွႆႈ ၵမ်ႉထႅမ်ပၼ်လႆႈ တူင်ႇဝိူင်းၵူၼ်း တဵမ်တဵမ်ထူၼ်ႈထူၼ်ႈၼႆယဝ်ႉ။ တႄႇဢဝ် လွင်ႈၵမ်ႉထႅမ် တူင်ႇဝိူင်းၵူၼ်းၸိူဝ်းၼၼ်ႉသေ ႁႂ်ႈပေႃးႁၼ်သဵၼ်တၢင်း၊ ဢွၵ်ႇပဵၼ်တိုဝ်ႉတၢင်း တႃႇၼႃႈၵၢၼ်ၼႆ ယိူင်းဢၢၼ်းမီးဝႆႉၸိူင်ႉၼင်ႇၼႆယဝ်ႉ။ လွင်ႈတၢင်း ဢၼ်ႁဵတ်းႁႂ်ႈ ပႃးၵႅမ်ႉ လႆႈထၢင်ႈႁၢင်ႈၼႆႉတႄႉ ပႃးၵႅမ်ႉၼႆႉ ဢၼ်းဢမ်ႇမီးၵူၼ်းၵေႃႉလႂ်၊ ၸုမ်းလႂ် ယိပ်းၵမ်ႁူမ်ႇငမ်းဝႆႉသေ၊ မၼ်းပဵၼ် ၸုမ်းတူင်ႇဝိူင်ႇၵူၼ်း ဢၼ်လွတ်ႈလႅဝ်းထၢင်ႇႁၢင်ႈလႄႈ မၼ်းပဵၼ် ႁႅင်းဢီး တႃႇႁႂ်ႈ ပၢႆးပႆႇၺႃႇ တၢင်းႁူႉတၢင်းမေႃ သမ်ႉပေႃးတေဢွၵ်ႇမႃးဢမ်ႇထၢတ်ႇ ဢမ်ႇဝၢႆးၼႆၶႃႈယဝ်ႉ။

လၢႆးၶပ်းၶိုင်

လွင်ႈၶပ်ႉၶိုင်ဝႆႉ တီႈပၢင်ပွႆးပႃးၵႅမ်ႉၼႆႉ ပဵၼ်ၸိူင်ႉႁိုဝ် ပေႃးဝႃႈၼႆ ၸိူဝ်းပဵၼ် ၽူႈၶပ်ႉၶိုင် ပႃးၵႅမ်ႉၼႆႉ ၶဝ်တေၶပ်ႉၶိုင်ဝႆႉပၼ် ဢွင်ႈတီႈ တႃႇတေဢုပ်ႇဢူဝ်းၵၼ်ဝႆႉ လၢႆဢွင်ႈ။ ယဝ်ႉၵေႃႈ တေမီး ဢွင်ႈတီႈ ႁပ်ႉၶႅၵ်ႇ၊ ဢွင်ႈတီႈတၢင်ႇသ​ဵၼ်ႈမၢႆ၊ တီႈဢွင်ႈတီႈတၢင်ႇသဵၼ်ႈမၢႆၼၼ်ႉ မၼ်းတေမီးဝႆႉ သွင်ၸုမ်း၊ ၸုမ်းၼိုင်ႈၼႆႉ မၼ်းတေၵဵပ်းဢဝ်သဵၼ်ႈမၢႆ ၽူႈၶိုၼ်ႈႁွတ်ႈမႃး ပႃးၵႅမ်ႉသေ မၼ်းတေတၢင်ႇမၢင်ၽၢင် Register သေၵေႃႈ သင်ဝႃႈမီးပႃး လွင်ႈတွၼ်ႈပၼ်ၶူဝ်းတွၼ်ႈၼႆၵေႃႈ တေတွၼ်ႈယိုၼ်ႈပၼ် ၽူႈၶိုၼ်ႈႁွတ်ႈပၢင်ပွႆးမႃး။ ထႅင်ႈၸုမ်းၼိုင်ႈၸမ်ႉ ပဵၼ်ၸုမ်း ႁပ်ႉတၢင်ႇသဵၼ်ႈမၢႆ ၽူႈတေပဵၼ်ၵေႃႉဢွၼ်ႁူဝ်လၢတ်ႈ Speaker ၼႆယဝ်ႉ။ ပေႃးၼၼ် ၽူႈဢၼ်တေၶဝ်ႈ ဢုပ်ႇဢူဝ်းပိုၼ်ၽႄႈတၢင်းႁူႉၼၼ်ႉ ၵႂႃႇပၼ်သဵၼ်ႈမၢႆတီႈ ၸုမ်းၼၼ်ႉသေ ၶဝ် လွင်ႈဝႃႈၸဝ်ႈၵဝ်ႇ တေလၢတ်ႈလွင်ႈသင်၊ တေဢဝ်ၶၢဝ်းလႂ်၊ တေဢဝ်ဢွင်ႈလႂ် ၼႆယဝ်ႉ။ ပေႃးၼၼ် ၸုမ်းပွင်ၵၢၼ်ၶဝ် တေတၢင်ႇမၢႆႇၽၢင်ဝႆႉပၼ်သေ ၶဝ်တေ ဢဝ်ပုၼ်ႈၽွၼ်း တႃႇဢဝ်ႁူဝ်ၶေႃႈ ၸဝ်ႈၵဝ်ႇၼၼ်ႉၵႂႃႇ ၸပ်းတိတ်းသႂ်ႇတီႈၽၢင်ႈႁူဝ်ၶေႃႈ Topic board ၼၼ်ႉယူႇ။ ယွၼ်ႉၼၼ်လႄႈ တီႈၽၢင်ႁူဝ်ၶေႃႈ Topic Board ၼၼ်ႉ ၸဝ်ႈၵဝ်ႇတေလႆႈႁၼ် ႁူဝ်ၶေႃႈၵူႈမဵဝ်းမဵဝ်း၊ တီႈဢွင်ႈတီႈၵူႈဢၼ်ဢၼ်၊ ၶၢဝ်းယၢမ်းၵူႈၶၢဝ်းၶၢဝ်းယဝ်ႉ။ ၸဝ်ႈၵဝ်ႇ ၶႂ်ႈလႆႈ ၶႂ်ႈထွမ် ႁူဝ်ၶေႃႈဢၼ်လႂ်ၵေႃႈ လူဝ်ႇတူၺ်းၶၢဝ်းယၢမ်းမၼ်း ဢွင်ႈမၼ်းသေၵေႃႈ ၶဝ်ႈထွမ်ႇ ၶဝ်ႈဢုပ်ႇၸွမ်းၵႂႃႇလႆႈယူႇ။ ၼင်ႇႁိုဝ် ႁူဝ်ၶေႃႈ မၼ်းပေႃးတေဢွၵ်ႇမႃးၼမ်ၼမ်၊ ႁႂ်ႈၽူႈၶိုၼ်ႈႁွတ်ႈပႃးၵႅမ်ႉ ပေႃးတေမီးသုၼ်ႇလိူၵ်ႈ ထွမ်ႇဢဝ်ၼၼ်ႉ ၶၢဝ်းယၢမ်း တႃႇဢုပ်ႇဢူဝ်း လႅၵ်ႈလၢႆႈတၢင်းႁူႉၵၼ်ၼႆႉ လႆႈမၵ်းမၼ်ႈၶၢဝ်းယၢမ်းဝႆႉ။

ၸုမ်းဢၼ်ၵမ်ႉထႅမ်ပၼ် ၼင်ႇႁိုဝ်ပေႃးတေပဵၼ်ပႃးၵႅမ်ႉ

တွၼ်ႈတႃႇတေပဵၼ် ပႃးၵႅမ်ႉမႃးၼႆႉ မၼ်းတေမီး ၸုမ်းႁႃႈၸုမ်းသေ လႆႈၵဵပ်းလိူၵ်ႈဢဝ်ၼႂ်း ၽူႈၶိုၼ်ႈႁွတ်ႈ ပႃးၵႅမ်ႉသေၵေႃႈ ႁဵတ်းပဵၼ်ၸုမ်းဝႆႉ။ ၸုမ်းၸိူဝ်းၼႆႉၵေႃႈ လႆႈႁၢပ်ႇဢဝ်ပုၼ်ႈၽွၼ်း တႃႇပေႃးတေပဵၼ် ပႃးၵႅမ်ႉမႃးယဝ်ႉ။ ၸုမ်းၸိူဝ်းၼၼ်ႉတႄႉ ပဵၼ် -

1. Organizer Tem
2. Co-ordinator Team
3. Admin Team
4. Marketing Team
5. Technical Support Team ၼႆၶႃႈယဝ်ႉ။ ၸုမ်းႁႃႈၸုမ်းၼႆႉ လႆႈႁပ်ႉဢဝ်ပုၼ်ႈၽွၼ်းတႃႇတေ ႁၢင်ႈႁႅၼ်းလူင်ႈၼႃႈပႃးၵႅမ်ႉၼႆသေတႃႉၵေႃႈ ၸုမ်းႁႃႈၸုမ်းၼႆႉ မၼ်းဢမ်ႇမီးသုၼ်ႇ ႁူမ်ႇငမ်းယိပ်းၵမ် ပၢင်ပွႆးပႃးၵႅမ်ႉၼင်ႇၵဝ်ႇ။ ယဝ်ႉၵေႃႈ မၼ်းဢမ်ႇမီးသုၼ်ႇ ဢဝ်ၸႂ်ၸဝ်ႈၵဝ်ႇၸတ်းၵၢၼ်ၵႂႃႇ။

ၼမ်ႉတွၼ်းၽွၼ်းလီ

ယွၼ်ႉပိူဝ်ႈဝႃႈ ၽူႈၶပ်းၶိုင်ပၢင်ပွႆးၶဝ် တေဢမ်ႇၶဝ်ႈၵဝ်းၸွမ်း၊ သုၵ်ႉသွမ်းလႄႈ ႁဝ်းၸၢင်ႈ ဢုပ်ႇဢူဝ်းၵၼ်လႆႈ လွတ်ႈလွတ်ႈလႅဝ်းလႅဝ်းယူႇယဝ်ႉ။ တီႈပၢင်ပွႆး ပႃးၵႅမ်ႉၼႆ့ မၼ်းပဵၼ်ၶူဝ် ဢၼ်ဢဝ် လွင်ႈတူင်ႇဝိူင်းၵူၼ်း၊ လွင်ႈပၢႆးမၢၵ်ႇမီး၊ လွင်ႈပၢႆးႁူႉမေႃၶဝ် ၵၢႆၸူးၵၼ်လႄႈ မၢင်ၸိူဝ်းမီး ပၢႆးႁူႉမေႃႇ ၸမ်ႉၶႂ်ႈႁူႉ ၵၢၼ်ပၢႆးမၢၵ်ႈမီး၊ မၢင်ၸိူဝ်းၸမ်ႉ ၵၢၼ်ပၢႆးမၢၵ်ႈမီး တဵမ်ထူၼ်ႈ သမ်ႉၶႂ်ႈႁူႉ လွင်ႈၵၢၼ်ပၢႆးႁူႉမေႃၼႆလႄႈ ၶဝ်ၼင်ႇၵၼ် ၸၢင်ႈႁူပ်ႉထူပ်းၵၼ်သေ ၸၢင်ႈမီးၽွၼ်းလီ တၢင်းသွင်ပႃႈသွင်ၽၢႆႇယူႇယဝ်ႉ။ ပေႃးၼၼ် တေမီးၶေႃႈထၢမ်မႃးဝႃႈ လွင်ႈယိူင်းဢၢၼ်း ပႃးၵႅမ်ႉၼႆႉ မၼ်းမီးသင်၊ မၼ်းပဵၼ်သင်ၼႆယူႇယဝ်ႉ။ ပေႃးလုၵ်ႉတီႈ ၽူႈၶပ်းပႃးၵႅမ်ႉၶဝ်ဝႃႈ လိူဝ်သေ ႁႂ်ႈၵူႈၵေႃႉၵူႈၽၢႆႇ မီးသုၼ်ႇလီ၊ တိုဝ်ႉတၢင်းလီ ႁူမ်ႈမိူဝ်ႈလဵဝ်ၵၼ် မၼ်းၵေႃႈ ဢမ်ႇမီးလွင်ႈယိူင်းဢၢၼ်သင်ၼႆ ဝႃႈလႆႈႁတ်းႁတ်းယူႇယဝ်ႉ။ တီႈၼႂ်းၵမ်ႇၽႃႇ ၵူႈတီႈတီႈၼႆႉ ယွၼ်ႉပိူဝ်ႈသင်လႄႈ ဢွၼ်ၵၼ်ႁဵတ်း ပႃးၵႅမ်ႉယူႇ လၢႆပွၵ်ႈလၢႆၽဝ်ၼႆ ​လွင်ႈတၢင်းမၼ်းတႄႉ တေလႆႈဝႃႈ ပဵၼ်လွင်ႈၸူႉတုမ်ပၼ်ႁႅင်း ဢၼ်မၢၵ်ႇမိူဝ်ယူႇဝႆႉၼၼ်ႉ ၼႆယဝ်ႉ။ ၸိူဝ်းမေႃၽႂ်မေႃမၼ်း ႁူႉၽႂ်ႁူႉမၼ်းၼၼ်ႉ မႃးႁူမ်ႈၵၼ်တီႈလဵဝ်ၵၼ်သေ ႁႃလွင်ႈတၢင်း၊ တိုဝ်းတၢင်း ၼင်ႇႁိူဝ်ပေႃးတေ ၶႅမ်ႉလႅပ်ႈၵႂႃႇတႃႇ ၵူႈၵေႃႉ ၵူႈၽၢႆႇၼၼ်ႉယဝ်ႉ။

ပႃးၵႅမ်ႉဢၼ်ဝႃႈၼႆႉတႄႉ တေလႆႈဝႃႈ မၼ်းၸႅၵ်ႇဢွၵ်ႇ လွၵ်းၵဝ်ႇလၢႆးၵဝ်ႇသေ မၼ်းပဵၼ်ပွႆး ဢၼ်ၸၢင်ႈၸူႉတုမ်ပၼ် ၼမ်ႉၵတ်ႉၵူၼ်းလႆႈ ဝႆးဝႆးဢၼ်ၼိုင်ႈၼႆ​တႄႉ မၼ်းတေႁႂ်ႈၵူႈၵေႃႉ ပွင်ႇလႅင်းၼိူဝ် လွင်ႈယိူင်းဢၢၼ်း ပႃးၵႅမ်ႉယူႇ။ ပေႃးၼၼ် ႁဝ်းၶႃႈ ဢဝ်ဢွၵ်ႇတူၺ်း ၽွၼ်းလီလဵၵ်ႉလဵၵ်ႉ တွၼ်ႈတႃႇ ၸိူဝ်းပဵၼ် ၽူႈၶိုၼ်ႈႁွတ်ႈၶဝ်တေလႆႈၼၼ်ႉၼႆ ပေႃးၸဝ်ႈၵဝ်ႇ တေၶႂ်ႈပိုၼ်ၽႄႈ တၢင်းႁူႉတၢင်းႁၼ် ဢၼ်ၸဝ်ႈၵဝ်ႇႁူႉဝႆႉၼႆ ၸဝ်ႈၵဝ်ႇတေလႆႈဢဝ်ၶၢဝ်းယၢမ်းသေ တေလႆႈသဵင်ႈငိုၼ်းသဵင်ႈတွင်းသေ ၸင်ႇၵႆႈပဵၼ်မႃးလႆႈ။ ပေႃးဝႃႈ တီႈပႃႈၵႅမ်ႉၼႆႉတႄႉ ၸဝ်ႈၵဝ်ႇဢမ်ႇတၢပ်ႈလူဝ်ႇၸူႉၵူၼ်းတုမ်ၵူၼ်း၊ ဢမ်ႇတၢပ်ႈလူဝ်ႇ ၵႅင်ႈငိုၼ်းတွင်း ၼမ်လူင်လၢင်သေၵေႃႈ ပဵၼ်မႃးလႆႈယူႇ။ ထႅင်ႈဢၼ်ၼိုင်ႈၸမ်ႉ မၼ်းတေမီး ၽူႈလူင်ႉလႅၼ်ႇတၢင်းၼမ် ဢၼ်တေၸၢင်ႈ ၶဝ်ႈႁူမ်ႈဢုပ်ႇဢူဝ်း ၸွႆႈထႅမ်ထတ်းသၢင်ႈၼႄ ပၼ် လွင်ႈတၢင်းႁၼ်ထိုင်ၸဝ်ႈၵဝ်ႇ၊ လွင်ႈႁူႉတၢင်းမေႃၸဝ်ႈၵဝ်ႇၼၼ်ႉ ပဵၼ်ႁိုဝ်မီးႁိုဝ် ဢၼ်ဝႃႈၼၼ်ႉ။ ပေႃးဢဝ်ၵူၼ်းၶိုၼ်ႈႁွတ်ႈမႃး ဢၼ်ထုၵ်ႇလီႁၢင်ႈႁႅၼ်းဝႆႉ​တႄႉ ၸဝ်ႈၶဝ် ၶႂ်ႈႁူႉသင်၊ ၸဝ်ႈၵဝ်ႇၶႂ်ႈ မွၵ်ႇလၢတ်ႈၽႄႈတိုၼ်းလွင်ႈသင်၊ ၶႂ်ႈတွင်ႈထၢမ်သင်၊ ၶဝ်ၸႂ်လွင်ႈတၢင်းသင်ၼႆသေဢမ်ႇၵႃး ၸဝ်ႈၵဝ်ႇထုၵ်ႇလီယုမ်ႇယမ်ဝႆႉဝႃႈ ၸဝ်ႈၵဝ်ႇၵေႃႈ ၸၢင်ႈပဵၼ် ၵူၼ်းၸိုဝ်ႈယႂ်ႇလိုဝ်းလင်ၵႂႃႇလႆႈဢၼ်ဝႃႈၼၼ်ႉယဝ်ႉ။

ပေႃးမီးၶ​ေႃႈထၢမ်ၼမ်ၵေႃႈ တေလႆႈၶေႃႈတွပ်ႇၼမ် ဢၼ်ဝႃႈၼၼ်ႉ ထုၵ်ႇလီဢဝ်ၸႂ်ႉတီႈ ပႃးၵႅမ်ႉၼႆႉယူႇယဝ်ႉ။ ​ၸိုဝ်ႈပႃးၵႅမ်ႉတႄႉၵေႃႈ ဢိင်ၼိူဝ် လွင်ႈတၢင်း၊ ဢွင်ႈတီႈ မၼ်းသေၵေႃႈ ဢွၼ်ၵၼ် တၢင်ႇဝႆႉပၼ်ၵူၺ်း၊ မိူၼ်ၼင်ႇ ပႃးၵႅမ်ႉဢၼ်တေႁဵတ်းတီႈ တႃႈၵုင်ႈၼႆၵေႃႈ တၢင်ႇၸိုဝ်ႈပၼ် ပႃးၵႅမ်ႉတႃႈၵုင်ႈ၊ တီႈဝဵင်းလိူဝ်ႇၵေႃႈ ပႃးၵႅမ်ႉဝဵင်းလိူဝ်ႇ၊ တီႈလႃႈသဵဝ်ႈၵေႃႈ ပႃးၵႅမ်ႉ လႃႈသဵဝ်ႈ ၼႆယဝ်ႉ။

ပေႃးဝႃႈပႃးၵႅမ်ႉ မိူင်းႁဝ်းၼႆႉတႄႉ မိူဝ်ႈပႆႇႁဵတ်းပႆႇထိုင် ပႃးၵႅမ်ႉၼၼ်ႉ မၢင်ၸိူဝ်းၵေႃႈ ဢွၼ်ၵၼ် တၢင်ႇမၢင်ၽၢင် (Register) ဝႆႉတီႈၼိူဝ် ဢိၼ်ႇတႃႇၼႅတ်ႉသေ ပၼ်သဵၼ်ႈမၢႆဝႆႉဝႃႈ ၽူႈလႂ်ၽႂ်တေၶိုၼ်ႈႁွတ်ႈ။ ပေႃးၼၼ် ၸုမ်းပွင်ၵၢၼ်ၶဝ် တေသူင်ႇပၼ် ၶႅပ်းမႂ်မႃးပၼ်ၶိုၼ်း။ ပေႃးၸဝ်ႈၵဝ်ႇ ၶိုၼ်းထုတ်ႇဢွၵ်ႇ ၶႅပ်းမႂ်ၼၼ်ႉသေ ၵႂႃႇၼႆ ၸဝ်ႈၵဝ်ႇ ၸၢင်ႈလႆႈ ၶူဝ်းတွၼ်ႈ ဢၼ်ပႃးၵႅမ်ႉၶဝ် ယိုၼ်ႈပၼ် ၼင်ႇ သိူဝ်ႈ၊ ထူင်၊ ၸွင်ႈ၊ ပပ်ႉ၊ ၵမ်ၸိုမ်း၊ သတေႇၵႃႇ ၸၵႂႃႇၸိူဝ်းၼႆႉယူႇ။ သင်ၸိူဝ်ႉဝႃႈ ဢမ်ႇတၼ်းလႆႈပၼ် သဵၼ်ႈမၢႆ တီႈၼိူဝ် ဢိၼ်ႇတႃႇၼႅတ်ႉၵေႃႈ ၸဝ်ႈၵဝ်ႇ ၸၢင်ႈၶဝ်ႈလႆႈ ပၢင်ပွႆးယူႇ။ လွင်ႈၶူဝ်းတွၼ်ႈတႄႉ တေလႆႈဢမ်ႇလႆႈ ဢိင်ၼိူဝ် ပွႆးၼိုင်ႈလႄႈပွႆးၼိုင်ႈ ဝဵင်းၼိုင်ႈလႄႈ ဝဵင်းၼိုင်ႈ မၼ်းၵေႃႈဢမ်ႇမိူၼ်ၵၼ်။ ၵူၺ်းၵႃႈဝႃႈ ႁဝ်းလႆႈၵႂႃႇငိၼ်းၵႂႃႇထွမ်ႇ ၵႂႃႇႁၼ် တိုဝ်ႈတၢင်းလီ တွၼ်ႈတႃႇႁဝ်းၼၼ်ႉ မၼ်းၵေႃႈ ပေႃးပဵၼ် ၶူဝ်းတွၼ်ႈလီ ဢၼ်ပႃးၵႅမ်ႉပၼ်ႁဝ်းယူႇယဝ်ႉ။

ပေႃးဝႃႈတေမႃးပႃးၵႅမ်ႉၼႆ ထုၵ်ႇလီပႃးမႃး ၶွမ်းလႅပ်ႉတွပ်ႉ လႄႈ ထုၵ်ႇလီဢဝ်ပႃးမႃး ၶိူင်ႈသိမ်းၶေႃႈမုၼ်း memory stick ဢမ်ႇၼၼ် external hard disk ယူႇယဝ်ႉ။ ယွၼ်ႉပိူဝ်ႈဝႃႈ ၸဝ်ႈၵဝ်ႇတေလႆႈႁၼ် ၽူႈဢၼ်တေပိုၼ်ၽႄႈပၼ် တၢင်းႁူႉ ဢိၵ်ႇၶေႃႈမုၼ်း၊ ​ၶဝ်တေၸၢင်ႈၽႄႈတိုၼ်းပၼ် ၶႅပ်းႁၢင်ႈ၊ ပပ်ႉလိၵ်ႈ၊ ငဝ်းတူင်ႉ၊ သဵင်၊ သွပ်ႉဝႄး ၸၵႂႃႇၸိူဝ်းၼႆႉယဝ်ႉ။ ပႃးၵႅမ်ႉၼႆႉ ၵမ်ႉပႃႈၼမ် ၵႆႉတႄႉ 9 မူင်း ၵၢင်ၼႂ်တေႃႇ တၢမ်းၶမ် 5 မူင်းသေ ၼႂ်းၶၢဝ်းတၢင်း ပၢင်ပွႆးပႃးၵႅမ်ႉၼၼ်ႉ ၶဝ်ၵႆႉၵမ်ႉထႅမ်ပၼ် ဝၢႆႇၽၢႆ ဢိၼ်ႇတႃႇၼႅတ်ႉ ဢၼ်ၸႂ်ႉတိုဝ်းလႆႈ လၢႆ ဢၼ်ၸႂ်ႉတိုဝ်းလႆႈ လွတ်ႈလွတ်ႈလႅဝ်းလႅဝ်းၼၼ်ႉယူႇၶႃႈ။ ယဝ်ႉၵေႃႈ တီႈၼိူဝ် ဢိၼ်တႃႇၼႅတ်ႉၼၼ်ႉ မၼ်းၵေႃႈမီး ဢွင်ႈတီႈသူင်ပၼ်ၶေႃႈမုၼ်းလႆႈလႄႈ ၶႅပ်းႁၢင်ႈ၊ ငဝ်းတူင်ႉ ဢၼ်ၵပ်းၵၢႆႇလူၺ်ႈ ပႃးၵႅမ်ႉၼၼ်ႉ ၸၢင်ႈဢၼ်လူတ်ႇၶိုၼ်ႈလႆႈၵမ်းလဵဝ်ၼႆႉၵေႃႈ တေလႆႈဝႃႈပဵၼ် လွင်ႈလၢၵ်ႇလၢႆး ပႃးၵႅမ်ႉဢၼ်ၼိုင်ႈယူႇ။

ပႃးၵႅမ်ႉ ၸိူဝ်းပဵၼ်ပွၵ်ႈဢွၼ်တၢင်းသုတ်း

ပႃးၵႅမ်ႉၼႂ်းမိူင်းမျၢၼ်ႇမႃႇၼႆႉ တႄႇႁဵတ်းတီႈ ဝဵင်းတႃႈၵုင်ႈ မိူဝ်ႈပီ 2010 လိူၼ်ၸၼ်ႇဝႃႇရီႇ 23 လႄႈ 24 ဝၼ်းၼၼ်ႉယဝ်ႉ။ တီႈပႃးၵႅမ်ႉၼၼ်ႉ ၸိူဝ်းပဵၼ် ၽူႈလူင်ႉလႅၼ်ႇပၢႆးႁူႉမေႃ ၼွၵ်ႈမိူင်း မႃးၶိုၼ်ႈႁွတ်ႈ မွၵ်ႈႁူၵ်းၵေႃႉၼႆႉသေ ၸိူဝ်းပဵၼ် ၽူႈၶိုၼ်ႈႁွတ်ႈၼႂ်းမိူင်းတႄႉ တေမီး (႓႐႐႐) ပၢႆၼႆယဝ်ႉ။ ဢၼ်ပဵၼ်ပႃးၵႅမ်ႉ ၼႂ်းမိူင်းမျၢၼ်ႇမႃႇ ဢၼ်ႁဵတ်းပွၵ်ႈၵမ်းၼိုင်ႈၼႆႉ ပေႃးဢဝ် ပၢင်ပွႆးပႃးၵႅမ်ႉ ၵူႈမိူင်းမိူင်းဝႃႈ ပဵၼ်ပၢင်ပွႆး ဢၼ်ၵူၼ်းၶိုၼ်ႈႁွတ်ႈၼမ်သေပိူၼ်ႈၼၼ်ႉယဝ်ႉ။

ပႃးၵႅမ်ႉဝဵင်းလိူဝ်ႇၵေႃႈ ႁဵတ်းၵႂႃႇ မိူဝ်ႈ ပီ 2011၊ လိူၼ်ၽႅပ်ႉဝႃႇရီႇ 12 လႄႈ 13 ၼၼ်ႉယူႇ။

ပႃးၵႅမ်ႉ ဢၼ်လႆႈႁဵတ်းမႃးၼႂ်းမိူင်းတႆး

ၼႂ်းမိူင်းတႆးႁဝ်းၶႃႈၵေႃႈ ဢၼ်ပဵၼ် ပၢင်ပွႆးပႃးၵႅမ်ႉၼႆႉ လႆႈတႄႇႁဵတ်းမႃးတီႈ ဝဵင်းတူၼ်ႈတီးဢွၼ်တၢင်း။ ၵူၺ်းၵႃႈ တေလႆႈဝႃႈ ဢမ်ႇပေႃး ၶႅမ်ႉလႅပ်ႈ။ ဝၢႆးသေၼၼ်ႉ မိူဝ်ႈပီ 2013 ၼၼ်ႉ ၸုမ်းတႆးသူင်ၸႂ် ၶွမ်ႇၽိဝ်ႇတိူဝ်ႇ ၸင်ႇလႆႈထူဝ်းၼႃႈသေ ၸူႉတုမ်ၵူၼ်းၼုမ်ႇလႄႈ ၸဝ်ႈၵၢၼ်ဢၢႆႇထီႇ ၼႂ်းတူင်ႇဝဵင်းလႃႈသဵဝ်သေ ႁဵတ်းပဵၼ် ပႃးၵႅမ်ႉ လႃႈသဵဝ်ႈ ပွၵ်ႈၵမ်းၼိုင်ႈ ယူႇယဝ်ႉ။ ပႃးၵႅမ်ႉလႃႈသဵဝ်ႈ ၼႆႉ

1. ပႃးၵႅမ်ႉလႃႈသဵဝ်ႈ ပွၵ်ႈၵမ်း (႑) - ပီ 2013၊ လိူၼ်ၸၼ်ႇဝႃႇရီႇ၊ ဝၼ်းထီႉ(႕) လႄႈ ဝၼ်းထီႉ (႖)
2. ပႃးၵႅမ်ႉလႃႈသဵဝ်ႈ ပွၵ်ႈၵမ်း (႒) - ပီ 2014၊ လိူၼ်ၸၼ်ႇဝႃႇရီႇ၊ ဝၼ်းထီႉ(႔) လႄႈ ဝၼ်းထီႉ (႕)
3. ပႃးၵႅမ်ႉလႃႈသဵဝ်ႈ ပွၵ်ႈၵမ်း (႓) - ပီ 2015၊ လိူၼ်ၸၼ်ႇဝႃႇရီႇ၊ ဝၼ်းထီႉ(႕) လႄႈ ဝၼ်းထီႉ (႖)