မႁႃရထဝိမႃၼဝတ်ထု၊ ၶုၼ်ၽီ ဢၼ်လႆႈလူႇဢသတိသတႃႇၼ တီႈၽြႃးၵတ်ႉသပ
14 - မႁႃရထဝိမႃၼဝတ်ထု၊ ၶုၼ်ၽီ ဢၼ်လႆႈလူႇဢသတိသတႃႇၼ တီႈၽြႃးၵတ်ႉသပ[မႄးထတ်း | မႄးထတ်းငဝ်ႈငႃႇ]
ၶုၼ်ၽီ မိူဝ်ႈပၢၼ်ၽြႃးၵတ်ႉသပၼၼ်ႉ လႆႈႁၼ်မုၼ်ၶမ်းၽြႃးလႄႈ မီးၸႂ်သတ်ႉထႃႇလိူဝ်ႁႅင်း လႆႈႁဵတ်း ၶဝ်ႈသွမ်း ၼမ်ႉၵတ်းၼမ်ႉဝၢၼ်လူႇတၢၼ်း၊ လႆႈလူႇတၢၼ်း သၢင်ႇၵၢၼ်း ဢိၵ်ႇပႃႈ လႆႈႁဵတ်းတၢင်းလူႇလူင် ဢသတိသတႃၼလႄႈ လႆႈၸၢမ်ႇပူၺ်ႈ ယႂ်ႇၶိုၵ်ႉလူင် ၸိူင်ႉၼင်ႇ ၸဝ်ႈၶုၼ်ဢိၼ်းယူႇ
- 1015။ (ၶုၼ်ၽီ) ဢၼ်ၶိုၼ်ႈၶီႇၼိူဝ် ရထႃးၵႅဝ်ႈ ဢၼ်ႁၢင်ႈၶိူင်ႈဝႆႉ လၢၵ်ႇလၢၵ်ႇလၢႆးလၢႆး ၵူႈပိူင်ပိူင် ဢၼ်ဢဝ် မႃႉၼိုင်ႈႁဵင်လၢၵ်ႈသေ လဵပ်ႈၵႂႃႇ ႁိမ်းသူၼ်သိူဝ်းၼႆႉ တၢင်းၶိုၵ်ႉလိုၵ်ႉမၼ်း မိူၼ်ၼင်ႇ ၸဝ်ႈၶုၼ်ဢိၼ်း ဢၼ်ပဵၼ်ၵႄႇၶုၼ်ၽီ ဢၼ်ယၢမ်ႈႁဵတ်း တၢင်းလူႇမႃးၼၼ်ႉယဝ်ႉ။
- 1016။ တီႈတမ်းမိုဝ်း လၵ်းသဝ်ၸဵၼ်ႈရထႃးမႂ်း တင်းသွင်ၽၢႆႇ ဢၼ်ဢဝ်ၶမ်းႁဵတ်းဝႆႉၼၼ်ႉ ဢၼ်ႁႄႉၵင်ႈ မၼ်းလႄႈသင်၊ မၵ်းႁိဢွၼ်ႇမၼ်းလႄႈသင် ၶႅမ်ႉလႅပ်ႈလီတႄႉယဝ်ႉ။ ဢၼ်လၵ်းသဝ်ၸဵၼ်ႈ မႃးၶွႆႈၵၼ် တီႈတမ်းမိုဝ်း ၼၼ်ႉၵေႃႈ လၢႆးမိုဝ်း သြႃႇမေႃၸဵၼ်ႈၶဝ် ႁဵတ်းဝႆႉၶႅမ်ႉလႅပ်ႈလီတႄႉယဝ်ႉ။ လေႃႉရထႃးမႂ်းၼႆႉ ၶိုၵ်ႉၶၢႆးမိူၼ်ၼင်ႇ လိူၼ်မူၼ်း ဢၼ်ဢွၵ်ႇမႃး ဝၼ်းသိပ်းႁႃႈၶမ်ႈၼၼ်ႉယဝ်ႉ။
- 1017။ ရထႃး ဢၼ်ဢဝ်မႆၼႅင်ႈၶမ်းဢွၼ်ႇ ၽွတ်ႈဝႆႉ၊ ဢၼ်ဢဝ်ရတၼႃႇၵႅဝ်ႈသႅင် ၵူႈပိူင်ပိူင် ႁၢင်ႈၶိူင်ႈဝႆႉ ဢၼ်မီးသဵင် လီထွမ်ႇလီငိၼ်းဝႆႉ ဢၼ်မီးငဝ်းႁိူဝ်ႈလႅင်းဝႆႉၼႆႉ တင်းဢၼ် ၶုၼ်ၽီ ယိပ်း ဝီးၶူၼ်ႁၢင်ၸႃႇမရီႇသေ လႅပ်ႈၵၼ်ဝႆႉတႄႉယဝ်ႉ။
- 1018။ ၶွပ်ႇမၢၵ်ႇလေႃႉ ရထႃးၼၼ်ႉလႄႈသင်၊ ၶႃမၢၵ်ႇလေႃႉရထႃးၼၼ်ႉလႄႈသင်၊ ၼူမ်းမၢၵ်ႇလေႃႉရထႃး မႂ်းၼၼ်ႉလႄႈသင် မိူၼ်ၼင်ႇ ဢဝ်ၸႂ်သေ ၽၢၼ်ႇပဵၼ်ဝႆႉယဝ်ႉ။ ႁွႆးမၵ်းဢွၼ်ႇ ဢၼ်လၢၵ်ႇလၢၵ်ႇလၢႆးလၢႆး မီးတီႈၼူမ်း မၢၵ်ႇလေႃႉၼၼ်ႉၵေႃႈ ငဝ်းမၼ်း ႁိူဝ်ႈႁၢပ်ႈမၢပ်ႈမိပ်ႈ မိူၼ်ၼင်ႇ ငဝ်းႁူင်းႁႆးဝႆႉယဝ်ႉ။
- 1019။ လေႃႉရထႃးမႂ်းၼႆႉ (ဢဝ်မွၵ်ႇၼွၼ်းၶိူဝ်း)တင်းၼမ်သေ ႁၢင်ႈၶိူင်ႈဝႆႉ လၢၵ်ႇလၢၵ်ႇလၢႆးလၢႆးယဝ်ႉ။ ၶွပ်ႇမၢၵ်ႇလေႃႉ မႂ်းၼၼ်ႉၵေႃႈ ငဝ်းလႅင်းမၼ်း ႁႅင်းႁိူဝ်ႈ မီးပဵၼ်ႁဵင်လိူဝ်ယဝ်ႉ။ သွႆႈၶမ်းဢွၼ်ႇ ဢၼ်ႁွႆႈဝႆႉ တွင်ႉၵွင်ႉတႅင်ႉၵႅင်ႉ တမ်ႈတီႈ ၶွပ်ႇမၢၵ်ႇလေႃႉရထႃးၼၼ်ႉ လႆႈငိၼ်းမိူၼ်ၼင်ႇ သဵင်တူႇရိယႃႇ ႁႃႈပိူင်ယဝ်ႉ။
- 1020။ ႁူဝ်လေႃႉရထႃးမႂ်းၼၼ်ႉ ဢဝ်ပတ်ႉတမျႃးသႅင်လႅင် ဢၼ်မိူၼ်လိူၼ်မူၼ်းၼၼ်ႉ ႁၢင်ႈၶိူင်ႈဝႆႉလႄႈ လၢၵ်ႇလၢႆးတႄႉတႄႉ။ တိုၼ်းၸိုၼ်ႈသႂ်တႃႇသေႇသေ လီႁၢၼ်ႉၸႂ်တႃႇသေႇယဝ်ႉ။ ငဝ်းႁိူဝ်ႈမၼ်းၵေႃႈ လုၵ်ႈႁိူင်းဝႆႉ ၵုၼ်းၵုၼ်းယဝ်ႉ။ (တီႈဝူင်ႈၵၢင် ဝူင်ႈၵၢင်မၼ်းၼၼ်ႉ ဢဝ်တုမ်ႇမူၼ်း) မၢႆးၵၼ်ဝႆႉလႄႈ ၶိုၵ်ႉၶၢႆး မိူၼ်ၼင်ႇ ဢဝ်သႅင်ပတ်း မၢႆးၵၼ်ဝႆႉၼၼ်ႉယဝ်ႉ။
- 1021။ ၶုၼ်ၽီ ၸိူဝ်းမႃႉၽႂ်းၽၢႆ ဢၼ်ၸၼ်ရထႃးမႂ်းၼၼ်ႉ (တီႈႁၢင်ယွႆႉမၼ်း) သၢႆႁၢင်မႃႉ ဢၼ်ဢဝ် သႅင်လႅင်ပတ်ႉတမျႃး ႁၢင်ႈၶိူင်ႈဝႆႉသေ မိူၼ်လိူၼ်မူၼ်း၊ ဢၼ်တၢင်းတႅမ်ႇတၢင်းသုင် တႅမ်ထူၼ်ႈသေ မေႃၵႂႃႇမေႃပႆ၊ ဢၼ်မိူၼ် ႁၢင်ႈမီးဢူၽုင်းယႂ်ႇ ပႅင်ႈၼင်ႇ ဢူၽုင်းယႂ်ႇဝႆႉ၊ ဢၼ်မီးႁႅင်းတူဝ်တဵမ်ထူၼ်ႈ၊ ဢၼ်ၽႂ်းၽၢႆၼၼ်ႉ ပဵင်းဢူၵ်းပဵင်းၸႂ် မႂ်းယူႇတႄႉယဝ်ႉ။
- 1022။ မႃႉၸိူဝ်းၼႆႉတင်းသဵင်ႈ ဢၼ်မေႃဢဝ် တိၼ်သီႇၶွၼ်သေ ၵႂႃႇၵႂႃႇပႆပႆ ယႆၵၼ်ၽဵင်ႇၽဵင်ၼၼ်ႉ ၶဝ်ႁူႉ ၸႂ်မႂ်းသေ ႁဵတ်းၸွမ်းပၼ်ၸႂ်မႂ်း ၶႅမ်ႉလႅပ်ႈယဝ်ႉ။ မႃႉၸိူဝ်းၼႆႉ ပဵၼ်မႃႉ ဢၼ်မျၢတ်ႈတွၼ်းလိူဝ်သေ မႃႉတၢင်ႇၸိူဝ်းလႄႈ ၶဝ်ၵေႃႈ ၸူမ်းၸူမ်းသိူဝ်းသိူဝ်းသေ ၽွမ်ႉၽဵင်ႇၵၼ် တိုတ်ႉၸၼ်ၵႂႃႇ ဢူၼ်ႈဢူၼ်ႈဢွၼ်ႇဢွၼ်ႇယူႇယဝ်ႉ။
- 1023။ (မႃႉၸိူဝ်းၼၼ်ႉ) ဢဝ်(ႁူဝ်ၶဝ်၊ ၶေႃးၶဝ်၊ ႁၢင်ၶဝ်) သၼ်ႇဝႆ ၽႅတ်းၼိုင် ၶွၼ်းၶဝ်ႇ (ၸိူဝ်ႈႁိင်ႇ) ၶိူင်ႈမႃႉသေ ၵႂႃႇၵေႃႈၵႂႃႇ၊ ၵျွၵ်းၵေႃႈၵျွၵ်း၊ ဝႅၼ်ၵေႃႈဝႅၼ်ယဝ်ႉ။ တီႈၶိူင်ႈမႃႉၸိူဝ်းၼၼ်ႉ လႆႈငိၼ်း မိူၼ်ၼင်ႇ သဵင်တွႆႇႁႆႇ တူႇရိယႃႇ ႁႃႈပိူင် လင်မေႃးမႃးယဝ်ႉ။
- 1024။ သဵင်လေႃႉရထႃး မႂ်းၶုၼ်ၽီလႄႈသင်၊ သဵင်ၶိူင်ႈၶူဝ်း ဢၼ်ႁၢင်ႈၶိူင်ႈဝႆႉ ၼၼ်ႉလႄႈသင်၊ သဵင်တိၼ်မႃႉ လႄႈသင်၊ သဵင်ႁီႇမႃႉလႄႈသင်၊ သဵင်ဝၢၼ်ၽီၶဝ် တင်းသဵင်ႈလႄႈသင် လႆႈငိၼ်းငၢႆးမိူၼ် သဵင်တူႇရိယႃႇ ၽီၵၼ်ႇထပ်ႉပ ဢၼ်ယူႇတီႈ သူၼ်သိူဝ်းၸိတ်ႉတလတႃႇၼၼ်ႉယဝ်ႉ။
- 1025။ ၼၢင်းၽီဢွၼ်ႇတင်းၼမ် ဢၼ်မီႈမၢၵ်ႇတႃ ငၢႆးမိူၼ်မၢၵ်ႇတႃ ၵႂၢင်မႄႈဢွၼ်ႇ ဢူၼ်ႈဢွၼ်ႇသၢင်ႇထုၵ်ႇ၊ ဢၼ်မီးမွႆတႃမွင်ႉဢွၼ်ႇ မိူၼ်ၼင်ႇ(မွႆတႃဝူဝ်း) ဢၼ်မီးၼႃႈယုမ်ႉ ဢၼ်မေႃလၢတ်ႈၵႂၢမ်း လီႁၵ်ႉလီႁွမ်၊ ဢၼ်ဢဝ် သႅင်ပတ်းလမ် ဢုမ်ႇလွမ်ႉႁွပ်ႈတူဝ်ၶဝ်ဝႆႉ ဢၼ်မီးၽိဝ်ၼိူဝ်ႉၼင် ဢူၼ်ႈဢွၼ်ႇ ဢၼ်ၽီၵၼ်ႇထပ်ႉပလႄႈ ၽီတင်းလၢႆ လႆႈပူႇၸေႃႇ ယွင်ႈယေႃးၶဝ်ၼၼ်ႉ မႃးဢုမ်ႇလွမ်ႉႁိမ်း ရထႃးမႂ်းဝႆႉယဝ်ႉ။
- 1026။ ၼၢင်းၽီဢွၼ်ႇတင်းၼမ် ဢၼ်မီးႁၢင်ႈၽၢင် လီၸပ်းပႅၼ်းသေ ၼုင်ႈဝႆႉ သိူဝ်ႈၶူဝ်းသီလိူင်ၼုမ်ႇ၊ ဢၼ်မီးမၢၵ်ႇတႃၵႂၢင်ႈ၊ ဢၼ်မီးၶွပ်ႇတႃႇၶွင်ႇလႅင်၊ ဢၼ်ပဵၼ်ၸၢဝ်းၽီလၢၵ်ႇလၢႆး၊ ဢၼ်မီးတူဝ်ၶိင်း တွတ်းၼွတ်း၊ ဢၼ်မေႃယုမ်ႉၶူဝ်ၸိုၼ်ႈၸၢင်ႇပၢင်ႇသႂ်ၸိူဝ်းၼၼ်ႉ ဢွၼ်ၵၼ်မႃး ယူႇဝႆႉႁိမ်းရထႃးမႂ်းသေ ဢွၼ်ၵၼ်ႁွမ်းမိုဝ်းဝႆႈဝႆႉ ၽႂ်မၼ်း ႁိမ်းမႂ်းယူႇယဝ်ႉ။
- 1027။ ၸိူဝ်းၼၢင်းၽီႁၢင်ႈလီဢွၼ်ႇ ဢၼ်တိုဝ်းဝႆႉဝႅၼ်ၶမ်း၊ ဢၼ်ၼုင်ႈဝႆႉ ၶူဝ်းလီ၊ ဢၼ်မီးဢႅင်ႈဢႅဝ်သၢင်ႇထုၵ်ႇ၊ ဢၼ်မၢၵ်ႇၵၢဝ်ႈမၢၵ်ႇၶႃ တဵမ်ထူၼ်ႈလဝ်းလီ၊ ဢၼ်မီးၼူမ်း(တိုင်ႇမၢၵ်ႈ)လီ၊ ဢၼ်မီးၼိဝ်ႉမိုဝ်းၵူမ်၊ ဢၼ်မီးၼႃႈတႃ ႁၢင်ႈလီ၊ ဢၼ်လီယဵမ်ႈလီတူၺ်းၸိူဝ်းၼၼ်ႉ ဢွၼ်ၵၼ်မႃး ယူႇဝႆႉႁိမ်းရထႃးမႂ်းသေ ဢွၼ်ႇၵၼ် ႁွမ်းမိုဝ်းဝႆႈဝႆႉ ၽႂ်မၼ်း ႁိမ်းမႂ်း ယူႇယဝ်ႉ။
- 1028။ ၸိူဝ်းၼၢင်းၽီႁၢင်ႈလီမၢင်ၸိူဝ်း ဢၼ်မီးၸွၵ်းႁူဝ်ႁၢင်ႈလီ၊ ဢၼ်ၼုမ်ႇလဵၵ်ႉယႅင်း သႅၼ်းၽဵင်ႇၵၼ် ၼၼ်ႉလႄႈသင်၊ ဢၼ်ငဝ်းၸွၵ်းႁူဝ် ႁိူဝ်ႈဢွၵ်ႇမၢပ်ႈမိပ်ႈၼၼ်ႉလႄႈသင်၊ ဢၼ်တီႈၶူၼ်ႁူဝ် (ပၵ်းဝႆႉမွၵ်ႇလႅင်)ၼၼ်ႉ လႄႈသင်၊ ဢၼ်မေႃဝႆႉတူဝ် ဢီႉတီႉဢွၼ်ႇတွၼ်ႇၸိူဝ်းၼၼ်ႉ ဢွၼ်ၵၼ်မႃး ယူႇဝႆႉႁိမ်းရထႃးမႂ်းသေ ဢွၼ်ႇၵၼ် ႁွမ်းမိုဝ်းဝႆႈဝႆႉ ၽႂ်မၼ်း ႁိမ်းမႂ်း ယူႇယဝ်ႉ။
- 1029။ ၸိူဝ်းၼၢင်းၽီႁၢင်ႈလီဢွၼ်ႇ ဢၼ်ႁွႆႈဝႆႉသွႆႈႁူ၊ ဢၼ်ဢဝ်မွၵ်ႇမူဝ် ႁၢင်ႈၶိူင်ႈႁူမ်ႇလူမ်ႈဝႆႉတီႈတူဝ်၊ ဢၼ်ဢဝ် လွၼ်ႉၸၼ်းၵူး လုပ်ႈတႃးဝႆႉတီႈတူဝ်၊ ဢၼ်မေႃဝႆႉတူဝ် ဢီႉတီႉဢွၼ်ႇတွၼ်ႇ ဢၼ်မေႃႁဵတ်းႁႂ်ႈ ၸႂ်မႂ်းၶုၼ်ၽီ သိူဝ်းမူၼ်ႈၼၼ်ႉ ဢွၼ်ၵၼ်မႃး ယူႇဝႆႉ ႁိမ်းရထႃးမႂ်းသေ ဢွၼ်ႇၵၼ် ႁွမ်းမိုဝ်းဝႆႈဝႆႉ ၽႂ်မၼ်း ႁိမ်းမႂ်း ယူႇယဝ်ႉ။
- 1030။ ၸိူဝ်းၼၢင်းၽီႁၢင်ႈလီဢွၼ်ႇ ဢၼ်ပၵ်း မွၵ်ႇၵူႈပိူင်ပိူင်၊ ဢၼ်ဢဝ်မွၵ်ႇမူဝ် ႁၢင်ႈၶိူင်ႈႁူမ်ႇလူမ်ႈဝႆႉတီႈတူဝ်၊ ဢၼ်ဢဝ် လွၼ်ႉၸၼ်းၵူး လုပ်ႈတႃးဝႆႉတီႈတူဝ်၊ ဢၼ်မေႃဝႆႉတူဝ် ဢီႉတီႉဢွၼ်ႇတွၼ်ႇ ဢၼ်မေႃႁဵတ်းႁႂ်ႈ ၸႂ်မႂ်းၶုၼ်ၽီ သိူဝ်းမူၼ်ႈၼၼ်ႉ ဢွၼ်ၵၼ် မႃးယူႇဝႆႉ ႁိမ်းရထႃးမႂ်းသေ ဢွၼ်ႇၵၼ် ႁွမ်းမိုဝ်းဝႆႈဝႆႉ ၽႂ်မၼ်း ႁိမ်းမႂ်း ယူႇယဝ်ႉ။
- 1031။ (ဢၼ်ၶဝ်ႁၢင်ႈၶိူင်ႈဝႆႉ) တမ်ႈတီႈၶေႃးၶဝ်ၸိူဝ်းၼၼ်ႉလႄႈသင်၊ တီႈႁူဝ်ၶဝ်ၸိူဝ်းၼၼ်ႉလႄႈသင်၊ ႁိူဝ်ႈလႅင်းမိူၼ်ၼင်ႇ ငဝ်းၵၢင်ဝၼ်း ဢၼ်ဢွၵ်ႇမႃး မိူဝ်ႈလိူၼ်သိပ်းသွင်ၼၼ်ႉသေ ႁိူဝ်ႈၸွတ်ႇၵႂႃႇ ၵူႈပႃႈၵူႈၽၢႆႇယဝ်ႉ။
- 1032။ ယွၼ်ႉပိူဝ်ႈ ႁႅင်းလူမ်းပဝ်ႇလႄႈသင် (ယွၼ်ႉပိူဝ်ႈ ႁႅင်းၵႂႃႇလေႃႉရထႃးၼၼ်ႉလႄႈသင်)၊ မိုဝ်းၶဝ်သွင် ၶွၼ် ဢၼ်မီးႁိမ်းႁွမ်း ဢၼ်ယိပ်းမွၵ်ႇၶွၼ်းဝႆ ၽႅတ်းၼိုင်ၼၼ်ႉလႄႈသင်၊ ၶိူဝ်းတၼ်းသႃႇၶဝ်ၼၼ်ႉလႄႈသင် ဢွၵ်ႇ မႃးသဵင်လီထွမ်ႇလီငိၼ်း ၸိုၼ်ႈၸိုၼ်ႈသႂ်သႂ် ႁဵတ်းႁႂ်ႈ ၸိူဝ်းၵူၼ်းမေႃႁႆႇမေႃတိုင်ႈ ၵတ်ႉၶႅၼ်ႇတင်းသဵင်ႈ ပေႃးထွမ်ႇလႆႈၼၼ်ႉယဝ်ႉ။
- 1033။ တိင်ႇၶုၼ်ၽီၼၼ်ႉ ယွၼ်ႉပိူဝ်ႈ သဵင်ဢိုင်းသဵင်တွႆႇမၼ်းသေ ႁဵတ်းႁႂ်ႈ(ၵူၼ်းတင်းၼမ်) ႁူမ်ၸူမ်း ၼင်ႇၼၼ် သဵင်ရထႃး သဵင်ၸၢင်ႉ ဢၼ်မီးဝႆႉႁိမ်းႁွမ်း သူၼ်သိူဝ်းၸိူဝ်းၼႆႉလႄႈသင်၊ သဵင်တူႇရိယႃႇၸိူဝ်းၼႆႉလႄႈသင် ႁဵတ်းႁႂ်ႈ မႂ်းၶုၼ်ၽီ လႆႈသိူဝ်းၸႂ်ႁူမ်ၸူမ်းယူႇယဝ်ႉ။
- 1034။ ပေႃးဝႃႈ ၸိူဝ်းသဵင်တိင်ႇ ဢၼ်မီးသၽေႃးဝၢၼ်ႁူ ထုၵ်ႇၸႂ် ႁၢၼ်ႉၸႂ် ဢွၵ်ႇသဵင်လင်မေႃးမႃးၸိုင် ၼၢင်းၽီဢွၼ်ႇၶဝ် ၸိူဝ်းဢၼ်ၽိုၵ်းႁဵၼ်းဝႆႉ မေႃၵႃႈဝႆႉၼၼ်ႉ ဢဝ်တင်းမွၵ်ႇမူဝ်ပတုမ်ႇမႃႇသေ မႃးၵႃႈ ပၼ်ႇလဵပ်ႈယူႇယဝ်ႉ။
- 1035။ သဵင်ၵႂၢမ်း ၸိူဝ်းဢၼ်ႁွင်ႉမေႃၼၼ်ႉလႄႈသင်၊ သဵင်တွႆႇ ၸိူဝ်းဢၼ်ႁႆႇတိုင်ႈၼၼ်ႉလႄႈသင်၊ တင်းလွၵ်းလၢႆးၵႃႈသေ ငမ်ႇမႅၼ်ႈၸွမ်းၵၼ်ယူႇယဝ်ႉ။ ၽွင်းၼၼ်ႉ ၼၢင်းၽီဢွၼ်ႇမၢင်ၸိူဝ်း မႃးၵႃႈတီႈႁိမ်း လေႃႉရထႃးမႂ်းယဝ်ႉ။ ၼၢင်းထွတ်ႈမျၢတ်ႈ မၢင်ၼၢင်းၸမ်ႉ ယူႇတၢင်းၶၢင်ႈသေ ႁဵတ်းႁႂ်ႈငဝ်းလႅင်း ႁိူဝ်ႈႁိူင်ႈၵႂႃႇ (ၵူႈၼႃႈၵူႈၽၢႆႇ)ယဝ်ႉ။
- 1036။ သင်ဝႃႈ ၸိူဝ်းသဵင်တိင်ႇ ဢၼ်မီးသၽေႃး ဝၢၼ်ႁူ ထုၵ်ႇၸႂ် ဢၼ်ႁဵတ်းႁႂ်ႈႁၢၼ်ႉၸႂ်ၼၼ်ႉ လင်မႃး မႃးၸိုင် မိူၼ်ၼင်ႇ မႃးပူၵ်းတိုၼ်ႇမႂ်းၶုၼ်ၽီသေ ပူႇၸေႃႇမိူၼ်ၼင်ႇ ၸဝ်ႈၶုၼ်ဢိၼ်း လႆႈသိူဝ်းၸႂ်ၼၼ်ႉယဝ်ႉ။
- 1037။ မိူဝ်ႈၸၢတ်ႈၵွၼ်ႇၼၼ်ႉ တၢမ်တူဝ်မႂ်း လႆႈႁဵတ်း ၵၢမ်ႇၵုသူဝ်ႇသင်မႃးၼေႃး။ ၸၢတ်ႈၵွၼ်ႇ မိူဝ်ႈပဵၼ် ၵူၼ်းၼၼ်ႉ လႆႈႁပ်ႉသိၼ်ဢုပုတ်ႈမႃး ၼင်ႇႁိုဝ်ၼေႃး။ လႆႈႁဵတ်း ၵၢၼ်လီၵုသူဝ်ႇ ၸိူင်ႉၼင်ႇႁိုဝ်လႄႈသင် ဢိၵ်ႇလူၺ်ႈ လႆႈတိုဝ်းၵမ်မႃး ၸိူင်ႉႁိုဝ် ႁၢၼ်ႉၸႂ်ႁၢၼ်ႉၶေႃးၼေႃး။
- 1038။ ဢူမုၼ်ၽုင်းတၼ်းၶူဝ်း မႂ်းၶုၼ်ၽီၼႆႉ ယႂ်ႇတႄႉယဝ်ႉ။ ႁိူဝ်ႈႁိူင်းႁူမ်ႇလူမ်ႈၼိူဝ် ၽီၶဝ်တင်းသဵင်ႈယဝ်ႉ။ ၽွၼ်းလီဢၼ်ၼႆႉ လႅပ်ႈတေဢမ်ႇၸႂ်ႈ ၵုသူဝ်ႇၽွၼ်းလီ ဢၼ်လႆႈႁဵတ်းမႃး ဢိတ်းဢွၼ်ႇၼိုင်ႈၼၼ်ႉၵူၺ်း။ ပဵၼ်ၽွၼ်းလီ ဢၼ်လႆႈႁပ်ႉသိၼ်ဢုပုတ်ႉမႃးလီလီ ၸၢတ်ႈၵွၼ်ႇႁႃႉ။
- 1039။ ၽွၼ်းလီဢၼ်ၼႆႉ ပဵၼ်ၽွၼ်းလီ ၵုသူဝ်ႇတႃႇၼႁႃႉ ဢမ်ႇၼၼ် ပဵၼ်ၽွၼ်းလီ သီႇလႁႃႉ။ ဢမ်ႇၼၼ် ပဵၼ်ၽွၼ်းလီ လႆႈႁွမ်းမိုဝ်းဝႆႈႁႃႉ၊ ၵဝ်ထၢမ်မႂ်းယူႇယဝ်ႉ။ လွင်ႈတၢင်းမၼ်းၼၼ်ႉ တွပ်ႇမႃးပၼ်ၵဝ်လူး (ၼႆ ၸဝ်ႈမွၵ်ႉၵလၢၼ်ႇ ထၢမ်ၵႂႃႇယဝ်ႉ)
- 1040။ ၶုၼ်ၽီၼၼ်ႉၵေႃႈ ၸူမ်းၸူမ်းသိူဝ်းသိူဝ်းသေ ၶိုၼ်းဢဝ်လွင်ႈဢဝ်တၢင်းမၼ်း တွပ်ႇလၢတ်ႈၶေႃႈ ထၢမ် ၸဝ်ႈၵႂႃႇယဝ်ႉ။
- 1041။ ၶႃႈတပႄးႁဝ်း လႆႈဝႆႈသႃ မုၼ်ၶမ်းၽြႃးၵတ်ႉသပ ဢၼ်ဢွင်ႇပႄႉ ဢိၼ်ႇတရေႇ၊ ဢၼ်မီးဝီႇရိယ တဵမ်ထူၼ်ႈ၊ ဢၼ်မျၢတ်ႈတွၼ်းလိူဝ် သတ်ႉတဝႃႇတင်းသဵင်ႈ၊ ဢၼ်ပဵၼ်ပုၵ်ႉၵူဝ်ႇထွတ်ႈမျတ်ႈ၊ ဢၼ်ပိုတ်ႇၽုၺ်ႇ ၽၵ်းတူၼိပ်ႉပၢၼ်ႇ၊ ဢၼ်ပဵၼ် ၽီၼိူဝ်ၽီ၊ ဢၼ်မီးၽုင်းၵၢမ်ႇ ဢၢၼ်ႇပၢၵ်ႇမၼ်းတင်းၼမ်၊ ဢၼ်မီးလၵ်ႈၶၼႃႇမျၢတ်ႈ ၵူၼ်းၸၢႆးၼၼ်ႉ တီႈၶႃႈယဝ်ႉ။
- 1042။ ၸဝ်ႈႁဝ်းတီႈၶႃႈ ယွၼ်ႉပိူဝ်ႈ လႆႈဝႆႈသႃ ၽြႃးၵတ်ႉသပ (ၸဝ်ႈၽူႈပၢၵ်ႈပႅတ်ႈ ၶဵၼ်ၵိလေႇသႃႇ) ဢၼ်မိူၼ်ၼင်ႇၸၢင်ႉပၢႆးလူင်၊ ဢၼ်ပူၼ်ႉဢေႃးၶသီႇမႄႈ၊ ဢၼ်မီးႁၢင်ႈၽၢင်မိူၼ်ၼင်ႇ ၶမ်းမဝ်ႈသိင်ႇၵီႇ၊ ၶမ်းၸမ်ႇပူႇရၢတ်ႉ ၼၼ်ႉသေ ၵိုင်ႉၵၢင်ႉ ပဵၼ်ၵေႃႉမီးၸႂ် ၽိူၵ်ႇၸိုၼ်ႈၶၢဝ်သႂ်ၵႂႃႇယဝ်ႉ။ (လွင်ႈဢၼ်ပဵၼ်ၵႂႃႇၼင်ႇၼၼ်ၵေႃႈ) ပဵၼ်ယွၼ်ႉပိူဝ်ႈ လႆႈဝႆႈသႃ မုၼ်ၶမ်းၽြႃး ဢၼ်မီးၸွမ်ပိဝ်တြႃးၼၼ်ႉယဝ်ႉ။
- 1043။ ၶႃႈတပႄး ဢၼ်ဢမ်ႇမီးၸႂ် ဢွႆႇႁွႆႈၸပ်းပႅၼ်းသင်ၼၼ်ႉ ၸင်ႇဢဝ်မွၵ်ႇဢၼ်သွႆႉယဝ်ႉ ဢၼ်ပႆႇသွႆႉယဝ်ႉၸိူဝ်းၼၼ်ႉ ႁၢင်ႈၶိူဝ်ႈႁွႆႈႁွႆႈသိူဝ်ႇသိူဝ်ႇ တီႈႁိူၼ်းယဝ်ႉ လႆႈဢဝ်တၢင်းလူႇၵႅဝ်ႈ ၶဝ်ႈသွမ်း ၼမ်ႉဝၢၼ် ဢၼ်ဢရသႃႇ တဵမ်ထူၼ်ႈ ဢိၵ်ႇလူၺ်ႈ သၢင်ႇၵၢၼ်း လူႇတၢၼ်းတမ်ႈတီႈ ၽြႃးၵတ်ႉသပယဝ်ႉ။
- 1044။ (ၸဝ်ႈႁဝ်းတီႈၶႃႈ) တမ်ႈတီႈ ၽြႃးပဵၼ်ၸဝ်ႈၵတ်ႉသပ ဢၼ်မျၢတ်ႈတွၼ်းလိူဝ် သတ်ႉတဝႃႇ တူဝ်သွင်တိၼ်ၼၼ်ႉ ယွၼ်ႉပိူဝ်ႈ လႆႈလူႇတၢၼ်း ၶဝ်ႈသွမ်းလႄႈသင်၊ ၼမ်ႉဝၢၼ်လႄႈသင်၊ သၢင်ႇၵၢၼ်းလႄႈသင်၊ တၢင်းၵိၼ်တၢင်းယႅမ်ႉ ႁႂ်ႈတဵမ်ထူၼ်ႈႁၢၼ်ႉၸႂ်လႄႈ (ၶႃႈတပႄးႁဝ်း) လႆႈၵႂႃႇမူၼ်ႈသိူဝ်း ဝဵင်းသိူဝ်းလူင် တီႈမိူင်းၽီၵူႈၶူင်းၶူင်းယဝ်ႉ။
- 1045။ ၸဝ်ႈႁဝ်းတီႈၶႃႈ ၶႃႈတပႄးၼႆႉ ယွၼ်ႉပိူဝ်ႈ လႆႈလူႇတၢၼ်း တၢင်းလူႇလူင်ဢသတိသ ဢၼ်မီးတၢင်း ၸိုၼ်ႈသႂ်သၢမ်ပိူင် ဢၼ်ဢမ်ႇသွတ်ႇသေႈၽၵ်းတူ (တီႈဢတိတ်ႈ ဢၼႃႇၵတ်ႈ၊ ပတ်ႉၸုပ်ႉပၢၼ်ႇၼၼ်ႉ ဢဝ်သူပ်းတူဝ် ႁူဝ်ၸႂ်သေ တူဝ်ၸဝ်ႈၵဝ်ႇၵေႃႈ လုၵ်ႉႁဵတ်း၊ တိုၵ်းသူၼ်းပိူၼ်ႈသေႁဵတ်း၊ ၶိုၼ်းဝူၼ်ႉၶိုၼ်းၸိူဝ်းဢၼ်ႁဵတ်းမႃး သၢမ်ပိူင်ၼႆႉ တဵမ်ထူၼ်ႈလႄႈ) လႆႈၸုၼ်ႉ ပႅတ်ႈၶၼ်ႇထႃႇၵူၼ်းသေ လႆႈမႃးသိူဝ်းလူၼ်း တမ်ႈတီႈ ဝဵင်းၵႅဝ်ႈၽီ မိူၼ်ၼင်ႇ ၶုၼ်ဢိၼ်းၼၼ်ႉယဝ်ႉ။ (ဢမ်ႇသွတ်ႇသေႈၽၵ်းတူၼၼ်ႉ ပွင်ႇဝႃႈ “ပိုတ်ႇၽုၺ်ႇၽၵ်းတူ တႃႇတေလူႇ”ၼႆယဝ်ႉ။
- 1046။ ၸဝ်ႈႁဝ်းတီႈၶႃႈ သင်ဝႃႈ ၶႂ်ႈလႆႈသၽေႃးလွင်ႈလီ ၸိူဝ်းပဵၼ် ဢႃႇယုယိုၼ်းယၢဝ်းလႄႈသင်၊ ႁၢင်ႈၽၢင်လီလဝ်းလႄႈသင်၊ သိူဝ်းသႃႇၼမ်တွၼ်းလႄႈသင်၊ ႁႅင်းယႂ်ႇလႄႈသင် တေလႆႈမီးၸႂ်ဢမ်ႇၸပ်းပႅၼ်း ဢမ်ႇထီႇၼဵဝ်သေ တေလႆႈႁဵတ်း ၶဝ်ႈသွမ်း ၼမ်ႉၵတ်းၼမ်ႉဝၢၼ် ၶိုၵ်ႉၶိုၵ်ႉသေ လူႇတၢၼ်းယဝ်ႉ။
- 1047။ ၸဝ်ႈႁဝ်းတီႈၶႃႈ တီႈၼႂ်းလေႃးၵၼႆႉလႄႈသင် တၢင်ႇလေႃးၵလႄႈသင် ၵေႃႉဢၼ်မျၢတ်ႈတွၼ်းလိူဝ် သေၽြႃးၵေႃႈယဝ်ႉ ၵေႃႉဢၼ်မျၢတ်ႈတွၼ်း မိူၼ်ၽြႃႈၵေႃႈယဝ်ႉ ဢမ်ႇမီးလႆႈၶႃႈ။ မုၼ်ၶမ်းၽြႃးၼႆႉ တမ်ႈတီႈ ၸိူဝ်းဢၼ် မၢင်ႇၵိူဝ်းၶႂ်ႈႁႃႁႂ်ႈလႆႈ ၼမ်ႉတွၼ်းၽွၼ်းလီတင်းၼမ်ၼၼ်ႉ ၵႅၼ်ႇၸဝ်ႈ ပဵၼ်ၽူႈၵိုင်ႇႁပ်ႉဢဝ် တၢင်းလူႇ ဢၼ်ဢဝ်မႃး တီႈၵႆၼၼ်ႉယဝ်ႉ (ၼႆ တွပ်ႇလၢတ်ႈၵႂႃႇယဝ်ႉ)။
မႁႃဝိႁႃရဝိမႃၼဝတ်ထု ႁူဝ်သိပ်းသီႇ သုတ်းယဝ်ႉ။ မႁႃရထဝၷ် ႁူဝ်ႁႃႈ သုတ်းယဝ်ႉ။ ꧤႃၼဝႃရ ႁူဝ်ထီႉသၢမ် သုတ်းတီႈၼႆႈယဝ်ႉ။
ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]
- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ပုရိသဝိမႃၼ၊ မႁႃရထဝၷ်၊ မႁႃဝိႁႃရဝိမႃၼဝတ်ထု