မႁႃႇမျၢတ်ႈမုၼိ ဝဵင်းၵဵင်းတုင်

ၽွင်းမိူဝ်ႈ ၽြႃးၸဝ်ႈၵေႃးတမ တိုၵ်ႉမီးယူႇ ၼႂ်းလေႃးၵၶူင်းၵၢင်လူင်ၼၼ်ႉ မီးၶုၼ်ႁေႃၶမ်း ၸဝ်ႈၼိုင်ႈ ၸိုဝ်ႈဝႃႈ ၶုၼ်ၸမ်ႇပူႇပတိ (ၶုၼ်ၶျုမ်းပူး)သေ မၼ်းၸဝ်ႈၼႆႉ ၽုင်းတၼ်းၶူဝ်း ယႂ်ႇသေဢမ်ႇၵႃး မၢၼ်ႇမႃႇၼယႂ်ႇၼႃႇၼႃႇ။ မၼ်းမၢႆၸႂ်ဝႃႈ ၼႂ်းၵမ်ႇၽႃႇၼႆႉ ၵေႃႉဢၼ်တေ ၽုင်းၵၢမ်ႇယႂ်ႇသေမၼ်းၼၼ်ႉ တေဢမ်ႇမီးၽႂ်ၼႆသေ တိုၼ်းဢမ်ႇၼပ်ႉယမ်ၽႂ်သေၵေႃႉ သေၸဝ်ႈ။

ထိုင်မႃးဝၼ်းၼိုင်ႈ ၼႂ်းၺၢၼ်ႇၽြႃးၵေႃးတမ ႁၼ်ထိုင်ဝႃႈ တေလႆႈၵႂႃႇၽူတ်ႇ ၶုၼ်ၶျုမ်းပူးၼႆလႄႈ ၸင်ႇၽၢၼ်ႇ ႁဵတ်းႁၢင်ႈၶုၼ်ႁေႃၶမ်း ဢၼ်ၼုင်ႈၶူဝ်းႁၢင်ႈႁေႃႇ တဵမ်ထူၼ်ႈသေ ၵႂႃႇၼင်ႈဝႆႉ တီႈၼိူဝ်ပလၢင်ႇတႅၼ်ႈၵႅဝ်ႈ ၶုၼ်ၶျုမ်းပူးၼၼ်ႉယဝ်ႉ။ ပေႃးဝႃႈ ၶုၼ်ၶျုမ်းပူး လႆႈမႃးႁၼ်ၼင်ႇၼၼ် ယွၼ်ႉပိူဝ်ႈ ၽုင်းၵၢမ်ႇယႂ်ႇသေမၼ်းလႄႈ ၶူၼ်တုမ်ႇၼိူဝ်ႉမၼ်း သၢၼ်ႈၼဵတ်းၵႂႃႇတင်းတူဝ် ပဵၼ်ဢၼ်ဢွၼ်ႇဢွၼ်ႇဢၢမ်းဢၢမ်း ၽုင်းၵၢမ်ႇၽြႃးသေ ၸင်ႇတေယွၼ်ႇယွမ်း မၢၼ်ႇမႃႇၼ ၼပ်ႉယမ်ဝႆႉသႃၵႂႃႇယဝ်ႉ။

လွင်ႈဢၼ် ႁုင်ႇႁၢင်ႈ မုၼ်ၶမ်းၽြႃး တိုဝ်းပၢၼ်းၵုမ်း သႂ်ႇလေႃးပႄး တၢင်းၵႄး ၼုင်ႈဝႆႉ ၶိူင်ႈၶူဝ်း ၶုၼ်ႁေႃၶမ်းၼၼ်ႉ ၶုၼ်ႁေႃၶမ်း မိူင်းထၺ်ၺဝတီႇ ၸင်ႇသွၼ်းလေႃႇပဵၼ် ႁၢင်ႈတွင်းသေ ဢိင်ပိုင်ႈၵိူဝ်းလီမႃးယဝ်ႉ။ ၶုၼ်ထၺ်ၺဝတီႇၼၼ်ႉ ပဵၼ်ၶုၼ်မိူင်းရၶႅင်ႇလႄႈ ႁုၼ်ႇႁၢင်ႈၽြႃးတွင်းၼၼ်ႉၵေႃႈ ၸင်ႇႁိၵ်ႈၸိုဝ်ႈဝႃႈ ၽြႃးလူင်ရၶႅင်ႇၼႆယူႇ။

ဝၢႆးသေ ၽြႃးလူင်ရၶႅင်ႇ ဢၼ်ႁွင်ႉဝႃႈ မႁႃႇမျၢတ်ႈမုၼိ ၽႅဝ်ထိုင်မႃး ဝဵင်းလိူဝ်ႇ ဢၼ်ႁွင်ႉဝႃႈ ဝဵင်းမၢၼ်းတလေးၼၼ်ႉ ယွၼ်ႉပိူဝ်ႈ ၽုင်းတၼ်းၶူဝ်းယႂ်ႇ ၵူၼ်းလူႇၵူၼ်းဝႆႈ ဢမ်ႇထၢတ်ႇ ဢမ်ႇဝၢႆးလႄႈ ၶၢဝ်ႇငၢဝ်းၸဝ်ႈ ႁွတ်ႈၸွတ်ႇထိုင်ၵူႈတီႈၵူႈတၢင်း ႁွတ်ႈထိုင်ပႃး မိူင်းတႆး ၵဝ်ႈႁၢႆးႁေႃယူႇ။ တီႈမိူင်းၵဵင်းတုင်ၵေႃႈ ၶၢဝ်ႇငၢဝ်းၼႆႉ ႁွတ်ႈထိုင်ၵႂႃႇလႄႈ ထိုင်မႃး ပီၵေႃးၸႃႇ 1296 (ပီၶရိတ်ႉ 1908) ၸဝ်ႈၾၵဵင်းတုင် ၸိုဝ်ႈဝႃႈ ၸဝ်ႈၵွၼ်ၵႅဝ်ႈဢိၼ်းထရၢႆး ၸင်ႇပၢင်းဢဝ် ၸဝ်ႈဢၢတ်ႇယႃးထမ်းၵဵင်းငမ်း ဢိၵ်ႇလူၺ်ႈ သင်ႇၶႃႇၸဝ်ႈၶဝ်၊ ၵူၼ်းဝၢၼ်ႈၵူၼ်းမိူင်းၶဝ်သေ ႁဵတ်းပၢင်ၵုမ်ၵၼ် တႃႇတေၵႂႃႇသွၼ်းလေႃႇ ႁုၼ်ႇႁၢင်ႈ ၽြႃးမႁႃႇမျၢတ်ႈမုၼိ တီႈဝဵင်းလိူဝ်ႇသေ ပၢင်းမႃး မိူင်းၵဵင်းတုင်ၼႆယဝ်ႉ။ ယိူင်းဢၢၼ်းတႄႉ ႁႂ်ႈပဵၼ်ပုၼ်ႈတႃႇ သႃႇသၼႃႇမၼ်ႈၵိုမ်းယိုၼ်းႁိုင် ႁိူဝ်ႈႁိူင်းပိူင်းသႂ် ၼႆယဝ်ႉ။

သွၼ်းလေႃႇၽြႃး ပၢင်းမႃးၵဵင်းတုင်

ပီ 1282 (ၶရိတ်ႉ 1921) ပုၼ်ႈတႃႇတေ ဢဝ်ပုၼ်ႈၽွၼ်းသေ လူင်းၵႂႃႇဝဵင်းလိူဝ်ႇ ၵႂႃႇသွၼ်းလေႃႇၽြႃး ပၺ်ၸလေႃးႁႃႇၼၼ်ႉ ၸဝ်ႈၾၵဵင်းတုင် ၸင်ႇပၼ်ပုၼ်ႈၽွၼ်း လုင်းၽူဝ်းမိင် ဢိၵ်ႇ လုင်းပၼ်းၺႃးသွင်ၵေႃႉ ႁႂ်ႈဢဝ်ပုၼ်ႈၽွၼ်း တႃႇတေလူင်းၵႂႃႇ ဝဵင်းလိူဝ်ႇ မၢၼ်းတလေးၼၼ်ႉယဝ်ႉ။ ပီ 1283 (ၶရိတ်ႉ 1922) လုင်းပၼ်းၺႃးၶႃသွင်ၵေႃႉ ၸင်ႇလူင်းၵႂႃႇဝဵင်းလိူဝ်ႇ ၵႂႃႇႁူပ်ႉထူပ်း သြႃႇမေႃသွၼ်းၽြႃး ဢူးတိတ်ႉ ဢၼ်ယူႇသဝ်း ဝဵင်းၵဝ်ႇမၢၼ်းတလေး ၽၢႆႇတူၵ်း တႃႈရူတ်ႉၾႆးသေ ဢၢပ်ႈပၼ်ၶဝ် ႁႂ်ႈသွၼ်းလေႃႇပၼ် ႁုၼ်ႇႁၢင်ႈၽြႃး ဢၼ်မိူင်ၼင်ႇ မႁႃႇမျၢတ်ႈမုၼိၼၼ်ႉယဝ်ႉ။ တႄႇဢဝ် ၶေႃးၸဝ်ႈတေႃႇထိုင် ၵွၵ်းႁူဝ်ၸဝ်ႈၼၼ်ႉ လႆႈသႂ်ႇပႃး ၼမ်ႉၼၵ်း ၶမ်းၸႅတ်ႈ 1 ၸွႆႉပၢႆ 7 ၶၼ်ၵျၢပ်ႈ၊ ၼမ်ႉၼၵ်းငိုၼ်းၸႅတ်ႈ 17 ၸွႆႉယဝ်ႉ။ ပုၼ်ႈတႃႇ ႁုၼ်ႇႁၢင်ႈတင်းသဵင်ႈၼၼ်ႉ လႆႈပႃးထႅင်ႈ တွင်းလိူင် တွင်းလႅင်တင်းၼမ်သေ ၵႃႈၶၼ်မၼ်း လႆႈပၼ်ငိုၼ်းတိင်းၵႃးၵဝ်ႇ 15000 ၵျၢပ်ႈယဝ်ႉ။ ၼႂ်းၵႃႈ ၵႃႈၶၼ် 15000 ၼၼ်ႉ ၸဝ်ႈၾသီႇပေႃႉ ၸဝ်ႈၶျႄႇ လႆႈႁူႉႁၼ်ၸွမ်းလႄႈ မီးၸေႇတၼႃႇလီသေ ၸွႆႈထႅမ် လူႇတၢၼ်းပၼ် 7500 ၵျၢပ်ႈ ပုၼ်ႈတႃႇၶိုင်ႈၼိုင်ႈယဝ်ႉ။

ဝၢႆးသေ လေႃႇသွၼ်းယဝ်ႉ တႃႇတေပၢင်းမႃးမိူင်းၵဵင်းတုင်ၼၼ်ႉ ဢွၼ်တၢင်းသုတ်း လုၵ်ႉဢဝ် ဝဵင်းလိူဝ်ႇ ပၢင်းၵႂႃႇ ဝဵင်းသီႇပေႃႉယဝ်ႉ။ မိူဝ်ႈၼၼ်ႉ တၢင်းရူတ်ႉတၢင်းၵႃး ပႆႇမီးလႄႈ ႁုၼ်ႇႁၢင်ႈၽြႃးၼၼ်ႉ လႆႈပၢင်းၶိုၼ်ႈမိူဝ်း ပွတ်းလႂ်ပွတ်းၼၼ်ႉယဝ်ႉ။ ၸဝ်ႈၾသီႇပေႃႉ သႃႇၸဝ်ႈၶႄႇ ဢဝ်ပုၼ်ႈၽွၼ်း ယွၼ်းတၢင်းၸွႆႈထႅမ် ၵူၼ်းမိူင်း ဢဝ်လေႃႉသေ လုၵ်ႉသီႇပေႃႉ တေႃႉသူင်ႇ တေႃႇပေႃးႁွတ်ႈထိုင် ၽၢႆႇတူၵ်းၶူင်း တႃႈၵေႃႈယဝ်ႉ။

ၸဝ်ႈၾၵဵင်းတုင် ၸဝ်ႈၵွၼ်ၵႅဝ်ႈၵေႃႈ ယွၼ်းဢဝ် တၢင်းၸွႆႈထႅမ်ၵူၼ်းမိူင်း ၵူႈတီႈၵူႈတၢင်းသေ ဢွၼ်ၵၼ် မႃးပၢင်းႁုၼ်ႇႁၢင်ႈၽြႃး ၶၢမ်ႈမႃးဝၼ်းဢွၵ်ႇၶူင်းသေ ၸင်ႇဢဝ်ႁႅင်းၵူၼ်း ႁႅင်းလေႃႉဝူဝ်း လေႃႉၵႂၢႆး တၢင်ႇဢဝ်ႁုၼ်ႇႁၢင်ႈသေ သိုပ်ႇၶၢဝ်းတၢင်း မိူဝ်းၵဵင်းတုင်ယဝ်ႉ။ ၽွင်းမိူဝ်ႈၼၼ်ႉ ၽၢႆႇဢွၵ်ႇၶူင်းၵေႃႈ တၢင်းရူတ်ႉတၢင်းၵႃးပႆႇမီးၼင်ႇၵဝ်ႇ။ ၽွင်းမိူဝ်ႈ ပၢင်းဢဝ် ႁုၼ်ႇႁၢင်ႈၽြႃး ႁွတ်ႈမႃး ၵဵင်းတုင်ၼၼ်ႉ ပႆႇဢဝ်ၶဝ်ႈမိူင်းၵမ်းလဵဝ်။ ၶႃႈဝၢၼ်ႈၵူၼ်းမိူင်း ၸူမ်းသိူဝ်း ဢွၼ်ၵၼ်ႁႆႇၵွင်ႁႆႇမွင်း မႃးႁပ်ႉတွၼ်ႈ ၽၢႆႇတူၵ်းဝဵင်း တီႈႁိမ်းၶူဝ်ၼမ်ႉၶိုၼ်ၼၼ်ႉယဝ်ႉ။ ၸင်ႇႁဵတ်း သုမ်ႉမၢၼ်ႇတၢပ်ႈသေ ဢဝ်လိုဝ်ႈဝႆႉ တီႈၼၼ်ႉ ၸူဝ်ႈၵႅပ်ႉယူႇ။ လုၵ်ႉတီႈ ၶူဝ်ၼမ်ႉၶိုၼ်သေ ၸင်ႇတေၶိုၼ်းပၢင်းၶဝ်ႈၵႂႃႇၼႂ်းမိူင်းလႄႈ ၵူၼ်းမိူင်း ဢွၼ်ၵၼ်ပႂ်ႉႁပ်ႉ ဝႆႈသႃပႂ်ႉလူႇပႂ်ႉဝႆႈ ပေႃးတဵမ် သွင်ၽၢၵ်ႇၶၢင်ႈတၢင်းၵႂႃႇယူႇ။ ၸင်ႇပၢင်းဢဝ် ႁုၼ်ႇႁၢင်ႈၸဝ်ႈ မႃးသဝ်း တမ်ႈတီႈ ၶူင်ႇၵၢႆးၸွၼ်း (ယၢမ်းလဵဝ် ပဵၼ်ဝၢင်းမၢၵ်ႇၼင်) သေ ၸင်ႇႁဵတ်းၵျွင်းမႆႉၵျွင်းၶႃးတီႈၼၼ်ႈ ၸူဝ်ႈၵႅပ်ႉသေ ပၼ်ႁႂ်ႈၵူၼ်းဝၢၼ်ႈ ၵူၼ်းမိူင်း မႃးပူႇၸေႃႇ ဝႆႉသႃမူးၸႃးၵၼ်ယဝ်ႉ။ ႁုၼ်ႇႁၢင်ႈၽြႃးမႁႃႇမျၢတ်ႈမုၼိ လႆႈယူႇသဝ်း တမ်ႈတီႈ သုမ်ႉၵျွင်းၶႃးၼၼ်ႉၵႂႃႇ ဝႃႇသႃၼိုင်ႈယူႇ။

ႁဵတ်းလူႇၵျွင်းၽြႃး ၺႃးၼႂ်းၵၢင်ဝဵင်း

ပီၵေႃးၸႃႇ 1288 (ၶရိတ်ႉ 1927) ၸင်ႇလိူၵ်ႈဢွင်ႈတီႈသေ ႁဵတ်ႈလူႇတၢၼ်း ဝိႁၢၼ်ၽြႃးမႁႃႇမျၢတ်ႈမုၼိ ဢၼ်ဢဝ်ၶႅပ်းမႆႉသၵ်းမုင်းသေ ထိုမ်းမၼ်းၵေႃႈ ဢဝ်မႆႉႁဵတ်းလွင်ဝႆႉၼၼ်ႉယဝ်ႉ။ ဝၢင်းဝိႁၢၼ်ၵေႃႈ ဢဝ်ဢုတ်ႇၵေႃႇလွမ်ႉဝႆႉ သီႇၽၢႆႇယဝ်ႉ။ ပီၼၼ်ႉ ၼင်ႇၵဝ်ႇ ၸင်ႇပၢင်းဢဝ် ႁုၼ်ႇႁၢင်ႈၸဝ်ႈ ၶဝ်ႈသူႇတီႈၼႂ်း ဝိႁၢၼ်မႂ်ႇ ပၢင်းၶိုၼ်ႈသႂ်ႇၼိူဝ် ပလၢင်ႇတႅၼ်ႈၵႅဝ်ႈလူင်ယဝ်ႉ။ ပီၵေႃးၸႃႇ 1288 လိူၼ် 12 မႂ်ႇ 14 ၶမ်ႈ ၸဝ်ႈၾလူင်ၵဵင်းတုင် ၸဝ်ႈၵွၼ်ၵႅဝ်ႈ ဢွၼ်ႁူဝ် တေႃးႁဵတ်း ၽႃႈတၼ်းၸႂ်သေ လူႇတၢၼ်းၵႂႃႇ ဝၼ်းလိူၼ် 12 မူၼ်းၼၼ်ႉယဝ်ႉ။ တႃႇတေတေႃး ၽႃႈတၼ်းၸႂ်ၼၼ်ႉ လႆႈၵႂႃႇဢဝ် ၵၢၼ်ႈမူဝ် မႃးႁၵ်းၸၼ်ဢဝ် ယႂ်းမၼ်းသေ ႁဵတ်းပဵၼ်သဵၼ်ႈပဵၼ်မႆ တေႃးႁဵတ်းပဵၼ် ၼၼ်ႉယဝ်ႉ။

ပီၵေႃးၸႃႇ 1300 တဵမ် (ၶရိတ်ႉ 1939) ၸဝ်ႈၼၢင်းၽ မႁႃႇတေႇဝီႇ ႁေႃၵဵင်းငၢမ်း ၸိုဝ်ႈဝႃႈ ၸဝ်ႈၼၢင်းၵျႃႇၺုၼ်ႉ ၸင်ႇဢုပ်ႇၵုမ် မေႃမိုဝ်းၶဝ်သေ ၶိုၼ်းမႄးၵုမ်းလုမ်းလႃး ၵျွင်းၽြႃးမႁႃႇမျၢတ်ႈမုၼိ ၵဵင်းတုင်ယဝ်ႉ။ ၸင်ႇၵွၵ်းပႅတ်ႈ ၶႅပ်းမုင်းမႆႉသၵ်းသေ မႄးလၢႆႈသႂ်ႇ ၶႅပ်းလဵၵ်းယဝ်ႉ။ သမ်ႉႁဵတ်းပႃး ၽုင်ႇႁၢၼ်ႉပြသၢတ်ႈသေ လူႇတၢၼ်းၵႂႃႇယဝ်ႉ။

ပီၵေႃးၸႃႇ 1303 (ၶရိတ်ႉ 1942) ၽွင်းမိူဝ်ႈ ၸမ်တေပဵၼ်သိုၵ်းၵမ်ႇၽႃႇ ပွၵ်ႈသွင်၊ ၽွင်းမိူဝ်ႈၾႆးသိုၵ်း ပႆႇလၢမ်းထိုင် မိူင်းၵဵင်းတုင်ၼၼ်ႉ မိူင်းၵဵင်းတုင်ၵေႃႈ မီးတႂ်ႈဢႃႇၼႃႇသိုၵ်းသေ ၶုၼ်သိုၵ်းဢဵင်းၵလဵတ်ႈ ၵပ်ႉပတဵင်ႇ ရေႃးပၢတ်ႉ ၵုမ်းၵမ်ဝႆႉယဝ်ႉ။ ပေႃးပဵၼ်သိုၵ်းမႃးၸိုင် ၵူဝ်ၶူဝ်းၶွင်ၵႃႈၶၼ်ယႂ်ႇ ၵႅဝ်ႈသႅင် ဢၼ်သႂ်ႇဝႆႉတီႈ ပၢၼ်းၵုမ်းလႄႈ တၢင်းၵႄး မႁႃႇမျၢတ်ႈမုၼိၼၼ်ႉလႄႈသင် ၶူဝ်းႁွႆႈၶူဝ်းတိုဝ်း ၸဝ်ႈၼၢင်းၵျႃႇၺုၼ်ႉ ဢၼ်ၸဝ်ႈၾလူင် ပၼ်ႁႂ်းတိုဝ်းၶဝ်ႈပွႆးလၢမ်းၼၼ်ႉလႄႈသင် ၸင်ႇဢဝ်ဢၢပ်ႈပၼ် ၼႂ်းမိုဝ်း ၵပ်ႉပတဵင်ႇ ရေႃးပၢတ်ႉသေ ပၼ်မိူဝ်းသိမ်းဝႆႉ တီႈၼႂ်းယေးငိုၼ်း ဝဵင်းတူၼ်ႈတီးယဝ်ႉ။ ဝၢႆးသေ သိုၵ်းၵမ်ႇၽႃႇ ပွၵ်ႈသွင် ယဝ်ႉတူဝ်ႈၵႂႃႇ ၶူဝ်းၵႅဝ်ႈသႅင်ငိုၼ်းၶမ်း ၶွင်ၵဵင်းတုင်ၸိူဝ်းၼၼ်ႉ ပႃးၵႂႃႇ မိူင်းဢိၼ်ႇတိယယဝ်ႉႁိုဝ် ဢမ်ႇၼၼ် လူႉလႅဝ်ႁၢႆလၢႆၵႂႃႇမိူဝ်ႈၽွင်းပဵၼ်သိုၵ်းၵမ်ႇၽႃႇ ပွၵ်ႈသွင်ၼၼ်ႉယဝ်ႉႁိုဝ်ၼႆၵေႃႈ ၽႂ်ဢမ်ႇၸွမ်းႁူႉ။

ပီၵေႃးၸႃႇ 1308-10 (ၶရိတ်ႉ 1947- 49) ၽၢႆႇၼိူဝ်ၸွမ်မုင်းမၼ်းၼၼ်ႉ ၶိုၼ်းမႄးတၢင်ႇထီး တၢင်ႇၸွင်ႈလူႇတၢၼ်းသေ ၸွမ်ႈၸဵင်ႇ ပြသၢတ်ႈၵေႃႈ ၶိုၼ်းဢဝ်ၶႅပ်းလဵၵ်း ၶႅၵ်းႁဵတ်း မွၵ်ႇၼွၼ်းၶိူဝ်း ပိၵ်ႇမိင်ႇတင်ႈသေ သႂ်ႇဝႆႉယဝ်ႉ။ ႁူဝ်ႉဢုတ်သီႇၼႃႈသီႇၽၢႆႇၵေႃႈ ယႃႉလဵဝ်သေ ၶိုၼ်းႁဵတ်း ႁူဝ်ႉလဵၵ်းလွမ်ႉဝႆႉယဝ်ႉ။

ပီၵေႃးၸႃႇ 1311 ၶိုၼ်းမႄးပူတ်းပႅတ်ႈ ထိုမ်းမႆႉ ဢၼ်ႁွင်းဝႆႉသေ ၶိုၼ်းဢဝ်ၶႅပ်းသတၢႆး 4 x 4 ထၢပ်ႈသႂ်ႇဝႆ့ ၶိုၼ်းယွမ်ႉႁၢၼ်လႅင် တဵၵ်းၶမ်းဝႆႉယဝ်ႉ။ လိူဝ်သေၼၼ်ႉ ၸွမ်းၽႃၽၢႆႇၼႂ်းၼၼ်ႉၵေႃႈ တႃးႁၢၼ်လႅင်သေဢမ်ႇၵႃး ဢဝ်ၶမ်းတဵၵ်းသေ ႁဵတ်းဝႆႉ ႁၢင်ႈၸၢတ်ႈၼေႃႇၶမ်းၽြႃး သိပ်းၸၢတ်ႈ ဢိၵ်ႇပႃး ၸိုဝ်ႈၸဝ်ႈတႃႇၼမၼ်းယဝ်ႉ။

ပွႆးၽြႃးမႁႃႇမျၢတ်ႈ ႁဵတ်းဢမ်ႇၵၢတ်ႈၵူႈပီ

ပီၵေႃးၸႃႇ 1312 (ၶရိတ်ႉ 1950) ဝၼ်းလိူၼ် 12 မူၼ်း ၸဝ်ႈၾၵဵင်းတုင် ၸိုဝ်ႈဝႃႈ ၸဝ်ႈၸၢႆးလူင်ၶေႇမႃႇထိပတိ ဢွၼ်ႁူဝ်ၸိူဝ်ႉၶိူဝ်းပီႈၼွင်ႉ ႁူမ်ႈလူၺ်ႈ ၸဝ်ႈတႃႇၼသေ ၼႂ်ၼၼ်ႉ ပၢင်းဢဝ် သင်ႇၶႃႇၸဝ်ႈ 85 ၸဝ်ႈ ၶဝ်ႈထႅဝ် လူႇတၢၼ်းၶဝ်ႈသွမ်းသၢၼ်ယဝ်ႉ တၢင်ႇထီးလူႇတၢၼ်း မုၵ်ႉလူင်သီႇၼႃႈ ယၢတ်ႇၼမ်ႉ လူႇတၢၼ်းၵႂႃႇယဝ်ႉ။ တႄႇဢဝ်ပီၼၼ်ႉမႃး ပွႆးၽြႃးမႁႃႇမျၢတ်ႈမုၼိ မိူင်းၵဵင်းတုင်ၵေႃႈ မၵ်းမၼ်ႈပဵၼ် ဝၼ်းလိူၼ်သိပ်းသွင်မူၼ်းၵႂႃႇ ၵူႈပီယဝ်ႉ။