ရꩡ်ꩡုမႃလႃဝိမႃၼဝတ်ထု၊ ၼၢင်းၽီ ပိုင်ႈဢိင်ၽြႃး
12 - ရꩡ်ꩡုမႃလႃဝိမႃၼဝတ်ထု၊ ၼၢင်းၽီ ပိုင်ႈဢိင်ၽြႃး[မႄးထတ်း | မႄးထတ်းငဝ်ႈငႃႇ]
မိူဝ်ႈၸၢတ်ႈၵွၼ်ႇ တမ်ႈတီႈဝၢၼ်ႈၵယႃႇ ၽွင်းမိူဝ်ႈပဵၼ် ၶႃႈၸႂ်ႉ ပုၼ်ႇၼႃး ယွၼ်ႉပိူဝ်ႈ လႆႈၺႃးၵႂၢမ်းထႃႉလႃႇ ၵေႃႉပဵၼ်ၸဝ်ႈႁိူၼ်းလႄႈ ပၢႆႈဢွၵ်ႇႁိူၼ်းမႃး ၽွင်းတေမႃးၽႅၼ်ၶေႃးတၢႆၼၼ်ႉ လႆႈမႃးၺႃးၽြႃးပဵၼ်ၸဝ်ႈ လႆႈငိၼ်း ၶေႃႈတိုၵ်းသူၼ်းဝႃႈ ပိုင်ႈဢိင်ၽြႃးပဵၼ်ၸဝ်ႈလႄႈၼႆသေ သိုပ်ႇၶတ်းၸႂ်ၵႂႃႇ မီးၸႂ်သတ်ႉထႃႇ ဢမ်ႇသုတ်ႈဢမ်ႇႁူၼ် လႆႈႁူႉ ႁၼ်သတ်ႉၸႃႇသီႇပႃးသေ လႆႈတၢႆႁွတ်ႈထိုင် မိူင်းၽီတႃႇဝတိမ်ႇသႃႇလႄႈ ၼၢင်းၽီၶဝ်တင်းၼမ် ဢွၼ်ၵၼ်ယွင်ႈယေႃး ယူႇလႄႈ ၼၢင်းၽီဢိူၺ်း...
- 826။ ၼၢင်းၽီ မႂ်းၼၢင်းၼႆႉ ဢူငဝ်းႁၢင်ႈၽၢင်မႂ်း ပဵၼ်ဢၼ်လီႁၢၼ်ႉၸႂ်တႄႉယဝ်ႉ။ တိၼ်မိုဝ်းမႂ်းၼၢင်းၵေႃႈ မေႃတမ်းဝၢင်း ၵႃႈၸွမ်း သဵင်တွႆႇဢၼ်လင်မေႃးမႃးၼၼ်ႉတႄႉယဝ်ႉ။
- 827။ ၽွင်းမိူဝ်ႈ မႂ်းၼၢင်းၵႃႈၼၼ်ႉ တမ်ႈတီႈ တူဝ်ၶိင်းလဵၵ်ႉယႂ်ႇမႂ်းၼၢင်းၼၼ်ႉ သဵင်ႁႆႇတိုင်ႈၽီၶဝ် မေႃးလင်မႃး လီထွမ်ႇမူၼ်ႈသိူဝ်းၸႂ်တႄႉတႄႉ။
- 828။ ၽွင်းမိူဝ်ႈ မႂ်းၼၢင်းၵႃႈၼၼ်ႉ တမ်ႈတီႈ တူဝ်ၶိင်းလဵၵ်ႉယႂ်ႇမႂ်းၼၢင်းၼၼ်ႉ ဢၢႆသႅဝ်ႁွမ်ႁူၺ်း ႁွမ်ၸွတ်ႇ ဢွၵ်ႇမႃး လီသုတ်ႇၼူမ်ထုၵ်ႇၸႂ်တႄႉတႄႉ။
- 829။ ပေႃးဝႃႈ လိမ်ႇမိတ်းတူဝ်ၼႆ ၶိူင်းၶူဝ်း ဢၼ်ပၵ်းၼဵပ်းဝႆႉ တီႈၸွၵ်းႁူဝ်မႂ်းၼၢင်းၼၼ်ႉ လႆႈငိၼ်းသဵင် တူႇရိယႃႇ ဢၼ်မီးဢင်ႇၵႃႇ ႁႃႈပိူင်ယဝ်ႉ။
- 830။ ပေႃးဝႃႈ လူမ်ႈယဵၼ်ပဝ်ႇၸိုင် မွၵ်ႇၸိူဝ်းဢၼ်ပၢၵ်းဝႆႉတီႈ မၢၵ်ႇႁူဝ်ပၢၼ်းၵုမ်းၼၼ်ႉ ၶွၼ်းဝႆသေ ဢွၵ်ႇမႃး သဵင်တူႇရိယႃႇ ဢၼ်မီးဢင်ႇၵႃႇ ႁႃႈပိူင်ယဝ်ႉ။
- 831။ မွၵ်ႇဢၼ်ပၵ်းဝႆႉ တီႈႁူဝ်မႂ်းၼၢင်းၼၼ်ႉ ႁွမ်ႁွမ်ႁူၺ်းႁူၺ်း ႁဵတ်းႁႂ်ႈႁူဝ်ၸႂ်သိူဝ်းလႄႈ မိူၼ်ၼင်ႇ မွၵ်ႇၽီမၺ်ႇၸူႇသၵ ႁွမ်ၸွတ်ႇၵႂႃႇ ၵူႈပႃႈၵူႈၽၢႆႇယဝ်ႉ။
- 832။ ၼၢင်းၽီ မႂ်းၼၢင်းၼႆႉ ၵူၺ်းလႆႈသုတ်ႇၼူမ်ဢၢႆႁွမ်ၼၼ်ႉယူႇၵူၺ်းယဝ်ႉ။ ၵူၺ်းလႆႈ တူၺ်းႁၼ် ႁၢင်ႈၽၢင် ဢၼ်ပဵၼ်မႃး တမ်ႈတီႈ ၽီၶဝ်ၼၼ်ႉၵူၺ်းယဝ်ႉ။ ၽွၼ်းလီဢၼ်ၼႆႉ ပဵၼ်ၽွၼ်းလီ ၵုသူဝ်ႇဢၼ်လႂ်ၼေႃး။ ၵဝ်ထမ်မႂ်းယူႇယဝ်ႉ။ တွပ်ႇမႃးလႄႈ (ၼႆ ၸဝ်ႈမွၵ်ႉၵလၢၼ်ႇ ထၢမ်ယဝ်ႉ)။
- 833။ ၶႃႈၼၢင်းၼႆႉ ၸၢတ်ႈၵွၼ်ႇ လႆႈပဵၼ်ၶႃႈၸႂ်ႉ ပုၼ်ႇၼႃး တမ်ႈတီႈ ဝၢၼ်ႈၵယႃႇယဝ်ႉ။ ၶႃႈၼၢင်းၼႆႉ ၽုင်းၵၢမ်ႇတႅမ်ႇယေႃႈၼႃႇၶႃႈ။ ဢမ်ႇမီးဢူႁိၵ်ႈသေဢိတ်း။ ၵူၼ်းတင်းၼမ် ႁူႉၸိုဝ်ႈၶႃႈၼၢင်းဝႃႈ ‘ရၸ်ၸုမႃလႃ’ၼႆဢေႃႈ။
- 834။ ယွၼ်ႉပိူဝ်ႈ ၸဝ်ႈႁိူၼ်းပွင်ႉထႃႈလႄႈသင်၊ ယွၼ်ႉပိူဝ်ႈ ႁႅမ်ပေႃႉလႄႈသင်၊ ယွၼ်ႉပိူဝ်ႈ လွၵ်ႇငိူတ်ႈလႄႈသင်၊ ၸႂ်ဢမ်ႇသိူဝ်းသႃႇ ၸင်ႇဢဝ် ဢုမ်ၼမ်ႉဢွၵ်ႇႁိူၼ်းသေ တေႁဵတ်းၵဵင်ႈ ဢၢင်ႈၵႂႃႇတဵၵ်းၼမ်ႉၼႆယဝ်ႉ။
- 835။ ၸင်ႇဢဝ် ဢုမ်ၼမ်ႉ တမ်းဝႆႉ တီႈႁိမ်းၽင်ႇတၢင်းသေ (ဝူၼ်ႉဝႃႈ) ၵဝ်ၼႆႉ သိုပ်ႇမီးသၢႆၸႂ်ယူၵေႃႈ တေမီးၼမ်ႉတွၼ်းၽွၼ်းလီသင်ၼေႃး။ (ၸင်ႇဝူၼ်ႉဝႃႈ) ၵဝ်တေၵႂႃႇတၢႆ တမ်ႈတီႈ ၼႂ်းထိူၼ်ႇၼႆႉၵူၺ်းယဝ်ႉၼႆသေ ၶဝ်ႈၵႂႃႇၼႂ်းထိူၼ်ႇယဝ်ႉ။
- 836။ ၸင်ႇႁဵတ်း တူင်ႇၸိူၵ်ႈႁႂ်ႈမၼ်ႈၵိုမ်း ဢဝ်ၵွင်ႉႁွႆႈ တီႈတူၼ်ႈမႆႉသေ ၸင်ႇဝၢႆႇတူၺ်း ၵူႈပႃႈၵူႈၽၢႆႇ ၸွင်ႇမီး ၵူၼ်း ၶဝ်ႈမႃးၼႂ်းထိူၼ်ႇၼႆႉၼေႃး ၼႆယူႇ။
- 837။ တမ်ႈတီႈ ၼႂ်းထိူၼ်ႇ ႁိမ်းတူၼ်ႈမႆႉၼၼ်ႉ ၸင်ႇလႆႈႁၼ် မုၼ်ၶမ်းၽြႃး ၸဝ်ႈၽူႈဢၼ် မေႃႁဵတ်းပၼ် ၽွၼ်းပၢင်ႈသတ်ႉတဝႃႇ ဢၼ်ၶဝ်ႈသၢၼ်ႇတြႃးဝႆႉယူႇ ဢၼ်ဢမ်ႇမီးၽေးၶဵၼ်သင်ၼၼ်ႉယူႇယဝ်ႉ။
- 838။ ၵေႃႉဢၼ်မႃးမီးယူႇ ၼႂ်းထိူၼ်ႇၼႆႉ ပဵၼ်ၽႂ်ၼေႃး။ ပဵၼ်ၵူၼ်းႁႃႉ ပဵၼ်ၽီႁႃႉၼႆ ၶႃႈၼၢင်းတူၵ်းၸႂ် လႂ်တိုၼ်ႇသေ ပဵၼ်ၺၢၼ်ႇတၢင်းႁူႉမႃးယဝ်ႉ။ ၶူၼ်တုမ်ႇၼိူဝ်ႉ ဢၼ်ဢမ်ႇယၢမ်ႈသၢၼ်ႈၼၼ်ႉၵေႃႈ သၢၼ်ႈမႃးယဝ်ႉ။
- 839။ ယွၼ်ႉပိူဝ်ႈ လႆႈႁၼ် မုၼ်ၶမ်းၽြႃး ၸဝ်ႈၽူႈဢၼ်လီၼပ်ႉယမ် ဢၼ်ထိူၵ်ႈႁပ်ႉဢဝ် ၵူၼ်းတင်းသဵင်ႈ ၼပ်ႉယမ်၊ ဢၼ်ၽၢတ်ႇယၢၼ် ထိူၼ်ႇၵိလေႇသႃႇသေ ႁွတ်ႈထိုင်ၼိပ်ႉပၢၼ်ႇလႄႈ ၸႂ်ၶႃႈၼၢင်း ပဵၼ်ဢၼ် ၸိုၼ်ႈသႂ် တႄႉယဝ်ႉ။
- 840။ ယွၼ်ႉပိူဝ်ႈလႆႈႁၼ် မုၼ်ၶမ်းၽြႃး ပုၵ်ႉၵူဝ်ႇၵေႃႉဢၼ် ပႂ်ႉထိင်းဢိၼ်ႇတရေႇၼိမ်ၸိုင်ႈ၊ ဢၼ်မူၼ်ႈသိူဝ်းလူၺ်ႈ (ဢရႁတ်တၽူဝ်ႇ) သၢၼ်ႇ၊ ဢၼ်ၸႂ်ဢႃႇရူင်ႇ ဢမ်ႇၽႅဝ်တၢင်းၼွၵ်ႈၼၼ်ႉလႄႈ ၸႂ်ၶႃႈၼၢင်း ၸိုၼ်ႈၸၢင်ႇပၢင်ႇသႂ်ၵႂႃႇ တႄႉတႄႉယဝ်ႉ။ ပုၵ်ႉၵူဝ်ႇၵေႃႉၼႆႉ မၼ်းတိုၼ်းဢမ်ႇၸႂ်ႈ ၵူၼ်းသႃမႆး (သႃႇမၺ)။
- 841။ တႃႇတေလႆႈၵႂႃႇထူပ်းႁၼ် မုၼ်ၶမ်းၽြႃးၼၼ်ႉ မိူၼ်ၼင်ႇ လီၵူဝ်ႁႄ ၶုၼ်သၢင်ႇသီႈ ဢၼ်ယူႇဝႆႉ ၼႂ်းထမ်ႈၼင်ႇၼၼ် (ၵူၼ်းၽူႈမီး တၢင်းယုမ်ႇယမ်ၽိတ်း မိတ်ႉသႃႇတိတ်ႉထိ)ၶဝ် ၵိုင်ႇလီၵူဝ်လႄႈ ၸၢင်ႈႁဵတ်းႁႂ်ႈ (ၸိူဝ်းၶဝ် ဢၼ်မီး တၢင်းယုမ်ႇယမ်ၽိတ်း) ၵူဝ်ႁႄလႄႈ (ၵေႃႉဢၼ်မီး ၸႂ်ၽႅၵ်ႇပိူင်ႈၶဝ် ယၢပ်ၸႂ်တႃႇတေထူပ်းႁၼ်) ၼင်ႇၼၼ် တႃႇတေလႆႈႁၼ် မွၵ်ႇမႆႉလိူဝ်ႇၵီႈၼၼ်ႉ ယၢပ်ႇၼင်ႇၼၼ် တႃႇတေလႆႈႁၼ် မုၼ်ၶမ်းၽြႃး ဢၼ်ဝႃႈၼၼ်ႉၵေႃႈ ယၢပ်ႇတႄႉတႄႉယဝ်ႉ။
- 842။ မုၼ်ၶမ်းၽြႃးၼၼ်ႉ ဢဝ်ၶေႃႈၵႂၢမ်းဢူၼ်ႈဢွၼ်ႇ တူင်ႉတၵ်ႉႁွင်ႉလၢတ်ႈၸႃတေႃႇ ရတ်ႉၸုမႃႇလႃႇသေ ပူင်လၢတ်ႈပၼ် ႁႂ်ႈၶႃႈႁဝ်း “တမ်ႈတီႈ ၽြႃးၼၼ်ႉ ပိုင်ႈဢိင်ၵိူဝ်းလီလႄႈ”ၼႆယဝ်ႉ။
- 843။ ၶႃႈၼၢင်းၼႆႉ ယွၼ်ႉပိူဝ်ႈ လႆႈငိၼ်း ၶေႃႈၵႂၢမ်း ဢၼ်ဢမ်ႇမီးတၢင်းၽိတ်း ဢၼ်မီးတီႈပွင်ႇ ဢၼ်ၸိုၼ်ႈသႂ်ဢူၼ်ႈဢွၼ်ႇ ဢၼ်ဝၢၼ်ႁူ ဢၼ်ႁဵတ်းႁႂ်ႈ လွင်ႈလိူတ်ႇမႆႈ ယဵၼ်ႁၢႆလႄႈ (ပဵၼ်ၸႂ်ၼပ်ႉယမ်ၵႂႃႇယဝ်ႉ)။
- 844။ မုၼ်ၶမ်းၽြႃး ဢၼ်မေႃႁဵတ်းပၼ် ၽွၼ်းပၢင်ႈသတ်ႉတဝႃႇတင်းသဵင်ႈၼၼ်ႉ ႁူႉထိုင် လွင်ႈၶႃႈၼၢင်း မီးၸႂ် ၽိူၵ်ႇၸိုၼ်ႈၶၢဝ်သႂ် မီးၸႂ်ငမ်ႇမႅၼ်ႈၽႃႇဝၼႃႇလႄႈ ၸင်ႇတေသင်ႇသွၼ် ၶႃႈၼၢင်းယဝ်ႉ။
- 845။ ၼႆႉပဵၼ် တြႃးတုၵ်ႉၶသတ်ႉၸႃႇယဝ်ႉ။ ၼႆႉပဵၼ် တြႃးသမုတယသတ်ႉၸႃႇ ဢၼ်ႁဵတ်းႁႂ်ႈပဵၼ် တၢင်း တုၵ်ႉၶယဝ်ႉ။ ၼႆႉပဵၼ် ၼိရေႃးထသတ်ႉၸႃႇ ဢၼ်တုၵ်ႉၶ မွတ်ႇဝွတ်ႈငိမ်းယဵၼ်ယဝ်ႉ။ ၼႆႉပဵၼ် မၵ်ႉၵင်ႇပႅတ်ႇပႃး တႃႇတေႁွတ်ႈထိုင် ၼိပ်ႉပၢၼ်ႇယဝ်ႉၼႆ ႁေႃးပၼ်ၶႃႈၼၢင်း ၼင်ႇၼႆယဝ်ႉ။
- 846။ ၶႃႈၼၢင်း လႆႈယၼ်မၼ်ႈ တမ်ႈတီႈ ၼိူဝ်ၶေႃႈသင်ႇသွၼ် မုၼ်ၶမ်းၽြႃး ဢၼ်မေႃဢီးလူတႃႇသေႇ ဢၼ်မေႃပၼ် ဢေႃးဝႃႇတ ၵတ်ႉၶႅၼ်ႇၼၼ်ႉသေ လႆႈႁူႉႁၼ်ႁွတ်ႈထိုင် တီႈလွတ်ႈတၢင်းတၢႆ တီႈၼိပ်ႉပၢၼ်ႇ ဢၼ်ဢမ်ႇမီး လွင်ႈလူႉႁၢႆတၢႆၶွႆႈ ဢၼ်မၢၵ်ႈၺၢၼ်ႇၽူဝ်ႇၺၢၼ်ႇ ပဵၼ်လွင်ႈတၢင်းၼၼ်ႉယဝ်ႉ။
- 847။ ၶႃႈၼၢင်းမီး ၸႂ်ယုမ်ႇယမ်တမ်ႈတီႈ (ရတၼႃႇသၢမ်ပိူင်) ဢမ်ႇသုတ်ႈဢမ်ႇႁူၼ်ဢေႃႈ။ ယွၼ်ႉပိူဝ်ႈ လွင်ႈတၢင်းငဝ်ႈငႃႇ ဢၼ်ႁူႉႁၼ်သတ်ႉၸႃႇသီႇပႃးသေ ဢဝ်သတ်ႉထႃႇတြႃး ႁူႉႁၼ်ထိုင် ဢမ်ႇၶွၼ်းဢမ်ႇဝႆလႄႈ (မုၼ်ၶမ်းၽြႃးၼႆႉ မီးၵုင်ႇမုၼ်ငဝ်း သမ်ႇမႃႇသမ်ႇပုတ်ႉထ တဵမ်ထူၼ်ႈယဝ်ႉ။ တြႃးၸဝ်ႈၼၼ်ႉ မီးၵုင်ႇမုၼ်ငဝ်း သွၵ်ႉ ၶႃႇတ... ၸိူဝ်းၼၼ်ႉ တဵမ်ထူၼ်ႈယဝ်ႉ။ သင်ႇၶႃႇၸဝ်ႈၼၼ်ႉ မီးၵုင်ႇမုၼ်ငဝ်း သုပ်ႉပတိပၼ်ႇၼ... ၸိူဝ်းၼၼ်ႉ တဵမ်ထူၼ်ႈယဝ်ႉ)ၼႆသေ (ၶႃႈၼၢင်း) ပဵၼ် လုၵ်ႈယိင်းဢူၵ်းၸႂ် မုၼ်ၶမ်းၽြႃးယဝ်ႉ။
- 848။ ဢၼ်ပဵၼ်ၶႃႈၼၢင်းၼႆႉ ဢမ်ႇမီးၽေးၶဵၼ်သင်သေ လႆႈၵျေႃႇမူၼ်ႈသိူဝ်းၸႂ်ယဝ်ႉ။ လႆႈႁူမ်ၸူမ်းယဝ်ႉ။ လႆႈပၵ်းမွၵ်ႇ ၽီၶဝ်ယဝ်ႉ။ လႆႈသုတ်ႉဢိုၵ်ႉၵိၼ် ၼမ်ႉၸဵမ်းၼမ်ႉဝၢၼ် (ဢၼ်ႁဵတ်းႁႂ်ႈတူဝ်လႄႈသဵင်) ဢူၼ်ႈဢွၼ်ႇ ၼၼ်ႉယဝ်ႉ။
- 849-850။ တူႇရိယႃႇ ဢႃꩮမ်ၿ၊ တူႇရိယႃႇၷၷ်ၷ၊ တူႇရိယႃႇꧤိမ၊ တူႇရိယႃႇသႃꩪု၊ တူႇရိယႃသံသယ၊ တူႇ ရိယႃပွၵ်ႉၶရ၊ တူႇရိယႃႇသုၽသ်သ ၸိူဝ်းႁူၵ်းမိုၼ်ႇၼၼ်ႉ ႁဵတ်းႁႂ်ႈလွင်ႈႁၢၼ်ႉၸႂ် လွင်ႈၸူမ်းၸႂ်ၶႃႈၼၢင်း တူင်ႉတိုၼ်ႇ ယဝ်ႉ။ ၼၢင်းၽီဝီၼႃမွၵ်ႉၶ၊ ၼၢင်းၽီၼၼ်ႇတႃႇ၊ ၼၢင်းၽီသုၼၼ်ႇတႃႇ၊ ၼၢင်းၽီသေႃးၼတိၼ်ႇၼႃႇ၊ ၼၢင်းၽီ သုၸိမ်ႇႁိတႃႇ-
- 851-2-3-4။ ၼၢင်းၽီဢလမ်ႇပုသႃႇ၊ ၼၢင်းၽီမိတ်ႉသၵေႇသီႇ၊ ၼၢင်းၽီပုၼ်ႇတရိၵႃႇ၊ ၼၢင်းၽီဢတိၻႃႇရုၼီႇ၊ ၼၢင်းၽီဢေႇၼီႇၽတ်ႉသ၊ ၼၢင်းၽီသုၽတ်ႉသႃႇ၊ ၼၢင်းၽီသုၽတ်ႉတႃႇ၊ ၼၢင်းၽီမုၻုဝွတိၼီႇ ၼၢင်းၽီၸိူဝ်း ဢၼ်ဝႃႈမႃးၼႆႉလႄႈ ၼႂ်းၼၢင်းၽီၶဝ် ဢၼ်လီယွင်ႈယေႃးၸိူဝ်းၼၼ်ႉၵေႃႈ ႁဵတ်းႁႂ်ႈလွင်ႈတၢင်းၸူမ်းသိူဝ်းၶႃႈၼၢင်း တူင်ႉတိုၼ်ႇယဝ်ႉ။ ၼၢင်းၽီၸိူဝ်းၼၼ်ႉ ပေႃးဝႃႈ ႁွတ်ႈထိုင် ၶၢဝ်းယၢမ်းသၢင်ႇထုၵ်ႇၸိုင် ၶဝ်မႃးၸူးတမ်ႈတီႈ ၶႃႈၼၢင်း သေ လၢတ်ႈဝႃႈ ႁဝ်းတေၵႃႈၼႄ၊ တေႁွင်ႉၵႂၢမ်းၼႄသေ ႁဵတ်းႁႂ်ႈ ၸဝ်ႈၼၢင်းႁဝ်း လႆႈမူၼ်ႈသိူဝ်းၸႂ်ၵွၼ်ႇၼႆယဝ်ႉ။ သူၼ်သိူဝ်းလူင် မိူင်းၽီတႃႇဝတိမ်ႇသႃႇ ဢွင်ႈတီႈ ဢမ်ႇမီးလွင်ႈမႆႈၸႂ် ဢွင်ႈတီႈ ႁဵတ်းႁႂ်ႈသိူဝ်းၸႂ်ၼႆႉ ဢမ်ႇၸႂ်ႈဢွင်ႈတီႈ ၵူၼ်းဢမ်ႇႁဵတ်းၵၢၼ်လီၶဝ်။ ၵူၺ်းပဵၼ် ဢွင်ႈတီႈ ၵူၼ်းဢၼ်ႁဵတ်းၵၢၼ်လီၶဝ်ၵူၺ်း။ ၵေႃႉဢၼ် ဢမ်ႇႁဵတ်းၵၢၼ်တၢင်း လီၼၼ်ႉ ၸၢတ်ႈၼႆႉလႄႈသင်၊ ၸၢတ်ႈၼႃႈလႄႈသင် ဢမ်ႇလႆႈသိူဝ်းသႃႇ။
- 855။ ၵေႃႉဢၼ် ႁဵတ်းၵၢၼ်တၢင်းလီၼၼ်ႉၵူၺ်း ၸၢတ်ႈၼႆႉလႄႈသင်၊ ၸၢတ်ႈၼႃႈလႄႈသင် လႆႈသိူဝ်းသႃႇ ယဝ်ႉ။ ၵူၼ်းၸိူဝ်းဢၼ် ၶႂ်ႈမႃးပဵၼ် မူႇၸုမ်းလုမ်းလၢင်း ၽီတႃႇဝတိမ်ႇသႃႇၶဝ်ၼၼ်ႉ ၵိုင်ႇလီႁဵတ်းၵၢၼ်လီၵုသူဝ်ႇ ၼမ်ၼမ်ယဝ်ႉ။ ၵႂၢမ်းၶေႃႈၼႆႉ မၢၼ်ႇမႅၼ်ႈဢိူဝ်ႈ။ ၵေႃႉဢၼ်လႆႈႁဵတ်းမႃး ၵၢၼ်တၢင်းလီၼၼ်ႉ တမ်ႈတီႈမိူင်းၽီ လႆႈမႃး ၸၢမ်ႇပူၺ်ႈ ၸီႈၸိမ်ႇၽီ တဵမ်ထူၼ်ႈသေ လႆႈမူၼ်ႈသိူဝ်းယဝ်ႉ။
- 856။ မုၼ်ၶမ်ႈၽြႃးၶဝ်ၸဝ်ႈ ပဵၼ်ၽြႃးမႃးၼႆႉ ပဵၼ်ပုၼ်ႈတႃႇ ၽွၼ်းလီ သတ်ႉတဝႃႇတင်းလၢႆယဝ်ႉႁေႃး။ မုၼ်ၶမ်းၽြႃးၶဝ်ၸဝ်ႈၼႆႉ ပဵၼ်ၽူႈထိူၵ်ႈႁပ်ႉဢဝ် တၢင်းလူႇတၢင်းတၢၼ်းထွတ်ႈမျၢတ်ႈ ၵူၼ်းၶဝ်ယဝ်ႉ။ ဢရိယႃႇသင်ႇၶႃႇ ၶဝ်ၸဝ်ႈၼႆႉ ပဵၼ်ႁႆႈၼႃးၽုၼ်ႇလိၼ်လီ ပုၼ်ႈတႃႇ တေၽုၵ်ႇသွမ်ႈ ၸိူဝ်ႉၽၼ်းၵၢၼ်တၢင်းလီယဝ်ႉ။ ၶဝ်ၸဝ်ႈၸိူဝ်းၼႆႉ ဢၼ်ၵိုင်ႇလီႁဵတ်းၼၼ်ႉ ၶဝ်ၸဝ်ႈတိုဝ်းၵမ်တဵမ်ထူၼ်ႈယဝ်ႉလႄႈ ၵေႃႉဢၼ်လႆႈလူႇတၢၼ်းပူႇၸေႃႇၶဝ်ၼၼ်ႉ လႆႈၵႂႃႇ မူၼ်ႈသိူဝ်း တမ်ႈတီႈ မိူင်းၽီယဝ်ႉ (ၼႆ လၢတ်ႈၵႂႃႇယဝ်ႉ)။
ရꩡ်ꩡုမႃလႃဝိမႃၼဝတ်ထု ႁူဝ်သိပ်းသွင် သုတ်းယဝ်ႉ။
မၺ်ꩡိꩦ်ꩧၵဝၷ် ႁူဝ်သီႇ သုတ်းယဝ်ႉ။
ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]
- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ မၺ်ꩡိꩦ်ꩧၵဝၷ်၊ ရꩡ်ꩡုမႃလႃဝိမႃၼဝတ်ထု