လွင်ႈၽြႃးၸဝ်ႈၼိုင်ႈလႄႈ ၸဝ်ႈၼိုင်ႈ ဢမ်ႇမိူၼ်ၵၼ် 8 ဢၼ်

ဝေႇမတ်ႉတတြႃး 8 ပႃး

ၽြႃးပဵၼ်ၸဝ်ႈ ၸိူဝ်းဢၼ်ၵီႈမုၼ်းၵႂႃႇယဝ်ႉၼၼ်ႉ တူၼ်ၼိုင်ႈလႄႈ တူၼ်ၼိုင်ႈ ၵုၼ်းမုၼ်ၵျေးၸူးၶဝ် မိူၼ်ၵၼ်ယူႇသေတႃႉၵေႃႈ တူၼ်ၼိုင်ႈလႄႈ တူၼ်ၼိုင်ႈ ဢၼ်ဢမ်ႇမိူၼ်ၵၼ်ၼၼ်ႉ မီးဝႆႉ 8 ပိူင် 8 ပႃးယဝ်ႉ။ ဢၼ်ပႅၵ်ႇပိူင်ႈၵၼ် 8 ပိူင်ၼၼ်ႉ ပဵၼ်ဝေႇမတ်ႉတြတႃး 8 ပႃးယဝ်ႉ။

1. ဢႃယုဝေမတ်တ ၸူဝ်ႈယိုၼ်း ဢႃႇယု ဢမ်ႇမိူၼ်ၵၼ်
2. ပမႃꧣဝေမတ်တ တၢင်းသုင်တႅမ်ႇ ဢမ်ႇမိူၼ်ၵၼ်
3. ၵုလဝေမတ်တ ၸိူဝ်ႉၶိူဝ်း ဢမ်ႇမိူၼ်ၵၼ်
4. ပꩪႃၼဝေမတ်တ ၶၢဝ်းယၢမ်း လႆႈၵျၢင်ႉၵမ် တုၵ်ႉၵရၸရိယႃႇ ဢမ်ႇမိူၼ်ၵၼ်
5. ရသမိဝေမတ်တ ဢူဢၢႆသၢႆငဝ်းတူဝ် ဢမ်ႇမိူၼ်ၵၼ်
6. ယႃၼဝေမတ်တ မိူဝ်ႈပၢႆႈၵႂႃႇႁဵတ်း ရႁၢၼ်း ၶိူင်ႈၶီႇ ဢမ်ႇမိူၼ်ၵၼ်
7. ၿေႃꩪိဝေမတ်တ တီႈပဵၼ်ၽြႃး တူၼ်ႈမႆႉၽေႃးထိ ဢမ်ႇမိူၼ်ၵၼ်
8. ပလ်လင်ၵဝေမတ်တ ပလၢင်ႇယႂ်ႇၵႂၢင်ႈ ဢမ်ႇမိူၼ်ၵၼ်

ၼႆသေ မီးပႅတ်ႇပိူင်။

ဢႃယုဝေမတ်တ

ဢႃႇယုဝေႇမတ်ႉတ ဢၼ်ဝႃးၼၼ်ႉ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ ၸူဝ်ႈဢႃႇယု ပဵၼ်ဢၼ်ဢမ်ႇမိူၼ်ၵၼ်ၼၼ်ႉယဝ်ႉ။ လွင်ႈဢၼ် ဢမ်ႇမိူၼ်ၵၼ်ၼႆႉ ပေႃးမႃးတူၺ်းၸွမ်း ၽြႃးပဵၼ်ၸဝ်ႈ ၸိူဝ်းဢၼ်ၵီႈမုၼ်းပူၼ်ႉၵႂႃႇယဝ်ႉၼၼ်ႉ တေလႆႈႁၼ် ပွင်ႇၸႅင်ႈလႅင်းလီယူႇ။

မိူၼ်ၼင်ႇ ၽြႃးၻီပင်ၵရႃ၊ ၽြႃးၵေၢꧣ်ꩦၺ်ၺ၊ ၽြႃးဢၼေႃမၻသ်သီ၊ ၽြႃးပၻုမ၊ ၽြႃးပၻုမုတ်တရ၊ ၽြႃးဢတ်ထၻသ်သီ၊ ၽြႃးꩪမ်မၻသ်သီ၊ ၽြႃးသိၻ်ꩪတ်ထ၊ ၽြႃးတိသ်သ ၶဝ်ၸဝ်ႈ 9 တူၼ်ၸိူဝ်းၼႆႉ ၵီႈမုၼ်း မိူဝ်ႈၸူဝ်ႈဢႃႇယုၵူၼ်း လႆႈ (100,000) ပီ၊ ၽြႃးမင်ၷလ၊ ၽြႃးသုမၼ၊ ၽြႃးသေႃꧤိတ၊ ၽြႃးၼႃရၻ၊ ၽြႃးသုမေꩪ၊ ၽြႃးသုꩡႃတ၊ ၽြႃးပိယၻသ်သီ၊ ၽြႃးၽုသ်သ ၶဝ်ၸဝ်ႈ 8 တူၼ်ၸိူဝ်းၼႆႉ ၵီႈမုၼ်း မိူဝ်ႈဢႃႇယုၵူၼ်းမီး (90000) ပီ၊ ၽြႃးရေဝတ၊ ၽြႃးဝေသ်သꧤူ၊ 2 တူၼ်ၼႆႉ ၵီႈမုၼ်းမိူဝ်ႈ ၸူဝ်ႈဢႃႇယုၵူၼ်းမီး (60000) ပီ၊ ၽြႃးဝိပသ်သီ (80000) ပီ၊ ၽြႃးသိၶီ (70000) ပီ၊ ၽြႃးၵၵုသၼ် (40000) ပီ၊ ၽြႃးၵေႃꧣႃၵမၼ (30000) ပီ၊ ၽြႃးၵသ်သပ (20000) ပီ၊ ၽြႃးၵေႃတမ (100) ပီ ၸိူဝ်းၼႆႉပဵၼ် လွင်ႈပႅၵ်ႇပိူင်ႈ ဢႃယုယၢဝ်းပွတ်း ၽြႃးယဝ်ႉ။ ဢဝ်ၸွမ်း ဢႃႇယုၵူၼ်း ပၢၼ်လႂ်ပၢၼ်ၼၼ်ႉ မုၼ်ၶမ်းၽြႃးလႆႈယူႇၵႂႃႇ 5 ပုၼ်ႈ 4 ပုၼ်ႈၵူၺ်းယဝ်ႉ။ မိူၼ်ၼင်ႇ မိူဝ်ႈဢႃႇယုၵူၼ်း မီး (100,000) ပီၼၼ်ႉ ၽြႃးသမ်ႉလႆႈယူႇၵႂႃႇ (80,000) ပီ၊ မိူဝ်ႈဢႃႇယုၵူၼ်း မီး (100) ပီၼၼ်ႉ ၽြႃးၸဝ်ႈၵေႃးတမ လႆႈယူႇၵႂႃႇ (80) ပီၼၼ်ႉယဝ်ႉ။

• ၸူဝ်ႈဢႃႇယုယၢဝ်း လႄႈ ပွတ်း

ၵပ်းၵၢႆႇလူၺ်ႈ ဢႃႇယု ယၢဝ်းပွတ်းၼႆႉ ၵွပ်ႈၶုၼ်မိူင်း ဢမ်ႇၸွမ်းတြႃးၼၼ်ႉ ပဵၼ်ပိူင်လူင်မၼ်းယဝ်ႉ။ ပေႃးၶုၼ်မိူင်း ၸွမ်းတြႃးၸိုင် သတ်ႉတဝႃႇ တင်းလၢႆ ၸင်ႇၸွမ်းတြႃး၊ ၽီၶဝ်ၵေႃႈ ၸင်ႇယူႇၸွမ်းတြႃးသေ ႁဵတ်းပၼ် ၽူၼ်လူမ်း ရႃႇသီႇဢုတု မၢၼ်ႇမႅၼ်ႈယဝ်ႉ။ ပေႃးရႃႇသီႇဢုတု ၽဵင်ႇၵေႃႈ မွၵ်ႇမၢၵ်ႇတၢင်းၵိၼ်တၢင်းယႅမ်ႉ မီးၼမ်ႉဝၢၼ်ၸဵမ်း တဵမ်ထူၼ်ႈလီမႃးယဝ်ႉ။ ပေႃးၸိူင်ႉၼၼ် ၵူၼ်းႁဝ်းၵေႃႈ ယူႇၸွမ်း ရႃႇသီႇဢုတု၊ ၵိၼ်ၸွမ်း တူၼ်ႈမွၵ်ႇမၢၵ်ႇသေ မီးဢဵၼ်ႁႅင်းမႃး ဢႃႇယုၵေႃႈ ၸင်ႈယၢဝ်းယိုၼ်းမႃးယဝ်ႉ။ ပေႃးဝႃႈ ၶုၼ်မိူင်း ဢမ်ႇၸွမ်းတြႃးၸိုင် ၽႂ်ၵေႃႈ ဢမ်ႇၸွမ်းတြႃး ၽီၶဝ်ၵေႃႈ ဢမ်ႇၸွမ်းတြႃး ၽူၼ်လူမ်းၵေႃႈ ဢမ်ႇမၢၼ်ႇ ရႃႇသီႇဢုတုၵေႃး ဢမ်ႇၽဵင်ႇ၊ တၢင်းၵိၼ် မွၵ်ႇမၢၵ်ႇၵေႃႈ ဢမ်ႇမီးၼမ်ႉဝၢၼ်ၸဵမ် တဵမ်ထူၼ်ႈ၊ ၵူၼ်းႁဝ်း ဢၼ်ၵိၼ်ၵေႃႈ ရေႃးၵႃႇ ၼမ်သေလႄႈ ဢႃႇယု ၸင်ႇပွတ်းမႃးယဝ်ႉ။

ၸွမ်းလူၺ်ႈ လွင်ႈသၽေႃး မီးၸိူင်ႉၼႆလႄႈ ၽြႃးပဵၼ်ၸဝ်ႈၵေႃႈ ပေႃးဝႃႈ ၵီႈမုၼ်းမႃး ၺႃးၵၢပ်ႈပၢၼ် ဢႃႇယုၵူၼ်းယၢဝ်းၵေႃႈ ဢႃႇယုၸဝ်ႈယၢဝ်းသေ ပေႃးၺႃးၵၢပ်ႈပၢၼ် ဢႃႇယုၵူၼ်းႁဝ်း ပွတ်းၵေႃႈ ဢႃႇယုၸဝ်ႈပွတ်းယဝ်ႉ။

• ၸူဝ်ႈဢႃႇယုလႄႈ ၽြႃးပဵၼ်ၸဝ်ႈၵီႈမုၼ်း

မိူဝ်ႈၽွင်း ဢႃႇယုၵူၼ်းႁဝ်း ယၢဝ်းၼႃႇပူၼ်ႉၼၼ်ႉၵေႃႈ ၽြႃးပဵၼ်ၸဝ်ႈ ဢမ်ႇၵီႈမုၼ်းပဵၼ်ၽြႃး။ ပေႃးဢႃႇယုယၢဝ်းၼႃႇ (ၽွင်းမိူဝ်ႈ ဢႃႇယုၵူၼ်း ယၢဝ်း ၼိုင်ႈသိၼ်ၶိုၼ်ႈၼိူဝ် တေႃႇထိုင် ဢသင်ႇၶေႇယ)ၼၼ်ႉ သတ်ႉတဝႃႇတင်းလၢႆ ၼၢၼ်းထဝ်ႈ ၼၢၼ်းတၢႆ၊ ႁေႃးတြႃးသင်ႇၶႃႇရ ဢမ်ႇမၼ်ႈဢမ်ႇၵိုမ်းၵေႃး ၶဝ်ဢမ်ႇယုမ်ႇလႄႈ မိူဝ်ႈဢႃႇယုၵူၼ်း ယၢဝ်းၼႃႇပူၼ်ႉတီႈၼၼ်ႉ ၽြႃးဢမ်ႇၵီႈမုၼ်း။ ပေႃးဢႃႇယု ပွတ်းၼႃႇၵေႃႈ (ဢႃႇယု ၼိုင်ႈပၢၵ်ႇလူင်းတႂ်ႈ) လေႃးၽ၊ တေႃးသ၊ မေႃးႁ ၼမ်ပူၼ်ႉတီႈၵႂႃႇလႄႈ ႁေႃးတြႃးၼႄၵေႃႈ ဢမ်ႇဢဝ် ဢမ်ႇတၼ်းထွမ်ႇလႆႈ။ ၵွပ်ႈၼႆ ၽြႃးပဵၼ်ၸဝ်ႈ မႃးၵီႈမုၼ်း မိူဝ်ႈၵၢပ်ႈဢႃႇယု ၼိုင်ႈသႅၼ်လႄႈ ၼိုင်ႈပၢၵ်ႇ ၼႂ်းၵႄႈၵၢင်ၼႆႉၵူၺ်း။

ပမႃꧣဝေမတ်တ

ပမႃႇၼဝေႇမတ်ႉတ ဢၼ်ဝႃႈၼႆႉ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ လွင်ႈသုင်တႅမ်ႇ ဢမ်ႇမိူၼ်ၵၼ်ၼၼ်ႉယဝ်ႉ။

မိူၼ်ၼင်ႇ ၽြႃးၻီပင်ၵရႃႇ၊ ၽြႃးရေဝတ၊ ၽြႃးပိယၻသ်သီ၊ ၽြႃးဢတ်ထၻသ်သီ၊ ၽြႃးꩪမ်မၻသ်သီ၊ ၽြႃးဝိပသ်သီ ၶဝ်ၸဝ်ႈ 6 တူၼ်ၸိူဝ်းၼႆႉ တၢင်းသုင်မီး (88) သွၵ်ႇ၊ ၽြႃးၵေၢꧣ်တၺ်ၺ၊ ၽြႃးမင်ၷလ၊ ၽြႃးၼႃရၻ၊ ၽြႃးသုမေꩪ 4 တူၼ်ၼႆႉ တၢင်းသုင်မီး (80) သွၵ်ႇ၊ ၽြႃးသုမၼ သုင် (90) သွၵ်ႇ၊ ၽြႃးသေႃꧤိတ၊ ၽြႃးဢၼေႃမၻသ်သီ၊ ၽြႃးပၻုမ၊ ၽြႃးပၻုမုတ်တရ၊ ၽြႃးၽုသ်သ သုင် (58) သွၵ်ႇ၊ ၽြႃးသုꩡႃတ သုင် (50) သွၵ်ႇ၊ ၽြႃးသိၻ်ꩪတ်ထ၊ ၽြႃးတိသ်သ၊ ၽြႃးဝေသ်သꧤူ သုင် (60) သွၵ်ႇ၊ ၽြႃးသိၶီ သုင် (70) သွၵ်ႇ၊ ၽြႃးၵၵုသၼ်ၼ (40) သွၵ်ႇ၊ ၽြႃးၵေႃꧣႃၵမၼ (30) သွၵ်ႇ၊ ၽြႃးၵသ်သပ (20) သွၵ်ႇ၊ ၽြႃးၵေႃးတမ (18) သွၵ်ႇ မၢင်မူႇသမ်ႉဝႃႈ (19) သွၵ်ႇၼႆယဝ်ႉ။

လွင်ႈဢၼ် တၢင်းသုင်တႅမ်ႇ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ ဢမ်ႇမိူၼ်ၵၼ်ၼႆႉ ပိူင်လူင်မၼ်း ပဵၼ်ၵွပ်ႈဢုတုလႄႈ ဢႃႇႁႃႇရယဝ်ႉ။ ပေႃးဢုတု ဢႃႇႁႃႇရ တဵမ်ထူၼ်ႈၵေႃႈ ၶၼ်ႇထႃႇတူဝ် တူၼ်ယႂ်ႇသုင်လီငၢမ်းယဝ်ႉ။ ပေႃးဢုတု ဢႃႇႁႃႇရ ဢမ်ႇတဵမ်ထူၼ်ႈၵေႃႈ ၶၼ်ႇထႃႇတူၼ်တူဝ် ဢမ်ႇယႂ်ႇသုင်။

ၵုလဝေမတ်တ

ၵုလဝေႇမတ်ႉတ ဢၼ်ဝႃးၼႆႉ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ ၸိူဝ်ႉၶိူဝ်း ဢမ်ႇမိူၼ်ၵၼ်ၼၼ်ႉယဝ်ႉ။

မိူၼ်ၼင်ႇ ၽြႃးပဵၼ်ၸဝ်ႈ ၸိူဝ်းဢၼ်ၵီႈမုၼ်းယဝ်ႉၵႂႃႇၼႆႉၸိုင် ၽြႃးၵၵုသၼ်ၼ၊ ၽြႃးၵေႃꧣႃၵမၼ ၽြႃးၵသ်သပ ၶဝ်ၸမ်ႈ 3 တူၼ်ၼႆႉ မႃးၵိူတ်ႇပဵၼ် ၸိူဝ်ႉၶိူဝ်းပုၼ်ႇၼႃးယဝ်ႉ။ လိူဝ်သေၼၼ်ႉ မႃးၵိူတ်ႇပဵၼ် ၸိူဝ်ႉၶိူဝ်းၶုၼ်လၢႆလၢႆယဝ်ႉ။

ၵွပ်ႈသင် ပေႃးဝႃးၼႆၸိုင် ၽြႃးပဵၼ်ၸဝ်ႈဢၼ်ဝႃႈၼႆႉ ပဵၼ်ဢၼ်ယႂ်ႇမျၢတ်ႈသေပိူၼ်ႈ ၵူႈၸိူဝ်ႉၵူႈၸၢဝ်းယဝ်ႉ။ ပေႃးဝႃႈ ၵူၼ်းတင်းလၢႆ မၵ်းမၢႆဝႃႈ ၸိူဝ်ႉၶိူဝ်းၶုၼ် ပဵၼ်ယႂ်ႇပဵၼ်လူင် ပဵၼ်ဢၼ်သုင်ဢၼ်မျၢတ်ႈၵေႃး ၽြႃးပဵၼ်ၸဝ်ႈ မႃးၵိူတ်ႇပဵၼ် ၼႂ်းၸိူဝ်ႉၶိူဝ်းၶုၼ်သေ ပေႃးသမ်ႉ မိူဝ်ႈပၢၼ် ၵူၼ်းမိူင်းၶူင်းၵၢင် မၵ်းမၢႆဝႃႈ ၸိူဝ်ႉၶိူဝ်း ပုၼ်ႇၼႃးမျၢတ်ႈသေပိူၼ်ႈၼႆၵေႃႈ ၽြႃးပဵၼ်ၸဝ်ႈ မႃးၵိူတ်ႇပဵၼ် ၸိူဝ်ႉၶိူဝ်းပုၼ်ႇၼႃးယဝ်ႉ။ ၵၢပ်ႈလႂ်ပၢၼ်ၼၼ်ႉ ၸိူဝ်ႉၶိူဝ်းဢၼ်လႂ် ပဵၼ်ယႂ်ႇပဵၼ်လူင် ပဵၼ်ဢၼ်ၸၼ်ႉသုင်မျၢတ်ႈၵေႃႈ ၵူၼ်းမိူင်းတင်းလၢႆ ၼပ်ႉယမ်ၸိူဝ်ႉၶိူဝ်းဢၼ်ၼၼ်ႉယဝ်ႉ။

ပꩪႃၼဝေမတ်တ

ပထႃႇၼဝေႇမတ်ႉတ ဢၼ်ဝႃႈၼႆႉ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ လွင်ႈလႆႈၵျၢင်ႉၵမ် ၶၢဝ်းယၢမ်း တုၵ်ႉၵရၸရိယႃႇ ဢမ်ႇမိူၼ်ၵၼ်ၼၼ်ႉယဝ်ႉ။

မိူၼ်ၼင်ႇ ၽြႃးၻီပင်ၵရႃ၊ ၽြႃးၵေၢꧣ်ꩦၺ်ၺ၊ ၽြႃးသုမၼ၊ ၽြႃးဢၼေႃမၻသ်သီ၊ ၽြႃးသုꩡႃတ၊ ၽြႃးသိၻ်ꩪတ်ထ ၸိူဝ်းၼႆႉလႆႈၵျၢင်ႉၵမ် တုၵ်ႉၵရၸရိယႃႇ (10) လိူၼ်၊ ၽြႃးမင်ၷလ၊ ၽြႃးသုမေꩪ၊ ၽြႃးတသ်သ၊ ၽြႃးသိၶီ 4 တူၼ်ၼႆႉ လႆႈၵျၢင်ႉၵမ် တုၵ်ႉၵရၸရိယႃႇ (8) လိူၼ်၊ ၽြႃးရေႇဝတ လႆးၵျၢင်ႉၵမ် (7) လိူၼ်၊ ၽြႃးသေႃၽိတ လႆႈၵျၢင်ႉၵမ် (4) လိူၼ်၊ ၽြႃးပၻုမ၊ ၽြႃးဢတ်ထၻသ်သီ၊ ၽြႃးဝိပသ်သီ 3 တူၼ်ၼႆႉ လႆႈၵျၢင်ႉၵမ် တုၵ်ႉၵရၸရိယႃႇ (14) ဝၼ်း၊ ၽြႃးၼႃရၻ၊ ၽြႃးပၻုမုတ်တရ၊ ၽြႃးဝေသ်သ ꧤူ၊ ၽြႃးၵေႃၼႃၵမၼ 4 တူၼ်ၼႆႉ လႆႈၵျၢင်ႉၵမ် (6) လိူၼ်၊ ၽြႃးၵေႃတမ လႆႈၵျၢင်ႉၵမ် (6) ပီယဝ်ႉ။

ဢၼ်ပထႃႇၼဝေမတ်ႉတ လွင်ႈလႆႈၵျၢင်ႉၵမ် တုၵ်ႉၵရၸရိယႃႇ ပႅၵ်ႇပိူင်ႈၵၼ်ၼႆႉ တေလႆႈဝႃႈ ၵွပ်ႈၵၢမ်ႇဝၼ်းလင်ၶဝ်ၸဝ်ႈယဝ်ႉ။ မိူၼ်ၼင်ႇ ၽြႃးၵေႃးတမၼႆႉ မိူဝ်ႈလႆႈႁူႉဝႃး ၽြႃးၵသ်သပ ၵျၢင်ႉၵမ် တုၵ်ႉၵရၸရိယႃႇ 6 ဝၼ်းသေ ပဵၼ်ၽြႃးၼၼ်ႉ မၼ်းၸဝ်ႈ ယၢမ်ႈလၢတ်ႈဝႃႈ “ပေႃးၵဝ်တေပဵၼ် ၽြႃးယူႇတႄႉ ၵျၢင်ႉၵမ် 6 ပီၵေႃႈ ၸၢင်ႈပဵၼ်သင်” ၼႆလႄႈ ၸင်ႇလႆႈမႃး ၵျၢင်ႉၵမ် ၸွမ်းၼင်ႇမၼ်းၸဝ်ႈ လၢတ်ႈဝႆႉ 6 ပီၼၼ်ႉယဝ်ႉ။

ဢပၻႃၼ ပႃႇလိ ပပ်ႉမၢႆၼိုင်ႈ 349၊ 39၊ ဢဝတၽလဝၷ်ၷ 10၊ ပုၿ်ၿၵမ်မပိလေႃႁိတၿုၻ်ꩪႃပၻႃၼၼႆႉ ႁေႃးၼႄဝႆႉ လွင်ႈၵျၢင်ႉၵမ် တုၵ်ၵရၸရိယႃႇ ၶၢဝ်းယၢမ်းမၼ်း ပႅၵ်ႇပိူင်ႈၵၼ်ၼႆႉ ပဵၼ်လူၺ်ႈ ၵၢမ်ႇပႃႇရမီႇ ဝၼ်းလင်ၶဝ်ၸဝ်ႈ ၼႆယဝ်ႉ။

ရသမိဝေမတ်တ

ရသမိဝေႇမတ်ႉတ ဢၼ်ဝႃႈၼႆႉ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ သၢႆငဝ်းဢူတူဝ်ဢွၵ်ႇမႃး ဢမ်ႇမိူၼ်ၵၼ်ၼၼ်ႉယဝ်ႉ။

မိူၼ်ၼင်ႇ ၽြႃးမင်ၵလၼႆႉ သၢႆငဝ်းတူဝ်ၸဝ်ႈ ဢွၵ်ႇမႃး ပိူင်းထိုင် ၸၵျႃႇဝလႃႇ မိုၼ်ႇတိူၵ်ႈယဝ်ႉ။ ၽြႃးပၻုမုတ်တရ သမ်ႉ 12 ယူႇၸၼႃႇ၊ ၽြႃးဝိပသ်သီ သမ်ႉ 7 ယူႇၸၼႃႇ၊ ၽြႃးသိꧠီ 3 ယူႇၸၼႃႇ၊ ၽြႃးၵၵုသၼ်ၼ သမ်ႉ 10 ယူႇၸၼႃႇ၊ ၽြႃးၵေႃးတမတႄႉ ဢွၵ်ႇၸွမ်းတူဝ်ၸဝ်ႈ မွၵ်ႈသီႇသွၵ်ႇၼၼ်ႉယဝ်ႉ။

ၵူၺ်းၵႃႈ ၽြႃးပဵၼ်ၸဝ်ႈ ၵူႈတူၼ်တူၼ်ၼႆႉ ၵွပ်ႈပိူဝ်ႈ ပႃႇရမီႇ တဵမ်ထူၼ်ႈဝႆႉ ၵူႈတူၼ်လႄႈ ၸွမ်းၼင်ႇ ၵၢင်ၸႂ်မီးၼၼ်ႉ ၶႂ်ႈဢဝ်သၢႆငဝ်းတူဝ်ၶဝ်ၸဝ်ႈ ပိူင်းထိုင် တီႈလႂ်ၵေႃႈ လႆႈယဝ်ႉ။

ယႃၼဝေမတ်ႉတ

ယႃႇၼဝေႇမတ်ႉတ ဢၼ်ဝႃႈၼႆႉ ၼေႃႇၶမ်းၸဝ်ႈ တူၼ်ၼိုင်ႈလႄႈ တူၼ်ၼိုင်ႈ မိူဝ်ႈၵႂႃႇပဵၼ်ရႁၢၼ်းၼၼ်ႉ ၶိူင်ႈၶီႇၶဝ် ဢမ်ႇမိူၼ်ၵၼ်ၼၼ်ႉယဝ်ႉ။

ၽြႃးၻီပင်ၵရႃ၊ ၽြႃးသုမၼ၊ ၽြႃးသုမေꩪ၊ ၽြႃးၽုသ်သ၊ ၽြႃးသိၶီ၊ ၽြႃးၵေႃꧣႃၵမၼ ၸိူဝ်းၼႆႉ ၶီႇၸၢင်ႉသေ ၵႂႃႇပဵၼ်ရႁၢၼ်းယဝ်ႉ။ ၽြႃးၵေၢꧣ်ꩦၺ်ၺ၊ ၽြႃးရေဝတ၊ ၽြႃးပၻုမ၊ ၽြႃးပိယၻသ်သီ၊ ၽြႃးၵၵုသၼ်ၼ ၶဝ်ၸဝ်ႈၸိူဝ်းၼႆႉ ၶီႇလေႃႉမႃႉသေ ၵႂႃႇပဵၼ်ရႁၢၼ်းယဝ်ႉ။ ၽြႃးမင်ၷလ၊ ၽြႃးသုꩡႃတ၊ ၽြႃးဢတ်ထၻသ်သီ၊ ၽြႃးတိသ်သ၊ ၽြႃးၵေႃးတမ ၶဝ်ၸဝ်ႈၸိူဝ်းၼႆႉ ၶီႇမႃႉသေ ၵႂႃႇပဵၼ်ရႁၢၼ်းယဝ်ႉ။ ၽြႃးဢၼေႃမၻသ်သီ၊ ၽြႃးသိၻ်ꩪတ်ထ၊ ၽြႃးဝေသ်သꧤူ ၶဝ်ၸဝ်ႈၸိူဝ်းၼႆႉ ၶီႇဝေႃးသေ ၵႂႃႇပဵၼ်ရႁၢၼ်းယဝ်ႉ။ ၽြႃးၼႃရၻတႄႉ ပႆတိၼ်ၵႂႃႇဢဝ်ယဝ်ႉ။ ၽြႃးသေႃꧤိတ၊ ၽြႃးပၻုမုတ်တရ၊ ၽြႃးၵသ်သပ ၶဝ်ၸဝ်ႈၸိူဝ်းၼႉ ၶီႇပျသၢတ်ႈမိၼ်သေ ၵႂႃႇပဵၼ်ရႁၢၼ်းယဝ်ႉ။

ၿေႃꩪိဝေမတ်တ

ၿေႃးထိဝေႇမတ်ႉတ ဢၼ်ဝႃႈၼႆႉ ၽြႃးပဵၼ်ၸဝ်ႈ တူၼ်ၼိုင်ႈလႄႈ တူၼ်ၼိုင်ႈ မိူဝ်ႈပဵၼ်ၽြႃး တႂ်ႈတူၼ်ႈမႆႉၽေႃးထိ ဢမ်ႇမိူၼ်ၵၼ်ၼၼ်ႉယဝ်ႉ။

ၽြႃးၻီပင်ၵရႃ ၵီႈမုၼ်း တီႈတူၼ်ႈမႆႉလိၼ်ႉမႃၼၼ်ႉယဝ်ႉ။ ၽြႃးၵေၢꧣ်ꩦၺ်ၺ ပဵၼ်တီႈတူၼ်ႈမႆႉၵွၵ်ႇမွင်၊ ၽြႃးမင်ၷလ၊ ၽြႃးသုမၼ၊ ၽြႃးရေဝတ၊ ၽြႃးသေႃꧤိတသမ်ႉ ပဵၼ်တီႈတူၼ်ႈမႆႉၵမ်ႉၵေႃႇ၊ ၽြႃးဢၼေႃမၻသ်သီ ပဵၼ်တီႈမႆႉပဝ်းလမ် (မႆႉႁူၵ်းၾႃႉ)၊ ၽြႃးပၻုမ၊ ၽြႃးၼႃႇရၻ ပဵၼ်တီႈမႆႉမၢၵ်ႇလိူင်ႇၵႃ၊ ၽြႃးပၻုမုတ်တရ ပဵၼ်တီႈ တူၼ်ႈမႆႉပႅၵ်ႇ၊ ၽြႃးသုမေꩪ ပဵၼ်တီႈ တူၼ်ႈမႆႉၵႃယွင်း၊ ၽြႃးသုꩡႃတ ပဵၼ်တီႈ တူၼ်ႈမႆႉသၢင်းၼၢမ်၊ ၽြႃးပိယၻသ်သီ ပဵၼ်တီႈ တူၼ်ႈမႆႉၽၵ်းၵုမ်ႇ၊ ၽြႃးဢတ်ထၻသ်သီ ပဵၼ်တီႈ တူၼ်ႈမႆႉမွၵ်ႇၸၢမ်၊ ၽြႃးꩪမ်မၻသ်သီ ပဵၼ်တီႈ တူၼ်ႈမႆႉသႃႈလဝ်ႈ (မႆႉမွၵ်ႇပၢႆၶဵမ်)၊ ၽြႃးသိၻ်ꩪတ်ထ ပဵၼ်တီႈ တူၼ်ႈမႆႉၼိဝ်ႉၼၢမ်၊ ၽြႃးတိသ်သ ပဵၼ်တီႈ တူၼ်ႈမႆႉပီးတွၵ်ႉ၊ ၽြႃးၽုသ်သ ပဵၼ်တီႈ တူၼ်ႈမႆႉမၢၵ်ႇၶၢမ်၊ ၽြႃးဝိပသ်သီ ပဵၼ်တီႈ တူၼ်ႈမႆႉၵႄး၊ ၽြႃးသိၶီ ပဵၼ်တီႈ တူၼ်ႈမႆႉမၢၵ်ႇမူင်ႈၽိူၵ်ႇ၊ ၽြႃးဝေသ်သꧤူ ပဵၼ်တီႈ တူၼ်ႈမႆႉပဝ်း၊ ၽြႃးၵၵုသၼ်ၼ ပဵၼ်တီႈ တူၼ်ႈမႆႉလိူဝ်ႇ၊ ၽြႃးၵသ်သပ ပဵၼ်တီႈ တူၼ်ႈမႆႉႁုင်း၊ ၽြႃးၵေႃးတမ ပဵၼ်တီႈ တူၼ်ႈမႆႉၺွင်ႇယဝ်ႉ။

တူၼ်ႈၽေႃးထိၼႆႉ မၢင်ၸိူဝ်း ထၢင်ႇဝႃႈ ပဵၼ် ၸိုဝ်ႈတူၼ်ႈမႆႉမဵဝ်းၼိုင်ႈ ႁင်းၶေႃမၼ်း၊ မၢင်ၸိူဝ်း သမ်ႉထၢင်ႇဝႃႈ ပဵၼ် တူၼ်ႈမႆႉၺွင်ႇ ဢၼ်လဵဝ်ၵူၺ်းၼႆယဝ်ႉ။ ဢမ်ႇၸႂ်ႈၸိူင်ႉၼၼ် ၽေႃးထိ ဢၼ်ဝႃႈၼႆႉ ၵွပ်ႈပိူဝ်ႈ မေႃႁူႉႁၼ် သတ်ႉၸႃႇသီႇပႃးလႄႈ မၢၵ်ႈသီႇပႃးၵေႃႈ လႆႈႁွင်ႉၽေႃးထိ ပိူင်ၼိုင်ႈ၊ ၵွပ်ႈပိူဝ်ႈ မေႃႁူႉႁၼ် ၺေႇယထမ်ႇတြႃးသီႇပႃးလႄႈ သပ်ႉပၺ်ႇၺုတၺၢၼ်ႇၵေႃႈ လႆႈႁွင်ႉဝႃႈ ၽေႃးထိပိူင်ၼိုင်ႈ၊ ၵွပ်ႈၼႆ တီႈတႄႉမၼ်းမၢၵ်ႈသီႇပႃးလႄႈ သပ်ႉပၺ်ႇၺုတၺၢၼ်ႇၼၼ်ႉ ၸင်ႇလႆႈႁွင်ႉဝႃး ၽေႃးထိယဝ်ႉ။ ဢၼ်မၢၵ်ႈသီႇပႃးလႄႈ သပ်ႉပၺ်ႇၺုတၺၢၼ်ႇၼၼ်ႉ ၽြႃးပဵၼ်ၸဝ်ႈႁဝ်း သမ်ႉၵႂႃႇႁူပ်ႉႁၼ်လႆႈမႃး တႂ်ႈတူၼ်ႈမႆႉၺွင်ႇၼၼ်ႉလႄႈ တူၼ်ႈမႆႉၺွင်ႇၼၼ်ႉ ပဵၼ်လွင်ႈတၢင်း (ဢွင်ႈတီႈ) ႁူႉႁၼ်မၢၵ်ႈလႄႈ သပ်ႉပၺ်ႇၺုတၺၢၼ်ႇၵႂႃႇယဝ်ႉ။ ၵွပ်ႈၼႆ မၢၵ်ႈလႄႈ သပ်ႉပၺ်ႇၺုတၺၢၼ်ႇၼႆႉ လႆႈၸိုဝ်ႈ ၽေႃးထိ ဢၼ်တႄႉမၼ်း၊ တူၼ်ႈမႆႉၺွင်ႇသမ်ႉ လႆႈၸိုဝ်ႈၽေႃးထိ ဢၼ်ပဵၼ်ဢုပၸႃႇမၼ်းယဝ်ႉ။ ၽြႃးပဵၼ်ၸဝ်ႈ ၵႂႃႇႁူႉႁၼ်လႆႈ မၢၵ်ႈၺၢၼ်ႇ သပ်ႉပၺ်ႇၺုတၺၢၼ်ႇ တီႈတူၼ်ႈမႆႉ ဢၼ်လႂ်ၵေႃႈ တူၼ်ႈမႆႉၼၼ်ႉ ပဵၼ်တူၼ်ႈၽေႃးထိယဝ်ႉ။

ပလ်လင်ၵမေဝမတ်တ

ပၼ်ႇလင်ႇၵဝေႇမတ်ႉတ ဢၼ်ဝႃးၼႆႉ ၽြႃးပဵၼ်ၸဝ်ႈ တူၼ်ႈၼိုင်ႈလႄႈ တူၼ်ၼိုင်ႈ တီႈဢၼ်ၵီႈမုၼ်းၼၼ်ႉ ပလၢင်ႇ တၢင်းယႂ်ႇၵႂၢင်ႈ ပဵၼ်ဢၼ် ဢမ်ႇမိူၼ်ၵၼ်ၼၼ်ႉယဝ်ႉ။

ၽြႃးၻီပင်ၵရႃ၊ ၽြႃးရေဝတ၊ ၽြႃးပိယၻသ်သီ၊ ၽြႃးဢတ်ထၻသ်သီ၊ ၽြႃးꩪမ်မၻသ်သီ၊ ၽြႃးဝိပသ်သီ ၸိူဝ်းၼႆႉ ပလၢင်ႇၵႂၢင်ႈ 54 သွၵ်ႇယဝ်ႉ။ ၽြႃးၵေၢꧣ်ꩦၺ်ၺ၊ ၽြႃးမင်ၷလ၊ ၽြႃးၼႃရၻ၊ ၽြႃးသုမေꩪ ၸိူဝ်းၼႆႉ ပလၢင်ႇၵႂၢင်ႈ 57 သွၵ်ႇယဝ်ႉ။ ၽြႃးသုမၼ ပလၢင်ႇၵႂၢင်ႈ 60 သွၵ်ႇယဝ်ႉ။ ၽြႃးသေႃꧤိတ၊ ၽြႃးဢၼေႃမၻသ်သီ၊ ၽြႃးပၻုမုတ်တရ၊ ၽြႃးၽုသ်သ ၸိူဝ်းၼႆႉ ပလၢင်ႇၵႂၢင်ႈ 32 သွၵ်ႇယဝ်ႉ။ ၽြႃးသိၻ်ꩪတ်ထ၊ ၽြႃးတိသ်သ၊ ၽြႃးဝေသ်သꧤူ ၸိူဝ်းၼႆႉ ပလၢင်ႇၵႂၢင်ႈ 40 သွၵ်ႇယဝ်ႉ။ ၽြႃးသိၶီ ပလၢင်ႇၵႂၢင်ႈ 32 သွၵ်ႇယဝ်ႉ။ ၽြႃးၵၵုသၼ်ႇၼ၊၊ ၽြႃးၵေႃꧣႃၵမၼ၊ ၽြႃးၵသ်သပ၊ ၽြႃးၵေႃးတမ ၸိူဝ်းၼႆႉ ပလၢင်ႇၵႂၢင်ႈၶဝ် ၶပ်ႉၵၼ်ၵႂႃႇ 26၊ 20၊ 16၊ 14 သွၵ်ႇ ႁင်းၽႂ်ႁင်းမၼ်းယဝ်ႉ။

ၽိုၼ်ဢိင်

• ၸဵင်ၶမ်းလႅင်း မၢႆ (4)၊ ဝေမတ်တ တြႃးပႅတ်ႇပႃး၊ ၸဝ်ႈၼၼ်ႇတႃႇၸရိယ (မိူင်းၵွင်)၊ ၼႃႈလိၵ်ႈ 69-73၊ 1996။
• မဟာဗုဒ္ဓဝင်၊ မင်းကွန်းဆရာတော် ဦးဝိစိတ္တာဘိဝံသ