သုတ်ႉထပႃႇၸိတ်ႈ 92

1. ဢမ်ႇလီလၢတ်ႈၵႂၢမ်း ပႅတ်ႉလႅၼ်ယဝ်ႉ။
2. ဢမ်ႇလီလၢတ်ႈၵႂၢမ်းလႃႇ ၵႂၢမ်းၵိၼ်ႇ– ၵႂၢမ်းၸူၵ်ႉၸႂ် ယဝ်ႉ။
3. ဢမ်ႇလီၵဝ်းၶျေႃးရႁၢၼ်းၽိတ်းၵၼ်။
4. ဢမ်ႇလီၶျပၼ်လိၵ်ႈ ဢၼ်ဝႃႈႁူမ်ႈပုၵ်ႈ ၵႃႈတီႈၸဝ်ႈ သၢင်ႇ၊ ၵူၼ်းႁိူၼ်း။
5. ဢမ်ႇလီႁူမ်ႈၼွၼ်း ၵျွင်းလဵဝ်ၵၼ် တင်းၸဝ်ႈသၢင်ႇ ၵူၼ်းႁိူၼ်းၶဝ် လိူဝ်သေသွင်ၶိုၼ်း သၢမ်ၶိုၼ်း ယဝ်ႉ။
6. ဢမ်ႇလီႁူမ်ႈၼွၼ်းၵျွင်းလဵဝ်ၵၼ် တၢင်းမႃႇတုၵႃႇ ယိင်းၶဝ် လႄႈသတ်းတူဝ်မႄႈသေၶိုၼ်းယဝ်ႉ။
7. ဢမ်ႇလီႁေႃးတြႃးပၼ်တၵႃႇယိင်းၶဝ် ဢၼ်ဢမ်ႇ မီးၵူၼ်းၸၢႆးၶဝ်ယူႇၸွမ်း လိူဝ်သေႁႃႈႁူၵ်းၶေႃႈ ယဝ်ႉ။
8. သၢၼ်ႇမၢၵ်ႈၽူဝ်ႇဢၼ်ႁဝ်းလႆႈၼၼ်ႉ ဢမ်ႇလီ ဢဝ်လၢတ်ႈၼႄၸဝ်ႈသၢင်ႇ၊ ၵူၼ်းႁိူၼ်းၶဝ်ယဝ်ႉ။
9. သင်ႇၶႃႇတိသိၵ်ႈဢႃႇပၢတ်ႈ ဢၼ်ရႁၢၼ်းသေပႃး ထုၵ်ႇမႅၼ်ႈၼၼ်ႉ– ဢမ်ႇလီဢဝ်လၢတ်ႈၼႄ တီႈ ၸဝ်ႈသၢင်ႇ၊ ၵူၼ်းႁိူၼ်းၶဝ်ယဝ်ႉ။
10. လိၼ်လၢႆလၢႆ ဢၼ်ဢမ်ႇလေႃးသင်ၼၼ်ႉ ဢမ်ႇ လီၶုတ်း၊ ဢမ်ႇလီၸႂ်ႉပိူၼ်ႈၶုတ်း။
11. တူၼ်ႈမႆႉ ယိူဝ်ႈယႃႈ ဢၼ်လိပ်းၶဵဝ်ယူႇၼၼ်ႉ ဢမ်ႇလီယ ဢမ်ႇလီၽၼ်း။
12. ပိူၼ်ႈထၢမ်မဵဝ်းၼိုင်ႈ ၵႂႃႇလၢတ်ႈမဵဝ်းၼိုင်ႈ– ဢမ်ႇ ၼၼ်– သမ်ႉယူႇယဵၼ်ယဵၼ်ပႅတ်ႈ ၸိူဝ်းၼၼ်ႉ ဢမ်ႇလီႁဵတ်း။
13. လၢတ်ႈၵႂၢမ်း– သႄႉပၢၵ်ႇၼႃႈ သႄႉဝၢႆးလင်ၸိူဝ်း ၼၼ်ႉ ဢမ်ႇလီလၢတ်ႈယဝ်ႉ။
14. ၶူဝ်းသိူဝ်ႇၶွင်သင်ႇၶႃႇၼၼ်ႉ ဢမ်ႇလီၵႂႃႇသိူဝ်ႇတီႈ ၵၢင်ပၢင်ႇ ငဝ်ႈမႆႉသေ ဢမ်ႇလၢတ်ႈၽႂ်သေ ၵႂႃႇပႅတ်ႈ ဢမ်ႇၵဵပ်းဝႆႉၶိုၼ်းၼၼ်ႉ ဢမ်ႇလီႁဵတ်း။
15. ၶူဝ်းသိူဝ်ႇၶွင်သင်ႇၶႃႇၼၼ်ႉ ဢဝ်သိူဝ်ႇၼႂ်းၵျွင်း သေ ဢမ်ႇလၢတ်ႈၽႂ်သေၵႂႃႇပႅတ်ႈ ဢမ်ႇၵဵပ်းဝႆႉၶိုၼ်းၼၼ်ႉ ဢမ်ႇလီႁဵတ်း။
16. ၶႂ်ႈႁႂ်ႈ ပိူၼ်ႈလႆႈယူႇၵႅပ်ႈသေ– ၵႂႃႇၽိုတ်ႉယူႇၼင်ႈ တီႈၸဝ်ႈဢၼ်ၽႅဝ်ဢွၼ်တၢင်း ၸဝ်ႈဢၼ်ဝႃႇယႂ်ႇ ၵုင်ႇယႂ်ႇ သၢင်ႉသုင်သေၸဝ်ႈၵဝ်ႇၼၼ်ႉ ဢမ်ႇလီ ႁဵတ်း။
17. ရႁၢၼ်း ၸဝ်ႈဢၼ်ဢမ်ႇမီးဢႃႈပႅတ်ႈတၢင်းၽိတ်း သင်ၼၼ်ႉ ဢမ်ႇလီလိုပ်ႈဢွၵ်ႇ ဢမ်ႇလီၸႂ်ႉပိူၼ်ႈ လိုပ်ႈဢွၵ်ႇၼႂ်းၵျွင်းသင်ႇၶိၵယဝ်ႉ။
18. ၵျွင်းသင်ႇၶိၵ ဢၼ်မႂ်ႇသွင်ထၢပ်ႈ ဢၼ်ထၢပ်ႈၼိူဝ် ပႆႇလႆႈသိူဝ်ႇသေ ႁဵတ်းၵူႇတၢင်ႇ– တၢင်ႇဝႆႉၼၼ်ႉ ဢမ်ႇလီမိူဝ်းယူႇၼင်ႈၼွၼ်းယဝ်ႉ။
19. ၵျွင်းလူင်ဢၼ်ႁဵတ်းသွင်သၢမ်ထၢပ်ႈၼၼ်ႉ– ဢမ်ႇ လီၵႂႃႇၸုၵ််း တီႈမီးယိူဝ်ႈယႃႈလိပ်းၶဵဝ်ၶူဝ်းသူၼ် ပိူၼ်ႈသေ ၶိုင်ပွင်ၸိၸမ်ႈယဝ်ႉ။
20. ၼမ်ႉဢၼ်မီးမူင်ႈမႅင်းၼၼ်ႉ ဢမ်ႇလီဢဝ်ထွၵ်ႇသႂ်ႇ တီႈၼိူဝ်ယိူဝ်ႈယႃႈ လိၼ်ဢၼ်ဢမ်ႇမီးၼမ်ႉယဝ်ႉ။
21. ရႁၢၼ်း ဢၼ်ဢမ်ႇၶၢၼ်းၸႂ်ႉၼၼ်ႉ– ဢမ်ႇလီၵႂႃႇ သင်ႇသွၼ်ရႁၢၼ်းယိင်းၶဝ်ယဝ်ႉ။
22. သမ်ႉဝႃႈၶၢၼ်းၸႂ်ႉသေၵေႃႈ– ပေႃးၵၢင်ဝၼ်းတူၵ်း ယဝ်ႉ ဢမ်ႇလီၵႂႃႇသင်ႇသွၼ် ၼင်ႇၵဝ်ႇယဝ်ႉ။
23. ၵႂႃႇသင်ႇသွၼ်ၵေႃႈ– ဢမ်ႇလီၵႂႃႇသင်ႇသွၼ် တီႈရ ႁၢၼ်းယိင်းၶဝ်ၼွၼ်းယဝ်ႉ။
24. ႁၼ်ပိူၼ်ႈၵႂႃႇသင်ႇသွၼ်သေလႄႈ ၶဝ်ၵိူဝ်းလႆႈ ဢၼ်ၼႆႉဢၼ်ၼၼ်ႉလႄႈ– ၶဝ်ၵႂႃႇသင်ႇသွၼ် ဢိူဝ်ႈ၊ ၵႂၢမ်းၸိူဝ်းၼႆႉ ဢမ်ႇလီလၢတ်ႈယဝ်ႉ။
25. ဢမ်ႇလီဢဝ်သၢင်ႇၵၢၼ်းႁဝ်း ပၼ်ရႁၢၼ်းယိင်းၶဝ် ဢၼ်ဢမ်ႇၸႂ်ႈပီႈၼွင်ႉယဝ်ႉ။
26. ဢမ်ႇလီယဵပ်ႉပၼ်သၢင်ႇၵၢၼ်း ရႁၢၼ်းယိင်းၶဝ် ဢၼ်ဢမ်ႇၸႂ်ႈပီႈၼွင်ႉယဝ်ႉ။
27. ဢမ်ႇလီၸူဝ်း ရႁၢၼ်းယိင်းၶဝ် ၵႂႃႇတႃႈပႆတၢင်းၶၢဝ်း ယၢဝ်းယဝ်ႉ။
28. ဢမ်ႇလီၶီႇႁိူဝ်း လမ်းလဵဝ်ၸွမ်း ရႁၢၼ်းယိင်းၶဝ် ၽၢႆးၶိုၼ်ႈၽၢႆးလွင်ႈယဝ်ႉ။
29. ဢမ်ႇလီသုင်းသွမ်း ဢၼ်ရႁၢၼ်းယိင်းၶဝ်မိုဝ်ႉၵႅင် ၶိုင်ပွင်ယဝ်ႉ။
30. ဢမ်ႇလီၼင်ႈယူႇ တီႈလပ်ႉတႃ– ၸွမ်းရႁၢၼ်းယိင်း ၵေႃႉတေႃႇၵေႃႉယဝ်ႉ။
31. ယူႇလီယူႇသေ ဢမ်ႇလီၵႂႃႇၵိၼ်သွမ်းဢၼ်ဝႆႉၵၢပ်ႈ ဢႃႇၵၼ်ႇတုၶဝ် လိူဝ်ပွၵ်ႈလဵဝ်။
32. ဢမ်ႇလီသုင်းၶဝ်ႈသွမ်း ဢၼ်တွၵ်ႈၸိုဝ်ႈတၢင်းၵိၼ် ဢၼ်ဢဝ်ၵႂၢမ်းမိုတ်ႈလိုၼ်ႈၵၼ်သေၽိတ်ႈယဝ်ႉ။
33. ဢမ်ႇလီသုင်းၶဝ်ႈသွမ်း ဢၼ်မႃးၽိတ်ႈပႃႈလင် ယဝ်ႉ။
34. တၢင်းၵိၼ်ယွႆႈဢၼ်ဝႆႉၵိၼ်ၸွမ်းတၢင်း ဢၼ်တမ်း ၶႅၵ်ႇၼၼ်ႉ ဢမ်ႇၶၢမ်ႇဢဝ်လိူဝ်သၢမ်သပိတ်ႈယဝ်ႉ။
35. ၶဝ်ႈၽၵ်းတၢင်းၵိၼ် ဢၼ်ႁဝ်းလႆႈႁၢမ်ႈယဝ်ႉၼၼ်ႉ ဢမ်ႇလီႈၵိၼ်သုင်းၶိုၼ်း။
36. ရႁၢၼ်းၸဝ်ႈဢၼ်ႁၢမ်ႈယဝ်ႉၼၼ်ႉ ဢမ်ႇတိုၵ်း သူၼ်း ႁႂ်ႈၵိၼ်သုင်းၶိုၼ်းယဝ်ႉ။
37. ပေႃးၵၢင်ဝၼ်းၸၢႆႉယဝ်ႉ ဢမ်ႇလီၵိၼ်သုင်းၶဝ်ႈ တၢင်းၵိၼ်ယဝ်ႉ။
38. တၢင်းၵိၼ်ဢၼ်ၵၢပ်ႈယဝ်ႉၼၼ်ႉ ဢမ်ႇလီဢဝ် ၵဵပ်းဝႆႉသေ ၵိၼ်သုင်းယဝ်ႉ။
39. ထေႃးပၢတ်ႈ၊ ၼမ်ႉၼူမ်းတႅင်ႈ၊ ၼမ်ႉမၼ်း၊ ၼမ်ႉ ၽိုင်ႈ၊ ၼမ်ႉဢွႆႈ၊ ပႃ၊ ၼိူဝ်ႉ၊ ၼမ်ႉၼူမ်း၊ ၼမ်ႉၼူမ်း သူမ်ႈ ၸိူဝ်းၼႆႉ– ပေႃးယူႇလီယူႇ ဢမ်ႇလီၵႂႃႇယွၼ်း ၵိၼ်သုင်းယဝ်ႉ။
40. တၢင်းၵိၼ်တၢင်းသဵင်ႈၼၼ်ႉ ပေႃးဢမ်ႇၵၢပ်ႈဢမ်ႇ လီၵိၼ်သုင်းယဝ်ႉ။
41. တိတ်ႉထိပရပိူၵ်ႈ ၶဝ်ၼၼ်ႉ ဢမ်ႇလီဢဝ်မိုဝ်း ၸဝ်ႈၵဝ်ႇ ယိပ်းတၢင်းၵိၼ် တၢင်းယႅမ်ႉသေပၼ်ၶဝ် ယဝ်ႉ။
42. ရႁၢၼ်း ဢၼ်ႁဝ်းၸူဝ်းၵႂႃႇၶၢမ်ႇသွမ်းၼႂ်းဝၢၼ်ႈ သေတီႈတီႈၼၼ်ႉ၊ ဢမ်ႇလီႈၸႂ်ႉပိူၼ်ႈ ႁေႃႈပိူၼ်ႈ ၶိုၼ်းမႃးၵွႆးယဝ်ႉ။
43. ႁိူၼ်းဢၼ် တိုၵ်ႉၸၢမ်ႇၸေးၸိမ်ႇၽူဝ်မေးယူႇ ၼၼ်ႉ ဢမ်ႇလီၶဝ်ႈမိူဝ်းၼႂ်းႁိူၼ်းၶဝ်ယဝ်ႉ။
44. ဢမ်ႇလီၵႂႃႇယူႇၼႂ်းၵႄႈၵၢင်တၵႃႇယိင်းၶဝ် တီႈဢၼ် ၽိတ်ႇယဵၼ်တႃ ပႃးလဵဝ်ၵွႆးယဝ်ႉ။
45. ဢမ်ႇလီၵႂႃႇၼင်ႈႁူမ်ႈလူၺ်ႈ တၵႃႇယိင်းၶဝ်ၵေႃႉ တေႃႇၵေႃႉ တီႈၵႆပိူၼ်ႈယဝ်ႉ။
46. ႁူႉပိူၼ်ႈၽိတ်ႈ ၶဝ်ႈသွမ်းယူႇ– ဢမ်ႇလၢတ်ႈၽႂ်သေ ဢမ်ႇလီၵႂႃႇလႄႇ တၢင်ႇႁိူၼ်းပႅတ်ႈယဝ်ႉ။
47. ပတ်ႉၸေးသီႇပိူင် ဢၼ်ၽိတ်ႈဝႆႉ မီးဢၶၢၼ်း ၼၼ်ႉ တေလႆႈလူႇၶၢမ်ႇၸွမ်းဢၶၢၼ်း ဢၼ်ပိူၼ်ႈ ၽိတ်ႈဝႆႉၼၼ်ႉၵွႆးယဝ်ႉ။
48. တပ်ႉသိုၵ်း ဢၼ်တိုၵ်ႉႁၢင်ႈ ဢွၵ်ႇမႃးၼၼ်ႉ– ဢမ်ႇလီတင်ႈၸႂ်သေ ၵႂႃႇလွမ်တူၺ်းယဝ်ႉ။
49. ၼႂ်းတပ်ႉသိုၵ်းၼၼ်ႉ ဢမ်ႇလီယူႇပူၼ်ႉသွင် သၢမ် ၶိုၼ်းယဝ်ႉ။
50. သမ်ႉဝႃႈ ယူႇသွင်သၢမ်ၶိုၼ်းသေၵေႃႈ– ဢမ်ႇလီၵႂႃႇ တူၺ်း တီႈပိူၼ်ႈႁၢင်ႈသိုၵ်း၊ တီႈပိူၼ်ႈဢၢၼ်ႇသိုၵ်း၊ တီႈပိူၼ်ႈသွၼ်သိုၵ်း၊ တီႈတပ်ႉၸၢင်ႉ တပ်ႉမၸိူဝ်း ၼၼ်ႉယဝ်ႉ။
51. ဢမ်ႇလီၵိၼ်သူတ်ႉလဝ်ႈ ႁုင်လဝ်ႈ လႄႈယႃႈလမ် ယဝ်ႉ။
52. ဢမ်ႇလီယဝ်ႉယွၵ်ႇ ၸိတ်းသေႇၼဵၼ်ၵၼ်ယဝ်ႉ။
53. ဢမ်ႇလီလုၺ်းလဵၼ်ႈ တူပ်းလဵၼ်ႈၼမ်ႉယဝ်ႉ။
54. ဢမ်ႇလီၵိူဝ်ႉလႅၼ်ႈ မၢတ်ႈတိုၼ်ႈ သႂၢင်းၽႅပ်ႉၼိူဝ် တြႃး ၼိူဝ်ရႁၢၼ်း သေၸဝ်ႈယဝ်ႉ။
55. ရႁၢၼ်းၸဝ်ႈၼိုင်ႈလႄႈၸဝ်ႈၼိုင်ႈ– ဢမ်ႇလီလွၵ်ႇ ၵၼ်ယဝ်ႉ။
56. ယူႇလီယူႇ ဢမ်ႇမီးလွင်ႈတၢင်းသင်ၼၼ်ႉ ဢမ်ႇလီ သႂ်ႇၾႆးဢွမ်ႇယဝ်ႉ။
57. ပႆႇတၼ်းတဵမ်ၽၢၵ်ႇလိူၼ်ၼၼ်ႉ ဢမ်ႇလီဢၢပ်ႇ ၼမ်ႉထႅင်ႈယဝ်ႉ။ မၢႆတွင်း။ ၼႆႉပဵၼ်ပတေႇသပိင်းၺၢတ်ႈ၊ ပိင်းၺၢတ်ႈပၼ် ၼႂ်းမိူင်း မတ်ၸိမ ၵူၺ်းယဝ်ႉ။
58. ပေႃးတေၼုင်ႈသင်ႇၵၢၼ်းမႂ်ႇၸိုင်– ထုၵ်ႇဢဝ်ဢၼ် ၵမ်ႇ ဢၼ်လမ် ၵူမ်ႇသေပိူင်ပိူင် ယႁၢင်ႈမၼ်းသေ ၸင်ႇၼုင်ႈမႆယဝ်ႉ၊ ႁႂ်ႈထူဝ်း ၵပ်ႉပိၼ်ႇတု ၼၼ်ႉ ယဝ်ႉ။
59. ပေႃးႁဝ်းဢဝ်သၢင်ႇၵၢၼ်းၵႂႃႇၸူးႁဵတ်းဝိၵပ်ႉပၼႃႇ သေတီႈတီႈယဝ်ႉ– ပေႃးပိူၼ်ႈပႆႇ ၸုၼ်ႉပၼ်ၸိုင် ဢမ်ႇလီဢဝ်ၼုင်ႈမႆယဝ်ႉ။
60. သပိတ်ႈ– သၢင်ႇၵၢၼ်း– ၽႅၼ်ႇသိူဝ်ႇ–မူၵ်ႇၶဵမ်– ႁင်းရႁၢၼ်းသေၸဝ်ႈၸဝ်ႈၼၼ်ႉ ဢမ်ႇလီဢဝ် သိူင်ႇယဝ်ႉ။
61. ၵႃႈပဵၼ်သတ်း သတ်းတဝႃႇၼၼ်ႉ– ဢမ်ႇလီတင်ႈ ၸႂ်ဢဝ်တၢႆယဝ်ႉ။
62. ၼမ်ႉ ဢၼ်မီးမူင်ႈမႅင်းၼၼ်ႉ– ဢမ်ႇလီ ၵိၼ်သုင်း ယဝ်ႉ။
63. တြႃး ဢၼ်တႅပ်းတတ်း (သုင်းၽျၢတ်ႉ) ယဵၼ်ႁၢႆ ယဝ်ႉၼၼ်ႉ ဢမ်ႇလီပူၵ်းလုၵ်ႉၶိုၼ်းယဝ်ႉ။
64. သင်ႇၶႃႇတိသိၵ်ႈဢႃႇပၢတ်ႈ ရႁၢၼ်းသေၸဝ်ႈၸဝ်ႈ ၼၼ်ႉ ပေႃးႁဝ်းႁူႉၸွမ်းယူႇ ဢမ်ႇလီႁူမ်ႇထူမ်ဝႆႉ ယဝ်ႉ။
65. ၵေႃႉဢၼ်ဢသၢၵ်ႈဢမ်ႇတဵမ်သၢဝ်းၼၼ်ႉ ဢမ်ႇလီ ဢဝ်ၶၢမ်ႇၸၢင်းပၼ်၊ ၵေႃႉၶၢမ်ႇၵေႃႈဢမ်ႇပဵၼ်ၸၢင်း၊ ၵႃႇရၵသင်ႇၶႃႇၵေႃႈ #ထုၵ်ႇတုၵ်ႉၵၢတ်ႈဢႃႇပၢတ်ႈ၊ ဢု ပတ်ႉသေႇသမ်ႉ ထုၵ်ႇပႃႇၸိတ်ႈယဝ်ႉ။
66. ၵူၼ်ၵႃႉဢၼ်ဝႄႈတီႈၵဵပ်းၶွၼ်ႇၼၼ်ႉ ပေႃးႁဝ်းႁူႉ လီငၢမ်းယူႇ ဢမ်ႇလီႁူမ်ႈၵႂႃႇတၢင်းၶၢဝ်းယၢဝ်းၸွမ်း ၶဝ်ယဝ်ႉ။
67. မႃႇတုၵႃႇယိင်းၶဝ်ၼၼ်ႉ ဢမ်ႇလီၵႂႃႇပႆတၢင်းၶၢဝ်း ယၢဝ်းၸွမ်းၵၼ်ယဝ်ႉ။
68. ရႁၢၼ်းႁဝ်းၼႆႉ ဢမ်ႇလီႁေႃးတြႃး ဢၼ်သၢၼ် ၶတ်းတြႃးၽြႃးပဵၼ်ၸဝ်ႈယဝ်ႉ။
69. ရႁၢၼ်းဢၼ်ႁေႃးတြႃးသၢၼ်ၶတ်း တြႃးၽြႃးပဵၼ် ၸဝ်ႈသေ သင်ႇၶႃႇၶဝ်ပႄႇဝႆႉၼၼ်ႉ ဢမ်ႇလီႁူမ်ႈ ႁဵတ်း ၵၢမ်ႇဢွၼ်ႇ ၵၢမ်ႇလူင်၊ ဢမ်ႇလီႁူမ်ႈသုင်း သွမ်း၊ ဢမ်ႇလီႁူမ်ႈၼွၼ်း ၵျွင်းလဵဝ်ၵၼ်ယဝ်ႉ။
70. ၸဝ်ႈသၢင်ႇဢၼ်ႁေႃးတြႃး သၢၼ်ၶတ်းတြႃးၽြႃး ပဵၼ်ၸဝ်ႈသေ သင်ႇၶႃႇလိုပ်ႈပႅတ်ႈၼၼ်ႉ ဢမ်ႇလီ ၶျေႃးဝႆႉ၊ ဢမ်ႇလီၸႂ်ႉႁဵတ်းၵၢၼ် ဢမ်ႇလီၸႂ်ႉၵၢပ်ႈ သေသုင်း၊ ဢမ်ႇလီႁူမ်ႈၼွၼ်း ၵျွင်းလဵဝ်ၵၼ်ယဝ်ႉ။
71. ဢၼ်ရႁၢၼ်းသေၸဝ်ႈၸဝ်ႈ ဢဝ်ဝိၼႄးသိၵ်ႉၶႃႇ ပုၵ်ႈသေ သင်ႇသွၼ်ပၼ်ႁဝ်းၼၼ်ႉ ဢမ်ႇလီတွပ်ႇ ထဵင် ဝႃႈတႂ်ႈဝႃႈၼိူဝ်ယဝ်ႉ။
72. မိူဝ်ႈဢၼ်ၼႄပႃႇတိမွၵ်ႈၼၼ်ႉ ဢၼ်ၼႄသိၵ်ႉၶႃႇ ပုၵ်ႈ ဢၼ်လဵၵ်ႉဢွၼ်ႇၸိူဝ်းၼႆႉ လႆႈတၢင််းၵူၼ်ႉ လၢႆလၢႆၵွႆး၊ လႆႈတၢင်းထၢင်ႇပိူင်ႈႁင်းၸဝ်ႈၵဝ်ႇၵွႆး ၵႂၢမ်းၸိူဝ်းၼႆႉ ဢမ်ႇလီလၢတ်ႈယဝ်ႉ။
73. မိူဝ်ႈဢၼ်ၼႄပႃႇတိမွၵ်ႈၼၼ်ႉ– “ဢေႃႈ” ဢၼ် ၼႆႉမႃးၼႂ်းၼႆႉဝႃႇ ၸိူဝ်းၼႆႉၸၵႂႃႇ ဝႃႈၸွမ်း မိူဝ်ႈ ပိူၼ်ႈၼႄ ပႃႇတိမွၵ်ႈၼၼ်ႉ ဢမ်ႇလီႁဵတ်း။
74. ရႁၢၼ်းၼင်ႇၵၼ် ဢမ်ႇလီႁႅမ်ၵၼ်ယဝ်ႉ။
75. ရႁၢၼ်းၼင်ႇၵၼ် ဢမ်ႇလီဢဝ်ၽႃႇမိုဝ်းငႃ ဢဝ် ၶွၼ်ႉ ဢဝ်မႆႉ ငႃၵၼ် လွၵ်ႇၵၼ်ယဝ်ႉ။
76. ဢမ်ႇမီးငဝ်ႈႁၢၵ်ႈ လွင်ႈႁၼ်လွင်ႈငိၼ်း လွင်ႈလီ ထၢင်ႇပိူင်ႈသင်သေ– ဢမ်ႇလီဢဝ်သင်ႇၶႃႇတိသိၵ်ႈ ဢႃႇပၢတ်ႈသေ မၢပ်ႇမႂ်ၼိူဝ်ရႁၢၼ်းသေၸဝ်ႈၸဝ်ႈ ယဝ်ႉ။
77. ႁဝ်းမီးၸႂ် ၶႂ်ႈႁႂ်ႈၸႂ်ပိူၼ်ႈဢမ်ႇၵတ်းယဵၼ်သေလႄႈ ဢမ်ႇလီႁဵတ်းႁႂ်ႈၸႂ်ပိူၼ်ႈ ပဵၼ်ဢၼ်ထၢင်ႇပိူင်ႈ ထၢင်ႇၽိတ်းယဝ်ႉ။
78. ဢၼ်ပိူၼ်ႈၽိတ်းၵၼ် ထဵင်ၵၼ် ဢုပ်ႇၵၼ်လွႆးလွႆး ၼၼ်ႉ ဢမ်ႇလီၵႂႃႇၶျွင်းထွမ်ႇယဝ်ႉ။
79. ၵၢမ်ႇဢၼ်ပိူၼ်ႈ တႅပ်းတတ်းၸွမ်းတြႃးယဝ်ႉၼၼ်ႉ ႁဝ်းၵေႃႈပၼ်သၢၼ်ႇတ သေယဝ်ႉ ဝၢႆးမၼ်း သမ်ႉ ၶိုၼ်းသႄႉၶိုၼ်းၼၼ်ႉ– ဢမ်ႇလီႁဵတ်းယဝ်ႉ။
80. မိူဝ်ႈသင်ႇၶႃႇ တိုၵ်ႉတႅပ်းတတ်းၵၢမ်ႇသေပိူင်ပိူင် ၼၼ်ႉ ဢမ်ႇပၼ်သၢၼ်ႇတသေ– လုၵ်ႉၵႂႃႇပႅတ်ႈ ၼၼ်ႉ ဢမ်ႇလီႁဵတ်းယဝ်ႉ။
81. မိူဝ်ႈပၼ်သၢင်ႇၵၢၼ်း– တီႈရႁၢၼ်းသေၸဝ်ႈၼၼ်ႉ ႁဝ်းၽွမ်ႉပိူၼ်ႈသေပၼ်ယဝ်ႉ၊ ဝၢႆးမၼ်းၼၼ်ႉ ႁဝ်း ဢမ်ႇလီသႄႉပိူၼ်ႈၶိုၼ်းယဝ်ႉ။
82. လၢပ်ႈဢၼ်ဢၢၼ်းလူႇ ၵႃႈတီႈသင်ႇၶႃႇယဝ်ႉၼၼ်ႉ ဢမ်ႇလီႁေႃး ႁႂ်ႈပိူၼ်ႈလူႇ တီႈပုၵ်ႉၵူဝ်ႇသေၸဝ်ႈ ၸဝ်ႈယဝ်ႉ။
83. ပေႃးတေမိူဝ်းလႄႇ ႁိူၼ်းၸဝ်ႈႁိူၼ်းၶုၼ်ၼၼ်ႉ တေလႆႈမွၵ်ႇလၢတ်ႈ ယၢမ်းႁဝ်းတေမိူဝ်းၼၼ်ႉ ဝႆႉ ဢွၼ်တၢင်းသေ ၸင်ႇလီမိူဝ်းယဝ်ႉ။
84. ၶူဝ်းၶိူင်ႈရတၼႃႇ သေဢၼ်ဢၼ်ၼၼ်ႉ ပေႃး ဢမ်ႇၸႂ်ႈ ဢၼ်တူၵ်းၼႂ်းဝၢင်းၵျွင်း ၼႂ်းဢရၢမ်ႇႁဝ်း ၼၼ်ႉ ဢမ်ႇလီၵဵပ်းဢဝ်ယဝ်ႉ။
85. ယၢမ်းၵၢင်ဝၼ်းၸၢႆႉယဝ်ႉၼၼ်ႉ– ပေႃးဢမ်ႇမီးၵၢၼ် ဢၼ်လူဝ်ႇႁဵတ်းၼႅတ်ႈၸိုင်– ဢမ်ႇလၢတ်ႈရႁၢၼ်း သေၸဝ်ႈၸဝ်ႈသေ ၶဝ်ႈမိူဝ်းၼႂ်းဝၢၼ်ႈၼၼ်ႉ ဢမ်ႇ လီႁဵတ်းယဝ်ႉ။
86. ဢၼ်ပဵၼ်ငႃး ပဵၼ်လုပ်ႇ ပဵၼ်ၶဝ်သတ်းၸိူဝ်းၼႆႉ ဢမ်ႇလီဢဝ်ႁဵတ်းမူၵ်ႇၶဵမ်ယဝ်ႉ။
87. ၵူႇၼွၼ်း ၵူႇၼင်ႈၼၼ်ႉ– ဢမ်ႇလီႁဵတ်းတိၼ် မၼ်း လိူဝ်ပႅတ်ႇၼိဝ်ႉၽြႃးပဵၼ်ၸဝ်ႈယဝ်ႉ။
88. ၵူႇၼွၼ်း ၵူႇၼင်ႈၼၼ်ႉ– ဢမ်ႇလီတင်ႈၼုၼ်ႈ တဵင်ၵုၺ်ယဝ်ႉ။
89. ပေႃးႁဵတ်းၽႅၼ်ႇသိူဝ်ႇၼင်ႈ– ႁႂ်ႈႁဵတ်းၼႃႈယၢဝ်း သွင်ၶိုပ်ႈ၊ ၼႃႈပွတ်းၶိုပ်ႈပၢႆၶိုင်ႈ၊ ၸၢမ်းမၼ်း ၶိုပ်ႈ ႞ – ၶိုပ်ႈၽြႃးပဵၼ်ၸဝ်ႈယဝ်ႉ။
90. ပေႃးႁဵတ်းသၢင်ႇၵၢၼ်းလွင်ယဵၼ်း – ႁႂ်ႈႁဵတ်းၼႃႈ ယၢဝ်းသီႇၶိုပ်ႈ၊ ၼႃႈပွတ်းသွင်ၶိုပ်ႈ– ၶိုပ်ႈၽြႃးပဵၼ် ၸဝ်ႈယဝ်ႉ။
91. ပေႃးႁဵတ်းသၢင်ႇၵၢၼ်းလၢႆႈၽူၼ် ႁႂ်ႈႁဵတ်းၼႃႈ ယၢဝ်း– ႁူၵ်းၶိုပ်ႈ၊ ၼႃႈပွတ်း– သွင်ၶိုပ်ႈပၢႆၶိုင်ႈ၊ ၶိုပ်ႈ ၽြႃးပဵၼ်ၸဝ်ႈယဝ်ႉ။
92. သၢင်ႇၵၢၼ်း ဢၼ်ႁဝ်းမႆၼၼ်– ဢမ်ႇလီႁဵတ်း တၢၼ်ႇ– ဢမ်ႇလီႁဵတ်းလိူဝ် သၢင်ႇၵၢၼ်းၽြႃးပဵၼ် ၸဝ်ႈယဝ်ႉ၊ သၢင်ႇၵၢၼ်းၽြႃးပဵၼ်ၸဝ်ႈၼၼ်ႉ– ၼႃႈယၢဝ်းမီးၵဝ်ႈၶိုပ်ႈ၊ ၼႃႈပွတ်းမီးႁူၵ်းၶိုပ်ႈ၊ ၶိုပ်ႈ ၽြႃးပဵၼ်းၸဝ်ႈယဝ်ႉ။

ၸဢၼ်ၼႄမႃး 92 ပုၵ်ႈၼႆႉ– ပေႃးႁဵတ်းထုၵ်ႇပႃႇၸိတ်ႈ ဢႃႇပၢတ်ႈယဝ်ႉ၊ တေလႆႈၵျႃးတေႇသၼႃႇ ႁဵတ်းဢုပုၵ်ႈသေ ၸင်ႇႁၢႆယဝ်ႉ။