ၵႂၢမ်းပေႃႈ (႑႐) ၶေႃႈ

ၼႂ်းထမ်းပုတ်ႉထၸဝ်ႈၼႆႉ တေလႆႈႁၼ် ၼင်ႇပိုၼ်း ၼၢင်းဝိသႃႇၶ မိူဝ်ႈတေတႄႇၼႃႈႁိူၼ်းၼၼ်ႉ ပေႃႈမၼ်းၼၢင်း သင်ႇသွၼ်ပၼ် မီးၵႂၢမ်း (10) ၶေႃႈ ဢၼ်လီတွင်းလီမၢႆ ၊ ၽွင်းတေၵႂႃႇယူႇႁိူၼ်းပိူၼ်ႈ ႁဵတ်းလုၵ်ႉပႂ်ႉပိူၼ်ႈၼၼ်ႉ။

ၼိုင်ႈ - ယႃႇဢဝ်ၽႆးတၢင်းၼႂ်းႁိူၼ်း ဢွၵ်ႇတၢင်းၼွၵ်ႈ၊ မီးတီႈပွင်ႇဝႃႈ တေဢမ်ႇလႆႈဢဝ် လွင်ႈသုၵ်ႉယုင်ႈၼႂ်းႁိူၼ်း ၵႂႃႇၶႆႈၼႄပိူၼ်ႈတၢင်ႇၵေႃႉ ၵဵဝ်ႇလူၺ်ႈလွင်ႈ ပူႇၼၢႆးယႃႈၼၢႆးႁဝ်းလႄႈ ၸဝ်ႈၽူဝ်ႁူဝ်း။

သွင် - ယႃႇဢဝ်ၽႆးတၢင်းၼွၵ်ႈ ၶဝ်တၢင်းၼႂ်းႁိူၼ်း၊ မေးၼၢင်း တေဢမ်ႇလႆႈဢဝ် ၶၢဝ်ႇတၢင်းၼွၵ်ႈ ဢၼ်ပိူၼ်ႈလၢတ်ႈၶၢႆၸိုဝ်ႈ ၼႃႈႁိူၼ်းႁဝ်းၼၼ်ႉ မႃးလၢတ်ႈၼႂ်းႁိူၼ်းႁဝ်း။

သၢမ် - ပၼ်​ ၵေႃႉႁဝ်းထုၵ်ႇလီပၼ်၊ ထုၵ်ႇလီပၼ်ၵူႈႁိမ်ၶူဝ်းၶွင် ၵေႃႉ​ၸၢင်ႈတေမႃးတႅၼ်းလႆႈၶိုၼ်းၼၼ်ႉၵူၺ်း။

သီႇ - ယႃႇပၼ် ၵေႃႉႁဝ်းဢမ်ႇထုၵ်ႇလီပၼ်၊ ဢမ်ႇထုၵ်ႇလီပၼ်ၵူႈႁိမ်ၶူဝ်းၶွင် ၵေႃႉဢၼ်ဢမ်ႇၸၢင်ႈမႃးတႅၼ်းၶိုၼ်းလႆႈ။

ႁႃႈ - ပၼ် ၵေႃႉႁဝ်းထုၵ်ႇပၼ်လႄႈ ၵေႃႉဢမ်ႇထုၵ်ႇလီပၼ်၊ ထုၵ်ႇလီပၼ်ၸွႆႈထႅမ် ပီႈၼွင်ႉၸိူဝ်ႉၶိူဝ်း ၸိူဝ်းၽၢၼ်ၼၼ်ႉ ပၼ်ၶိုၼ်းၵေႃႈလီ ဢမ်ႇပၼ်ၶိုၼ်းၵေႃႈယဝ်ႉ ထုၵ်ႇလီမႅင်ႇပၼ်။

ႁူၵ်း - ယူႇ၊ ၼင်ႈၸွမ်းၶဝ် မီးတၢင်းသိူဝ်းသိူဝ်း၊ ထုၵ်ႇလီၸုၵ်းဝႆႉ ၽၢႆႇၼႃႈပူႇၼၢႆးယႃႈၼၢႆး ၽွင်းၶဝ်ဢမ်ႇပႆႇႁွင်ႉၼင်ႈ။

ၸဵတ်း - ၵိၼ်သိူဝ်းသိူဝ်း၊ မိူဝ်ႈၵိၼ်ၶဝ်ႈၼၼ်ႉ တေလႆႈတူၺ်း ပူႇၼၢႆးယႃႈၼၢႆး လူဝ်ႇသင်၊ ၸဝ်ႈၽူဝ်လူဝ်ႇၽၵ်းသင် တူၺ်းပၼ်ၶဝ်ဢွၼ်တၢင်းသေ ၸင်ႇၼင်ႈၵိၼ်ႁူမ်ႈမူႇၸွမ်းၶဝ်။

ပႅတ်ႇ - ၼွၼ်းသိူဝ်းသိူဝ်း (လပ်းလီ) ဢွၼ်ၼႃႈ ပႆႇၶဝ်ႈၼွၼ်းၼၼ်ႉ တေလႆႈတူၵ်းၽၵ်းတူ ႁပ်းဢမ်ႇႁပ်း၊ တေလႆႈၶဝ်ႈၼွၼ်းဝၢႆးလင်၊ လုၵ်ႉၸဝ်ႉၸဝ်ႉ ၼင်ႇၵူၼ်းၶႃႈ ၵူၼ်းၸႂ်ႉၶဝ်ႁဵတ်း။

ၵဝ်ႈ - ဝႆႉသတိ ၽႆး၊ ပူႇၼၢႆးယႃႈၼၢႆးလႄႈ ၸဝ်ႈၽူဝ်ၼႆႉ တေလႆႈဝူၼ်ႉဝႆႉၼႂ်းၸႂ်ဝႃႈ မိူၼ်ၽႆး၊ ၸၢင်ႈပဵၼ်ၽေးၼႆ တေလႆႈဝႆႉသတိတႃႇသေႇ။

သိပ်း - ၼပ်ႉယမ်ၸဝ်ႈႁိူၼ်းၼင်ႇ ၸဝ်ႈၽီ၊ တေလႆႈဝူၼ်ႉဝႃႈ ပူႇၼၢႆးယႃႈၼၢႆးလႄႈ ၸဝ်ႈၽူဝ်ၼႆႉ မိူၼ်ၶုၼ်ၽီ ၵွပ်ႈၼႆ တေလႆႈၼပ်ႉယမ်ၶဝ် ၼင်ႇၶုၼ်ၽီ ၼႆယဝ်ႉ။

ၸိူဝ်း (10) ၶေႃႈၼႆႉ မၼ်းပဵၼ် ၽွၼ်းလီ တႃႇ​မေးၼၢင်းလႄႈ တႃႇၼႃႈႁိူၼ်းမူၼ်း တႃႇတူင်ႇဝိူင်းၵူၼ်းသိူဝ်းၸႂ်လႆႈ ၵမ်းလဵဝ်းယဝ်ႉ။ သင်ဝႃႈ ၼၢင်းယိင်းၶဝ် တေမိူဝ်းယူႇႁူမ်ႈၶၢင်းၸဝ်ႈၽူဝ် တီႈႁိူၼ်းပိူၼ်ႈၼၼ်ႉၸိုင် တေလႆႈယိူင်ႈၸွမ်း ၼင်ႇ ၵႂၢမ်းပေႃႈ (10) ၶေႃႈၼႆႉ မၼ်းတိုၼ်းတေလႆႈ ႁၼ်ၽွၼ်းလီ ပေႃႈမႄႈသွင်ၽၢႆႇလႄႈ ၸဝ်ႈၽူဝ် ပီႈၼွင်ႉၶိူဝ်းပိူၼ်ႈ ႁၵ်ႉႁွမ်ႁဝ်း ၸွမ်းၼင်ႇ ႁဝ်းပဵၼ် လုၵ်ႉပႂ်ႉလီ ၼၼ်ႉယူႇယဝ်ႉ။

ၽိုၼ်ဢိင်

ၼႃႈလိၵ်ႈ 47၊ ပပ်ႉသဵၼ်ႈတၢင်းၶိုၼ်ႈယႂ်ႇ တႃႇတူင်ႇဝိူင်းၵူၼ်း ၸွမ်းၼင်ႇ ထမ်းပုတ်ႉထ၊ ၸဝ်ႈၶူးပၼ်ႇတိတ ၼမ်ႉၶမ်း