ပိူင်လိူင်း:ၸဝ်ႈမူဝ်ၶိူဝ်း

ၸႃႇတိ

ၸဝ်ႈမူဝ်ၶိူဝ်း ပဵၼ် ၸႃႇတိ ပွတ်းၵဵင်းလူမ်း မိူင်းတႆးပွတ်းၸၢၼ်း။ ၵိူတ်ႇမိူဝ်ႈပီ 1955 ၊

ႁၢပ်ႇၵၢၼ်

ၶဝ်ႈႁၢပ်ႇၵၢၼ်သိုၵ်း ယူႇပွတ်းမိူင်းပဵင်း - ၵဵင်းတုင် ပၢၼ်ၶွမ်ႇမိဝ်ႇၼိတ်ႉ ၸဵမ်မိူဝ်ႈဢႃယု 16 ပီ ဝၢႆးမႃး ၶဝ်ႈႁူမ်ႈတပ်ႉသိုၵ်းလုၵ်ႉၽိုၼ်ႉၽွမ်ႉႁူမ်ႈတႆး SURA ဢၼ်ၸဝ်ႈၵွၼ်းၸိူင်း ဢွၼ်ႁူဝ်သေ လႆႈႁပ်ႉပုၼ်ႈၽွၼ်းၵုမ်းသိုၵ်း ၶဝ်ႈပၢင်တိုၵ်းသိုၵ်းမၢၼ်ႈ ပွတ်းမိူင်းပၼ်ႇ ၵဵင်းတွင်း မိူင်းၼၢႆး ၶူဝ်လမ် လၢႆးၶႃႈ ၵေးသီး မိူင်းၵိုင် ၸိူဝ်းၼႆႉ။ မိူဝ်ႈပၢၼ်တပ်ႉသိုၵ်းမိူင်းတႆး MTA ၼၼ်ႉ လႆႈၶဝ်ႈပၢင်တိုၵ်းသိုၵ်းဝ တီႈလွႆလၢင်း ၶၢဝ်းတၢင်းႁိုင်လၢႆလၢႆပီ ထိုင်တီႈတိူဝ်ႉမၢတ်ႇၸဵပ်းတီႈၶႃ ဢမ်ႇပႆလႆႈလီလႄႈ လႆႈၵိုတ်းလိုဝ်ႈ ယူႇဝႆႉတီႈမိူင်းထႃး တေႃႇ ၶုၼ်သႃႇ MTA ဝၢင်းၶိူင်ႈၵႂႃႇမိူဝ်ႈပီ 1996။

ပုၼ်ႈၽွၼ်း

မိူဝ်ႈမၼ်းၸဝ်ႈ ယူႇၼႂ်းၸုမ်းသိုၵ်းပၢၼ် SURA လႄႈ MTA ၼၼ်ႉ ယၢမ်ႈလႆႈႁပ်ႉပုၼ်ႈၽွၼ်း တူင်ႉၼိုင်ၵၢၼ်သိုၵ်း ယူႇႁူမ်ႈၽူႈမီးၸိုဝ်ႈသဵင်ၶဝ်လၢႆၸဝ်ႈ မိူၼ်ၼင်ႇ ၸဝ်ႈယွတ်ႈသိုၵ်း ၸဝ်ႈၵၢၼ်းယွတ်ႈ ၸဝ်ႈၸၢႆးယီႈ ၸဝ်ႈမႁႃႇၵျႃႇ ၸဝ်ႈၸၢႆးလူႇ (ၸဝ်ႈလႅင်းသႂ်) လႄႈယၢမ်ႈယူႇၼႂ်းတပ်ႉၸုမ်း ၸဝ်ႈၵၼ်းၸဵတ်း မႃးယူႇယဝ်ႉ။

ဝၢႆးဝၢင်းၶိူင်ႈ

ဝၢႆးၶုၼ်သႃႇ MTA ဝၢင်းၶိူင်ႈယဝ်ႉ မၼ်းၸဝ်ႈယူႇပဵၼ်ၵူၼ်းမိူင်း ႁဵတ်းၵၢၼ်ၵႃႉၶၢႆယူႇသဝ်းၵႂႃႇမႃးပွတ်းၼမ်ႉၸၢင် လၢင်းၶိူဝ်း မိူင်းပၼ်ႇ မိူင်းတူၼ် လႄႈလႆႈထုၵ်ႇသိုၵ်းမၢၼ်ႈ တိၺွပ်းယွၼ်ႉသွၵ်ႈႁၼ်ၶူဝ်းၽိတ်း ၼႂ်းၵႃးမၼ်းၸဝ်ႈၶီႇလႄႈလႆႈၶၢမ်ႇတူၵ်းၶွၵ်ႈမၢၼ်ႈႁိုင် 10 ပီပၢႆ ။ ဝၢႆးဢွၵ်ႇၶွၵ်ႈမၢၼ်ႈမႃး ၼႂ်းပီ 2010 လႆႈၶိုၼ်းၶဝ်ႈႁူမ်ႈ ၸုမ်းသိုၵ်းၵူၼ်းမိူင်း (ပိတုၸိတ်ႉ) MTA မၢၵ်ႇၵႅင်း ဢၼ်ၸဝ်ႈလႅင်းသႂ် ဢွၼ်ႁူဝ်ၼၼ်ႉ ပဵၼ်ၸၼ်ႉၸဝ်ႈႁၢၼ် ႁပ်ႉပုၼ်ႈၽွၼ်းယူႇၾၢႆႇဢုပ်ႇပိူင်ႇ ၾၢႆႇတႅပ်းတတ်းတြႃး ၸဝ်ႈမူဝ်ၶိူဝ်းၼႆႉ ပဵၼ်ၵူၼ်း မီးၸႂ်ႁၵ်ႉၸိူဝ်ႉၸၢတ်ႈဝၢၼ်ႈမိူင်း ပဵၼ်ၵူၼ်းသူင်ပႃးၸႂ် ၵၢၼ်သိုၵ်းတႄႉတႄႉဝႃႈဝႃႈ။ ယူႇၼႂ်းသိုၵ်းၸွမ်းပၵ်းပိူင်သိုၵ်း ႁၢင်ႈႁႅၼ်းတူဝ်ႈတၼ်းတႃႇသေႇ လိူဝ်ၼၼ်ႉၸဝ်ႈၵႆႉလၢတ်ႈ လွင်ႈထွတ်ႈမျၢတ်ႈ 4 ယိူင်ႈ (ၸိူဝ်ႉၸၢတ်ႈ၊ ဝၢၼ်ႈမိူင်း၊ ၽႃႇသႃႇ၊ သႃသၼႃႇ) ဢၼ်ပဵၼ်ၶေႃႈလၵ်းၼမ်း ပုၼ်ႈတႃႇၸိူဝ်ႉၸၢတ်ႈ ဢၼ်ၸဝ်ႈၵွၼ်းၸိူင်း ၽုၵ်ႇၾင်ၸႂ်မႃးၼၼ်ႉယဝ်ႉ ။

ပွင်ၵၢၼ်သႃႇသၼႃႇ

ၵဵဝ်ႇလွင်ႈၵၢၼ်သႃသၼႃႇ ပၢႆးပၺ်ႇၺႃႇၵေႃႈမၼ်းၸဝ်ႈ လႆႈပဵၼ်ၸဝ်ႈတႃႇၼႁူမ်ႈလူႇတၢၼ်း သၢင်ႈဝတ်ႉ ဝိႁၢၼ်ႇ ၸေႇတီႇ ႁူမ်ႈပဵၼ်ပေႃႈဢွၵ်ႇ ၶၢမ်ႇသၢင်ႇၶၢမ်ႇၸၢင်း လႄႈ ၵမ်ႉၸွႆႈသင်ႇၶ ၵႂႃႇႁဵၼ်းလိၵ်ႈၼွၵ်ႈမိူင်းၸိူဝ်းၼႆႉ မီးတင်းၼမ်ယူႇယဝ်ႉ ။ ၵွင်းမူးလူင်ပုတ်ႉထၵႃႇယႃႇ ဝတ်ႉၵုင်းပိၼ်း မိူင်းပၼ်ႇၼၼ်ႉၵေႃႈ မၼ်းၸဝ်ႈႁူမ်ႈပဵၼ်ၸဝ်ႈတႃႇၼလူင်ၵေႃႉၼိုင်ႈ ၊ ၾၢႆႇၼိုင်ႈ မိူဝ်ႈပၢၼ်မၼ်းၸဝ်ႈ မၢတ်ႇၸဵပ်းၵိုတ်းလိုဝ်ႈယူႇ မိူင်းထႃးၼၼ်ႉၵေႃႈ ယၢမ်ႈလႆႈပဵၼ်‌ၸဝ်ႈတႃႇၼ သၢင်ႈလူႇၶူဝ်လႆၶိုၼ်ႈဝတ်ႉၵျွင်းမိူင်းထႃး ဝႆႉမိူဝ်ႈပီ 1993။

သဵင်ႈၵၢမ်ႇသုတ်းမုၼ်

တေႃႇပေႃးဢမ်ႇယူႇလီလႄႈ လႆႈလုသဵင်ႈၵႂႃႇ တီႈႁူင်းယႃလူင်ထူၼ်းၿူးရီး ၵုင်းထဵပ်ႈ မိူင်းထႆး မိူဝ်ႈဝၼ်းထိ 13.8.2025 ၽွင်းဢႃယု 70 ပီ ၼၼ်ႉယဝ်ႉ။ မိူဝ်ႈလဵဝ်ၶၢပ်ႈတူဝ် ၸဝ်ႈႁၢၼ်မူဝ်ၶိူဝ်း ဝႆႉတီႈဝတ်ႉသျိၼူဝ်းရသႃရၢမ်းဝေႃးရဝိႁၢရ်ႇ (วัดชีโนรสารามวรวิหาร) ၿၢင်းၵွၵ်ႇၼွႆႉ ၵုင်းထဵပ်ႈ ၊ ဝၼ်းထိ 15 - 17.8.2025 မီးပၢင်ႁေႃးထမ်းတြႃးၵူႈၶမ်ႈ တႄႇၶၢဝ်းယၢမ်း 18.30 မူင်း ၊ ဝၼ်းထိ 18.8.2025 ယၢမ်း 14.00 မူင်း ၸႃႇပၼၽဝ်ၶၢပ်ႈတူဝ်ၸဝ်ႈယဝ်ႉ။