ၸၼ်ႉၸွမ်ပုတ်ႉထမိူင်းတႆး

ၸၼ်ႉၸွမ်ပုတ်ႉထမိူင်းတႆး

ၸၼ်ႉၸွမ်ပုတ်ႉထမိူင်းတႆး
ၸိုဝ်ႈတၢင်ႇဢၼ်	SSBU
ၶေႃႈၶၼ်ပၢၵ်ႇ	bhāsaye jotaye dhammaṃ (pāli)
ၶေႃႈၶၼ်ပၢၵ်ႇ ၽၢႆႇဢိင်းၵလဵတ်ႈ	"to dialogue and uphold the torch of dharma"
မဵဝ်း	Public
တႄႇတင်ႈမႃး	2016 (2016)
ဢထိပတိ	ၸဝ်ႈၶူးလူင် ၶမ်းမၢႆ ထမ်မသႃမိ
ႁႅင်းၵၢၼ်ၽူႈလူင်ႉလႅၼ်ႇ	71
ႁႅင်းၵၢၼ်ၽူႈပူၵ်းပွင်	103
လုၵ်ႈႁဵၼ်း	208
ၸၼ်ႉၶူး	53
ဝၢႆးၸၼ်ႉၶူး	24
လုၵ်ႈႁဵၼ်းၸၼ်ႉၶူးလူင်	6
တီႈယူႇ	ဝဵင်းတူၼ်ႈတီး , မိူင်းတႆး , မိူင်းမျၢၼ်ႇမႃႇ 20.79364°N 97.07645°E / 20.79364; 97.07645
သီ	Orange
ဝႅပ်ႉသၢႆႉ	www.ssbu.edu.mm

လွင်ႈတၢင်း

ၸၼ်ႉၸွမ်ပုတ်ႉထမိူင်းတႆးၼႆႉပဵၼ် ၸၼ်ႉၸွမ်ပုတ်ႉထဢၼ်ၵေႃႇတင်ႈဢွၼ်တၢင်းသုတ်းပိူၼ်ႈ ၼႂ်းမိူင်းတႆးၼႆႉယဝ်ႉ။ ၽူႈဢွၼ်ႁူဝ်ၵေႃႇတင်ႈ ၸဝ်ႈၶူးလူင် ၶမ်းမၢႆ ထမ်မသႃမိ ၼႆႉ ၵွပ်ႈပိူဝ်ႈလႆႈပဵၼ် ၽူႈၼမ်းၼႂ်းလူင် ၼႂ်းၸုမ်းၸၼ်ႉၸွမ်ပုတ်ႉထၵူႈမိူင်းမိူင်း (International Association of Buddhist Universities)IABU လႄႈ မီးတူဝ်ထူပ်းဢုပ်ႇဢူဝ်း ၸၼ်ႉၸွမ်ပုတ်ႉထၵူႈၸၢတ်ႈၸိုင်ႈမိူင်း ၼွၵ်ႈမိူင်းၼႂ်းမိူင်းသေ ပဵၼ်ဢၼ်လွင်ႈလီၶွႆသေဢမ်ႇၵႃး ပၢႆးဝူၼ်ႉ ၸဝ်ႈၶူးလူင် ထမ်မသႃမိ ႁဝ်းၵေႃႈ လႆႈမီးပၢႆးဝူၼ်ႉ တေၸဵမ်မိူဝ်ႈ ပီ 1987 ၼၼ်ႉယဝ်ႉလႄႈ ၸင်ႇလႆႈၵေႃႇတင်ႈ ၸၼ်ႉၸွမ်ပုတ်ႉထ မႃးယူႇယဝ်ႉ။ ၸၼ်ႉၸွမ်ပုတ်ႉထမိူင်းတႆးၼႆႉ လႆႈတေႇၽိသိၵ်ႇမင်ၵလႃတီႈလိၼ် မိူဝ်ႈပီ 2014 ၼီႈသေ တေတင်ႇမႃး ထိုင်မႃးပီ 7-2-2016 ၼၼ်ႉ ၸင်ႇလႆႈပိုတ်ႇၽုၺ်ႇမႃးယူႇယဝ်ႉ။ မိူဝ်ႈပီၵေႃးၸႃႇ 1377 ၼီႈ၊ လိူၼ်ၵမ်လွင်ႈ(14)ၶမ်ႈ၊ ပီ 2016 ၼီႈ၊ လိူၼ်ၽေႇပဝႃရီ (7) ဝၼ်း၊ ဝၼ်းဢႃးတိတ်ႉၼၼ်ႉ ၸဝ်ႈသင်ႇၶတူၼ်လူင်ၶဝ်ၸဝ်ႈ၊ ၽူႈယႂ်ႇၵူၼ်းလူင်ၸၼ်ႉၸိုင်ႈမိူင်းၶဝ်ၸဝ်ႈ၊ ၽူႈလူင်ႉလႅၼ်ႇ လႄႈၸဝ်ႈတႃႇၼသတ်ထႃးၼွၵ်ႈမိူင်းၼႂ်းမိူင်း ၶဝ် ဢွၼ်ၵၼ်ၶိုၼ်ႈႁွတ်ႈမႃးထိုင်တီႈ သၼ်လွႆပၺႃၽေႃထိ၊ ပွၵ်ႉၽြႃးၽိူၵ်ႇ၊ ဝဵင်းလူင်တူၼ်ႈတီး သေ လႆႈပိုတ်ႇၽုၺ်ႇပၢင်မင်ႇၵလႃႇ ၸၼ်ႉၸွမ်ပုတ်ႉထမိူင်းတႆး မႃးယူႇယဝ်ႉ။

ၶေႃႈယၼ်ႇၸႂ်ႈ

ၸၼ်ႉၸွမ်ပုတ်ႉထမိူင်းတႆး လႆႈဝၢင်းဝႆႉ ၶေႃႈယၼ်ႇၸႂ်ဝႆႉဝႃႈ- ၽႃသယေ ၸေႃတယေ ထမ်မံ - ဢုပ်ႇၵူမ်ၶူၼ်ႉၶႆႈ ပိူင်းတႆႈထမ်မ ၼႆသေ ဝၢင်းၽႅၼ်လွင်ႈၶိုင်ႇၶမ်ႉ ၽၢႆႇပၢႆးၵၢၼ်ႁဵၼ်း လႄႈ ၽၢႆႇပၢႆးၸတ်းၵၢၼ် ပူၵ်းၶွင်း ၸၼ်ႉၸွမ်ၵႂႃႇယူႇယဝ်ႉ။ ဢိင်ဢဝ်ၶေႃႈယၼ်ႇၸႂ်ၼႆႉသေ တေဢွၼ်ႁူဝ်သပ်းလႅင်းၼေ လွၼ်ႉထမ်းတြႃးၶေႃႈသင်ႇသွၼ်ပုတ်ႉထၸဝ်ႈ တွၼ်ႇတႃႇၽူႈသူင်ႇလဵပ်ႈႁဵၼ်း ၼႂ်းမိူင်းၼွၵ်ႈမိူင်း လႄႈတၵႃႇသတ်ထႃးတင်းၼမ်ၵႂႃႇယူႇယဝ်ႉ။

ထုင်းၵႂၢမ်းမီးဝႆႉဝႃႈ ၼူၵ်ႉၸွၵ်ႇပေႉလႅမ်ႈၶႃး၊ ၸၢင်ႉငႃးပေႉတုမ်မႆႉ ၼႆၶႃႈလႄႈ ၼင်ႇၵႃႈပွင်ပဵၼ်လႆႈၼၼ်ႉ ယဝ်ႉၵေႃႈ တႃႇႁႂ်ႈပဵၼ်ဢၼ်ၵမ်ႉထႅမ် လွင်ႈယုၵ်ႉယွင်ႈပုတ်ႉထသႃသၼႃႇၸွတ်ႇတူဝ်ႈလူၵ်ႈလုမ်ႈၾႃႉၼၼ်ႉ ၸၼ်ႉၸွမ်ပုတ်ႉထမိူင်းတႆးႁဝ်း လႆႈဝၢင်းပိူင်ၽေႃႇလၸီႇလီလီငၢမ်းငၢမ်းသေ ၵေႃႇသၢင်ႈပိုတ်ႇၽုၺ်ႇမႃးယူႇယဝ်ႉ။ ဢိင်ဢဝ်လွင်ႈဝၢင်းၽႅၼ်ၶၢဝ်းယၢဝ်းသေ ၼင်ႇႁိုဝ်တေဢမ်ႇပိူင်ႈၵၼ်တင်း ၸၼ်ႉၸွမ်ၵူႈမိူင်းမိူင်းၼၼ်ႉလႄႈ လႆႈပိုတ်ႇၽုၺ်ႇဢွင်ႈၵၢၼ်လူင် (Division) ဝႆႉ 2 ဢွင်ႈၵၢၼ်လူင် ဢွၼ်တၢင်းသေယဝ်ႉ တေႇတူင်ႉၼိုင်မႃးယူႇယဝ်ႉ။

ၸၼ်ႉၸွမ်ပုတ်ႉထမိူင်းတႆး လႆႈပိုတ်ႇၽုၺ်ႇဝႆႉ ဢွင်ႈၵၢၼ်လူင် လႄႈ ဢွင်ႈၵၢၼ်ဢွၼ်ႇ ၸိူဝ်းၼၼ်ႉၸမ်ႉ- ဢွင်ႈၵၢၼ်လူင် ၽၢႆႇၸတ်းၵၢၼ်ပူၵ်းၶွင်း (Administrative and management Division) လႄႈ ဢွင်ႈၵၢၼ်လူင်ၽၢႆႇပၢႆးပၺႃ (Academic Division) မီးဝႆႉၼင်ႇၼႆယဝ်ႉ။ တီႈၼႆႈတေလၢတ်ႈၼေ ဢွင်ႈၵၢၼ်ဢွၼ်ႇ ဢၼ်မီးၽၢႆႇတႂ်ႈၵၢၼ်ပၢႆးပၺ်ၺႃႇၸိူဝ်းၼႆႉလူႇၵွၼ်ႇ-

• ဢွင်ႈၵၢၼ်လဵပ်ႈႁဵၼ်းလိၵ်ႈပႃႇလိ လႄႈ ၽႃႇသႃႇၵႂၢမ်းလၢတ်ႈ (Department of Pali and Languages)
• ဢွင်ႈၵၢၼ်လဵပ်ႈႁဵၼ်းလိၵ်ႈလူင် (Manuscript Studies Centre) လႄႈ
• ဢွင်ႈၵၢၼ်လဵပ်ႈႁဵၼ်းလႆၢးၸတ်းၵၢၼ်ႁူင်းတူၺ်းလိၵ်ႈ (Library and Information Management) ၸိူဝ်းၼႆႉယူႇယဝ်ႉ။

ၸိူဝ်းဢၼ်ပႆႇတဵမ်ၸၼ်ႉဢွင်ႈၵၢၼ်ၼၼ်ႉ လႆႈမၵ်းမၼ်ႈဝႃႈဢွင်ႈၵိင်ႇၽေ (Subject Unit) ၼႆယဝ်ႉ။ ၼႂ်းၸိူဝ်းၼၼ်ႉၸမ်ႉ-

1. ဝိၼယ (Vinaya Studies)
2. သုတ်တၼ်တ (Suttanta Studies)
3. ထေရဝႃတ ဢၽိထမ်မ (Theravada Abhidhamma Studies)
4. ပုတ်တတသ်သၼ (Buddhist Philosophy)
5. ပုတ်ထတသ်သၼ လႄႈတူင်ႇဝိူင်းၵူၼ်း (Buddhist Sociology)
6. ပုတ်ထမၼုသ်သပေတ (Buddhist Anthropology)
7. ပုတ်ထသုၶုမ (Buddhist Arts)
8. သၼ်သၵရိတ်ႉ (Sanskrit) လႄႈ
9. ပိုၼ်း (History) ၸိူဝ်းၼႆႉယဝ်ႉ။

တေဢဝ်ပီၵၢၼ်ႁဵၼ်း 2018-19 မႃးၼၼ်ႉ ၸၼ်ႉၸွမ်ပုတ်ထမိူင်းတႆး လႆႈႁပ်ႉသွၼ်ပၼ် ၸၼ်ႉၶူးမေႃ Ph.D၊ ၸၼ်ႉမႁႃ M.A (Pāli and Buddhist studies) ၸိူဝ်းၼႆႉသေယဝ်ႉ ထိုင်မႃး ပီၵၢၼ်ႁဵၼ်း 2020-2021 လႆႈသိုပ်ႇႁပ်ႉ သွၼ်ၸၼ်ႉတီႇပလူဝ်ႇမႃႇၸၼ်ႉသုင် (Postgraduate Diploma) လႄႈ ၸၼ်ႉၶူး B.A (လဵပ်ႈႁဵၼ်းလိၵ်ႈလူင် ၽၢႆႇတႆး) မႃးယူႇယဝ်ႉ။ ထိုင်မႃး ပီၵၢၼ်ႁဵၼ်း 2022-2023 ၼႆႉ လႆႈသိုပ်ႇပိုတ်ႇသွၼ် ၸၼ်ႉတီႇပလူဝ်ႇမႃႇၸၼ်ႉသုင် (Postgraduate Diploma) Library information and Management ၽၢႆႇၸတ်းၵၢၼ်ႁူင်းတူၺ်းလိၵ်ႈ ထႅင်ႈယူႇယဝ်ႉ။ တေႃႈလဵဝ် ၼႂ်းပီၵၢၼ်ႁဵၼ်း 2024-2025 ၶိုၼ်းလႆႈ သိုပ်ႇပိုတ်ႇႁပ်ႉၸၼ်ႉၶူး B.A (Pāli and Buddhist studies) ၽၢႆႇဢင်းၵိတ်ႉ လႄႈ ၸၼ်ႉမႁႃ M.A ၽၢႆႇလဵပ်ႈႁဵၼ်းလိၵ်ႈလူင် မႃးယူႇယဝ်ႉ။

သင်ဝႃႈ သူၼ်ၸႂ်ၶႂ်ႈလဵပ်ႈႁဵၼ်းတီႈၸၼ်ႉၸွမ်ပုတ်ႉထမိူင်းတႆးၼႆ ဢမ်ႇၼၼ် ၶႂ်ႈႁူႉလွင်ႈတၢင်း ၶေႃႈမုၼ်းၼမ်လိူဝ်ၼႆႉၸိုင် ၶဝ်ႈၵႂႃႇတူၺ်းတီႈ ဝဵပ်ႉသၢႆႉ https://www.ssbu.edu.mm/ ၼႆႉ လႆႈယူႇ။ ၵပ်းသိုပ်ႇမႃးတီႈၼႂ်း facebook- https://www.facebook.com/shanstate.buddhistuniversity/