ၻီပဝိမႃၼဝတ်ထု၊ ၼၢင်းၽီ ႁိူဝ်ႈလႅင်း မိူၼ်လၢဝ်မႃမွင်း
9-ၻီပဝိမႃၼဝတ်ထု၊ ၼၢင်းၽီ ႁိူဝ်ႈလႅင်း မိူၼ်လၢဝ်မႃမွင်း[မႄးထတ်း | မႄးထတ်းငဝ်ႈငႃႇ]
- 75။ ၼၢင်းၽီ မိူၼ်ၼင်ႇလၢဝ်မႃမွင်း ႁိူဝ်ႈႁိူင်းလႅင်းပိူင်း ၵူႈပႃႈၵူႈၽၢႆႇၼင်ႇၼၼ် ငဝ်းတူဝ်မႂ်း ၼၢင်း ဢၼ်လီႁၢၼ်ႉၸႂ်ၼႃႇၼၼ်ႉၵေႃႈ ႁိူဝ်ႈႁိူင်းပိူင်းလႅင်းၵႂႃႇ ၵူႈပႃႈၵူႈတၢင်းဝႆႉယူႇယဝ်ႉ။
- 76။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းလႆႈမီး ဢူဢၢႆသၢႆငဝ်းႁိူဝ်ႈလႅင်းၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်လႄႈ တမ်ႈတီႈၼႆႈ မႂ်းၼၢင်းမႃးလႆႈၽွၼ်းလီ တဵမ်ထူၼ်ႈၼေႃး။ ယွၼ်ႉပိူဝ်ႈ ၵုသူဝ်ႇသင်သေ မႂ်းၼၢင်းမႃးလႆႈပူၺ်ႈၽီ တၼ်းၸႂ်ၼင်ႇၼႆၼေႃး။
- 77။ ၼၢင်းၽီ ၵွပ်ႈပိူဝ်ႈ ၵုသူဝ်ႇသင်သေ မႂ်းၼၢင်းလႆႈမႃးမီး ဢူငဝ်း ၸိုၼ်ႈသႂ်ၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်သေ မႂ်းၶိုၵ်ႉတွၼ်းလိူဝ်သေ (ၽီတၢင်ႇၸိူဝ်း)ၼေႃး။ ၵွပ်ႈပိူဝ်ႈ ၵုသူဝ်ႇသင်သေ ႁၢင်ႈၽၢင်လဵၵ်ႉယႂ်ႇတူဝ်မႂ်း ႁိူဝ်ႈလႅင်းၵႂႃႇ ၵူႈပႃႈၵူႈၽၢႆႇၼေႃး။
- 78။ ၼၢင်းၽီ ဢူမုၼ်ၽုင်းယႂ်ႇ ၵဝ်ထၢမ်မႂ်းယူႇယဝ်ႉ။ မိူဝ်ႈပဵၼ်ၵူၼ်းၼၼ်ႉ မႂ်းလႆႈႁဵတ်းၵုသူဝ်ႇ သင်မႃးၼေႃး။ ယွၼ်ႉပိူဝ်ႈ ၵုသူဝ်ႇဢၼ်လႂ်သေ မႃးလႆႈမီး ဢူဢၢႆသၢႆငဝ်းလႅင်းၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်းၵေႃႈ သမ်ႉပေႃး ႁိူဝ်ႈႁိူင်းမၢပ်ႈမိပ်ႈၵႂႃႇ ၵူႈပႃႈၵူႈၽၢႆႇၼေႃး။
- 79။ ၵွပ်ႈပိူဝ်ႈ ၸဝ်ႈမွၵ်ႉၵလၢၼ်ႇထၢမ်လွင်ႈတၢင်းမၼ်းလႄႈ ၼၢင်းၽီၵေႃႈ ႁူမ်ႁူမ်ၸူမ်းၸူမ်း ၸင်ႇၶိုၼ်းတွပ်ႇလၢတ်ႈၼႄ လွင်ႈတၢင်းမၼ်းၵႂႃႇ ၸွမ်းၼင်ႇၶေႃႈထၢမ်ၼၼ်ႉယဝ်ႉ။
- 80။ တမ်ႈတီႈ မိူင်းၵူၼ်း မိူင်ႈပဵၼ်ၵူၼ်းၸိုင် ၶၢဝ်းယၢမ်းၵၢင်ၶမ်ႈလပ်းသိင်ႇ ၶၢဝ်းပိူၼ်ႈတႆႈ ၽႆးၼၼ်ႉ ၶႃႈၼၢင်းလႆႈလူႇတၢၼ်း ၽႆးယဝ်ႉ။ (ဢဝ်ၼမ်ႉမၼ်းသႂ်ႇဝၢၼ်ႇ ၸပ်းၽႆးတိၼ်ၵႃလူႇ)
- 81။ ၵေႃႉဢၼ်လႆႈလူႇတၢၼ်း ၽႆးလႅင်း တမ်ႈတီႈ လပ်းသိင်ႇမိုတ်းတၼ် ၶၢဝ်းယၢမ်းတႆႈၽႆးၼၼ်ႉ တမ်ႈတီႈမၼ်း တၵ်းပဵၼ်မႃး မွၵ်ႇတင်းၼမ် မွၵ်ႇမူဝ်တင်းၼမ်သေ လႆႈမီးႁေႃဝိမၢၼ်ႇႁိူဝ်ႈလႅင်းယဝ်ႉ။
- 82။ ယွၼ်ႉပိူဝ်ႈ ၵုသူဝ်ႇၼႃးမုၼ်ဢၼ်ၼၼ်ႉသေ ၶႃႈၼၢင်းၸင်ႇမႃးမီး ငဝ်းတူဝ်ႁိူဝ်ႈလႅင်းပိူင်း ၼင်ႇၼႆယဝ်ႉ။ ၵွပ်ႈပိူဝ်ႈ ၵုသူဝ်ႇဢၼ်ၼၼ်ႉလႄႈ တမ်ႈတီႈၼႆႈ ၶႃႈၼၢင်းၸင်ႇလႆႈပူၺ်ႈလီ(ၸီးၸိမ်ႇ) တင်းသဵင်ႈ ဢၼ်ပဵင်းဢူၵ်းပဵင်းၸႂ်ၼၼ်ႉယဝ်ႉ။
- 83။ ၵွပ်ႈၵုသူဝ်ႇဢၼ်ၼၼ်ႉသေ ၶႃႈၼၢင်းလႆႈမီး ငဝ်းလႅင်းၸိုၼ်ႈသႂ်ယဝ်ႉ။ ၵွပ်ႈၵုသူဝ်ႇၼၼ်ႉ သေ ၶႃႈၼၢင်း ၶိုၵ်ႉတွၼ်းလိူဝ်သေ (ၽီတၢင်ႇၸိူဝ်း)ယဝ်ႉ။ ၵွပ်ႈၵုသူဝ်ႇၼၼ်ႉသေ ႁၢင်ႈၽၢင်လဵၵ်ႉယႂ်ႇ ၶႃႈၼၢင်း ႁိူဝ်ႈလႅင်းၵႂႃႇ ၵူႈပႃႈၵူႈၽၢႆႇယဝ်ႉ။
- 84။ ၸဝ်ႈရႁၢၼ်း ၽူႈမီးၽုင်းယႂ်ႇတီႈၶႃႈ... ၶႃႈၼၢင်းတွပ်ႇလၢတ်ႈပၼ်ၸဝ်ႈႁဝ်း ၼင်ႇၼႆဢေႃႈ။ မိူဝ်ႈပဵၼ်ၵူၼ်းၼၼ်ႉ ၶႃႈလႆႈၶိုင်ပွင်လူႇတၢၼ်း (ၽႆးလႅင်း)ၼၼ်ႉဢေႃႈ။ ၵွပ်ႈၵုသူဝ်ႇၼၼ်ႉသေ ၸင်ႇတေ လႆႈမီး ဢူငဝ်းႁိူဝ်ႈႁိူင်းၼင်ႇၼႆဢေႃႈ။ ဢူငဝ်းၶႃႈႁဝ်းၼႆႉၵေႃႈ ႁိူဝ်ႈႁိူင်းပိူင်းသႂ်ၵႂႃႇ ၵူႈပႃႈၵူႈၽၢႆႇၶႃႈဢေႃႈ... (လၢတ်ႈၵႂႃႇၼင်ႇၼႆယဝ်ႉ)။
ၻီပဝိမႃၼဝတ်ထု ႁူဝ်ၵဝ်ႈ သုတ်းယဝ်ႉ။
ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]
- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ပီၻဝၷ်ၷ၊ ၻီပဝိမႃၼဝတ်ထု