ၼႃႈႁိူၼ်း (႔) မဵဝ်း

ပုတ်ႉထၸဝ်ႈ တႅၵ်ႈၼိူင်းဝႆႉ ၽူဝ်လႄႈ​မေး မီး (4) ပိူင်ယဝ်ႉ။

ၼိုင်ႈ - ၽူဝ်မိူၼ်ၵူၼ်းတၢႆလႄႈ ယူႇၸွမ်းမေး ၵေႃႉမိူၼ်ၵူၼ်းတၢႆ။
သွင် - ၽူဝ်မိူၼ်ၵူၼ်းတၢႆလႄႈ ယူႇၸွမ်း​မေး ၵေႃႉမိူၼ်ၼၢင်းၽီ၊
သၢမ် - ၽူဝ်မိူၼ်ၶုၼ်ၽီလႄႈ ယူႇၸွမ်းမေး ၵေႃႉမိူၼ်ၵူၼ်းတၢႆ၊
သီႇ - ၽူဝ်လႄႈတင်း​မေး မိူၼ်ၶုၼ်ၽီ ၼၢင်းၽီ ယူႇၸွမ်းၵၼ် ၼႆယဝ်ႉ။

ၼႂ်းၽူဝ်လႄႈမေးၼၼ်ႉ တင်းသွင်ပူႇဢွၵ်ႇ ႁဵတ်းၵၢၼ် ဢဝ်တူဝ်ၸႂ်ပိူၼ်ႈတၢႆ၊ လၵ်ႉၶူဝ်းၶွင်ပိူၼ်ႈ၊ ႁူမ်ႈၵႃႇမၽိတ်းၸွမ်းပၵ်းပိူင်၊ ပႅတ်ႉလႅၼ်ပိူၼ်ႈ၊ သူႇယႃႈ တေႃႇလွင်း ၵိၼ်လဝ်ႈ ႁဵတ်းၵၢၼ်ၵႃႉ ယႃႈမဝ်းၵမ်၊ ၸႂ်ၵူတ်ႉ၊ ၶႃႈၶိူဝ်းပိူၼ်ႈ၊ ထီႇၼဵဝ်၊ ဢမ်ႇမေႃၼပ်ႉယမ် ၽူႈမီးၵုင်ႇမုၼ် ၼင်ႇၸဝ်ႈရႁၢၼ်း ပုၼ်ႇၼႃးၶဝ်လႄႈ မေႃႁဵတ်း ၵၢၼ်ဢမ်ႇလီတၢင်းလူင်ၼၼ်ႉ မၼ်းမိူၼ်ၵူၼ်းတၢႆယဝ်ႉ ဝႃႈၼႆ။

လိူဝ်သေၼၼ်ႉ ပုတ်ႉထၸဝ်ႈ သိုပ်ႇလၢတ်ႈဝႃႈ ၽူဝ်လႄႈမေးတင်းသွင်ၼႆႉ မေႃပွင်ၵၢၼ်လီႁူမ်ႈၵၼ်၊ မီးၼမ်ႉၸႂ်လီမိူၼ်ၵၼ် ​မီးၶေႃႈယုမ်ႇယမ်ၼိူဝ်ၵၼ် ၵၢၼ်ၼႂ်းလေႃးၵၵေႃႈ မေႃသၢင်ႈလီ ၵၢၼ်ၼႂ်းထမ်ႇမၷေႃႈ မေႃႁဵတ်းမိူၼ်ၵၼ်ၼၼ်ႉ ၽူဝ်မေးသွင်ၵေႃႉၼႆႉ မိူၼ်ၶုၼ်ၽီလႄႈ ၼၢင်းၽီယဝ်ႉ ဝႃႈၼႆ။

ၽိုၼ်ဢိင်

ၼႃႈလိၵ်ႈ 44၊ ပပ်ႉသဵၼ်ႈတၢင်းၶိုၼ်ႈယႂ်ႇ တႃႇတူင်ႇဝိူင်းၵူၼ်း ၸွမ်းၼင်ႇ ထမ်းပုတ်ႉထ၊ ၸဝ်ႈၶူးပၼ်ႇတိတ ၼမ်ႉၶမ်း