ၽလၻႃယၵဝိမႃၼဝတ်ထု၊ ၶုၼ်ၽီ လူႇမၢၵ်ႇမူင်ႈ

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

3 - ၽလၻႃယၵဝိမႃၼဝတ်ထု၊ ၶုၼ်ၽီ လူႇမၢၵ်ႇမူင်ႈ[မႄးထတ်း | မႄးထတ်းငဝ်ႈငႃႇ]

ၶုၼ်ၽီ ဢၼ်လႆႈဢဝ် မၢၵ်ႇမူင်ႈသီႇလုၵ်ႈ လူႇတၢၼ်း တမ်ႈတီႈ ၸဝ်ႈမွၵ်ႉၵလၢၼ်ႇသေ လႆႈၵႂႃႇၸၢမ်ႇပူၺ်ႈ ႁၢင်ႈႁေႃ ဝိမၢၼ်ႇ ဢၼ်သဝ်မၼ်းပဵၼ် သႅင်လႅင်ပတ်ႉတမျႃးၼၼ်ႉ

  • 1060။ ႁေႃဝိမၢၼ်ႇ ဢၼ်ပဵၼ်သဝ်သႅင်လႅင်ၼႆႉ သုင်တႄႉယဝ်ႉ။ တၢင်းသုင်မၼ်း မီးသိပ်းႁူၵ်းယူႇၸၼႃႇ ယဝ်ႉ။ ႁေႃပြသၢတ်ႈပၢႆလႅမ် ၵႂၢင်ႈၵူင်လူင် ၸဵတ်းပၢၵ်ႇလင် ဢၼ်ဢဝ်ပတ်းလမ် ႁဵတ်းပဵၼ်သဝ်မၼ်းၼၼ်ႉ ပိုၼ်ႉသိူဝ်ႇမၼ်း ဢဝ်ၶႅပ်းၶမ်း သိူဝ်ႇဝႆႉလႄႈ ၶိုၵ်ႉလိုၵ်ႉတႄႉတႄႉ။
  • 1061။ (မႂ်းၶုၼ်ၽီၸမ်ႉ) ယူႇသဝ်း တမ်ႈတီႈ ႁေႃဝိမၢၼ်ႇၼၼ်ႉသေ သူတ်ႉၵေႃႈ သူတ်ႉ ၵိၼ်ၵေႃႈ ၵိၼ်ယဝ်ႉ။ သဵင်တိင်ႇၽီၶဝ်ၵေႃႈ ဢူၼ်ႈဢွၼ်ႇ လီထွမ်ႇတႄႉယဝ်ႉ။ ၸိူဝ်းၼၢင်းၽီဢွၼ်ႇ ႁူၵ်းသိပ်းပၢႆသီႇၵေႃႉ ဢၼ်ယူႇသဝ်း တမ်ႈတီႈ ႁေႃပၢႆလႅမ်၊ ဢၼ်ၽိုၵ်းဝႆႉႁဵၼ်းဝၢႆႉတၢင်းမေႃလီငၢမ်း ဢၼ်မီးသၽေႃးၸႂ်လီ ဢၼ်မီးၸီးၸိမ်ႇ ဢၼ်ယူႇသဝ်းတမ်ႈတီႈ မိူင်းၽီတႃႇဝတိမ်ႇသႃႇၶဝ် ဢွၼ်ၵၼ်ၵႃႈ ဢွၼ်ၵၼ်ႁွင်ႉၵႂၢမ်းသေ ႁဵတ်းႁႂ်ႈမႂ်း လႆႈမူၼ်ႈတူၼ်ႈၸႂ်ယဝ်ႉ။
  • 1062။ မႂ်းၶုၼ်ၽီ ဢၼ်ဢႃႇၼုၽေႃႇ ၽုင်းတၼ်းၶူဝ်းယႂ်ႇဢိူၺ်း မိူဝ်ႈပဵၼ်ၵူၼ်းၼၼ်ႉ လႆႈႁဵတ်း ၵုသူဝ်ႇ လၵ်ႇလၢႆးၼင်ႇႁိုဝ်ၼေႃး။ ယွၼ်ႉပိူဝ်ႈ ၵုသူဝ်ႇလၢၵ်ႇလၢႆးဢၼ်လႂ်သေ လႆႈမႃးမီး ဢူငဝ်းႁိူဝ်ႈႁိူင်းပိူင်းသႂ် ၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇလၢၵ်ႇလၢႆးၼင်ႇႁိုဝ်သေလႄႈ ဢူငဝ်းမႂ်း ႁိူဝ်ႈႁိူင်းပိူင်းသႂ်ၸွတ်ႇၵႂႃႇ ၵူႈၼႃႈၵူႈၽၢႆႇၼေႃး။ (ၼႆ ၸဝ်ႈ မွၵ်ႉၵလၢၼ်ႇ ထၢမ်ၵႂႃႇယဝ်ႉ)။
  • 1063။ ၶုၼ်ၽီၼၼ်ႉၵေႃႈ ၸူမ်းၸူမ်းသိူဝ်းသိူဝ်းသေ ၶိုၼ်းဢဝ်လွင်ႈ ဢဝ်တၢင်းမၼ်း တွပ်ႇလၢတ်ႈ ၶေႃႈထၢမ် ၸဝ်ႈမွၵ်ႉၵလၢၼ်ႇၵႂႃႇယဝ်ႉ။
  • 1064။ ၵေႃႉဢၼ်လူႇတၢၼ်း မၢၵ်ႇမႆႉၼၼ်ႉ လႆႈမီးၸႂ်ၽိူၵ်ႇၸိုၼ်ႈၶၢဝ်သႂ် ၼပ်ႉယမ် ၵေႃႉမီးတၢင်းတိုဝ်းၵမ် ၸိုၼ်ႈသႂ်လႄႈ လႆႈၽွၼ်းလီၵုသူဝ်ႇယႂ်ႇမၢၵ်ႈယဝ်ႉ။ ၵူၼ်းၵေႃႉၼၼ်ႉ လႆႈႁွတ်ႈထိုင် မိူင်းၽီသေ လႆႈမူၼ်ႈသိူဝ်းတမ်ႈ တီႈ တႃႇဝတိမ်ႇသႃႇယဝ်ႉ။ လႆႈၸၢမ်ႇပူၺ်ႈလူၺ်ႈ ၽွၼ်းလီ ယႂ်ႇမၢၵ်ႈၼၼ်ႉယဝ်ႉ။
  • 1065။ ၸဝ်ႈရႁၢၼ်းမျၢတ်ႈ ၶႃႈတပႄး ယၢမ်ႈလႆႈဢဝ် မၢၵ်ႇမူင်ႈသီႇလုၵ်ႈ လူႇတၢၼ်းပၼ် ၸဝ်ႈႁဝ်းမႃးဢေႃႈ။
  • 1066။ ၵွပ်ႈၼၼ်လႄႈ ၵေႃႉဢၼ်ၶႂ်ႈလႆႈ လွင်ႈသိူဝ်းသႃႇၵူၼ်းလႄႈသင်၊ ၶႂ်ႈလႆႈ လွင်ႈသိူဝ်းသႃႇၽီလႄႈသင်၊ ၶႂ်ႈပဵၼ်ၵူၼ်းႁၢင်ႈလီၶိုၵ်ႉတွၼ်း တီႈမိူင်းၵူၼ်းလႄႈသင် ထုၵ်ႇလီလူႇတၢၼ်း မၢၵ်ႇမႆႉတႃႇသေႇယဝ်ႉ။
  • 1067။ ယွၼ်ႉပိူဝ်ႈ ၵုသူဝ်ႇလၢၵ်ႇလၢႆးၼင်ႇၼၼ်လႄႈ ၶႃႈၸင်ႇမႃးလႆႈ ၵုသူဝ်ႇလၢၵ်ႇလၢႆးၼင်ႇၼႆယဝ်ႉ။ ပ။ ဢူငဝ်းၶႃႈႁဝ်းၵေႃႈ ႁိူဝ်ႈႁိူင်းပိူင်းသႂ်ၵႂႃႇ ၵႃႈၼႃႈၵူႈၽၢႆႇယဝ်ႉဢေႃႈ။ (ၼႆ တွပ်ႇၵႂႃႇၼင်ႇၼႆယဝ်ႉ)။

ၽလၻႃယၵႃဝိမႃၼဝတ်ထု ႁူဝ်သၢမ်သုတ်းယဝ်ႉ။

ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

  1. ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ပုရိသဝိမႃၼ၊ ပႃယႃသိဝၷ်၊ ၽလၻႃယၵႃဝိမႃၼဝတ်ထု