ၽူႈၸႂ်ႉတိုဝ်း:ၶိင်းၵွၼ်း/sandbox
ပိူင်တႅမ်ႈဝွၵ်း
[မႄးထတ်း | မႄးထတ်းငဝ်ႈငႃႇ]ဝွၵ်းဢၼ်ဝႃႈၼႆႉ မၼ်းပဵၼ်ငဝ်ႈႁၢၵ်ႈ တႃႇႁၢင်ႈၶိူင်ႈၶေႃႈၵႂၢမ်းႁဝ်း၊ တႄႇတီႈမေႃႁၢင်ႈၶိူင်ႈၶေႃႈၵႂၢမ်း ႁႂ်ႈလဝ်း၊ လီထွမ်ႇ၊ ၶဝ်ႈႁူငၢႆႈ ၸိူဝ်းၼၼ်ႉသေ ပေႃးမေႃလူင်ႉလႅၼ်ႇ ၵတ်ႉၶႅၼ်ႇၼမ်မႃးယဝ်ႉၸိုင် တေၸၢင်ႈပဵၼ်မႃး ၽူႈတႅမ်ႈဝွၵ်း၊ မေႃႁွင်ႉၵႂၢမ်းပၢၼ်ၵဝ်ႇ။ ၼႂ်းၽူႈႁွင်ႉၵႂၢမ်းပၢၼ်မႂ်ႇၵေႃႈ တေ ပဵၼ်မႃးၽူႈႁွင်ႉၵႂၢမ်း ႁိပ်ႉႁွပ်ႉလႆႈ။ ဝွၵ်းၼႆႉ ၵူၼ်းပၢၼ်မႂ်ႇဝၼ်းမိူဝ်ႈၼႆႉ ဢွၼ်လိုဝ်းလင်ၵၼ် ၼႂ်းထိၵ်ႉထွၵ်ႉဝႃႈ ၶမ်းၶူမ်း ၼႆယဝ်ႉ။ သင်မေႃဝွၵ်းၸိုင် ဢၼ်သုင်သုတ်း တေၵွႃႇထိုင်လႆႈ မေႃတႅမ်ႈလိၵ်ႈ လင်ႇၵႃႇလူင်၊ မိူၼ်ၶူးမေႃလူင်ၶဝ်ၸဝ်ႈ၊ ၸဝ်ႈလုင်း ၸဝ်ႈၸရေးၵေႃႇမိူင်းႁဝ်းၶဝ် လႆႈ။
ၵွပ်ႈပိူဝ်ႈဝႃႈ တင်းသဵင်ႈၸိူဝ်းၼၼ်ႉ ၶေႃႈၵႂၢမ်းၵွင်ႉၵၢႆႇၵၼ် ၸၢပ်ႈၵၼ်လူင်ၵွႃႇ တေႃႇပေႃးသုတ်းၼၼ်ႉယဝ်ႉ။ မွၵ်ႈတႅမ်ႈဝွၵ်း လႄႈ ၵႂၢမ်းၸၢပ်ႈလႅပ်ႈတႄႉၵေႃႈ မီးယူႇ မိူင်းၽႂ်မိူင်းမၼ်း ၶိူဝ်းၽႂ်ၶိူဝ်းမၼ်းသေတႃႉၵေႃႈ ၾိင်ႈလၢတ်ႈၸၢပ်ႈလႅပ်ႈလူင်ၵွႃႇလႆႈဢၼ်(မိူၼ်ၼင်ႇၵႂၢမ်းတႆးပၢၼ်ၵဝ်ႇတႆးႁဝ်း)ၼႆႉ ၼႂ်းၵမ်ႇၾႃႇၼႆႉ မီးတႆးႁဝ်းၶိူဝ်းလဵဝ်ၵူၺ်း။ ပိူဝ်ႈၼၼ်လႄႈ ၾိင်ႈဢၼ်လၢတ်ႈၵႂၢမ်းၸၢပ်ႈလႅပ်ႈၼႆႉ သႅၼ်းႁုၼ်ႈမႂ်ႇႁဝ်း လီႁူႉလီမေႃတႄႉꧦ။ သင်ဢမ်ႇတႄႇတီႈမေႃဝွၵ်း မေႃၸၢပ်ႈလႅပ်ႈၼႆႉၸိုင် ဢမ်ႇၶိုၼ်ႈၵွႃႇထိုင်လႆႈၸၼ်ႉသုင် ၼင်ႇဢၼ်လၢတ်ႈမႃးၼၼ်ႉလႆႈ။
ဢွၼ်တၢင်းသုတ်း ႁဝ်းလူတူၺ်း ဝွၵ်းႁူဝ်ၼိုင်ႈ -
- ၸိူၵ်ႈလဵၵ်းလူင်
- တေၶၢတ်ႇငၢႆႈ
- သင်ၸႂ်တႅၵ်ႇယၢႆႈ ဢွၼ်ႁုၵ်ႉ ။
- သဵၼ်ႈမႆလၢႆႈ
- တေၼဵဝ်ၵိုမ်း
- သင်ၸႂ်ႁူႉပိုၼ်း ဢွၼ်ၽၼ်ႈ - ၼႆႉပဵၼ် ဝွၵ်းၶိုၵ်ႉတွၼ်းလူင် ဢၼ်ၽူႈတႅမ်ႈဝွၵ်းတႆး လုင်းသႅင်ၶမ်းသႃႇ တႅမ်ႈဝႆႉ။ ပႃးဝႆႉ ၼႂ်းပပ်ႉဝွၵ်း ပွတ်းယၢဝ်း ၶၢဝ်းတၢင်း။
လူတူၺ်းထႅင်ႈ ဝွၵ်းထႅင်ႈပုၵ်ႈၼိုင်ႈ -
- သႅၼ်းႁုၼ်ႈမႂ်ႇ
- ႁႅင်ႉၶၢတ်ႇယၢၼ်
- ၵိၼ်ၼွၼ်း ဢမ်ႇဝၢၼ်လႆႈ ။
- ပၢႆးဝူၼ်ႉၶပ်ႉ
- ဢမ်ႇၵပ်းသၢၼ်
- ၶၢၼ်ၸႂ်တိူဝ်းလိူတ်ႇမႆႈ - ၼႆသမ်ႉပဵၼ် ဝွၵ်း ၶိုၵ်ႉတွၼ်း ဢၼ်ၽူႈတႅမ်ႈဝွၵ်း လႅင်းမိူင်း တႅမ်ႈဝႆႉ။ ပႃးဝႆႉၼႂ်းပပ်ႉဝွၵ်း သဵင်ၶူဝ်ၼူၵ်ႉၶၢၵ်ႇ။
ပေႃးၼၼ် တေႁဵတ်းႁိုဝ် ၽိုၵ်းတႅမ်ႈဝွၵ်း
[မႄးထတ်း | မႄးထတ်းငဝ်ႈငႃႇ]ႁဝ်းၶႂ်ႈတႄႇ တႅမ်ႈၶေႃႈၵႂၢမ်းဝႃႈႁိုဝ်ၵေႃႈလႆႈ ႁဝ်းလူဝ်ႇလႆႈတႄႇတူၺ်း ဢွၼ်တၢင်းသေၵွၼ်ႇ၊ မိူၼ်ၼင်ႇဝႃႈ ႁဝ်းတႄႇၶေႃႈၵႂၢမ်းဝႃႈ
တႃႇမွၵ်ႇဢွၼ်ႇ တုမ်ႇမႂ်ႇ ၼႆလႄႈ ၼင်ႇႁိုဝ်ၶေႃႈၵႂၢမ်း တေၵွင်ႉၵၼ်ၵွႃႇၼၼ်ႉ ဢၼ်လမ်ႇလွင်ႈသုတ်းပဵၼ်တူဝ်ပၢႆ ၶေႃႈၵမ်းလိုၼ်းသုတ်း ဢၼ်ဝႃႈ မႂ်ႇ ၼႆၼၼ်ႉယဝ်ႉ၊ မႂ်ႇၼၼ်ႉ ၵွပ်ႈပိူဝ်ႈၸႂ်ႉဝႆႉ တူဝ်မႄႈလိၵ်ႈတႆး ဢၼ်ပဵၼ် မ ၵၢင်းၵိင်း ယၵ်းဝႆႉလႄႈ ႁဝ်းတေလႆႈဢဝ်တူဝ်မၼၼ်ႉပႅတ်ႈသေ ႁႃ ၵၢင်းၵိင်း ယၵ်းၼၼ်ႉ မႃးသႂ်ႇသေ သိုပ်ႇၵွႃႇ၊ ပေႃးႁဵတ်းၸိူင်ႉၼၼ် ထႅဝ်ၼိုင်ႈယဝ်ႉ ထႅဝ်ၼိုင်ႈ သိုပ်ႇၵွႃႇၸိုင် ႁဝ်းတေလႆႈၵွႃႇ ဝွၵ်းပုၵ်ႈၼိုင်ႈႁင်းၵူၺ်းယူႇ။ ပေႃးၼၼ် တေၸၢမ်း သိုပ်ႇတႅမ်ႈတူၺ်း ႁႂ်ႈပဵၼ်ဝွၵ်းႁူဝ်ၼိုင်ႈႁင်းမၼ်း
- တႃႇမွၵ်ႇဢွၼ်ႇ တုမ်ႇမႃးမႂ်ႇ
- လႆႈသႂ်ႇၸႂ် သေလုမ်းလႃး
- ၵီႈမုၼ်းမႃး ႁၢင်ႈလီႁွမ်
- ၽူႈလႆႈလွမ် ထုၵ်ႇၸႂ်ထူၼ်ႈ
- မႅင်းၽိုင်ႈမူၼ်ႈ ၸုပ်ႇၼမ်ႉဝၢၼ်
- မိူၼ်ၸၢတ်ႈပၢၼ် လုၵ်ႈႁဵၼ်းဢွၼ်ႇ
- ၶူးလႆႈသွၼ်ႇ ဝူၼ်ႉပၼ်ၵႆ
- လႆႈသႂ်ႇၸႂ်သေ လုမ်းလႃး
- ပေႃးလႅတ်းမႃး လႄႈ ၶိုၼ်ႈယႂ်ႇ
- ယႃႇလိုမ်းတူၺ်း သႅၼ်းႁုၼ်ႈမႂ်ႇၶိုၼ်းၼႃႈ လုၵ်ႈႁဵၼ်း ......။
ၶေႃႈလိုၼ်းသုတ်း ယွၼ်းႁႂ်ႈ ၽူႈလူဢၢၼ်ႇႁဝ်းၶဝ် မေႃတႅမ်ႈဝွၵ်း မေႃၶမ်းၶူမ်းၵွႃႇ ၵူႈၵေႃႉၵူႈၸဝ်ႈသေၵမ်း ...... ။