ၽြႃးသမ်ႇမႃႇထိ ဝတ်ႉပၢင်ႇ

Sammadhi Buddha, Wat Pang

ၽြႃးသမ်ႇမႃႇထိ ဝတ်ႉပၢင်ႇ

ႁုၼ်ႇႁၢင်ႈၽြႃးသမ်ႇမႃႇထိ ပုတ်ႉထၸဝ်ႈသူႇၼႆႉ မီးဝႆႉ ၼႂ်းဝၢင်းတိူၵ်ႈသွၼ်လိၵ်ႈ ဝတ်ႉပၢင်ႇ ဝဵင်းလၢႆးၶႃႈယဝ်ႉ။

ပမႃႇၼၽြႃးသူႇၼႆ

တၢင်းသုင်- ပလၢင်ႇ ႁၢၼ်ႉတႂ်ႈ 5 ပေႇ၊ ပလၢင်ႇႁၢၼ်ႉၼိူဝ် 2 ပေႇ၊ တူဝ်ၽြႃးၸဝ်ႈ 10 ပေႇ၊ တၢင်းၵႂၢင်ႈၼႃႈတၵ်း 5 ပေႇ ။ လႆႈဝႃႈ ပေႃးပႃးပလၢင်ႇၸိုင် တင်းသုင် ၽြႃး မီးယူႇ 17 ပေႇယဝ်ႉ။

ၽြႃးသူႇၼႆႉ ဢဝ်သင်သေႁဵတ်းဝႆႉ

တႃႇတေပဵၼ်မႃးၽြႃးသူႇၼႆႉ လႆႈၽုၵ်ႇဝႆႉတူၼ်ႈမႆႉ ဢၼ်မၢၼ်ႈၶဝ်ႈဝႃႈ ကြံံ.စာ ၼၼ်ႉသၢမ်တူၼ်ႈ တႃႇၶၢဝ်းတၢင်းသၢမ်ပီၸမ်ၸမ်ယဝ်ႉ။ ပေႃးဝႃႈၶိူဝ်းတူၼ်ႈမႆႉဢၼ်ၼႆႉ ယႂ်ႇယၢဝ်းပေႉတူဝ်မႃးယဝ်ႉ ၸဝ်ႈသြႃႇDr.ပၼ်ႇတဝ ၸင်ႇႁွင်ႉ ဢူးမဵဝ်းၶၢႆႇ (မေႃၶႅၵ်း) ဢၼ်ပဵၼ်ၵူၼ်းသၢၼ်ၽြႃးၼၼ်ႉ မႃးၵေႃႇယူင်ႉ လဵၵ်း ႁႂ်ႈဢွၵ်ႇႁၢင်ႈၽြႃး တႃႇၶၢဝ်းတၢင်းလိူၼ်ပၢႆ တႃႇႁႂ်ႈပေႃးၸၢင်ႇသုပ်းသႂ်ႇၼိူဝ်ၶိူဝ်းတူၼ်ႈမႆႉၼၼ်ႉၼႆယဝ်ႉ။ ၽြႃးသူႇၼႆႉ တၢင်းၼႂ်း ဢဝ်ၶိူဝ်းတူၼ်ႈမႆႉ ပဵၼ်ယႂ်ႇသေ ၼွၵ်ႈသမ်ႉ ဢဝ်လဵၵ်းႁေႃဝႆႉၼႆယဝ်ႉ။

ၽႂ်ၵေႃႉႁဵတ်းလူႇ

ၸဝ်ႈသြႃႇDr.ပၼ်ႇတဝ ၵျွင်းပၢင်ႇဢွၼ်ႁူဝ်ၼမ်းၼႃႈ တၵႃႇသတ်ႉထႃးတင်းၼမ်သေ ၵေႃႇသၢင်ႈလူႇတၢၼ်း။

ပၢင်းၶိုၼ်ႈပလၢင်ႇ

မိူဝ်ႈဝၼ်းၽိတ်ႈ 14 ၶမ်ႈ ၼႃႈလိူၼ်ႁူၵ်းမူၼ်း ၵၢင်ၶမ်ႈၼၼ်ႉ ၸဝ်ႈၶူးလူင်တွၵ်ႉတိူဝ်ႇၶမ်းမၢႆထမ်မသႃႇမိ ၽူႈၵေႃႇတင်ႈၸၼ်ႉၸွမ်ပုတ်ႉထမိူင်းတႆး လႆႈမႃးမဵတ်ႉတႃႇ ႁေႃးတြႃး တီႈၵျွင်းပၢင်ႇသေ ထိုင်မႃးၵၢင်ၼႂ် လႆႈဢွၼ်ၵၼ်ပၢင်းၽြႃးလဵပ်ႈၵျွင်းယဝ်ႉသေ ၸင်ႇပၢင်းၶိုၼ်ႈပလၢင်ႇ တၢင်ႇဢၼေၵၸႃႇ မိူဝ်ႈဝၼ်းထိ May 25, 2021 လိူၼ်ႁူၵ်းမူၼ်း။ တင်းဝၼ်းပိုတ်ႇၵျွင်းၸဝ်ႈၶၢဝ် ႁေႃႁႅင်းပတုမ်ႇမႃႇ လႄႈ ဝၼ်းပၢင်းၽြႃးၶိုၼ်ႈပလၢင်ႇၼၼ်ႉ ပဵၼ်ဝၼ်းလဵဝ်ၵၼ်ယဝ်ႉ။

လွင်ႈလၢၵ်ႇလၢႆးၽြႃးသူႇၼႆႉ

ၽြႃးသူႇၼႆႉ ပေႃးမိူၼ်ၼင်ႇပဵၼ်ၽြႃး ဢၼ်မီးၸႂ်ၶႃႈယဝ်ႉ။ ယွၼ်ႉသင်ၼႆ ပေႃး 15 ဝၼ်းၼိုင်ႈပွၵ်ႈ လႆႈၵဵတ်းပၼ်ယွတ်ႈမႆႉ ဢၼ်မႅၼ်းဢွၵ်ႇပူၼ်ႉတူဝ်မၼ်းၸဝ်ႈ၊ လႆႈထႃႁူဝ်ၵႅတ်းပၼ်မၼ်းၸဝ်ႈတႃႇသေႇၼၼ်ႉယဝ်ႉ။ တင်းပီတေမီးသီၶဵဝ်ၸိုမ်ႉသေဢမ်ႇၵႃး ဝိူင်းပလၢင်ႇလူင်မၼ်းၵေႃႈ လႆႈဢဝ်တူၼ်ႈမႆႉသပေႇ 24 တူၼ်ႈႁၢင်ႈၶိူင်ႈ ပူႇၸေႃႇလူႇတၢၼ်းဝႆႉတင်းပီၸိူင်ႉၼၼ်ႉယဝ်ႉ။ ပေႃးၶၢဝ်းယွတ်ႈမႆႉသပေႇ ႁုၼ်ႈမႂ်ႇလႅင်ဢွၵ်ႇမႃးၶိုၼ်းၸိုင်ႈ ပလၢင်ႇ လႄႈ ၽြႃး တိူဝ်းႁၢင်ႈလီ သပၢႆႇတႄႉတႄႉယဝ်ႉ။

တၢင်ႇပိုၼ်း

ၸဝ်ႈသြႃႇၵျွင်းပၢင်ႇ 18.1.2026