ႁႅင်းသိူဝ်ၶႅင်

ႁႅင်းသိူဝ်ၶႅင် (တၢင်ႉယၢၼ်း)
ႁၢင်ႈၽၢင် ၽူႈတႅမ်ႈလိၵ်ႈ ႁႅင်းသိူဝ်ၶႅင်
ၵိူတ်ႇ	(1961-05-26) 26 မေႇ၊ 1961 ဝဵင်းတၢင်ႉယၢၼ်း၊ မိူင်းတႆး၊ မျၢၼ်ႇမႃႇ
ၼႃႈၵၢၼ်	ၽူႈတႅမ်ႈလိၵ်ႈ ၽူႈႁၢပ်ႇၵၢၼ်သႃႇသၼႃႇ
ၶၢဝ်းႁိုင်	1988–တေႃႇယၢမ်းလဵဝ်
မဵဝ်းလိၵ်ႈ	ၸိူင်း၊ ဝွၵ်း
လွင်ႈႁဵတ်းသၢင်ႈဢၼ်လီမၢႆတွင်းဝႆႉ	တၢင်းႁၵ်ႉမၢၵ်ႇၵႅမ်ႈၶွင်ႇ တၢင်းႁၵ်ႉၼူၵ်ႉသႅဝ်းဢွၼ်ႇ မွၵ်ႇလူင်ႇလဵဝ် ၶိုၼ်းထူပ်းႁၼ်ၵၼ် ၶႅၵ်ႇ
လၢႆးမိုဝ်း

ၼႂ်းၸိုဝ်ႈသဵင်လိုဝ်းလင် ၽူႈတႅမ်ႈလိၵ်ႈတႆးၼၼ်ႉ ႁႅင်းသိူဝ်ၶႅင် တၢင်ႉယၢၼ်းၼႆႉ ပဵၼ်ဢၼ်လိုဝ်းလင်တႄႉတႄႉ။ လႆႈဝႃႈ ၸိုဝ်ႈႁႅင်းသိူဝ်ၶႅင်ၼႆႉ တႄႇၵိူတ်ႇဢွၵ်ႇမႃးၸွမ်း ပပ်ႉၸိူင်း တၢင်းႁၵ်ႉမၢၵ်ႇၵႅမ်ႈၶွင်ႇ မၢႆ(1) ဢၼ်ဢိတ်ႇဢွၵ်ႇ မိူဝ်ႈပီ 1988 ၼၼ်ႉယဝ်ႉ။ ဢၼ်မၼ်း တႄႇတႅမ်ႈလိၵ်ႈမႃးၼၼ်ႉတႄႉ ပဵၼ်မိူဝ်ႈပၢၼ်လုၵ်ႈႁဵၼ်း လိၵ်ႈတႆးမ.ႁႃႈတူဝ် ၼႂ်းပီ 1987 ၼၼ်ႉၵူၺ်း။

လၢႆးတႅမ်ႈလိၵ်ႈ ႁႅင်းသိူဝ်ၶႅင်ၼႆႉ ၶေႃႈၵႂၢမ်း ပွင်ႇၸႂ်ငၢႆႈ ၼမ်ႉၵႂၢမ်း ဢမ်ႇတႅၵ်ႇယၢႆႈ ၸၼ်ဢဝ်ၽူႈလူလိၵ်ႈ ၶဝ်ႈၸူမ်ၵႂႃႇ ၼႂ်းၸိူင်းလိုၵ်ႉလိုၵ်ႉသေ ၵမ်ႈၽွင်ႈ ပေႃးလိုမ်းၵိၼ်ၶဝ်ႈၵိၼ်ၼမ်ႉၵွၼ်ႇ။ ပေႃးပႃး လွင်ႈလီၶႂ်ႈၶူဝ်ၵေႃႈ ၵေႃႉလူမၼ်း ဢမ်ႇယိူၼ်ႉလႆႈသေ ၶူဝ်ယူႇၶိုၵ်းၶိုၵ်းႁင်းၵူၺ်း၊ ပေႃးၺႃး တီႈလီၶေႃးၶူမ်ၵေႃႈ ၵေႃႉလူမၼ်း ၼမ်ႉတႃယွႆႉတူၵ်းယမ်း ပေႃးဢမ်ႇယိူၼ်ႉလႆႈယဝ်ႉ။ ထႅင်ႈပိူင်ၼိုင်ႈ လၢႆးတႅမ်ႈလိၵ်ႈ ႁႅင်းသိူဝ်ၶႅင်ၼႆႉ မၼ်းထိမ်ႇလႆႈ သိူင်ႇလႆႈၸိူင်းမၼ်း လီၼႃႇၼႃႇ၊ ၽႂ်တေပဵၼ်သင် ၵေႃႉလႂ် တေပဵၼ်ၽႂ်ၼႆ ဢမ်ႇလၢမ်းႁူႉထႃႈလႆႈ။ ၶေႃႈသင်ႇ ၼႂ်းၸိူင်း ဢၼ်ပၢႆၵမ် ၶႂ်ႈတမ်သႂ်ႇၼၼ်ႉ တမ်ပၵ်းသႂ်ႇထိုင်လႆႈ ၼႂ်းမၢၵ်ႇလမ်းႁူဝ်ၸႂ် ၵေႃႉလူဢၢၼ်ႇၼၼ်ႉ ယမ်တႄႉတႄႉ။

လူတူၺ်းၼႂ်းပပ်ႉလိၵ်ႈ ဢၼ်ႁႅင်းသိူဝ်ၶႅင်တႅမ်ႈဝႆႉ ၸိူဝ်းၼၼ်ႉသေ ယွၼ်ႉသင်လႄႈ လႆႈတၢင်ႇၸိုဝ်ႈပၢႆၵမ်ဝႃႈ ႁႅင်းသိူဝ်ၶႅင်ၼႆၸိုင် ၽူႈတႅမ်ႈလိၵ်ႈ ပဵၼ်ၵူၼ်းယွမ်ၵႅင်းလႄႈ ဢၢင်ႈၶႂ်ႈသႂ်ႇၸိုဝ်ႈဝႃႈ “ယွမ်ၵႅင်းႁႅင်းသိူဝ်” ၼႆယူႇ။ ၵူၺ်းၵႃႈ သမ်ႉၶႂ်ႈႁႂ်ႈ ပဵၼ် သိူဝ်ၶိုၵ်ႉလိုၵ်ႉ သိူဝ်ႁႅင်းယႂ်ႇ သိူဝ်ၵႅၼ်ႇၶႅင်လႄႈ ၸင်ႇတေလိူၵ်ႈပၢႆၵမ် ဢၼ်ဝႃႈ “ႁႅင်းသိူဝ်ၶႅင်”၊ ယွၼ်ႉပိူဝ်ႈ ပဵၼ်ၵူၼ်းၸႃႇတိတၢင်ႉယၢၼ်းလႄႈ ၸင်ႇသႂ်ႇပႃးၵိုၵ်း တီႈယူႇဝႃႈ “ႁဵင်းသိူဝ်ၶႅင် တၢင်ႉယၢၼ်း”။ ပေႃးတူၺ်း ဝွၵ်းဢၼ်ႁႅင်းသိူဝ်ၶႅင် တႅမ်ႈပိုတ်ႇဝႆႉ တီႈပွင်ႇၸိုဝ်ႈမၼ်းၸိုင် လႆႈႁၼ်ၼင်ႇၼႆ-

"ႁႅင်း" ႁဝ်းႁႂ်ႈတွၼ်းလိူဝ်

"သိူဝ်" ႁဝ်းႁႂ်ႈတွၼ်းသႅႅင််

"ၶႅင်" ၸႂ်ႁဝ်းမၼ်ႈမၼ်ႈ

ၼႆယူႇ။ ႁႅင်းသိူဝ်ၶႅင် ယၢမ်ႈပဵၼ် မေႃသွၼ်လိၵ်ႈတႆး မ.ႁႃႈတူဝ် တမ်ႈတီႈ ၸႄႈဝဵင်းၵျွၵ်ႉမႄး ဝၢၼ်ႈၼႃးၶေႃ ပီ 1980 တမ်ႈတီႈ ပၢင်သွၼ်လိၵ်ႈတႆး ၶၢဝ်းမႆႈၼၼ်ႉယဝ်ႉ။ လႆႈငိၼ်းၵႂၢမ်းမၢင်ၸိူဝ်း လၢတ်ႈဝႃႈ “မေႃလိၵ်ႈတႆးမႃးၵေႃႈ ဢမ်ႇၸၢင်ႈၵႂႃႇလူပပ်ႉသင်” ၼႆလႄႈ မီးၸႂ် ဢမ်ႇၶႂ်ႈၶၢမ်ႇသေ ၸင်ႇတေၶတ်းၸႂ် တႅမ်ႈႁႂ်ႈပဵၼ်ပပ်ႉၸိူင်း ဢၼ်လီလူၶဝ်ႈၸႂ်ၼႆယဝ်ႉ။ ဝၢႆးၼၼ်ႉ ၸင်ႇတႅမ်ႈပႃးထႅင်ႈ လွင်ႈပိၼ်ႇၽႃႇသႃႇဢိၵ်ႇ လွၼ်ႉမွၼ်းၵႂၢမ်း ဢၼ်ပဵၼ် လိၵ်ႈလၢႆးပၼ်တၢင်းႁူႉၼၼ်ႉယဝ်ႉ။

ပပ်ႉၸိူဝ်းတႅမ်ႈမႃး

1. တၢင်းႁၵ်ႉမၢၵ်ႇၵႅမ်ႈၶွင်ႇ မၢႆ (1) (1988)
2. တၢင်းႁၵ်ႉမၢၵ်ႇၵႅမ်ႈၶွင်ႇ မၢႆ (2) (1991)
3. တၢင်းႁၵ်ႉၼူၵ်ႉသႅဝ်းဢွၼ်ႇ ပီတႆး (2087)
4. မွၵ်ႇလူင်ႇလဵဝ်
5. မွၵ်ၵွၼ်တေမွၵ်ႇၼႄယူႇ
6. လီၸင်းသေပိူၼ်ႈ
7. ၶိုၼ်းထူပ်းႁၼ်ၵၼ်
8. ၶႅၵ်ႇ
9. ၵႅဝ်ႈ
10. ဝွၵ်းၼႂ်းသူၼ်မွၵ်ႇႁၵ်ႉ မၢႆ 1 တေႃႇ မၢႆ 5
11. မူဝ်ႇသျေႇတႃးယၢၼ်း (ပိၼ်ႇၽႃႇသႃႇ)
12. ငရၢႆးမိူင်းၵူၼ်း (ပိၼ်ႇၽႃႇသႃႇ)
13. ၵေႃႉႁၵ်ႉဢွၼ်ႇလႅင်း (ၸိူင်းပွတ်း)
14. ယိင်းၼွင်ႉဢမ်ႇၶႂ်ႈပဵၼ် (ၸိူင်းပွတ်း)
15. လွၼ်ႉမွၼ်းၵႂၢမ်း
16. လိၵ်ႈပေႃႈပၼ်လုၵ်ႈ (ပိၼ်ႇၽႃႇသႃႇ)

ႁႅင်းသိူဝ်ၶႅင် ဢၼ်ဝႃႈၼၼ်ႉ ပဵၼ်ၸိုဝ်ႈပၢႆၵမ် ပဵၼ်ၸိုဝ်ႈလပ်ႉ ၽူႈဢၼ်တႅမ်ႈလိၵ်ႈၼၼ်ႉၵူၺ်း။ ႁႅင်းသိူဝ်ၶႅင်ၼႆႉ ပဵၼ်ၸိုဝ်ႈပၢႆၵမ် ၸဝ်ႈသုၶမ်း ဢၼ်ၼိုင်ႈၵူၺ်း။