တႃႈသူပ်းတဵင်း

တႃႈသူပ်းတဵင်း

တႃႈ

တႃႈဢၼ်ဝႃႈၼၼ်ႉ ပဵၼ်တီႈၶိူင်ႈၶီႇ မႃးလိုဝ်ႈၵိုတ်းသူင်ႇၵူၼ်း ႁပ်ႉၵူၼ်း​​သေ ပဵၼ်လႆႈ ႁိမ်းၽင်ႇတၢင်းၵႃးလႄႈ ႁိမ်းၽင်ႇၼမ်ႉႁွင်ႈ ဢိၵ်ႇ ၽင်ႇၼမ်ႉပၢင်ႇလၢႆႇ၊။

သူပ်း

သူပ်းဢၼ်ဝႃႈၼၼ်ႉ ပဵၼ်တီႈႁွင်ႈၼမ်ႉဢွၼ်ႇ မႃးပွင်ႇသႂ်ႇ ​​ၵေးၼမ်ႉလူင်။

တဵင်း

တဵင်းဢၼ်ဝႃႈၼၼ်ႉ ပဵၼ်ၸိုဝ်ႈမႄႈၼမ်ႉဢၼ်ၼိုင်ႈ ဢၼ်လုၵ်ႉတၢင်း မိူင်းၵိုင်​​သေ လႆလတ်းၸႄႈဝဵင်းလွႆလႅမ် လၢင်းၶိူဝ်း​​သေ မႃးပွင်ႇသႂ်ႇၼမ်ႉၶူင်း၊ တီဢၼ်ၼမ်ႉတဵင်း မႃးပွင်ႇသႂ်ႇ ၼမ်ႉၶူင်းၼၼ်ႉ ႁွင်ႉဝႃႈ သူပ်းတဵင်းယဝ်ႉ။

ထိုင်မႃး ပီၶရိတ်ႉ 1999-2000 ၸဝ်ႈ​​ၼေႃႈမိူင်းၶွၼ်း ၸဝ်ႈသိုၵ်းမႁႃႇၵျႃႇ ဢၼ်ပဵၼ်ၸုမ်းၵူၼ်းၵဝ်ႇ MTA မႃးတႄႇပိုတ်ႇၽုၺ်ႇ​​ (1.4.2000) ဢဝ်ႁိူဝ်းမႃးၶၢတ်ႈႁဵတ်းပလူင်ႈသေ ႁပ်ႉဢဝ် ၵၢၼ်​​တေႃႉသူင်ႇၶၢမ်ႈၶူင်း မိူဝ်းၸူး ဝဵင်းႁူဝ်မိူင်း ဢၼ်ယၢမ်ႈပဵၼ် ငဝ်ႈၸိုင်ႈတပ်ႉသိုၵ်းမိူင်းတႆး MTA မိူဝ်ႈပၢၼ်ၶုၼ်သႃႇ။ လုၵ်ႉတီႈႁူဝ်မိူင်း မိူဝ်းထိုင်လႆႈ မႄႈႁွင်ႈသွၼ် ၼႂ်ႈမိူင်းထႆးယဝ်ႉ။

တႃႈသူပ်းတဵင်းၼႆႉ ပဵၼ်တႃႈၶၢမ်ႈၶူင်း ဢၼ်လုၵ်ႉဢဝ် မိူင်းထႆး မႄႈႁွင်ႈသွၼ် ဢဝ်ၶူဝ်းမိူင်းထႆး ၶၢမ်ႈမႃး ၽၢႆႇတူၵ်းၶူင်း ပွင်ႇထိုင် လၢင်းၶိူဝ်း မွၵ်ႇမႆႇ မိူင်းၼၢႆး လွႆလႅမ် ၼမ်ႉၸၢင် တူၼ်ႈတီးပုၼ်ႉယူႇ​​​။

မိူဝ်ႈတႃႈသူပ်းတဵင်း ပႆႇပိုတ်ႇၼၼ်ႉ လႆႈၶၢမ်ႈတီႈတႃႈႁူၺ်ႈပုင်ႇ ႁိမ်းၼႃးၵူင်း ၶၢမ်ႈမိူဝ်းတၢင်း ပႅတ်ႇငွၵ်း မိူဝ်းထိုင်ႁူဝ်မိူင်းယဝ်ႉ။ တႃႈႁူၺ်ႈပုင်ႇၼႆႉ မီးၽၢႆႇၼိူဝ်တႃႈသူပ်းတဵင်း​​သေ တႃႈႁူၺ်ႈၶႃးသမ်ႉ မီးၽၢႆႇတႂ်ႈတႃႈသူပ်းတဵင်းယဝ်ႉ။

ၵုၼ်ႇၶူဝ်း ဢၼ်လုၵ်ႉၽၢႆႇတူၵ်းၶူင်း မႃးၶၢမ်ႈတႃႈသူပ်းတဵင်းၼႆႉတႄႉ ပဵၼ်ၶိူင်ႈၵိၼ်ယႅမ်ႉ ၵူႈပိူင် ဢိၵ်ႇလူၺ်ႈ ဝူဝ်းၵႂၢႆးၸိူဝ်းၼႆႉယဝ်ႉ။ ၶူဝ်းၸႂ်ႉတိုဝ်း မိူင်းထႆး ၵူႈပိူင်ပိူင်​​ၵေႃႈ လတ်းၶၢမ်ႈတႃႈသူပ်းတဵင်း​​သေ လႆႈဝႃႈပဵၼ် တႃႈၶူဝ်းၶၢမ်ႈၼမ်ႉၶူင်းတႃႈၼိုင်ႈယူႇ။

ပီ 2021 လိူၼ်ၼူဝ်ႇဝိမ်ႇပိူဝ်ႇ တႃႇ​​တေၵၢႆႇၶူဝ်လူင်ၶၢမ်ႈ ၼမ်ႉၶူင်း တီႈတႃႈသူပ်းတဵင်းၼၼ်ႉ လူင်ပွင်ၸိုင်ႈမိူင်းတႆး တူၵ်းလူင်းပၼ် ၽႅၼ်ၵၢၼ်ယဝ်ႉ​​သေ တႄႇႁဵတ်း ပိုၼ်ႉထၢၼ်ၶူဝ်ၵႂႃႇယူႇ။