ရႁၢၼ်းဢေႁိၽိၵ်ႉၶု

ရႁၢၼ်း ဢေႁိၽိၵ်ႉၶု 28,647 ၸဝ်ႈ

ၼႂ်းၵႃႈ ရႁၢၼ်းပႅတ်ႇမဵဝ်းၼၼ်ႉ ၶဝ်ႈပႃးဝႆႉ ရႁၢၼ်းဢေႁိၽိၵ်ႉၶုယဝ်ႈ။ ဢေႁိ - ပွင်ႈဝႃႈ “မႃး”၊ ꧤိၵ်ၶု- ပွင်ႇဝႃႈ “ရႁၢၼ်း”။ တူၼ်တူဝ်ၽြႃးၵေႃးတမ ၵေႃႉႁွင်ႉဝႃႈ “ရႁၢၼ်း မႃးလႄႈ မႃးတိုဝ်းၵမ် တြႃးဢၼ်ႁူဝ်ႁၢင်ၵၢင်လီၼၼ်ႉတ” ၼႆသေ ပဵၼ်ရႁၢၼ်းဢေႁိၽိၵ်ႉၶုၵႂႃႇ။
တႃႇတေပဵၼ် ရႁၢၼ်းဢေးႁိၽိၵ်ႉၶုၼၼ်ႉၵေႃႈ ၶဝ်ၸဝ်ႈလႆႈမီးပႃႇရမီႇဝၼ်းလင် ဢၼ်ၸၢတ်ႈၵွၼ်ႇ လႆႈလူႇတၢၼ်းဝႆႉ ၽႃႈလိူင်သၢင်ႇၵၢၼ်းၼၼ်ႉ ၸင်ႇတေပဵၼ်လႆႈယဝ်ႉ။ မိူၼ်ၼင်ႇ ၸဝ်ႈၿႃႇႁိယၻႃႇလုၸရိယၼၼ်ႉ ပဵၼ်ရႁၢၼ်းတႃႇယဝ်ႉသေတ ယွၼ်ႉပိူဝ်ႈ ၼႂ်းသမ်ႇသရႃႇ ဢမ်ႇလႆႈလူႇတၢၼ်းၽႃႈလိူင်သၢင်ႇၵၢၼ်းလႄႈ ဢမ်ႇထိူၵ်ႈလႆႈပဵၼ် ရႁၢၼ်းဢေႁိၽိၵ်ႉၶု။
လိူဝ်သေၼၼ်ႉ ၶဝ်ၸဝ်ႈ တိုၼ်းတေပဵၼ် ၵေႃႉႁူႉႁၼ်တြႃးသတ်ႉၸႃႇ။ မိူၼ်ၼင်ႇ ၽတ်ႉတဝၵ်ႉၵီႇ ၶဝ်သၢမ်သိပ်းပီႈၼွင်ႉၼၼ်ႉ ၶဝ်ႁႃၼၢင်းယိင်း ဢၼ်လၵ်ႉၶူဝ်းၶဝ်ပၢႆႈ၊ ၶဝ်ၵႂႃႇၺႃးၽြႃး၊ ၽြႃးႁေႃးတြႃးပၼ်ၶဝ်သေ ၵမ်ႈၽွင်ႈ ပဵၼ်သေႃးတႃႇပၢၼ်ႇ၊ ၵမ်ႈၽွင်ႈ ပဵၼ် သၵတႃႇၵၢမ်ႇ၊ ၵမ်ႈၽွင်ႈပဵၼ် ဢၼႃႇၵၢမ်ႇသေ ၽြႃးပဵၼ်ၸဝ်ႈ ႁွင်ႉဢေႁိၽိၵ်ႉၶုသေ ပဵၼ်ရႁၢၼ်းၵႂႃႇ။ ၸဝ်ႈမႁႃႇၵပ်ႉပိၼၶဝ်ၸဝ်ႈ 1000 ၵေႃႉၼၼ်ႉၵေႃႈ လႆးထွမ်ႇတြႃး ပဵၼ်သေႃးတႃႇပၢၼ်ႇယဝ်ႉ ၽြႃးၸင်ႇတေ ႁွင်ႉဢေႁိၽိၵ်ႉၶုသေ ပဵၼ်ရႁၢၼ်းၵႂႃႇ။ မၢင်ၸဝ်ႈမၢင်ပႃးၵေႃႈ လုၵ်ႉတီႈၽဝၵူၼ်းႁိူၼ်း လႆႈထွမ်ႇတြႃးၽြႃးယဝ်ႉ ပဵၼ်ရႁၢၼ်းတႃႇၵႂႃႇလႄႈ ၽြႃးႁွင်ႉ ဢေႁိၽိၵ်ႉၶုသေ ပဵၼ်ရႁၢၼ်းၵႂႃႇ။

ၼႂ်းသႃႇသၼႃႇ ပုတ်ႉထၽြႃးၵေႃးတမၼႆႉ ၸဝ်ႈရႁၢၼ်း ဢၼ်တူၼ်တူဝ် မုၼ်ၶမ်းၽြႃး ႁွင်ႉဝႃႈ ဢေႁိၽိၵ်ႉၶုသေ ပဵၼ်ရႁၢၼ်းမႃးၼၼ်ႉ ပေႃးတူၺ်း တီႈၼႂ်းဝိၼယပိတၵၢတ်ႈၸိုင် လႆႈႁၼ် မီးဝႆႉ 1,344 ၸဝ်ႈ။ ၼႂ်းၼၼ်ႉပဵၼ်-

• ပၺ်ႇၸဝၵ်ႉၵီႇ 5 ၸဝ်ႈ
• လုၵ်ႈသထေးမိူင်းပႃႇရႃႇၼသီႇ ၸၢႆးယသလႄႈ ဢူၺ်းၵေႃႉမၼ်း 55 ၸဝ်ႈ
• လုၵ်ႈႁူမ်ႈဢူႈ ဢမ်ႇႁူမ်ႈမႄႈ ၸဝ်ႈႁေႃၶမ်းၵေႃးသလ ၸုမ်းၽတ်ႉတဝၵ်ႉၵီႇ 30 ၸဝ်ႈ
• ၸုမ်းရသေႉသၢမ်ပီႈၼွင်ႈ ဢုရုဝေလၵတ်ႉသပ၊ ၼတီႇၵတ်ႉသပ၊ ၵယႃႇၵတ်ႉသပ 1,000 ၸဝ်ႈ
• ၸုမ်းဢၵ်ႉၵသႃႇဝၵ ၸဝ်ႈသႃႇရိပုတ်ႉတရႃႇ ၸဝ်ႈမွၵ်ႉၵလၢၼ်ႇၶဝ် 250 ၸဝ်ႈ
• ၸဝ်ႈဢင်ႇၵုလိမႃႇလ 1 ၸဝ်ႈ ႁူမ်ႈၵၼ် 1,344 ၸဝ်ႈ။
  

တီႈၼႂ်းသုတ်ႈတၼ်ႇတပိတၵၢတ်ႈ ၼႂ်းၼိၵႃႇယၸိူဝ်းၼၼ်ႉ လႆႈႁၼ် 27,303 ၸဝ်ႈ။ ၼႂ်းၼၼ်ႉ ပဵၼ်-

• ၸုမ်းပုၼ်ႇၼႃးသေလၶဝ် 300 ၸဝ်ႈ
• ၸုမ်းၸဝ်ႈႁေႃၶမ်း မႁႃႇၵပ်ႉပိၼ မိူင်းၵုၵ်ႉၵုတဝတီႇ 1,000 ၸဝ်ႈ
• ၵူၼ်းမိူင်းၵပိလဝၢတ်ႈ ဢၼ်ၸဝ်ႈႁေႃၶမ်းသုတ်ႉထေႃးထၼ ၸႂ်ႉမႃးပၢင်းၽြႃး သိပ်းၸုပ်ႈ 10,000 ၸဝ်ႈ
• ၸုမ်းပုၼ်ႇၼႃး ပႃႇရႃႇယၼိၵၶဝ် 16,000 ၸဝ်ႈ ႁူမ်ႈၵၼ် ပဵၼ်ၵႂႃႇ 27,303 ၸဝ်ႈ။
  

ပေႃးဢဝ် သဵၼ်ႈမၢႆ တီႈၼႂ်းဝိၼယပိတၵၢတ်ႈ 1,344 ၸဝ်ႈလႄႈ သဵၼ်ႈမၢႆ တီႈၼႂ်း သုတ်ႉတၼ်ႇတပိတၵၢတ်ႈ 27,303 ၸဝ်ႈ မႃးလေႃးၵၼ်ၸိုင် ပဵၼ်ၵႂႃႇ 28,647 ၸဝ်ႈယဝ်ႉ။