သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး

သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး (ၽၢႆႇဢင်းၵိတ်ႉ Tai Sangha University Students’ Association Bangkok, Thailand) ပဵၼ်ၸုမ်းသင်ႇၶတႆး ဢၼ်ႁဵၼ်းလိၵ်ႈယူႇတီႈ ၸၼ်ႉၸွမ်မႁႃၸုလႃးမိူင်းၵွၵ်ႇ၊ ၸိုင်ႈထႆး ၸုမ်းလႆႈၵေႃႇတင်ႈမႃးမိူဝ်ႈပီ 2005 သေ ထိုင်မႃး ပီ 2010 ၸၼ်ႉၸွမ်လႆႈမၵ်းမၼ်းပၼ်သေ၊ သင်ႇၶတႆးၶဝ်ၸဝ်ႈလႆႈပဵၼ်ၼမ်ႉၼိုင်ႈၸႂ်လဵဝ်ၵၼ်သေ ႁူမ်ႈသၢင်ႈၼႃႈၵၢၼ် သႃႇသၼႃႇ ၾိင်ႈငႄႈလိၵ်ႈလၢႆးတႆး ၵႂႃႇတေႃႇထိုင်ယၢမ်းလဵဝ်ယဝ်ႉ။

ပိုၼ်း

ၽူႈပၼ်ႁႅင်း

သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ၼႆႉ ဢိင်ပိုင်ႈလူၺ်ႈတၢင်းၶတ်းၸႂ်သႂ်ႇႁႅင်း ၸဝ်ႈၶူးလူင် Prof. Dr. ၶမ်းမၢႆ ထမ်ႇမသႃႇမိ (DPhil, Oxford)၊ ၸဝ်ႈၶူးသုꩪမ်မ သုၶမ်းတႆး B.A., M.A. (MCU) M.A. (TU) လုၵ်ႈႁဵၼ်း Ph.D. ၸၼ်ႉၸွမ်ၸူးလႃးလူင်းၵွၼ်း၊ ၸဝ်ႈၶူးသုၸိၼ်တႃ (မိူင်းၼၢႆး)၊ လႄႈ ၸဝ်ႈၶူးပၺ်ၺႃၽေႃၷ B.A. (ၼွင်ႁၢႆးယႃႈ) ၶဝ်ႈၸဝ်ႈဢွၼ်ႁူဝ်ၼမ်းၼႃႈသေ ႁႃသူၼ်းတုမ်သင်ႇၶတႆး၊ ဢၼ်လုၵ်ႉၼႂ်းမိူင်းတႆး မႃးႁဵၼ်းလိၵ်ႈယူႇတီႈၸၼ်ႉၸွမ် ၼႂ်းမိူင်းထႆးၼႆႉသေဢမ်ႇၵႃး ဢိၵ်ႇပႃးတင်ႈၸဝ်ႈသင်ႇၶတႆး ၸိူဝ်းမီးယႇဝႆႉၼႂ်းမိူင်းထႆးၸိူဝ်းၼႆႉ မႃးႁူမ်ႈႁွမ်းၵၼ်သေ၊ ၵေႃႇတင်ႈပဵၼ်မႃးၸုမ်းဢၼ်လႆႈၸိုဝ်ႈဝႃႈ ꧦမုၵ်ႉၸုမ်းလုၵ်ႈႁဵၼ်းၸၼ်ႉၸွမ်သင်ႇၶတႆးမိူင်းၵွၵ်ႇ၊ ၸိုင်ႈထႆးꧦ ၼႆႉမႃး မိူဝ်ႈပီ 2005 ၼၼ်ႉယဝ်ႉ။

ပၢင်ႁပ်ႉတွၼ်ႈၼွင်ႉမႂ်ႇ
သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ပီ 2022

ယိူင်းဢၢၼ်းလွင်ႈတင်ႈၸုမ်း

ၸဝ်ႈၶူးၶဝ်ၸဝ်ႈလႆႈဢွၼ်ႁူဝ်ၼမ်းၼႃႈသေ လႆႈၵေႃႇတင်ႈၸုမ်းမႃးၼႆႉ ယွၼ်ႉမီးတၢင်းယိူင်းဢၢၼ်းႁႂ်ႈသင်ႇၶတႆး လႄႈလုၵ်ႈႁဵၼ်းၸၢႆးယိင်းတႆး ၸိူဝ်းမႃးႁဵၼ်းလိၵ်ႈယူႇတီႈၸၼ်ႉၸွမ်ၼႂ်းမိူင်းထႆးၼႆႉ ႁႂ်ႈပေႃးမီးတၢင်းမိုတ်ႈၵိုဝ်းၸမ်ၸႂ်ၵၼ်၊ ႁႂ်ႈပေႃးလႆႈယူႇပဵၼ်ၼမ်ႉၼိုင်ႈၸႂ်လဵဝ်ၵၼ်၊ ယၢမ်းမိူဝ်ႈယူႇဢမ်ႇလီၵိၼ်ဢမ်ႇဝၢၼ် ဢမ်ႇၼၼ်တူၵ်းတၢင်းယၢပ်ႇၽိုတ်ႇ သေလွင်ႈꧦ မႃးၵေႃႈ ႁႂ်ႈမီးလွင်ႈၸွႆႈထႅမ်တူၺ်းထိုင်ၵၼ်လႆႈ၊ ၸွင်ႇလႆႈဢွၼ်ၵၼ်တင်ႈ ꧦ မုၵ်ႉၸုမ်းလုၵ်ႈႁဵၼ်းၸၼ်ႉၸွမ်သင်ႇၶတႆးမိူင်းၵွၵ်ႇ၊ ၸိုင်ႈထႆးꧦ ၼႆႉမႃးယဝ်ႉ၊ ဝၢႆးသေၶဝ်ၸဝ်ႈ လႆႈဢွၼ်ႁူဝ်ၵေႃႇတင်ႈၸုမ်းမႃးယဝ်ႉ၊ သင်ႇၶတႆးၵေႃႈလႆႈဝႃႈပဵၼ်ဢၼ်ၶိုၼ်ႈယႂ်ႇမႂ်ႇသုင်လိူဝ်ၵဝ်ႇမႃးတႄႉꧦ ဝႃႈꧦ ယူႇယဝ်ႉ၊ ပေႃးမႃးတူၺ်းၶိုၼ်း မိူၼ်ၼင်ႇၽၢႆႇၵၢၼ်ႁဵၼ်းၵၢၼ်သွၼ်လႄႈသင်၊ ၽၢႆႇလွင်ႈမိုတ်ႈၵိုဝ်းၸမ်ၸႂ်ၵၼ် ၼႂ်းမူႇၼႂ်းၸုမ်းၸိူဝ်းၼႆႉလႄႈသင်၊ ၽၢႆႇၼႃႈၵၢၼ်တႃငၢၼ်းၸိူဝ်းၼႆႉလႄႈသင်၊ လႆႈဝႃႈၶႅမ်ႉလႅပ်ႈမႃးလိူဝ်ၵဝ်ႇတႄႉꧦ ဝႃႈꧦ ယဝ်ႉ။

တႅမ်ႈပၵ်းပိူင်ၸုမ်း

ထိုင်မႃးပီ 2009 ၼၼ်ႉ ၸဝ်ႈၶူးၵိတ်တိသႃရႃၽိပႃလ (ꩪမ်မႃၸရိယ) M.A., Ph.D. (Candidate), Thailand ၸဝ်ႈၶူးၼႃၵိၼ်တ (B.A.) လႄႈ တင်းၽူႈၶဝ်ႈၸုမ်ႈလၢႆꧦ ၸဝ်ႈ တင်ႇလႆႈဢုပ်ႇၵုမ်ၵၼ် လွင်ႈတႃႇတေႁဵတ်းဢွၵ်ႇပပ်ႉပၵ်းပိူင်ၸုမ်း ပုၼ်ႈတႃႇႁႂ်ႈ လုၵ်ႈႁဵၼ်းသင်ႇၶတႆး သမ်ႉပေႃးတေလႆႈမေႃယူႇသဝ်းၸွမ်းပၵ်းပိူင် ၼၼ်ႉလႄႈသင်၊ ၸဝ်ႈၼိုင်ႈလႄႈၸဝ်ႈၼိုင်ႈ ၼင်ႇႁိုဝ်တေမီးတၢင်းၼပ်ႉယမ်ၼိူဝ်ၵၼ် ၼၼ်ႉလႄႈသင်၊ ၼင်ႇႁိုဝ်ပေႃးတေမေႃယူႇၸွမ်းပၵ်းပိူင်ၸၼ်ႉၸွမ် လႄႈပၵ်းပိူင်ဝၢၼ်ႈမိူင်းပိူၼ်ႈၸိူဝ်းၼၼ်ႉလႄႈသင်၊ ၶဝ်ႈၸဝ်ႈလႆႈဝူၼ်ႉႁၼ်ထိုင်ၸႃႇၽူႈၶဝ်ႈၸုမ်းၸိူဝ်းမႃးလိုၼ်းလင် ဢၼ်တေမႃးႁဵၼ်းလိၵ်ႈၼႂ်းမိူင်းထႆးၼႆႉ ၼင်ႇႁိုဝ်ပေႃးတေဢမ်ႇလႆႈမီးတၢင်းယၢပ်ႇၽိုတ်ႇၼၼ်ႉ ၶဝ်ၸဝ်ႈၸင်ႇလႆႈဢွၼ်ၵၼ်တႅပ်းတတ်းဝႃႈ ꧦ တင်ႈတႄႇဢဝ်ၼႆႉၵႂႃႇလူဝ်ႇလႆႈမီးပၵ်းပိူင်ယဝ်ႉꧦ ၼႆႉလႄႈ ၸင်ႇလႆႈႁဵတ်းဢွၵ်ႇမႃးပၵ်းပိူင် တႃႇသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး မိူဝ်ႈပီ 2009 ၼၼ်ႉယဝ်ႉ။

ၸၼ်ႉၸွမ်ပၼ်ၶႂၢင်ႉတင်ႈၸုမ်း

ထိုင်မႃးပီ 2010 ၼၼ်ႉ ၸၼ်ႉၸွမ်မႁႃႇၸူးလႃးလူင်းၵွၼ်း လႆႈပိုတ်ႇပၼ်တိုဝ်ႉတၢင်း ႁႂ်ႈလုၵ်ႈႁဵၼ်းၼွၵ်ႈမိူင်းၵူႈမိူင်းꧦ တင်ႈၸုမ်းႁင်းၽႂ်ႁင်းမၼ်သေ တၢင်ႇၶိုၼ်ႈၼႂ်းၸၼ်ႉၸွမ်ပုၼ်ႈတႃႇႁႂ်ႈၸၼ်ႉၸွမ်တူၺ်းထိုင်လုၵ်ႈႁဵၼ်းလႆႈငၢႆႈၶိုၼ်ႈမႃးလႄႈ တႃႇႁႂ်ႈလုၵ်ႈႁဵၼ်းၶဝ် လႆႈမီးတိုဝ်ႉတၢင်းတႃႇတေၸွႆႈထႅမ် ႁဵတ်းသၢင်ႈၼႃႈၵၢၼ်ၼႂ်းၸၼ်ႉၸွမ်ၶိုၼ်းၼၼ်ႉယဝ်ႉ၊ ယွၼ်ႉၼၼ်သေ ၸဝ်ႈၶူးသုမၼ သႅင်လၢဝ် (ၵေႇသီႇ) ၸင်ႇလႆႈႁႃဢုပ်ႇၵုမ်ၵၼ်တင်း ၽူႈပွင်ၵၢၼ်ၸုမ်း လႄႈ ၽူႈၶဝ်ႈၸုမ်းၵူႈၸဝ်ႈꧦ လွင်ႈတႃႇတေတင်ႈၸုမ်းသေ တၢင်ႇၶဝ်ႈၼႂ်းၸၼ်ႉၸွမ်မႁႃႇၸူးလႃးလူင်းၵွၼ်း၊ ၶဝ်ၸဝ်ႈၸင်ႇလႆႈၸႂ်ၽွမ်ႉႁူမ်ႈၵၼ်သေ လႆႈတၢင်ႇၸုမ်းၶဝ်ႈၼႂ်းတၼ်ႉၸွမ်ယူႇယဝ်ႉ။

ဢၼ်လႆႈတၢင်ႇၸုမ်းၶဝ်ႈၼႂ်းၸၼ်ႉၸွမ်ၼၼ်ႉ ယွၼ်ႉၶႂ်ႈႁႂ်ႈၵူၼ်းၼွၵ်ႈမိူင်း ႁူႉၸၵ်းသင်ႇၶတႆးၼမ်တိူဝ်းမႃးလိူဝ်ၵဝ်ႇလႄႈသင်၊ ၼင်ႇႁိုဝ်တေလႆႈမီးသုၼ်ႇလႆႈသုၼ်ႇ ဢၼ်ပဵၼ်ၽၢႆႇၵၢၼ်ႁဵၼ်းၵၢၼ်သွၼ်ႁဝ်းၶႃႈ၊ ႁႂ်ႈၶိုၼ်ႈယႂ်ႇၶိုတ်းၸၼ်ႉမႃးလိူဝ်ၵဝ်ႇလႄႈသင်၊ ၼင်ႇႁိုဝ်ပေႃႈတေလႆႈသုၼ်ႇလႆႈသုၼ်ပဵၼ် တႃႇႁဵတ်းသၢင်ႈၸွႆႈထႅမ်ၼႃႈၵၢၼ်ၼႂ်းၸၼ်ႉၸွမ်ၼၼ်ႉလႄႈသင်၊ ၼင်ႇႁိုဝ်ႈတင်းၽၢႆႇလုၵ်ႈႁဵၼ်းလႄႈ ၽၢႆႇၸၼ်ႉၸွမ်တင်းသွင်ၽၢႆႇၼႆႉ သမ်ႉပေႃးတေမီးၽွၼ်းလီတေႃႇၵၼ်ၼၼ်ႉလႄႈသင်၊ ၸင်ႇလႆႈတၢင်ႇသဵၼ်ႈမၢႆ သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ၶဝ်ႈၼႂ်းၸၼ်ႉၸွမ်း ၸွမ်းၼင်ႇယိူင်းဢၢၼ်းမီးဝႆႉၼၼ်ႉယဝ်ႉ။

ပိၼ်ႇပႅင်လႅၵ်ႈလၢႆႈ

ၸွမ်းၼင်ႇထုင်းၵႂၢမ်းတႆးႁဝ်းမီးဝႃႈ ꧦထုင်းၵဝ်ႇယႃႇႁႂ်ႈႁၢႆ လၢႆးမႂ်ႇႁႂ်ႈၶိုတ်းၵၢပ်ႈꧦ ၼႆလႄႈ ထိုင်မႃးၼႂ်းပီ 2011 ၼႆႉ ၸဝ်ႈၶူးသုမၼ သႅင်လၢဝ် (ၵေႇသီႇ) လႄႈ ၸဝ်ႈၶူးꩪမ်ႇမိၵ (လၢႆးၶႃႈ) ၶဝ်ၸဝ်ႈ လႆႈဢွၼ်ႁူဝ်ၼမ်းၼႃႈ ၸုမ်းသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး တင်းသဵင်ႈသေ လႆႈၶိုၼ်းမူၼ်ႉမေးပၵ်ႈပိူင်ၵမ်ႉၽွင်ႈလႄႈ ၸိုဝ်ႈၸုမ်း မိူဝ်ႈဢွၼ်တၢင်းၸႂ်ႉ ꧦ မုၵ်ႉၸုမ်းလုၵ်ႈႁဵၼ်းၸၼ်းၸွမ်သင်ႇၶတႆး မိူင်းၵွၵ်ႇ၊ ၸိုင်ႈထႆးꧦ လႆႈလၢႆႈမႃးပဵၼ် ꧦ မုၵ်ႉၸုမ်းသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆးꧦ သေ သိုပ်ႇမၵ်ႈမၼ်းၶိူင်ႈမၢႆ လႄႈၸုမ်ႈၸုမ်းၸိူဝ်းၼႆႉမႃးယူႇယဝ်ႉ၊ ယွၼ်ႉၶႂ်ႈႁိုဝ်ႈၸုမ်းလီသေဢွၼ် တွၼ်းသေၵဝ်ႇ၊ ၼင်ႇႁိုဝ်လွင်ႈယူႇသဝ်းႁဝ်းႁႂ်ႈမိူၼ်ပိူၼ်ႈ လႄႈၼႃႈၵၢၼ်ႁဝ်း သမ်ႉပေႃးတေ ၶိုၼ်ႈသၢင်ႉၶိုၼ်ႈသုင်လိူဝ်ၵဝ်ႇၼၼ်ႉလႄႈသင်၊ ၼင်ႇႁိုဝ်ပၵ်းပိူင်ႁဝ်းၶႃႈ ပေႃးတေထုၵ်ႇမီၼ်ႈၸွမ်းပိူင်ယူႇသဝ်း ၼႂ်းၸၼ်ႉၸွမ်လႄႈပၵ်ႈပိူင်ဝၢၼ်ႈမိူင်းၸိူဝ်ႉၼႆႉလႄႈသင် ၸင်ႇၶိုၼ်းမူၼ်ႉမေးပၵ်းပိူင် သင်ႇၶတႆးလုၵ်းႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆးမႃးယဝ်ႉ။

ထိုင်မႃးဝၼ်းထိ 4 လိူၼ် ၾႅပ်ႉပိဝ်ႇဢိူဝ်ႇရီႇ 2020 ၼၼ်ႉ ႁူဝ်ပဝ်ႈ မုၵ်ႉၸုမ်းသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ၸဝ်ႈၶူးဢိသ်သရိယ ဢွၼ်ႇၶိုၼ်းသႂ် (မိူင်းၵိုင်) ဢွၼ်ႁူဝ်ၼမ်းၼႃႈသေ လႆႈၶွတ်ႇၽွတ်ႈ ၸုမ်းပွင်ၵၢၼ်ထတ်းပၵ်းပိူင်ၶိုၼ်ႈမႃး ထိုင်မႃး ဝၼ်းထိ 18 လိူၼ် ၾႅပ်ႉပိဝ်ႇဢိူဝ်ႇရီႇ 2020 တေႃႇထိုင် ဝၼ်းထိ 20 လိူၼ် ၾႅပ်ႉပိဝ်ႇဢိူဝ်ႇရီႇ 2020 ၼၼ်ႉ၊ ၸုမ်းပွင်ၵၢၼ်ထတ်းပၵ်းပိူင် ၸင်ႇလႆႈဢွၼ်ၵၼ်ထတ်း၊ ထႅမ်၊ ထွၼ် ပၵ်းပိူင်ၵမ်ႈၽွင်မႃးယူႇယဝ်ႉ။

ၸိုဝ်ႈၸုမ်းဢၼ်ၵဝ်ႇပဵၼ် ꧦမုၵ်ႉၸုမ်းသင်ႇၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆးꧦ ၼၼ်ႉ လႆႈထွၼ်ပႅတ်ႈ ꧦမုၵ်ႉၸုမ်းꧦ မၼ်းသေ လၢႆႈပဵၼ် ꧦသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆးꧦ ၸိုဝ်ႈၽၢႆႇဢင်းၵိတ်ႉ Tai Sangha University Students’ Association Bangkok, Thailand (TSUSA) မႃးယူႇယဝ်ႉ။

ဝၢႆးသေလႆႈဢဝ်တၢင်ႇလၢတ်ႈ ဢုပ်ႇၵုမ်ၵၼ်တီႈဝတ်ႉမႂ်ႇတႆး သႃထုပရႃႇတိတ်ႇ မိူင်းၵွၵ်ႇ၊ ၸိုင်ႈထႆး ယဝ်ႉတူဝ်လီငၢမ်းယဝ်ႉ၊ ထိုင်ႈမႃး ဝၼ်းထိ 22 မၢတ်သျ် ပီ 2021 ၸင်ႇလႆႈတူၵ်းလူင်းလႆႈၸႂ်ၵၼ်သေ တႅပ်းတတ်းၸႂ်ႉတိုဝ်းၸိုဝ်ႈၸုမ်ႈမႂ်ႇ ꧦသင်ႇၶတႆးလုၵ်ႈႁဵၼ်းၸွၼ်ႉၸွမ်မိူင်းၵွၵ်ႇ၊ ၸိုင်ႈထႆးꧦ ၼႆႉမႃးတေႃႇတေႃႈလဵဝ်ယဝ်ႉ။

ပိူင်ၶွတ်ႇၽွတ်ႈၸုမ်း

ပိူင်ၶွတ်ႈၽွတ်ႈ သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး မီးတင်းမူတ်းသွင်တွၼ်ႈ–

1.ၽူႈၵိူဝ်းၵုမ်
1.1. ၸဝ်ႈၶူးလူင် Prof. Dr. ၶမ်းမၢႆ ꩪမ်မသႃမိ မိူင်းဢင်းၵိတ်ႉ (D.Phil., Oxford) ဢၷ်ၷမႁႃသၻ်ꩪမ်မၸေႃတိၵꩪၸ၊ ဢၷ်ၷမႁႃၷၼ်ထဝႃၸၵပꧣ်ꩨတ၊ မႁႃꩪမ်မၵထိၵပႁုၸၼႁိတꩪရ၊ ပႃႇၵွၵ်ႉၶလူင် လႄႈၽူႈၵေႃႇတင်ႈ ၸၼ်ႉၸွမ်ပုတ်ႉထမိူင်းတႆး၊ ဝဵင်းတူၼ်ႈတီး။
1.2. ၸဝ်ႈသြႃႇလူင် မႁႃၺႃႇꧣိၼ်ၻ ဝတ်ႉမႂ်ႇတႆး မိူင်းၵွၵ်ႇ၊ ၸိုင်ႈထႆး။
1.3. ၸဝ်ႈသြႃႇလူင် သူဝ်ၽူၼ်းဝသျိရပူၼ်း ႁူဝ်ပဝ်ႈလူင် လုၵ်ႈႁဵၼ်းၼွၵ်ႈမိူင်း ၸၼ်ႉၸွမ်မႁႃႇၸူးလႃးလူင်းၵွၼ်း။
1.4. ၸဝ်ႈၶူး Dr. သႅင်ႁိူင်း ၼႃႇရိၼ်ႇၻႃၽိပႃလ (ꩪမ်မႃၸရိယ) M.A., Ph.D (Sri Lanka)၊ သၻ်ꩪမ်မၸေႃတိၵꩪၸ၊ မႁႃၷၼ်ထဝႃၸၵပꧣ်ꩨိတ၊ ၽူႈၵုမ်ႈႁွင်ႈၵၢၼ်ၽၢႆႇၵပ်းသၢၼ်ၼွၵ်ႈမိူင်း၊ ၶူးသွၼ်ၵထိၵၸၼ်ႉၸွမ်မႁႃႇၸိူလႃးလူင်းၵွၼ်း၊ ၶူးပွင်သွၼ်ၵထိၵၸၼ်ႉၸွမ်ပုတ်ႉထမိူင်းတႆး၊ ဝဵင်းတူၼ်ႈတီႈ။
1.5. ၸဝ်ႈၶူး Dr. သႅင်ႁိူင်း ပၺ်ၺႃၽေႃၷၽိပႃလ (ꩪမ်မႃၸရိယ M.A.(Sri Lanka), Ph.D (Mahidol) ၸၼ်ႉၸွမ်မႁိတူၼ်း၊ ၶူးပွင်သွၼ်ၸၼ်ႉၸွမ်ပုတ်ႉထမိူင်းတႆး၊ ဝဵင်းတူၼ်ႈတီး။
1.6. ၸဝ်ႈၶူး Dr. ၵိတ်တိသႃရႃၽိပႃလ (ꩪမ်မႃၸရိယ) M.A., Ph.D (Mahamakut, Thailand) ၽူႈမၢႆလူင် ၸုမ်းပၢႆးပၺ်ႇၺႃႇ ငဝ်ႈငုၼ်းမုၵ်ႉၸုမ်းလူင်သရ်ႇၶႃႇၸိုင်ႈတႆး။
1.7. ၸဝ်ႈၶူး Dr. ၼေႃႇသႅင် ဢၷ်သေၼ B.A. (Philosophy), M.A. (English), Ph.D. (Linguistics) MCU, Thailand.
1.8. ၸဝ်ႈၶူးမႁႃႇၵေႃးလိၼ်ႇတ B.A. (MCU) M.A. (Human Resource Management - NIDA Institute.
1.9. ၸဝ်ႈၶူးတိုၼ်းႁၢၼ် တေၸဝံသ B.A. (English), M.A. (English), Ph.D. (Linguistics) (Candidate), MCU, Thailand.

2.ၽူႈပွင်ၵၢၼ်
2.1. ႁူဝ်ပဝ်ႈလူင် 1 ၸဝ်ႈ
2.2. ၵႅမ်ႈႁူဝ်ပဝ်ႈ 2 ၸဝ်ႈ
2.3. ၽူႈမၢႆလူင် 1 ၸဝ်ႈ
2.4. ၵႅမ်ႈၽူႈမၢႆ 2 ၸဝ်ႈ
2.5. ၽၢႆႇၵၢၼ်ငိုၼ်း 3 ၸဝ်ႈ
2.6. ၽၢႆႇၵပ်ႈသိုပ်ႇ 4 ၸဝ်ႈ
2.7. ၽၢႆႇပၢႆးပၺ်ႇၺႃႇ 5 ၸဝ်ႈ
2.8. ၽၢႆႇၶၢဝ်ႇ 5 ၸဝ်ႈ
2.9. ၽၢႆႇပၢႆးယူႇလီ 3 ၸဝ်ႈ
2.10. ၽၢႆႇထိင်းသိမ်းၶူဝ်းၶွင် 3 ၸဝ်ႈ

ၼႃႈၵၢၼ်ဢၼ်ႁဵတ်း

တႅမ်ႈလိၵ်ႈပိၼ်ႇလိၵ်ႈ

သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ၵူႈၸုပ်ႈꧦ ၵူႈပီꧦ လႆႈႁူမ်ႈၵၼ်ၶတ်းၸႂ် တႅမ်ႈပပ်ႉ ပိၼ်ႇပပ်ႉဢွၵ်ႇ ဢၼ်ဢဝ်ၸိုဝ်ႈၸုမ်းသေၽိမ်းဢွၵ်ႇၵေႃႈမီး မိူၼ်ၸိူင်ႉၼင်ႇ ပပ်ႉ သႅင်သယၢမ်၊ ဢၼ်ႁဵတ်းဢွၵ်ႇၵူႈပီ တေႃႈလဵဝ် ပီ 2022 ၼႆႉ ပဵၼ် ပပ်ႉ မၢႆသိပ်းယဝ်ႉ၊ ပပ်ႉဝေႃးႁႃႇရ တႆး ထႆး ၸႃႉၵႂႃႇၸိူဝ်းၼႆႉယဝ်ႉ၊ ၸဝ်ႈၶူးမၢင်ၸဝ်ႈၵေႃႈတွၼ်ႈတႃႇပဵၼ်လွင်ႈမၢႆတွင်း ၼႂ်းႁွင်ႈႁဵၼ်းၼၼ်ႉ လႆႈႁူမ်ႈမူႇလိၵ်ႈၵၼ်သေၽိမ်းဢွၵ်ႇတႃႇ ပဵၼ်တီႈမၢႆတွင်း လွင်ႈဢၼ်လႆႈယဝ်ႉႁဵၼ်းၵေႃႈမီး လိူဝ်သေၼၼ်ႉလုၵ်ႈႁဵၼ်းမၢင်ၸဝ်ႈ ဢၼ်ပႃးဝႃႇသၼႃႇ လွင်ႈတႅမ်ႈလိၵ်ႈတႄႉꧦ ၼၼ်ႉ လႆႈတႅမ်ႈလိၵ်ႈလူင်း ၼႂ်းဝီးၶီႇၽီးတီႈယႃးတႆး ၵေႃႈမီး မိူၼ်ၸိူင်ႉၼင်ႇ သျဵၵ်းသႃႇပီႇယႃး၊ ၸဝ်ႈၵၢင်းသိူဝ်၊ ၶူးဝႃးဝုၼ်းၸုမ်ႉ၊ သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ၸႃႉၵႂႃႇၸိူဝ်းၼႆႉယဝ်ႉ။

ၸတ်းႁဵတ်းပၢင်သွၼ်

ၵူႈပီꧦ ၸူဝ်ႈၶၢဝ်းပိၵ်ႉလိၵ်ႈဢမ်ႇၼၼ် ၸူဝ်ႈၶၢဝ်းဢၼ်လႆႈႁဵၼ်းလိၵ်ႈ လုၵ်ႈႁဵၼ်းလႆႈဢွၼ်ၵၼ် ၸတ်းႁဵၼ်းပၢင်သွၼ် တႃႇထႅမ်ပၼ်ၼမ်ႉၵတ်ႉ လုၵ်ႈႁဵၼ်းမိူၼ်ၸိူင်ႉၼင်ႇ သွၼ်ပၼ်လိၵ်ႈဢင်းၵိတ်ႉ လိၵ်ႈထႆး လႄႈ ဢုမ်ႇပိဝ်ႇတႃႇ ၸိူဝ်းၼႆႉယဝ်ႉ၊ မိူဝ်ႈလုၵ်ႈႁဵၼ်းႁဵၼ်းလိၵ်ႈယဝ်ႉၵႂႃႇသီႇပီ လုၵ်ႈႁဵၼ်းၵေႃႈလႆႈႁူႉလိၵ်ႈထႆး လူလိၵ်ႈထႆး ဢင်းၵိတ်ႉ လႄႈၽၢႆႇ IT ၵေႃႈၶႅၼ်ႇၶိုၼ်ႈမႃးထႅင်ႈ ၶဝ်ႈၸဝ်ႈလႆႈဢဝ်ပၺ်ႇၺႃႇဢၼ်လႆႈႁဵၼ်းမႃးၸိူဝ်ႉၼၼ်ႉ ၸႂ်ႉၼႂ်းၸၢတ်ႈပၢၼ်ၶဝ် လႄႈ ၸွႆႈလိူဝ်ၼႂ်းၸုမ်း၊ မၢင်ၸဝ်ႈလႆႈ ပိၼ်ႇလိၵ်ႈထႆး လိၵ်ႈဢိင်း ပဵၼ်လိၵ်ႈတႆးၸိူဝ်းၼႆႉယဝ်ႉ၊ ၽၢႆႇ IT ၵေႃႈလႆႈၸွႆႈႁဵၼ်းပၢႆႉ ႁဵတ်း Poster ပၢင်တၢၼ်းၶႆး ႁဵတ်းဝီႇၼၢႆး ၸိူဝ်းၼႆႉ လႆႈၶႅမ်ႉလႅပ်းလီတႄႉꧦ၊ လိူဝ်သေၼၼ်ႉ ၸူဝ်ႈၶၢဝ်းယေႃးၵႃႇ ၶူဝ်ဝိတ်ႇ 19 ၼႆႉ ၸုမ်းပၢႆးပၺ်ႇၺႃႇ သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး လႆႈပိုၼ်ႇပၢင်သွၼ်ဢွၼ်ႇလၢႆး မီးလုၵ်ႈႁဵၼ်း ဢွၼ်ႇယိင်းၸၢႆးယိင်း ၼႂ်းမိူင်းတႆးလႄႈ မိူင်းထႆး လႆႈမႃးၶဝ်ႈႁဵၼ်းၸွမ်းၼမ်တႄႉꧦ ဝႃႈꧦ ယဝ်ႉ။

ၸတ်းႁဵတ်းပၢင်တၢၼ်ႈၶႆႈ

လွင်ႈတူင်ႉၼိုင် တႃႇယုၵ်ႉမုၼ်းၼမ်ႉၵတ်ႉလုၵ်ႈႁဵၼ်း ထႅင်ႈဢၼ်ၼိုင်ႈ ပေႃးၸႁဵၼ်းလိၵ်ႈယဝ်ႉ၊ ၸုမ်းပၢႆးပၺ်ႇၺႃႇ သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး လႆႈၸတ်းႁဵတ်းပၢင်တၢၼ်ႈၶႆႈ လႆႈပိုတ်ႇပၼ်တိုဝ်ႉတၢင်းလုၵ်ႈႁဵၼ်းၵူႈၸဝ်ႈၵူႈပႃး ၵူႈၵေႃႉ ပၼ်ႁူဝ်ၶေႃႈမႃးသေ မႃးတၢၼ်ႈၶႆႈၸႅၵ်ႇၽေပၼ်တၢင်းႁူႉ လႄႈတူဝ်ထူပ်းတီႈတႆးၵေႃႉလွင်ႈဢၼ်လႆႈႁူႉလႆႈႁဵၼ်းမႃး ပၼ်တႆးၵေႃႉ ၼႂ်းၸၼ်ႉၸွမ် ႁူမ်ႈလူၺ်ႈတၵႃႇပီႈၼွင်ႉတႆး ဢၼ်ပႂ်ႉထွမ်ႇတၢင်း ၽဵတ်ႉပုၵ်ႉ သင်ႇၶတႆးၼၼ်ႉယဝ်ႉ၊ ပၢင်တၢၼ်ႈၶႆႈ တေၸတ်းႁဵတ်းၵူႈဝၼ်ႈၸၼ် ၶၢဝ်းယၢမ်း 04:00 - 04:45 ယၢမ်းဝၢႆးဝၼ်းၶႃႈယဝ်ႉ။ လိူဝ်သေလႆႈၽိတ်ႈလုၵ်ႈႁဵၼ်းတႆးမႃးတၢၼ်ႈၶႆႈယဝ်ႉ မၢင်ပွၵ်ႈလႆႈၽိတ်းလုၵ်ႈႁဵၼ်းၵူၼ်းၼွၵ်ႈမိူင်းမႃး တၢၼ်ႈၶႆႈပဵၼ်ၽႃႇသႃႇဢိင်းၵိတ်ႉ ၸႅၵ်ႇၽေပၼ်တၢင်းႁူႉ ၵေႃႈမီးယဝ်ႉၶႃႈယဝ်ႉ။

ၸွႆႈၼွင်ႉမႂ်ႇ

ၸွမ်းၼင်ႇယိူင်းဢၢၼ်း ဢၼ်လႆႈတင်ႈၸုမ်းမီးဝႃႈ ၸုမ်းသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး ၵေႃႇတင်ႈၶိုၼ်ႈမႃးတွၼ်ႈတႃႇ ၸွႆႈထႅမ်ၵၼ် ၵွပ်ႈၼၼ်၊ မိူဝ်ႈလုၵ်ႈႁဵၼ်းမႂ်ႇၶဝ်ႈမႃးၼၼ်ႉ၊ ၽၢႆႇၵပ်းသိုပ်ႇ လၢႆႈၸွႆႈထႅမ်မွၵ်ႇလၢတ်ႈၼေ ၶၵ်ႉတွၼ်ႈလွင်ႈၶဝ်ႈမႃးႁဵၼ်းလိၵ်ႈ ပၼ်ၶေႃႈမုၼ်း ပၢႆးၵၢၼ်ႁဵၼ်းဢၼ်ၸၼ်ႉၸွမ်မႁႃၸူးလႃး မီးဝႆႉ ႁႂ်ႈလုၵ်ႈႁဵၼ်းတႅပ်းတတ်းၸႂ်လိူၵ်ႈႁဵၼ်း၊ ၸွႆႈၵပ်းသိုပ်ႇ လွင်ႈႁဵတ်းဝီႇသႃႇ၊ ပေႃးမႃးထိုင်မိူင်းထႆးၵေႃႈ ၸွႆႈႁပ်ႉ ၸွႆႈၶပ်းၶိုင် လွင်ႈယွၼ်းဝီႇသႃႇ တႃႇယူႇႁဵၼ်းလိၵ်ႈၼႂ်းမိူင်းထႆး ၸွႆႈႁႃပၼ်ၵျွင်းၼႂ်းမိူင်းထႆး တႃႇလုၵ်ႈႁဵၼ်းလႆႈယူႇ လႆႈၽိုၵ်းႁဵၼ်းႁူႉလိၵ်ႈထႆးၵႂၢမ်းထႆးထႅမ်ထႅင်ႈ ၸိူဝ်းၼႆႉယဝ်ႉ၊ လႆႈဝႃႈၸုမ်းသင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး မီးၽွၼ်းလီၼိူဝ် သင်ႇၶတႆးႁဝ်းၶႃႈ ဢၼ်မႃးႁဵၼ်းလိၵ်ႈၼႂ်းမိူင်းထႆးတႄႉꧦ ၶႃႈယဝ်ႉ။

မိူဝ်ႈၼွင်ႉမႂ်ႇၶဝ်ႈၸဝ်ႈလႆႈမႃးထိုင်မိူင်းထႆး လႆႈဝီႇသႃႇလုၵ်ႈႁဵၼ်းတႃႇယူႇႁဵၼ်းလိၵ်ႈၼႂ်း မိူင်းထႆးယဝ်ႉ၊ ၽူႈပွင်ၵၢၼ်သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး လႆႈႁူမ်ႈသၢင်ႈၼႃႈၵၢၼ်ၸွမ်းၵၼ်ၵႂႃႇ မိူၼ်ၸိူင်ႉၼင်ႇ ၽၢႆႇၽူႈမၢႆ၊ ၽၢႆႇၵၢၼ်ငိုၼ်း၊ ၽၢႆႇၶၢဝ်ႇမီႇတီႇယႃႇ၊ ၽၢႆႇပၢႆးပၺ်ႇၺႃႇ၊ ၽၢႆႇပၢႆးယူႇလီ လႄႈၽၢႆႇသိပ်းၶူးၶွင် ၶဝ်ႈၸဝ်ႈၵေႃႈလႆႈၸွႆႈၵၼ် မိူၼ်ႈၵႂၢမ်းၵပ်းထုၵ်ႇတႆးမီးဝႆႉဝႃႈ ꧦႁူမ်ႈၵၼ်ၵိၼ်ၸင်ႇဝၢၼ် ႁူမ်ႈၵၼ်ႁၢမ်ၸင်ႇမဝ်ꧦ ဢၼ်ဝႃႈၼၼ်ႉၶႃႈယဝ်ႉ။

ၽိုၼ်ဢိင်

1. ပပ်ႉပၵ်းပိူင် သင်ႇၶတႆးလုၵ်ႈႁဵၼ်းၸၼ်ႉၸွမ်မိူင်းၵွၵ်ႇ၊ ၸိုင်ႈထႆး (2021)