ဢုၸ်ꧡုဝိမႃၼဝတ်ထု၊ ၼၢင်းၽီ လႆႈလူႇဢွႆႈ

10. ဢုၸ်ꧡုဝိမႃၼဝတ်ထု၊ ၼၢင်းၽီ လႆႈလူႇဢွႆႈ

             ၼၢင်းၽီ... တမ်ႈတီႈ မိူင်းရႃႇၸၵျူဝ်ႇၼၼ်ႉ ယွၼ်ႉပိူဝ်ႈလႆႈဢဝ် ပွတ်းဢွႆႈ လူႇတၢၼ်းပၼ် တမ်ႈတီႈ ၸဝ်ႈမႁႃႇမွၵ်ႉၵလၢၼ်ႇလႄႈ လႆႈမီး ၼၢင်းၽီဢွၼ်ႇတင်းၼမ် ဢုမ်ႇလွမ်ႉႁွပ်ႈဝႆႉ ၸိူင်ႈၼင်ႇ ၸဝ်ႈၶုၼ်ဢိၼ်းၼၼ်ႉ

• 808။ ၼၢင်းၽီ... မႂ်းၼၢင်းၼႆႉ မိူၼ်ၼင်ႇ လိူၼ်လႅတ်ႇ ႁိူဝ်ႈႁိူင်းပိူင်းထွင်ႇ ၼိူဝ်ၵၢင်ႁၢဝ် ၼိူဝ်ၼင်လိၼ်မိူင်းသေ ၶိုၵ်ႉၶၢႆးဝႆႉယူႇၼၼ်ႉလႄႈသင် မႂ်းၼၢင်းၼႆႉ ၶိုၵ်ႉၶၢႆးတႄႉယဝ်ႉ။ မိူၼ်ၼင်ႇ ၶုၼ်သၢင်လူင် ၶိုၵ်ႉၶၢႆးလိူဝ်သေ ၸဝ်ႈၶုၼ်ဢိၼ်းလႄႈ ၽီတင်းသဵင်ႈၼင်ႇၼၼ် မႂ်းၼၢင်းၼႆႉၵေႃႈ ႁၢင်ႈၽၢင်ၶိုၵ်ႉမႂ်းၼၢင်းလႄႈသင် ဢူငဝ်းမႂ်းၼၢင်းလႄႈသင် ဢလုမ်းဢလၢင်း မႂ်းၼၢင်းလႄႈသင် ၽုင်းတၼ်းၶူဝ်းလႄႈသင် တွၼ်းၵႄးလိူဝ်တင်းသဵင်ႈယဝ်ႉ။

• 809။ ၼၢင်းၽီဢွၼ်ႇ ဢၼ်ပၵ်းမွၵ်ႇမူဝ်ၵႅဝ်ႈ၊ ဢၼ်မီးပၢၼ်းၵုမ်းၵႅဝ်ႈ၊ ဢၼ်ဢူငဝ်းတူဝ် ႁိူဝ်ႈလႅင်းမိူၼ်ၶမ်း၊ တမ်ႈတီႈ တူဝ်ၶိင်း ဢၼ်(ႁွႆႈတိုဝ်းဝႆႉ ဝႅၼ်တိၼ် ဝႅၼ်မိုဝ်း)၊ ဢၼ်ၼုင်ႈဝႆႉ သိူဝ်ႈၶူဝ်းၵႅဝ်ႈ ၼၢင်းၽီဢိူၺ်း ၵဝ်ထၢမ် မႂ်းယူႇယဝ်ႉ။ မႂ်းၼၢင်း ဢၼ်မႃးဝႆႈၵဝ်ၼႆႉ ပဵၼ်ၽႂ်ၼေႃး။

• 810။ ၼၢင်းၽီ မႂ်းၼႆႉ မိူဝ်ႈၸၢတ်ႈၵွၼ်ႇ မႂ်းလႆႈႁဵတ်းၵၢမ်ႇသင်မႃး။ မိူဝ်ႈမႂ်းပဵၼ်ၵူၼ်းၼၼ်ႉ ယၢမ်ႈႁဵတ်း လွင်ႈၵၢၼ်တၢင်းလူႇမႃးယူႇႁႃႉ ဢမ်ႇၼၼ် ယၢမ်ႈႁပ်ႉသိၼ်သီႇလမႃးယူႇႁႃႉ။ ယွၼ်ႉပိူဝ်ႈ ၵုသူဝ်ႇသင်လႄႈ မႂ်းၼၢင်း လႆႈမႃးတႄႇသၼ်ႇထေႇ တမ်ႈတီႈ  မိူင်းၽီၼၼ်ႉသေ မီးဢလုမ်းဢလၢင်း တင်းၼမ်ၼေႃး။ ၽွၼ်းလီဢၼ်ၼႆႉ ပဵၼ် ၽွၼ်းလီၵုသူဝ်ႇ ဢၼ်လႂ်ၼေႃး။ ၼၢင်းၽီ ၵဝ်ထၢမ်မႂ်းယူႇယဝ်ႉ၊ တွပ်ႇမႃးလူး (ၼႆ ၸဝ်ႈမွၵ်ႉၵလၢၼ်ႇ ထၢမ်ၵႂႃႇယဝ်ႉ)။

• 811။ ၸဝ်ႈႁဝ်းတီႈၶႃႈ မိူဝ်ႈတမ်ႈတီႈ မိူင်းရႃႇၸၵျူဝ်ႇၼၼ်ႉ (ၸဝ်ႈႁဝ်း) မႃးတုင်းသွမ်း တမ်ႈတီႈႁိူၼ်း ၶႃႈတပႄးၶဝ်ၶႃႈဢေႃႈ။ ၵွပ်ႈပိူဝ်ႈ ၽႅဝ်မႃး ၼင်ႇၼၼ်လႄႈ ၶႃႈၼၢင်းၵေႃႈ မီးၸႂ်သတ်ႉထႃႇ ၽိူၵ်ႇၸိုၼ်ႈၶၢဝ်သႂ် ဢမ်ႇမီး တီႈတႅၵ်ႈလႆႈလႄႈ လႆႈဢဝ် ဢွႆႈဢွၼ်ႇပွတ်းၼိုင်ႈ လူႇတၢၼ်းပၼ် တမ်ႈတီႈ ၸဝ်ႈႁဝ်းၶႃႈဢေႃႈ။

• 812။ ၸဝ်ႈႁဝ်းတီႈၶႃႈ ဝၢႆးၼၼ်ႉ မႄႈလွင်(မႄႈၽူဝ်)ႁဝ်း ၸင်ႇမႃးတွင်ႈထၢမ်ဝႃႈ “လုၵ်ႈပႂ်ႉ ဢွႆႈၼၼ်ႉ ဢဝ်ၵႂႃႇၸုၼ်ႉပႅတ်ႈ တီႈလႂ်”ၼႆယဝ်ႉ။ ပေႃးထၢမ်ၼင်ႇၼႆ ၶႃႈတပႄးၵေႃႈ ၶိုၼ်းတွပ်ႇဝႃႈ “မႄႈၸဝ်ႈ... ဢွႆႈၼၼ်ႉ ၸုၼ်ႉပႅတ်ႈၵေႃႈ ဢမ်ႇၸႂ်ႈ၊ ၵိၼ်ပႅတ်ႈၵေႃႈ ဢမ်ႇၸႂ်ႈ၊ တူဝ်ၶႃႈ ဢဝ်လူႇတၢၼ်းပၼ် ၸဝ်ႈရႁၢၼ်း ဢၼ်ဢမ်ႇမီး ၵိလေႇသႃႇၼၼ်ႉယဝ်ႉ” (ၼႆ လၢတ်ႈၵႂႃႇၼင်ႇၼႆယဝ်ႉ)။

• 813။ ၸဝ်ႈႁဝ်းတီႈၶႃႈ မႄႈလွင် ၸင်ႇထႃႉလႃႇဝႃႈ “ႁိူၺ်ႉ လုၵ်ႈပႂ်ႉ ႁိူၼ်းလင်ၼႆႉ မႂ်းပဵၼ်ၸဝ်ႈႁိူၼ်းႁႃႉ ၵဝ်ပဵၼ်ၸဝ်ႈႁိူၼ်းႁႃႉ”ၼႆယဝ်ႉ။ မႄႈလွင်ၼၼ်ႉ ၵဵပ်ႈဢဝ်မၢၵ်ႇႁိၼ်သေ သိုင်းၶႃႈတပႄးယဝ်ႉ။ ၶႃႈတပႄးၵေႃႈ တၢႆၽၢတ်ႇ ၽဝၵူၼ်းသေ မႃးပဵၼ်ၼၢင်းၽီတီႈၶႃႈယဝ်ႉ။

• 814။ ၶႃႈၼၢင်းၼႆႉ လႆႈမီးၵၢမ်ႇၵုသူဝ်ႇ လူႇတၢၼ်းဢွႆႈ ဢၼ်ဢမ်ႇမီးတၢင်းၽိတ်း၊ ဢၼ်ပၼ်ၽွၼ်းလီၼၼ်ႉ တီႈၶႃႈဢေႃႈ။ ၽွၼ်းလီ လွင်ႈသိူဝ်းသႃႇ ၵုသူဝ်ႇၼၼ်ႉၵေႃႈ လႆႈၸၢမ်ႇပူၺ်ႈယူႇယဝ်ႉဢေႃႈ။ ၶႃႈၼၢင်းၼႆႉ လႆႈၵျေႃႇလူၺ်ႈ ဢူၺ်းၵေႃႉၽီၶဝ်တီႈၶႃႈယဝ်ႉ။ ၶႃႈၼၢင်းၼႆႉ လႆႈၵျေႃႇမူၼ်ႈလူၺ်ႈ ၵႃႇမၵုၼ်ႇႁႃႈပိူင်ယူႇယဝ်ႉ။

• 815။ ၸဝ်ႈႁဝ်းတီႈၶႃႈ ၵူၺ်းလႆႈႁဵတ်း ၵၢမ်ႇၵုသူဝ်ႇ လူႇတၢၼ်းဢွႆႈ ဢၼ်ဢမ်ႇမီးတၢင်းၽိတ်း၊ ဢၼ်ပၼ် ၽွၼ်းလီၼၼ်ႉ တီႈၶႃႈဢေႃႈ။ ၽွၼ်းလီလွင်ႈသိူဝ်းသႃႇ ၵုသူဝ်ႇၼၼ်ႉၵေႃႈ လႆႈၸၢမ်ႇပူၺ်ႈယူႇယဝ်ႉဢေႃႈ။ ၶႃႈၼၢင်းၼႆႉ လႆႈၵျေႃႇလူၺ်ႈ ဢူၺ်းၵေႃႉၽီၶဝ် တီႈၶႃႈယဝ်ႉ။ ၶႃႈၼၢင်းၼႆႉ လႆႈၵျေႃႇမူၼ်ႈလူၺ်ႈ ၵႃႇမၵုၼ်ႇႁႃႈပိူင်ယူႇယဝ်ႉ။

• 816။ ၽွၼ်းလီ ၵၢၼ်တၢင်းလီၼင်ႇၼႆၼႆႉ မီးယႂ်ႇၼမ်တႄႉဢေႃႈ။ တၢင်းလူႇၶႃႈၼၢင်း ဢၼ်လႆႈလူႇဢွႆႈၼၼ်ႉ ၽွၼ်းလီမၼ်း မီးယႂ်ႇၼမ်တႄႉဢေႃႈ။ ၶႃႈၼၢင်းၼႆႉ လႆႈၵျေႃႇလူၺ်ႈ ဢူၺ်းၵေႃႉၽီၶဝ် တီႈၶႃႈယဝ်ႉ။ ၶႃႈၼၢင်းၼႆႉ လႆႈၵျေႃႇမူၼ်ႈလူၺ်ႈ ၵႃႇမၵုၼ်ႇႁႃႈပိူင် ယူႇယဝ်ႉ။

• 817။ ၽွၼ်းလီ ၵၢၼ်တၢင်းလီၼင်ႇၼႆၼႆႉ မီးယႂ်ႇၼမ်တႄႉဢေႃႈ။ တၢင်းလူႇၶႃႈၼၢင်း ဢၼ်လႆႈလူႇဢွႆႈၼၼ်ႉ ဢႃႇၼုၽေႃႇမၼ်း ယႂ်ႇတႄႉဢေႃႈ။ လႆႈမီးတၢင်းႁူမ်ႇလူမ်ႈ မိူၼ်ၼင်ႇ ၸဝ်ႈၶုၼ်ဢိၼ်း ဢၼ်ၽီတႃႇဝတိမ်ႇသႃႇၶဝ် ပႂ်ႉပႃးလူလွမ်ၼၼ်ႉယဝ်ႉ။ လႆႈၸၢမ်ႇသိူဝ်းၸႂ် ၸိူင်ႉၼင်ႇ ၸဝ်ႈၶုၼ်ဢိၼ်း ၽူႈမီးတႃလႅင်းၼိုင်ႈႁဵင် ဢၼ်လႆႈ ၸၢမ်ႇပူၺ်ႈလူၺ်ႈ သူၼ်သိူဝ်းၼၼ်ႇတဝၼ်ႇၼၼ်ႉယဝ်ႉ။

• 818။ ၸဝ်ႈႁဝ်းတီႈၶႃႈ ၶႃႈၼၢင်းၼႆႉ ၼပ်ႉယမ်ပိုင်ႈဢိင်ၸဝ်ႈႁဝ်း ဢၼ်မီးၸႂ်မေႃဢီႈလူပိူၼ်ႈ ဢၼ်မီးပၺ်ႇၺႃႇၼၼ်ႉယူႇဢေႃႈ။ ၶႃႈၼၢင်း လႆႈတွင်ႈထၢမ် လွင်ႈၸဝ်ႈႁဝ်း ဢမ်ႇမီးတၢင်းၶႆႈတၢင်းပဵၼ်ၼၼ်ႉ ယူႇဢေႃႈ။ လိူဝ်သေၼၼ်ႉ မီးၸႂ်ၼပ်ႉယမ် ဢမ်ႇယူတ်းဢမ်ႇသဵင်ႈ ႁၢၼ်ႉၸႂ်ႁၢၼ်ႉၶေႃးသေ လႆႈဢဝ် ပွတ်းဢွႆႈ လူႇတၢၼ်းပၼ် ၸဝ်ႈႁဝ်း တီႈၶႃႈဢေႃႈ (ၼႆ လၢတ်ႈၵႂႃႇယဝ်ႉ)။

ဢုၸ်ꧡုဝိမႃၼဝတ်ထု ႁူဝ်သိပ်း သုတ်းယဝ်ႉ။