တၢမ်တူဝ်တေႇဝတၢတ်ႈ တေၵေႃႉၶႃႈႁႅမ်

ၽႅၼ်ၵၢၼ် ဢၼ်ၶႃႈႁႅမ်ၽြႃးပဵၼ်ၸဝ်ႈၼၼ်ႉၵေႃႈ ဢမ်ႇပဵၼ်ၵၢၼ်ယဝ်ႉ၊ သမ်ႉလႆႈထိင်းဢိုတ်း ၼင်ႇႁိုဝ်ၶၢဝ်ႇဢၼ်ၼႆႉ တေဢမ်ႇလႆႈႁူဝ်ႈလႄႈ တေႇဝတၢတ်ႈၼႆႉ ၸႂ်တဵၼ်ႈတွၼ်ႇသေ ဢမ်ႇၼိမ်ဢမ်ႇသဝ်းလႆႈယူႇယဝ်ႉ။ ၽႅၼ်ၵၢၼ်ႁႂ်းၸၢင်ႉၼႃႇရႃႇၵီႇရိ ယဵပ်ႇတၢႆၼၼ်ႉ ဢမ်ႇပဵၼ်ၵၢၼ်လႄႈ တိူဝ်ႉသၢင်ႈမၼ်းတႄႉတႄႉ။ တႅပ်းတတ်းဝႃႈ ပွၵ်ႈၼႆႉတႄႉ တၢမ်တူဝ်တေႇဝတၢတ်ႈ ၵေႃႉတေၶႃႈႁႅမ် ၼႆယူႇယဝ်ႉ။

ႁိမ်းဝဵင်းရႃႇၸၵျူဝ်ႇၼၼ်ႉ မီးလွႆၵိတ်ႉၸၵုတ်ႉ ၼႆ။ ၼိူဝ်လွႆၼၼ်ႉ မီးၵျွင်းဢၼ်ၽြႃးပဵၼ်ၸဝ်ႈယူႇသဝ်းလႄႈ ပေႃးၽြႃးပဵၼ်ၸဝ်ႈဢွၵ်ႇတုင်းသွမ်းၼႂ်းဝဵင်းရႃႇၸၵျူဝ်ႇယဝ်ႉ ၸင်ႇၶိုၼ်းယေႃးၶိင်းၶိုၼ်းမႃးၼိူဝ်လွႆၵူႈဝၼ်း ယူႇယဝ်ႉ။ ပေႃးၽႅဝ်ၵၢင်တၢင်းၼႆ ၽြႃးပေၼ်ၸဝ်ႈ ၵႆႉၵႆႉလိုဝ်ႈႁိူဝ်ႉလိုဝ်ႈမွႆႈ၊ တီႈဢၼ်ၽြႃးပဵၼ်ၸဝ်ႈ ၵႆႉၵႆႉလိုဝ်ႈၼၼ်ႉ ပဵၼ်တီႈၽႅင်ၵၢၼ်ၶႃႈႁႅမ်ၼႆ တေႇဝတၢတ်ႈၸင်ႇၶပ်းၶိုင်ႁၢင်ႈႁႅၼ်းဝႆႉလပ်ႉလပ်ႉ။ ပေႃးထိုင်ဝၼ်းၼၼ်ႉၵေႃႈ တေႇဝတၢတ်ႈၼႆႉ ဢီးထွင်းမၢၵ်ႇႁိၼ်လူင် တူၵ်းလူင်းသႂ်ႇၼိူဝ်ၽြႃးပေၼ်ၸဝ်ႈယဝ်ႉ။ မၢၵ်ႇႁိၼ်လူင်ၼၼ်ႉ ၵိင်ႈလူင်းမႃးၸူးၽြႃးပဵၼ်ၸဝ်ႈသိုဝ်ႈသိုဝ်ႈယဝ်ႉ။ ၵူၺ်းၵႃႈ ဢမ်ႇထၢင်ႇထိူမ်သေ မၢၵ်ႇႁိၼ်ၼၼ်ႉ ၵႂႃႇၶင်ႉသႂ်ႇမၢၵ်ႇႁိၼ်လူင်သွင်ဢၼ်သေ ၵိုတ်းၵႂႃႇ။ ၵူၺ်းၵႃႈ ႁႅင်းလေႃႈမၼ်းႁၢမ်ႉႁႅင်းၼႃႇလႄႈ ၸၢၵ်ႇမၢၵ်ႇႁိၼ်ဢွၼ်ႇဢၼ်ၼိုင်ႈ ၸင်ႇၵႂႃႇတိူဝ်ႉၺႃးသႂ်ႇ တိၼ်ၽြႃးပဵၼ်ၸဝ်ႈသေ ၸင်ႇမၢၼ်ႉလိူတ်ႈဝႆႉယူႇယဝ်ႉ။

ၽွင်းၽြႃးပဵၼ်ၸဝ်ႈလႆႈၶၢမ်ႇတၢင်းၵႃႇယိၵတုၵ်ႉၶ ယွၼ်ႉမၢၵ်ႇႁိၼ်တိူဝ်ႉၺႃးၼၼ်ႉ တေႇဝတၢတ်ႈၼႆႉ ၽႅၼ်ၵၢၼ်မၼ်းလူႉလႄႈ ၸင်ႇပဵၼ်ၸႂ်ယုင်ႈယင်ႈ ၶီၸႂ်ၶၢၼ်ၸႂ်လူင်လၢင်သေ မိူဝ်းၶိုၼ်းယူႇယဝ်ႉ။ ၽြႃးပဵၼ်ၸဝ်ႈတႄႉ ဢဝ်ၸႂ်ၽဵင်ႇပဵင်း ဢၼ်ပဵၼ်ၸႂ်ဢုပႅၵ်ႉၶႃႇၼၼ်ႉ တူၺ်းတွင်းၸွမ်းတီႈဝေႇတၼႃႇတၢင်းပဵၼ်ၼၼ်ႉယူႇ။ သင်ႇၶႃႇၶဝ်ၸဝ်ႈ ၸင်ႇပၢင်းၽြႃးပဵၼ်ၸဝ်ႈၵႂႃႇတီႈၵျွင်းဢုယိၼ်ႇမၼ်ႇတၵုၼ်ႇꧤိ ၼၼ်ႉယဝ်ႉ။ ဝၢႆးၼၼ်ႉ ၽြႃးပဵၼ်ၸဝ်ႈ ဢွၵ်ႇၸႂ်ၶႂ်ႈယေႃးၶိင်းၵႂႃႇတီႈၵျွင်း သူၼ်ၸီႇဝၵၼႆလႄႈ ၸင်ႇဢွၼ်ၵၼ်ပၢင်းၵႂႃႇတီႈၼၼ်ႈယူႇယဝ်ႉ။

သုၶိၼေႃဝ ၶေမိၼေႃ ႁုၼ်တု၊ သၿ်ၿသတ်တႃ ꧤဝၼ်တု၊ သုၶိတတ်တႃ။
မဵတ်တသုတ်တံ

ၽိုၼ်ဢိင်

ၼႃႈလိၵ်ႈ ႙႙ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)