ပလ်လင်ၵဝိမႃၼဝတ်ထု၊ ၼၢင်းၽီပလၢင်ႇၶိုၵ်ႉ
3-ပလ်လင်ၵဝိမႃၼဝတ်ထု၊ ၼၢင်းၽီပလၢင်ႇၶိုၵ်ႉ
[မႄးထတ်း | မႄးထတ်းငဝ်ႈငႃႇ]- 307။ ၼၢင်းၽီ ဢူမုၼ်ၽုင်းယႂ်ႇ။ ပလၢင်ႇၼွၼ်း ၵႂၢင်ႈယႂ်ႇၶိုၵ်ႉလူင် ဢၼ်ဢဝ်ၵႅဝ်ႈသႅင်ငိုၼ်း ၶမ်း ရတၼႃႇ ႁဵတ်းႁၢင်ႈမွၵ်ႇမႂ် လၢၵ်ႇလၢၵ်ႇလၢႆးလၢႆးဝႆႉၼၼ်ႉ ၼႄဢူငဝ်းၵူႈပိူင်ပိူင်ယူႇယဝ်ႉ။
- 308။ ၼၢင်းၽီဢွၼ်ႇၸိူဝ်းၼႆႉၵေႃႈ ၵႃႈၵေႃႈၵႃႈ ႁွင်ႉၵေႃႈႁွင်ႉၵႂၢမ်းသေ ဢုမ်ႇလွမ်ႉမႂ်းၼၢင်းဝႆႉ တင်းသဵင်ႈယဝ်ႉ။ ၸူမ်းၸူမ်းသိူဝ်းသိူဝ်း တင်းသဵင်ႈယဝ်ႉ။ ၼၢင်းၽီ ဢူမုၼ်ၽုင်းယႂ်ႇ... (မႂ်းၼၢင်းၼႆႉ) ၽုင်းတၼ်းၶူဝ်းၽီ ယႂ်ႇၶိုၵ်ႉ တဵမ်ထူၼ်ႈတႄႉယဝ်ႉ။ မိူဝ်ႈပဵၼ်ၵူၼ်းၼၼ်ႉ လႆႈႁဵတ်းၵုသူဝ်ႇလၢၵ်ႇလၢႆး သင်မႃး။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းၼၢင်းသမ်ႉမီး ဢႃႇၼုၽေႃႇႁိူဝ်ႈႁိူင်းၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်းၵေႃႈ သမ်ႉပေႃး ႁိူဝ်ႈႁိူင်းမၢပ်ႈမိပ်ႈၵႂႃႇ ၵူႈပႃႈၵူႈၽၢႆႇၼေႃး။
- 309။ ၽွင်းမိူဝ်ႈပဵၼ်ၵူၼ်း တမ်ႈတီႈ မိူင်းၵူၼ်းၼၼ်ႉ ၶႃႈၼၢင်းလႆႈပဵၼ် လုၵ်ႈပႂ်ႉ ၸိူဝ်ႉၶိူဝ်း ၽူႈမၢၵ်ႈမီးဢေႃႈ။ ဢမ်ႇမေႃဢွၵ်ႇၸႂ်လမ်တေႃးသၶႃႈ။ ၸွမ်းၵၢင်ၸႂ်ၸဝ်ႈၽူဝ်ၶႃႈဢေႃႈ။ လွင်ႈႁပ်ႉသိၼ် ၵေႃႈ ဢမ်ႇလိုမ်းသေပွၵ်ႈၶႃႈ။
- 310။ ၶႃႈၼၢင်းၼႆႉ မိူဝ်ႈပဵၼ်ၵူၼ်းၼၼ်ႉ ပဵၼ်ၵူၼ်းၵေႃႉလဵၵ်ႉသေတႃႉ ဢမ်ႇမီးၸႂ်ယုတ်ႈမိူၵ်ႈ။ မီးၸႂ်ၽိူၵ်ႇၸိုၼ်ႈၶၢဝ်သႂ်သေ ႁဵတ်းပၼ်ၵေႃႉပဵၼ်ၽူဝ် ႁႂ်ႈႁၢၼ်ႉၸႂ်ယူႇ။ ၵၢင်ဝၼ်းလႄႈသင် ၵၢင်ၶိုၼ်းလႄႈ သင် တိုၼ်းႁဵတ်းပၼ်လွင်ႈႁၢၼ်ႉၸႂ်ပဵင်းၸႂ်ယဝ်ႉ။ ပဵၼ်ၽူႈမီးသိၼ်မၼ်ႈယဝ်ႉ။
- 311။ ငိူင်ႉဝႄႈ လွင်ႈဢဝ်တၢႆ သၢႆၸႂ်ပိူၼ်ႈယဝ်ႉ။ လွင်ႈလၵ်ႉၼၼ်ႉ ဢမ်မီး။ မီးလွင်ႈၵႃႇယၵၢမ်ႇ ၸိုၼ်ႈသႂ်ယဝ်ႉ။ မီးတၢင်းတိုဝ်းၵမ် ၸိုၼ်ႈသႂ်ယဝ်ႉ။ လွင်ႈၵိၼ်လဝ်ႈမဝ်းၵႅပ်ႇ ဢမ်ႇမီးမႃး။ ၶေႃႈၵႂၢမ်း ဢမ်ႇမၢၼ်ႇဢမ်ႇမႅၼ်ႈ ဢမ်ႇလၢတ်ႈ။ တိုဝ်းၵမ်ၽိူမ်ႉထႅမ် သိၼ်ႁႃႈသဵၼ်ႈယဝ်ႉ။
- 312-3။ ၸၢတ်ႈၵွၼ်ႇၼၼ်ႉ ၶႃႈၼၢင်းမီးလွင်ႈၸႂ် ၽိူၵ်ႇၸိုၼ်ႈၶၢဝ်သႂ်သေ မိူဝ်ႈဝၼ်းၽိတ်ႈ လိူၼ်မႂ်ႇသိပ်းသီႇၶမ်ႈ လိူၼ်လပ်းသိပ်းသီႇၶမ်ႈလႄႈသင်၊ ဝၼ်းသိပ်း ႁႃႈၶမ်ႈလႄႈသင်၊ ဝၼ်းပႅတ်ႈၶမ်ႈလႄႈ သင် ဝၼ်းၽိတ်ႈပႅတ်ႇၶမ်ႈလႄႈသင် ဝၼ်းဢွၵ်ႇသိၼ်ၼၼ်ႉလႄႈသင် ၶႃႈၼၢင်းယူႇၸွမ်းသိၼ်ထမ်း သေ ႁၢၼ်ႉၸႂ်ႁၢၼ်ႉၶေႃး တိုဝ်းၵမ်မၼ်ႈပၼ်ႈၵႅၼ်ႇသိၼ်ပႅတ်ႇ ဢၼ်ဢမ်ႇမီးတၢင်းၽိတ်း ဢၼ်ပၼ်လွင်ႈ သိူဝ်းသႃႇသေယဝ်ႉ ၵုင်ႇမုၼ် ဢၼ်တိုဝ်းၵမ်တီႈၼိူဝ်ၸဝ်ႈၽူဝ်ၼၼ်ႉၵေႃႈ တဵမ်ထူၼ်ႈတီႈၶႃႈယဝ်ႉ။ ၸွမ်းၵၢင်ၸႂ် ၵေႃႉပဵၼ်ၽူဝ်ယဝ်ႉ။ ပဵၼ်တပႄး မုၼ်ၶမ်းၽြႃးယဝ်ႉ။
- 314။ မိူဝ်ႈတိုၵ်ႉမီးသၢႆၸႂ် တီႈမိူင်းၵူၼ်းၼၼ်ႉ ၵွပ်ႈပိူဝ်ႈ လႆႈႁဵတ်းၵုသူဝ်ႇၼင်ႇၼႆလႄႈ ၸင်ႇလႆႈ ၽွၼ်းလီလၢၵ်ႇလၢႆးၼင်ႇၼႆယဝ်ႉ။ ဝၢႆးသေ ၶၼ်ႇထႃႇလူႉလႅဝ်ၸိုင် ထႅင်ႈၸၢတ်ႈၼႃႈၼၼ်ႉ လႆႈမီးဢူမုၼ် ၽုင်းတၼ်းၶူဝ်း တဵမ်ထူၼ်ႈသေ လႆႈႁွတ်ႈထိုင် သုၵတိ တီႈလီယဝ်ႉ။
- 315။ မီးလွင်ႈတၢင်းသိူဝ်းလူၼ်းၸႂ် လႆႈယူႇသဝ်း တမ်ႈတီႈ ႁေႃဝိမၢၼ်ႇသေ ၼၢင်းၽီဢွၼ်ႇၶဝ် ဢုမ်ႇလွမ်ႉၶႃႈၼၢင်းဝႆႉယဝ်ႉ။ ၽီၶဝ် ဢဝ်တင်းဢူငဝ်းႁိူဝ်ႈလႅင်းၶဝ် ႁဵတ်းႁႂ်ႈၶႃႈၼၢင်း ၵေႃႉဢႃႇယုယၢဝ်း ဢၼ်ႁွတ်ႈၽႅဝ် တီႈႁေႃဝိမၢၼ်ႇ ႁႂ်ႈမူၼ်ႈသိူဝ်းၸႂ်ယဝ်ႉ။
ပလ်လင်ၵဝိမႃၼဝတ်ထု ႁူဝ်သၢမ် သုတ်းယဝ်ႉ။
ၽိုၼ်ဢိင်
[မႄးထတ်း | မႄးထတ်းငဝ်ႈငႃႇ]- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ပႃရိၸ်ꧡတ်တၵဝၷ်၊ ပလ်လင်ၵဝိမႃၼဝတ်ထု