ပိုၼ်းၽြႃးလင်ႇၵႃႇဢူမ်ဢၢၼ်ႇ

ဝၼ်းၸဝ်ႈဢဝ်သၼ်ႇတေႇ (ဝၼ်းၽတ်း)

ပိုၼ်းၶိူဝ်းၸဝ်ႈပုတ်ႉထႃႇ ၊ ၸူဝ်ႈႁိုင်ၼႃႇတူၼ်လွင်း။
ယူႇသၢင်ႈၸၼ်ႉၶူင်းၽီ ၊ မူၼ်ႈသိူဝ်းလီၵူႈမိူဝ်ႈ။
ၽီသၢင်ႈႁူမ်ႈၵၼ်ၵႂႃႇ ၊ ဝၼ်ႇတၼႃႇပၢင်းလူင်း။
ၸင်ႇၽၢၵ်ႈၸၼ်ႉၶူင်းၼိူဝ် ၊ ႁွတ်ႈႁၢႆးၽိူဝ်ၵပ်ႉပီႇလဝၢတ်ႈ။
သဝ်းလီမုင်ႈသၼ်ႇထေႇ ၊ တမ်ႈလႃႇသေႇဝၼ်းၼူ။
မႅၼ်ႈလိူၼ်ပႅတ်ႇဝၼ်းမူၼ်း ၊ ၽႅၼ်ႇၵုၼ်ၵူၼ်းသၼ်ႇႁွၼ်ႈဝႆႉယဝ်ႉ။

ဝၼ်းၸဝ်ႈၵိူတ်ႇ (ဝၼ်းသုၵ်း)

ၵေႃမုင်ႈဝၢင်ႈလႃႇႁၢင်း ၊ ၸွႆႈသႅင်ၼၢင်းၶႅပ်ႇၸုမ်ႈ။
သိပ်းလိူၼ်ထူၼ်ႈတဵမ်ၵႂႃႇ ၊ မႄႈမႃႇတႃႇယၢၼ်ႁေႃ။
သူႁွတ်ႈတမ်ႈလူင်ပဝ်း ၊ ၸဝ်ႈလွင်းႁဝ်းၽၢၵ်ႈမုင်ႈ။
ပီမိူင်းႁူၵ်းသိပ်းပႅတ်ႇ ၊ ႁုင်ႈသၢႆလႅတ်ႇဝၼ်းပူး။
မိူဝ်ႈလိူၼ်မႅတ်ႈႁူၵ်းမူၼ်း ၊ ၽႅၼ်ႇၵုၼ်ၵူၼ်းသၼ်ႇႁွၼ်ႈ။
ၽီလၢႆတဝ်ႈလူင်းသူႇ ၊ ထၢၼ်ႈပဵၼ်မူႇလုမ်းလႃး။
ၸဝ်ႈယၢင်ႈၵႂႃႇၸဵတ်းတိၼ် ၊ ဢမ်ႇၸပ်းလိၼ်သေယၢင်ႈ။
မူဝ်ၶမ်းၵီႈတုင်းၽႃႇ ၊ ၸဝ်ႈပႆၵႂႃႇၼိူဝ်မူဝ်ၼၼ်ႉယဝ်ႉ။

ဝၼ်းဢွၵ်ႇထိူၼ်ႇ (ဝၼ်းၸၼ်)

လႃႇၽေးၸဝ်ႈသီႇရိမႃႇယႃႇ၊
ပေႃႈၸဝ်ႈၸိုဝ်ႈသုၻ်ႉ​ထေႃးၻၼႃႇႁေႃၶမ်း။
ႁၵ်ႉထူၼ်ႈၼႃႇတွၼ်းၸႂ် ၊ ၵူႈဝၼ်းၼႂ်ႁွပ်ႇဢုမ်ႈ။
သိပ်းႁူၵ်းပီထူၼ်ႈယႂ်ႇ ၊ ပုတ်ႈႁေႃမႂ်ႇၵိၼ်မိူင်း။
ၸၢမ်ႇဝၢင်ႈၸွႆႈတင်းလၢႆး ၊ ၵူႈဝၼ်ႈသၢႆ​ၵျ​ေႃႇထူၼ်ႈ။
ၼၢင်းလူင်ၸိုဝ်ႈယသေႃႇတရႃႇ ၊ လုၵ်ႈၸဝ်ႈၸိုဝ်ႈရႃႇႁုလႃႇၸၢႆးလႅင်။
ႁူမ်ႈမူၼ်ႈသိပ်းသၢမ်ပီ ၊ သိၵ်ႈၵျႃးၽီၸင်ႇတဝ်ႈ။
ၼႄၼိမိတ်ႈသီႇထႃႇ ၊ ၸဝ်ႈလႆႈၵႂႃႇထူပ်းႁၼ်။
ၽူႈထဝ်သၼ်ႇတိၼ်းတိၼ်း ၊ၽူႈပဵၼ်ၵိၼ်းႁဵဝ်ႇႁႅင်ႈ။
ၽူႈတၢႆဝၢႆးၶွႆႈတူႇ ၊ ၸဝ်ႈၽိၵ်ႉၶူႇရႁၢၼ်း။
ဢိမ်ႇၸၢၼ်ႈဝၢင်ႈၸႂ်မႃး ၊ ၸဝ်ႈလွင်းၽြႃးဢွၵ်ႇပၢႆႈ။
ၺႃးဝၼ်ႈသိူဝ်းၸုမ်ႈယႂ်ႇ ၊ လိူၼ်ပႅတ်ႇမႂ်ႇတဵမ်မူၼ်း။
ၸၢႆးသၼ်ႇၼလၵ်းၶွၼ်း ၊ႁွႆႈႁၢင်ၵွၼ်းမႃႉမႅတ်ႈတႄႉယဝ်ႉ။

ဝၼ်းၸဝ်ႈပဵၼ်ၽြႃး (ဝၼ်းပုတ်ႉ)

ဢွၵ်ႇၽၢၵ်ႈမိူဝ်ႈၶိုၼ်းႁူင် ၊ ပူၼ်ႉၽေးသူင်ၵႅတ်ႇၵင်ႈ။
ၵွၼ်းလူင်ၵၼ်ႇတိၵႃႇ ၊ ပုင်ႈဝႅၼ်ၽႃႇပႃးပႆ။
ႁွတ်ႈၼေႃႇမႃႇၵႄးၼွင်း ၊ တႆႇၽိဝ်ၽွင်းလႅၼ်ႈၶၢမ်ႈ။
ထိုင်ၼႂ်းႁူၺ်ႈလူင်ပႃႇ ၊ ၸဝ်ႈၸင်ႇၵႂႃႇၵမ်းထမ်း။
တိတ်ႉထၢၼ်ႇပၢတ်ႇၽူမ်မူၺ်း ၊ သၢင်ႇလူင်ၽူၺ်းၶၢမ်ႇၵၼ်ႈ။
တႂ်ႈတူၼ်းၽေႃးထိၶမ်း ၊ ဢွၵ်ႇၽုတ်းတမ်းပလၢင်ႇ။
ၶုၼ်သူင်ၶွတ်ႇသိုၵ်းတဝ်ႈ ၊ ဢမ်ႇပႄႉၸဝ်ႈၶိုၼ်းၼီ။
လိူၼ်ႁူၵ်းမႂ်ႇမူၼ်းတၢၼ်း ၊ မႅၼ်ႈထို်ဝၼ်းၸၢင်ႉမိၼ်ၼၼ်ႉယဝ်ႉ။

ဝၼ်းၸဝ်ႈႁေႃးထမ်ႇမၸၵျႃႇ (ဝၼ်းသဝ်)

ၸင်ႇဝႃႈဝူင်ႉငဝ်းသႅင် ၊ ၵႄႈတၢင်းၼႅင်ပွႆႇမႆႈ။
ႁူဝ်ပိုင်းမိၵၻႃႇ ၊ တမ်ႈၼႂ်းပႃႇလူင်တိုင်။
ၸဝ်ႈၵႂႃႇၶျွတ်ႈရသေး ၊ ဢၢၼ်ႇတဵမ်ၸေးႁႃႈၸဝ်ႈ။
တင်းလူင်ပၼ်ႇၸဝၢၵ်ႈ ၊ ပူၼ်ႉလွတ်ႈယၢၵ်ႈထိုင်ႁူင်။
ငဝ်ႈတြႃးထမ်ႇမၸၵျႃႇ ၊ မႅၼ်ႈႁူဝ်ဝႃႇလိူၼ်မူၼ်း။
ၸၼေႇမိူဝ်ႈဝၼ်းႁူင် ၊ တင်ႈပွႆးလူင်ဝၢၼ်ႇၶျွတ်ႈ။
ငဝ်ႈၶမ်းႁိူဝ်ႈလူင်ၵႂႃႇ ၊ ထၢင်ႇၸႅင်ႈၼႃႇလႅင်းပိူင်း။
ၽိူၵ်ႇသွမ်ႇလႄႈလႅင်ၶဵဝ် ၊ ဢွၵ်ႇပဵၼ်ပဵဝ်ႇႁူၵ်းယိူင်ႈ။
လႅင်းထိုင်ၾႃႉမိုၼ်ႇမုင်ႈ ၊ ထၢၼ်ႈႁိူဝ်ႈႁုင်ႈသၢင်းဝၢင်း။
ၵႅၼ်ႇၸဝ်ႈၶျွတ်ႈၼႄႁေႃး ၊ ၽုၺ်ႇပၼ်သေႃးၽူဝ်ႇမၢၵ်ႇတႄႉယဝ်ႉ။

ဝၼ်းၸဝ်ႈဢဝ်ပရိၼိပၢၼ်ႇ (ဝၼ်းဢင်းၵၼ်း)

ၸိူဝ်းဢၼ်ၸဝ်ႈထုၵ်ႇၶျွတ်ႈ ၊ ၵႄႈပွႆႇလွတ်ႈထိုင်ၸွမ်။
ပႅမ်ႇမႃႇဢိၵ်ႇၽီၵူၼ်း ၊ ပူၼ်ႉဢုင်ႁူၼ်းသူႇမၢၵ်ႈ။
သီႇသိပ်းပၢႆႁႃႈဝႃႇ ၊ ၸဝ်ႈမဵတ်ႉတႃႇတြႃး။
ၸူဝ်ႈၸဝ်ႈပႅတ်ႇသိပ်းပီ ၊ ဢၢၼ်ႇတဵမ်လီထူၼ်ႈႁွတ်ႈ။
တူၼ်ၶမ်းၶဝ်ႈၼိပ်ႉပူႇ ၊ တမ်ႈလူင်မူႇသူၼ်းပဝ်း။
ပၢၵ်ႇပၢႆသီႇသိပ်းပႅတ်ႇလၵ်းပီ ၊ မႅၼ်ႈဝၼ်းလီသၢင်ႇသီႈ။
လိူၼ်ႁူၵ်းမူၼ်းထူၼ်ႈၵုမ်ႇ ၊ တႂ်ႈပဝ်းၼုမ်ႇသူၼ်ႁွမ်။
ၵုသ်ႉသိင်ႇၼႃႇရုင်ၸိုင်ႈမိူင်းလူင် ၊ ၸဝ်ႈၶုၼ်ႁူင်မၢၼ်ႇလႃႇ။
ယၢမ်းၼၼ်ၸဝ်ႈႁၢၼ်းတႃႇ၊ လွမ်ႉႁွပ်ႈၸဝ်ႈပုတ်ႉထႃႇယမ်ငဝ်းဝႆႉယဝ်ႉ။

ဝၼ်းထၢတ်ႈၽႆးမႆႈ (ဝၼ်းဢႃးတိတ်ႉ)

ၽီၵူၼ်းႁူၼ်ႈဢူၼ်တိုၼ်ႇ ၊ ၵူႈလၢႆမို်ၼ်ႇပဵၼ်ပွႆး။
တဝ်ႈလႆလူႇၽိုၼ်းႁွမ် ၊ ၵူမ်ႈၵွမ်းငွမ်လူႇဝႆႈ။
ၸွမ်းဢဝ်ၸဝ်ႈတိတ်ႉထၢၼ်ႇ ၊ ထၢတ်ႈတူဝ်ၽၢၼ်ႇပဵၼ်ၽႆး။
လုၵ်ႉႁုပ်ႇမႆႈပေႃးၽွင် ၊ ဢွၵ်ႇပဵၼ်ၵွင်ထၢတ်ႈၸဝ်ႈ။
ၽိူၵ်ႇၶၢဝ်သီလိူင်ၵႄႇ ၊ ထူၼ်ႈပႅတ်ႇပႄႇၵွၵ်းတူင်။
မိူဝ်ႈၵႃလူၼ်ႇလိူၼ်ႁူၵ်း ၊ သိပ်းသွင်တူၵ်းဝၢႆႇလွင်ႈ။
တၼ်းၼႆၶႆႈၼႄဢၢၼ်ႇ ၊ ငဝ်းပိုၼ်းပၢၼ်ႇၽြႃးတႄႉယဝ်ႉ။

ၽိုၼ်ဢိင်

ၼႃးလိၵ်ႈ (႙႒) ၊ တြႃးပုတ်ႉထၽႃႇသႃႇ (ၸၼ်ႉငဝ်ႈ) ထၢၼ်ၽွင်းလူင်သႃႇသၼႃႇ၊ ဢိတ်ႇဢွၵ်ႇတီႈ ထၢၼ်ၵူမ်းသႃႇသၼႃႇ ပီ 1999