ပုၵ်ႉၵုသတိ ၸဝ်ႈၸွမ်မိူင်းၵၼ်ႇထႃႇရ

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

ပုၼ်ႈတႃႇႁႂ်ႈတေႇသၼႃႇၽြႃးပဵၼ်ၸဝ်ႈ ၽႅဝ်ၽႄႈတိူၼ်းထိုင်တီႈၵႆၵႆၼၼ်ႉ လွင်ႈႁဵတ်းသၢင်ႈၵူၼ်းၵႃႉၶဝ်ၵေႃႈ ၶဝ်ပႃးတွၼ်ႈဢၼ်လမ်ႇလွင်ႈယူႇ။ သႃႇသၼႃႇၼၼ်ႉ လႆႈပွႆႇရႁၢၼ်း(႖႐) တူၼ်ႁႂ်ႈဢွၵ်ႇၶၢဝ်းတၢင်းၵႂႃႇ၊ ၼႂ်းရႁၢၼ်းၸိူဝ်းၼၼ်ႉ ၶဝ်ႈပႃးၶုၼ်မၢဝ်ႇယသၵေႃႉၼိုင်ႈ။ ၼႂ်းရႁၢၼ်း (႖႐) တူၼ်ၼၼ်ႉ ၶုၼ်မၢဝ်ႇယသလႄႈ ၵမ်ႈပႃႈၼမ် မိူဝ်ႈပႆႇပဵၼ်ရႁၢၼ်းၼၼ်ႉ ပဵၼ်ၵူၼ်းၵႃႉၶၢႆၵွႆးၼင်ႇၵဝ်ႇ။ ၽြႃးပဵၼ်ၸဝ်ႈပူင်ၵႂၢမ်းဝႃႈ "လုၵ်ႈႁၵ်ႉၶဝ်တင်းလၢႆဢိူၺ်း- ပုၼ်ႈတႃႇ ၽွၼ်းလီၵူၼ်းတင်းၼမ် တေလႆႈသိူဝ်းသႃႇၼၼ်ႉ ဢွၵ်ႇႁႃပိုၼ်ၽႄႈထမ်ႇမတႃႉ" ၼႆ။ သင်ႇၶႃႇရႁၢၼ်းၶဝ်ၵေႃႈ ဢမ်ႇမီးၸႂ်ၸႅၵ်ႇၽႄၵိူင်းၵၼသင်သေ ဢွၵ်ႇႁႃပိုၼ်ၽႄႈထမ်ႇမယူႇယဝ်ႉ။

ၵူၼ်းဝၢၼ်ႈဢၼ်မီးႁိမ်းႁွမ်း ဝဵင်းပႃႇရႃႇၼသီႇ တိူင်းၵႃႇသိၼၼ်ႉ လႆႈဢဝ်ၵုၼ်ႇသိၼ်ဢၼ်ဢွၵ်ႇတီႈဝၢၼ်ႈသူၼ်ၶဝ်သေ ၵႂႃႇၶၢႆတေႃႇၵူၼ်းၵႃႉမိူင်းပႃႇရႃႇၼသီႇယဝ်ႉ။ မိုတ်ႈၵိုဝ်းၸမ်ၸႂ်ၵၼ်တင်းၵူၼ်းၵႃႉၶဝ်ဝႆႉယူႇ။ ၶဝ်လႆႈႁူႉငိၼ်းဝႃႈ ယသလႄႈဢူၺ်းလီမၼ်း လုၵ်ႈၵူၼ်းၵႃႉၸိူဝ်းၼၼ်ႉ လႆႈထွမ်ႇငိၼ်းထမ်ႇမၽြႃးသေ ပိုၼ်ႉပွႆႇပႅတ်ႈၵၢၼ်ႈၼႃႈႁိူၼ်းၶဝ်သေ မႃးၼုင်ႈသၢင်ႇၵၢၼ်းၼႆလႄႈ ၶဝ်လႆႈၶဝ်ႈၸႂ် ထမ်ႇမတြႃးၽြႃးပဵၼ်ၸဝ်ႈသေ ဢွၼ်ၵၼ်မႃးႁဵတ်းရႁၢၼ်း၊ ႁဵတ်းၼႆသေ ထမ်ႇမၼႆႉ ၸင်ႇတႄႇၽႄႈတိူၼ်းၵႂႃႇယူႇယဝ်ႉ။

ၽြႃးပဵၼ်ၸဝ်ႈၼႆႉ ႁဵတ်းသၢင်ႈၵၢၼ်လႅၵ်ႈလၢႆႈဢၼ်ယႂ်ႇလူင်ဢၼ်ၼိုင်ႈယူႇယဝ်ႉ။ ၵၢၼ်လႅၵ်ႈလၢႆႈၼၼ်ႉ ပဵꧣ်ၵၢၼ်ဢၼ်ႁႄႉႁၢမ်ႈလွင်ႈၶႃႈတူဝ်ၸႂ်တိရိတ်ႉသၢၼ်ႇၶဝ်သေ ဢဝ်တၢင်ႇၽီလႄႈ လွင်ႈၸႅၵ်ႇၽႄၸၢတ်ႈသုင်တႅမ်ႇ ၸိူဝ်းၼၼ်ႉယူႇယဝ်ႉ။ ပူင်ၵႂၢမ်းဝႃႈ- ပေႃးလပ်းတႃယုမ်ႇလိပ်းယုမ်ႇလႅင်ၼိူဝ်ၽႃႇသႃႇတြႃးၼႆ ၸၢင်ႈလႆႈတၢင်းတုၵ်ႉၶၢၼ်ၸႂ်၊ ဢမ်ႇၸႂ်ႈလွၵ်းလၢႆးဢဝ်ၽဝဢွၵ်ႇပူၼ်ႉလႆႈ ၼႆယူႇယဝ်ႉ။ ဢၼ်ၽြႃးပဵၼ်ၸဝ်ႈႁေႃးၼႄ တႃႇလွတ်ႈဢွၵ်ႇလႆႈသမ်ႇသရႃႇဝူတ်ႈတုၵ်ႉၶၼၼ်ႉ ၵူၼ်းၸိူဝ်းၽူႈမီးပၺ်ႇၺႃႇၶဝ်ၵေႃႈ ယုမ်ႇယမ်ႁပ်ႉတုင်းသေ ဢွၼ်ၵၼ်တိူင်ႇပၢင်ႇဢုပ်ႇၵုမ်ၵၼ်လွင်ႈထမ်ႇမတြႃးမႃးယူႇယဝ်ႉ။

မိူဝ်ႈပၢၼ်ၽြႃးပဵၼ်ၸဝ်ႈၼၼ်ႉ လွင်ႈၵပ်းသိုပ်ႇသဵၼ်ႈတႃႈသၢႆတၢင်းယၢပ်ႇၼႃႇ။ ပုၼ်ႈတႃႇတေလုၵ်ႉမိူင်းၼိုင်ႈ ၵႂႃႇမိူင်းၼိုင်ႈ တီႈၼိုင်ႈလႄႈ တိႈၼိုင်ႈၼၼ်ႉ ၵူၼ်းၵႃႉၶဝ် လႆႈဢဝ်တင်းလေႃႉ မီးပွင်းမုင်း၊ ႁိူဝ်းၸိူဝ်းၼႆႉသေ ၵႂႃႇမႃးယူႇယဝ်ႉ။ မီးပွၵ်ႈၼိုင်ႈ- ၶုၼ်ႁေႃၶမ်းမိူင်းမႃႇၵထ ပိမ်ႇပိသႃႇရၼႆႉ ဢွၵ်ႇၸႂ်ၶႂ်ႈႁဵတ်းဢူၺ်းလီၵပ်းသိုပ်ႇတင်း မိူင်းႁိမ်းႁွမ်းၼႆ။ ႁဵတ်းၼၼ်သေ ၸင်ႇသူင်ႇယိုၼ်ႈလိၵ်ႈၸုမ်ႈထိုင် ၶုၼ်ႁေႃၶမ်းမိူင်းၵၼ်ႇထႃႇရ ပုၵ်ႉၵုသတိ ဢၼ်သဝ်းသၢင်ႈၼင်ႈႁေႃငဝ်ႈဝဵင်းလူင် တၵ်ႉၵသီႇလသေ ႁဵတ်းႁႂ်ႈပဵၼ်ဢူၺ်းလီၵၼ် တင်းမိူင်းမႃႇၵထယူႇယဝ်ႉ။ ၶုၼ်တင်းသွင်ၽၢႆၵေႃႈ ၸင်ႇသူင်ႇယိုၼ်ႈလိၵ်ႈၸုမ်ႈတေႃႇၵၼ်၊ သူင်ႇၶွင်ၽၢၵ်ႇတေႃႇၵၼ်သေ ၵပ်းသိုပ်ႇႁဵတ်းဢူၺ်းလီၵၼ်ယူႇယဝ်ႉ။

မီးပွၵ်ႈၼိုင်ႈ ၶုၼ်ႁေႃၶမ်းပုၵ်ႉၵုသတိၸင်ႇသူင်ႇယိုၼ်ႈၽႃႈမႆတူဝ် ဢၼ်ထိူၵ်ႈၵႃႈၶၼ်ယႂ်ႇၽိုၼ်ၼိုင်ႈၸူးၶုၼ်ႁေႃၶမ်းပိမ်ႇပိသႃႇရယူႇယဝ်ႉ။ ၽႃႈမႆတူဝ်ဢၼ်ၵႃႈၶၼ်ယႂ်ႇလူင်တၢၼ်ႇၼႆႉ ယႃႇဝႃႈၶုၼ်ႁေႃၶမ်း တေႃႈၵူၼ်းမိူင်းမႃႇၵထၶဝ်ယင်းဢမ်ႇယၢမ်ႈႁၼ်သေပွၵ်ႈၵွၼ်ႇယဝ်ႉ။

ၶုၼ်ႁေႃၶမ်းပိမ်ႇပိသႃႇရႃႇၼႆႉ ပေႃးဝႃႈလႆႈႁၼ်ၽႃႈမႆတူဝ်ၼၼ်ႉၵေႃႈ ယိၼ်းၸူမ်းၵႂႃႇၵႅပ်ႉၼိုင်ႈ ၽွင်းၼၼ်ႉၵမ်းလဵဝ် ယိၼ်းပဵꧣ်လွင်ႈၸႂ်ဢမ်ႇသိူဝ်ႇ လွင်ႈတၢင်းမၼ်းတႄႉ "ၵဝ်တေမီးၶူဝ်းဢီႈသင် ႁႂ်ႈပေႃးၵႃႈၶၼ်ၵိုင်ႇတၢၼ်ႇၽႃႈမႆတူဝ်ၼႆႉဢေး" ၼႆသေ လွမ်မႆႈၸႂ်ယူႇ။ ဝူၼ်ႉၼင်ႇၼႆသေ ၼႂ်းၸႂ်ၶုၼ်ႁေႃၶမ်းပိမ်ႇပိသႃႇရၸင်ႇလႆႈတၢင်းၶႆႈၸႂ် ဢၼ်ၼိုင်ႈ။ တၢင်းၶႆႈၸႂ်ဢၼ်ၼၼ်ႉတႄႉ ၶိူင်ႈၶူဝ်းဢၼ်မျၢတ်ႈတွၼ်းတၢင်ႇလိူဝ် ၵုင်ႇမုၼ်ငဝ်းရတၼႃႇသၢမ်ပိူင်ၼၼ်ႉ ဢမ်ႇမီးသင် ၼႆယူႇယဝ်ႉ။

ႁဵတ်းၼၼ်သေ ၶုၼ်ႁေႃၶမ်းပိမ်ႇပိသႃႇရၼႆႉ ဢဝ်ၵုင်ႇၵုၼ်းမုၼ်ငဝ်းပုတ်ႉထ၊ ထမ်ႇမ၊ သင်ႇၶသေ တႅမ်ႈမၢႆသႂ်ႇၼိူဝ်ၶႅပ်းပေႇၶမ်းယဝ်ႉ သူင်ႇယိုၼ်ႈထိုင် ဢူၺ်းလီဢၼ်ပဵၼ် ၶုၼ်ႁေႃၶမ်းပုၵ်ႉၵုသတိယူႇယဝ်ႉ။ ၶုၼ်ႁေႃၶမ်းပုၵ်ႉၵုသတိၼႆႉ ပဵꧣ်ၵူၼ်းထႅမ်သၢင်ႈပႃႇရမီႇမႃးလၢႆလၢႆပၢၼ်သေ ပႃႇရမီႇၵႄႇထူၼ်ႈယဝ်ႉလႄႈ ဝၢႆးသေ လူလိၵ်ႈၸုမ်ႈ ၶုၼ်ႁေႃၶမ်းမိူင်းမႃႇၵထ ပိမ်ႇပိသႃႇရယဝ်ႉၵေႃႈ ယိၼ်းပဵၼ်ၸႂ်ၸူမ်းသိူဝ်းသေ ၸင်ႇပၢဝ်ႇၶၢၼ်ၼင်ႇၼႆယဝ်ႉ။

"ဢူၺ်းလီၵဝ် ၶုၼ်ပိမ်ႇပိသႃႇရၼႆႉ ၵိုင်ႇပဵၼ်ၵူၼ်းမႃးၵေႃႉၼိုင်ႈတႄႉယဝ်ႉ၊ ၵိုင်ႇထိူၵ်ႈလႆႈၸူဝ်ႈပၢၼ်မၼ်းတႄႉ၊ ၵေႃးတမပုတ်ႉထၸဝ်ႈၼႆႉ ၵီႈလွၼ်ႉမႃးၼႂ်းမိူင်းမႃႇၵထယဝ်ႉ၊ ဢူၺ်းလီပိမ်ႇပိသႃႇရၼႆႉ လႆႈလူလွမ်လုမ်းလႃးၸမ် တူဝ်ၽြႃးပဵၼ်ၸဝ်ႈယဝ်ႉ၊ ၵဝ်တႄႉ ၵႆယၢၼ်တင်းၽြႃးပဵၼ်ၸဝ်ႈဝႆႉယူႇ" လႆႈတၢင်းၼႅင်ၸႂ်ယူႇႁဵတ်းၼင်ႇၼၼ်ယဝ်ႉ။

ယူႇၸူဝ်ႈၵႅပ်ႉၼိုင်ႈ၊ ၶုၼ်ႁေႃၶမ်းပုၵ်ႉၵုသတိၼႆႉ ၵူဝ်ႁေၽၽေးသမ်ႇသရႃႇမႃးသေယဝ်ႉ တႅပ်းတတ်းဝႃႈ တေၽႃႈဝၢင်းႁၢင်ႈႁေႃၼႆယဝ်ႉ။ တေဢွၵ်ႇမိူဝ်းၵႂႃႇတၢင်းမိူင်းမႃႇၵထယဝ်ႉ တေမိူဝ်းလူလွမ်လုမ်းလႃးၽြႃးပဵၼ်ၸဝ်ႈ ဝႃႈၼင်ႇၼႆယူႇယဝ်ႉ။ ဝၢႆးၼၼ်ႉ မၼ်းၸဝ်ႈၸင်ႇၽႃႈဝၢင်းႁၢင်ႈႁေႃသေ ထႃႁူဝ်လွမ်ႈ၊ ထႃၼူတ်ႇထႃၵၢင်း၊ ဢဝ်သၢင်ႇၵၢၼ်း၊ သီႇပိတ်ႈ၊ ဢဝ်ၶွၼ်ႉတဝ်ႉသေ ပႆယၢင်ႈမိူဝ်းၸူးမိူင်းမႃႇၵထယူႇယဝ်ႉ။

ၶႆႇသင်ၾၼ်းၶမ်း ပီႈၼွင်ႉၸၢဝ်းတိုၼ်းၶိူဝ်းၶုၼ်ႁေႃၶမ်း ႁၼ်လွင်ႈပိူင်ပဵၼ်ဢၼ်ၼႆႉသေ ယိၼ်းပဵၼ်တၢင်းၶီၸႂ်မႆႈၸႂ်ၵႂႃႇတႄႉတႄႉယဝ်ႉ။ ၶုၼ်ႁေႃၶမ်း ပုၵ်ႉၵုသတိၼႆႉ ႁၵ်ႉသႃၶႃႈဝၢၼ်ႈၵူၼ်းမိူင်းမၼ်း ၼင်ႇလုၵ်ႈဢွၵ်ႇၵၢင်တွင်ႉႁွင်ႈသႆႈမၼ်းၸဝ်ႈယဝ်ႉ။ ၶႃႈဝၢၼ်ႈၵူၼ်းမိူင်းၵေႃႈ ႁၵ်ႉသႃၶုၼ်ႁေႃၶမ်းၶဝ်တႄႉတႄႉလႄႈ ဢွၼ်ၵၼ်ႁႆႈႁႆႈႁွင်ႉႁွင်ႉ၊ ၶႃႈဝၢၼ်ႈၵူၼ်းမိူင်းၸင်ႇဢွၼ်ၵၼ်ၸပ်းၸွမ်းၵႂႃႇ တၢင်းလင်ၶုၼ်ႁေႃၶမ်းၶဝ်ယူႇယဝ်ႉ။

ၶုၼ်ႁေႃၶမ်းၸင်ႇလၢတ်ႈတီႈၶဝ်ဝႃႈ ယႃႇႁႂ်ႈၸွမ်းမႃးၽၢႆႇတၢင်းလင်မၼ်း၊ တေႃႈလဵဝ် ၵဝ်ဢမ်ႇၸႂ်ႈၶုၼ်ႁေႃၶမ်းသူယဝ်ႉ၊ ဢမ်ႇတၢပ်ႈလူဝ်ႇမႃးၸွမ်းလုမ်းလႃးသင်ယဝ်ႉ ၼႆသေတႃႉၵေႃႈ ၶႃႈဝၢၼ်ႈၵူၼ်းမိူင်းဢမ်ႇယွမ်းႁပ်ႉလႃးလႃး၊ ၽိူဝ်ႇၼၼ် ၶုၼ်ႁေႃၶမ်းၸင်ႇတိုတ်ႉၸၼ်ၽႅၼ်ၵၢၼ်ဢၼ်ၼိုင်ႈ၊ ၽႅၼ်ၵၢၼ်ၼၼ်ႉတႄႉ "ပေႃးသူယင်းတိုၵ်ႉမၵ်းမၼ်ႈၵဝ်ပဵၼ်ၶုၼ်ႁေႃၶမ်းသူၼႆၸိုင် တေလႆႈဢွၵ်ႇၶေႃႈပူင်ၼၵ်းဢၼ်ၼိုင်ႈ ဝႃႈၼႆသေ ဢၼ်ၶွၼ်ႉတဝ်ႉမၼ်းၶိတ်ႇၶၼ်ႇႁဵၻ်းမၢႆမႆသဵၼ်ႈၼိုင်ႈ၊ သူယႃႇပေပူၼ်ႉပႅၼ်မၢႆမႆသဵၼ်ႈၼႆႉ၊ သင်ၸိူဝ်ႉဝႃႈ သူပူၼ်ႉပႅၼ်မႃးမႆသဵၼ်ႈၼႆႉၼႆၸိုင် ၵဝ်တေလႆႈပၼ်တၢမ်ႇသူ၊ ယွၼ်ႉသူပၼ်ႉပႅၼ်ၶေႃႈပူင်ၼၵ်းၸဝ်ႈၶုၼ်ႁေႃၶမ်း" ပူင်ၵႂၢမ်းၼင်ႇၼႆယဝ်ႉ။ ႁဵတ်းၼၼ်သေ ၶႃႈဝၢၼ်ႈၵူၼ်းမိူင်းၸိူဝ်းၸွမ်းမႃးၸိူဝ်းၼၼ်ႉ ၸင်ႇဢွၼ်ၵၼ်တူၵ်းၼမ်ႉတႃသေ ဝၢႆပွၵ်ႈမိူဝ်းၶိုၼ်းႁိူၼ်းၶဝ်ယူႇယဝ်ႉ။

ၶုၼ်ႁေႃၶမ်းသိုပ်ႇၶၢဝ်းတၢင်းမႃးၸူးမိူင်းရႃႇၸၵျူဝ်ႇ၊ ၶၢဝ်းတၢင်းရႃႇၸၵျူဝ်ႇလႄႈ ၵၼ်ႇထႃႇရၼႆႉ ၵႆယၢဝ်းသေ ယၢပ်ႇတႄႉတႄႉယဝ်ႉ။ ၶုၼ်ႁေႃၶမ်းၼႆႉ ဢမ်ႇတိုဝ်းၶႅပ်းတိၼ်သေ လတ်းပႆၸွမ်းၶၢဝ်းတၢင်း ဢၼ်ယၢပ်ႇယဵၼ်ၼၼ်ႉယူႇယဝ်ႉ။ ၽႃႇတိၼ်ၸဝ်ႈပေႃးပွင်းလွၵ်ႈလႅင်ဝႆႉၸၢင်းႁၢင်းယဝ်ႉ။ တိူဝ်းၸဵပ်းမႃးသေတႃႉၵေႃႈ သိုပ်ႇၶၢဝ်းတၢင်းမၼ်းၸဝ်ႈယူႇတိၵ်းတိၵ်းယဝ်ႉ။

ႁဵၼ်းၼၼ်သေ သိုပ်ႇၶၢဝ်းတၢင်းမႃးဢမ်ႇလိုဝ်ႈဢမ်ႇသဝ်း၊ ထိုင်ႁူဝ်ၶမ်ႈမႃး ၸင်ႇၽႅဝ်မိူင်းရႃႇၸၵျူဝ်ႇ၊ ၽွင်းမၼ်းၽႅဝ်ၼၼ်ႉ ၽၵ်းတူဝဵင်းရႃႇၸၵျူဝ်ႇပေႃးဢိုတ်းပႅတ်ႈယဝ်ႉ။ မၼ်းၸင်ႇၵႂႃႇယွၼ်းၼွၼ်းႁဵတ်းၶႅၵ်ႇ ႁိူၼ်းၸဝ်ႈမေႃႈလိၼ် ဢၼ်မီးၼွၵ်ႈဝဵင်းၼၼ်ႉ။ ၸဝ်ႈႁိူၼ်းၵေႃႈ ပၼ်ၶႂၢင်ႉမၼ်း။ တေႃႇတတ်းၵၼ်သေ ၽြႃးပဵၼ်ၸဝ်ႈသမ်ႉယေႃးၶိင်းမႃးႁိူၼ်းၸဝ်ႈမေႃႈလိၼ်ၼၼ်ႉၼင်ႇၵဝ်ႇ။ မႃးလိုဝ်သဝ်းတင်းၶုၼ်ႁေႃၶမ်းၼၼ်ႉယူႇယဝ်ႉ။ ႁဵတ်းၼၼ်သေ ႁေႃးၼႄတြႃးတေႇသၼႃႇတေႃႇထိုင်ၶမ်ႈၶိုၼ်းၼၼ်ႉသုတ်းသဵင်ႈယဝ်ႉ။ ပုၵ်ႉၵုသတိၼႆ လႆႈပဵၼ်သေႃးတႃႇပၢၼ်ႇၵႂႃႇ? ၸၢတ်ႈၼႃးမႃးတႄႉ မၼ်းၸဝ်ႈတေလႆႈၸူဝ်ႈပၢၼ်ၽီသၢင်သေ ၽဝၵမ်းလိုၼ်းသုတ်းမႃး တေလႆႈဢွၵ်ႇပူၼ်ႉလွတ်ႈသမ်ႇသရႃႇဝူတ်ႈၶၢၼ်ၸႂ်လူင်သေယဝ်ႉ တေၽႅဝ်တီႈဢရႁတ်ႉတမၢၵ်ႈ၊ ဢရႁတ်ႉတၽူဝ်ႇ တီႈဢၼ်ၸႃႇတိသုတ်းမွတ်ႇၼၼ်ႉယူႇယဝ်ႉ။ ပုၼ်ႈတႃႇတေလႆႈႁဵၻ်းပဵၼ်ရႁၢၼ်း တႃႇသိုပ်ႇပႆၶၢဝ်းတၢင်းထမ်ႇမတြႃးၽြႃးပဵၼ်ၸဝ်ႈၼၼ်ႉ ပေႃးၽႅဝ်ၶၢဝ်းၽုၺ်ႇၽၵ်းတူဝဵင်းၵေႃႈ မၼ်းၸင်ႇၶဝ်ႈၵႂႃႇၼႂ်းဝဵင်းရႃႇၸၵျူဝ်ႇ၊ မိူဝ်ႈၽွင်းၶဝ်ႈမႃးၼႂ်းဝဵင်းၼၼ်ႉ လႆႈထူပ်းၸုၼ်မႅၼ်ႈ လွင်ႈတၢင်းဢမ်ႇထၢင်ႇထိူမ်ႇသေ လႆႈသဵင်ႈၵၢမ်ႇသုတ်းမုၼ်ၵႂႃႇယူႇယဝ်ႉ။

ၶုၼ်ႁေႃၶမ်းပိမ်ႇပိသႃႇရ ယင်းဢမ်ႇတၼ်းလႆႈထူပ်းႁၼ်ဢူၺ်းလီမၼ်းဢၼ်ပဵၼ်ပုၵ်ႉၵုသတိၵွၼ်ႇ။ ၶုၼ်ႁေႃၶမ်းပိမ်ႇပိသႃႇရၼႆႉ ယွၼ်ႉပဵၼ်ဢူၺ်းလီၵၼ် တင်းပုၵ်ႉပုသတိလႄႈ ၸင်ႇၵၢဝ်ႇယွၼ်းဝႃႈ - ႁႂ်ႈဢွၵ်ႇမူၼ်ႉပူၼ်ႉလွတ်ႈသမ်ႇသရႃႇဝူတ်ႈတုၵ်ႉၶလူင်ၼႆသေၵမ်း ၼႆယူႇယဝ်ႉ။


ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

ၼႃႈလိၵ်ႈ ႕႙၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)