ပၢႆးလုၵ်ႉၽိုၼ်ႉ

ဝၼ်းလုၵ်ႉၽိုၼ်ႉ လိူၼ်မေႊ 21 ဝၼ်း လုၵ်ႉတီႈပၢင်လူင်မႃး

ဝၼ်းလုၵ်ႉၽိုၼ်ႉ လိူၼ်မေႊ 21 ဝၼ်းၼႆႉ မၼ်းလုၵ်ႉတီႈ ပၢင်လူင်မႃး။ ၼႂ်းၶေႃႈၵိၼ်ၵႅၼ်ႇပၢင်လူင်ၼႆႉ တႆး လႆႈယွၼ်းသုၼ်ႇလႆႈၽွင်းငမ်းတူဝ်ၵဝ်ႇ တဵမ်ထူၼ်ႈ။ ပေႃးဝႃႈသုၼ်ႇလႆႈၽွင်းငမ်းတူဝ်ၵဝ်ႇ တဵမ်ထူၼ်ႈၼႆ မၢၼ်ႈဢမ်ႇႁဵတ်းပၼ်လႆႈ၊ ပေႃးမၢၼ်ႈဢမ်ႇႁဵတ်းပၼ် လႆႈၵေႃႈ တႆးတိုၼ်းယွၼ်းဝႃႈ ၶႂ်ႈၽၢတ်ႇဢွၵ်ႇ မိူဝ်ႈလႂ်ၵေႃႈ ႁႂ်ႈၽၢတ်ႇဢွၵ်ႇလႆႈ။

Monument PL 001 လၵ်းသဝ်ႁိၼ် တီႈဝဵင်းပၢင်လူင် ၸိုင်ႈတႆးပွတ်းၸၢၼ်း

ပေႃးတႆးယွၼ်းဝႆႉၸိူင်ႉၼၼ်ၵေႃႈ သုၼ်ႇလႆႈၽွင်းငမ်းတူဝ်ၵဝ်ႇၼႆႉ တၢင်းမၢၼ်ႈၶဝ်ၵေႃႈလႆႈပၼ်ၵႂၢမ်း မၼ်ႈၵႅၼ်ႇဝႆႉ ၼႂ်းလိၵ်ႈႁူမ်ႈမၢႆပၢင်လူင်၊ ၵူၺ်းၵႃႈ ပိူဝ်ႈတႃႇၽၢတ်ႇဢွၵ်ႇသမ်ႉ မႃးသႂ်ႇဝႆႉၼႂ်းပိူင်ငဝ်ႈပိုင်းမိူင်း 1947 ၼႂ်းတွၼ်ႈ 201 ၊ မိူင်းတႆးလႄႈမိူင်းယၢင်းလႅင်ၼႆႉ ႁူမ်ႈႁွမ်းၵၼ်တဵမ် 10 ပီယဝ်ႉၵေႃႈ ၽၢတ်ႇဢွၵ်ႇလႆႈ- ဝႃႈဝႆႉၼင်ႇၼႆ။ ႁဵတ်းၼၼ်သေ ထိုင်မႃးပီ 1948 မိူင်းမၢၼ်ႈလႆႈၵွၼ်းၶေႃမႃး။ ပေႃးလႆႈၵွၼ်းၶေႃယဝ်ႉၵေႃႈ ၾၢႆႇတပ်ႉသိုၵ်းမၢၼ်ႈ ႁႃၵူႈလၢႆးလၢႆးသေ ၶဝ်ႈၼႂ်းမိူင်းတႆး၊ ပိူဝ်ႈတႃႇႁုပ်ႈယိုတ်းဢဝ်မိူင်းတႆး။

မိူဝ်ႈဢွၼ်တၢင်း ဢၼ်မၢၼ်ႈၶဝ်ၶဝ်ႈမႃးမိူင်းတႆးၼႆႉ ယွၼ်ႉပိူဝ်ႈယၢင်းလုၵ်ႉၽိုၼ်ႉသေ ၶဝ်ႈမႃး၊ တပ်ႉမၢၼ်ႈၵေႃႈမႃးၸွမ်းယၢင်းသေပၵ်းယူႇဝႆႉ၊ ဢမ်ႇပေႃးၼမ်။ ဝၢႆးၼႆႉမႃး ယၢင်းထွႆဢွၵ်ႇမိူင်းတႆးၵႂႃႇၵေႃႈ တပ်ႉမၢၼ်ႈၵေႃႈၵိုတ်းဝႆႉၽွင်ႈ။ ၵူၺ်းၵႃႈ ၽိူဝ်ႇထိုင်ပီ 1950 ၶႄႇၽိူၵ်ႇ ၵၢၼ်ႉသိုၵ်းတီႈမိူင်းၶႄႇသေ ပၢႆႈၶဝ်ႈမႃးမိူင်းတႆး၊ ပေႃးၶဝ်ႈမႃးယဝ်ႉ ၶႄႇၽိူၵ်ႇသမ်ႉမႃးၵဵပ်းသိုၵ်း၊ မႃးတင်ႈတပ်ႉ ပိူဝ်ႈတႃႇၶဵင်ႇၶိုၼ်းၶႄႇလႅင်။ မၢၼ်ႈၸင်ႇႁႃတိုဝ်ႉတၢင်း ဢိင်ဢၢင်ႈဝႃႈ ပိူဝ်ႈတႃႇတေၵႅတ်ႇၶႄႁႄႉၵင်ႈၸိုင်ႈမိူင်းႁူမ်ႈတုမ်ႁဝ်း၊ ယႃႇႁႂ်ႈတူၵ်းၼႂ်းမိုဝ်းၶႄႇၽိူၵ်ႇၼႆသေ ၶိုၼ်ႈမႃးမိူင်းတႆး။ ပေႃးမႃးယဝ်ႉၵေႃႈ တပ်ႉသိုၵ်းမၢၼ်ႈတိုၼ်း ဢမ်ႇထွၼ်ပွၵ်ႈမိူဝ်းယဝ်ႉ၊ ပေႃးၶဝ်ဢမ်ႇထွၼ်ၵေႃႈ ၶဝ်ၵုမ်းၵမ်ဝႆႉၵၢၼ်ဢုပ်ႇပိူင်ႇၽွင်းငမ်း။

ပေႃးၵုမ်းၵမ်ဝႆႉၵၢၼ်ဢုပ်ႇပိူင်ႇၽွင်းငမ်းၵေႃႈ ပေႉၵိၼ်ၵူၼ်းမိူင်း။ ဢၼ်တပ်ႉသိုၵ်းမၢၼ်ႈပေႉၵိၼ်ၵူၼ်းမိူင်းၼႆႉ ဢမ်ႇၸႂ်ႈပၢၼ်ၼႆႉၵူၺ်း၊ တိုၼ်းတႄႇမႃးၸဵမ်ပၢၼ်မိူဝ်ႈၼၼ်ႉ။ ပၢၼ်မိူဝ်ႈၼၼ်ႉ တၢင်းႁုၵ်းႁၢႆႉသိုၵ်းမၢၼ်ႈၼႆႉ ၵၼ်ႉၸၼ်ၶႃႈတၢႆၼၢႆးၶၢဝ် ၵေႃႈမီး။ ပိူၼ်ႈပေႃးတႅမ်ႈဝႆႉၼႂ်းၽိုၼ်လိၵ်ႈလၢႆးဝႃႈ ၵျပၼ်ႊႁၢႆႉၼႃႇ၊ ၵျပၼ်ႊႁၢႆႉၼႃႇ ယင်းပႆႇပဵင်းၶီႈတိၼ်သိုၵ်းမၢၼ်ႈလူးၵွၼ်ႇ။

ယွၼ်ႉပိူဝ်ႈၼၼ် ၽွင်းၼၼ်ႉ တႆးတင်းၼမ်ၵေႃႈဝႃႈ ႁဝ်းႁူမ်ႈႁွမ်းၵၼ်တဵမ် 10 ယဝ်ႉ၊ ထုၵ်ႇလႆႈ (လူဝ်ႇ) ၽၢတ်ႇဢွၵ်ႇယဝ်ႉယူဝ်ႉ.. ၼႆသေဢွၼ်ၵၼ်ႁဵတ်းပၢင်ၵုမ်။ ၽွင်းၼၼ်ႉ တႆးၵေႃႈမီး 2 ၾၢႆႇ၊ ၵမ်ႈၽွင်ႈဝႃႈလူဝ်ႇလႆႈၽၢတ်ႇဢွၵ်ႇ၊ ၵမ်ႈၽွင်ႈၵေႃႈဝႃႈ ႁဝ်းဢမ်ႇလူဝ်ႇၽၢတ်ႇဢွၵ်ႇ၊ ႁဝ်းလူဝ်ႇလႆႈၶိုၼ်း မူၼ်ႉမႄး ပိူင်ငဝ်ႈပိုင်းမိူင်း 1947 ဢိူဝ်ႈ။ ၵမ်ႈၽွင်ႈၵေႃႈဝႃႈ ၵႂႃႇမူၼ်ႉမႄးၵေႃႈၸၢင်ႈပွင်ႇသင်၊ သုတ်းတီႈသိုၵ်းမၢၼ်ႈၶဝ် ပေႃးမႃးမီးယူႇၼႂ်းႁဝ်းယဝ်ႉလူး၊ ၵွပ်ႈပိူဝ်ႈတႅမ်ႈဝႆႉၼႂ်းလိၵ်ႈလႄႈ ၶဝ်တေထွၼ်ၶိုၼ်း မိူဝ်းမိူင်းၶဝ်ၼၼ်ႉ ၶဝ်တိုၼ်းဢမ်ႇမိူဝ်း- ဝႃႈၼႆၵၼ်။

ႁဵတ်းၼၼ်သေ ၸိူဝ်းဢၼ်ၶႂ်ႈၽၢတ်ႇဢွၵ်ႇၵေႃႈ ၼမ်တႄႉတႄႉ။ ပီ 1956-57 ႁဵတ်းပၢင်ၵုမ်တီႈမိူင်းယႆ။ ပေႃးၸိူင်ႉၼၼ် ထိုင်တီႈၸွမ်ၽွင်းလူင် ဢူးၼု ၵေႃႈၶိုၼ်ႈမႃးတီႈလႃႈသဵဝ်ႈ၊ မၼ်းမႃးလၢတ်ႈၵႂၢမ်းဝႃႈ- မိူင်းဢမႄႊရိၵၼ်ႊႁႅင်းယႂ်ႇၼႂ်းလုမ်ႈၾႃႉၼႆႉ ယွၼ်ႉပိူဝ်ႈၸွမ်ၸိုင်ႈလူင် လိင်ႊၶၼ်ႊ ဢမ်ႇပၼ်မိူင်းပွတ်းၸၢၼ်း ၽၢတ်ႇဢွၵ်ႇ။ မိူင်းပွတ်းၸၢၼ်းၶဝ်ၶႂ်ႈၽၢတ်ႇဢွၵ်ႇလႄႈ မၼ်းဢမ်ႇပၼ်ၽၢတ်ႇဢွၵ်ႇသေ လႆႈတိုၵ်းယိုတ်းၶဝ်သေ ဢဝ်ႁူမ်ႈႁွမ်းမႃး။ ယွၼ်ႉပိူဝ်ႈၼၼ်လႄႈ ၸိုင်ႈမိူင်းဢမႄႊရိၵၼ်ႊၼႆႉ ၸင်ႇပဵၼ်ၸိုင်ႈမိူင်းဢၼ်မီးဢႃႇၼႃႇသုင်သုတ်း ၼႂ်းလုမ်ႈၾႃႉ တေႃႇထိုင်မိူဝ်ႈလဵဝ်။ လွင်ႈၼႆႉ ၵဝ်ၶႃႈၶႂ်ႈႁႂ်ႈၵူၼ်းမိူင်းတႆးသူၸဝ်ႈ ၸိူဝ်းဢၼ်ၶႂ်ႈၽၢတ်ႇဢွၵ်ႇၼႆႉ ႁူႉထိုင်ဢိူဝ်ႈ- ဝႃႈၼႆ။

မၼ်းပွင်ႇဝႃႈ- ပေႃးတႆးသူဢၢၼ်းၽၢတ်ႇဢွၵ်ႇၼႆ မၢၼ်ႈႁဝ်းတိုၼ်းတိုၵ်းမင်ယဝ်ႉ၊ မၼ်းမိူၼ်ၵၼ်တင်း ပိုၼ်ၽၢဝ်ႇသိုၵ်းတေႃႇတႆးၼၼ်ႉယဝ်ႉ။ ပေႃးဝႃႈၸိူင်ႉၼၼ် တႆးတင်းၼမ် ဢမ်ႇၶႂ်ႈယွမ်းယဝ်ႉသေ ၸင်ႇပၼ်ဢဵၼ်ပၼ်ႁႅင်း ၸိူဝ်းဢၼ်ၶႂ်ႈလုၵ်ႉၽိုၼ်ႉ တႄႇလုၵ်ႉၽိုၼ်ႉမႃး မိူဝ်ႈလိူၼ်မေႊ 21 ပီ 1958 ။

မိူဝ်ႈပီၼၼ်ႉ ႁူမ်ႈၵၼ်တင်းမၢၼ်ႈၵေႃႈ လႆႈ 10 ပီယဝ်ႉ၊ ၵူၺ်းၵႃႈ ပိူဝ်ႈတႃႇၽၢတ်ႇဢွၵ်ႇၼႆႉ တိုၼ်းဝႃႈဢမ်ႇဢုပ်ႇလႆႈ၊ ဢုပ်ႇၼႂ်းသၽႃးၵေႃႈဢမ်ႇလႆႈ ၵွပ်ႈဝႃႈတပ်ႉမၢၼ်ႈပႂ်ႉဝႆႉယူႇ။ ၾၢႆႇၼိုင်ႈ ၵူၼ်းမိူင်းတႆးၵေႃႈ ထုၵ်ႇၶီႇၼဵၵ်းတဵၵ်းတဵင်၊ ထုၵ်ႇၵၼ်ႉၸၼ်၊ ထုၵ်ႇၽဝ်ၸိူဝ်းၼႆႉ။ ပေႃးငဝ်းလၢႆးပဵၼ်ယူႇ ၸိူင်ႉၼၼ်ၵေႃ ၵူၼ်းၸၢဝ်းၶိူဝ်းတႆးၼိူဝ် ၸိုဝ်ႈသေႃးၼၼ်ႇတ ၸင်ႇဢွၼ်ႁူဝ်သေ မႃးတီႈမိူင်းၵျွတ်ႈ၊ ၼႂ်းၸႄႈဝဵင်းမိူင်းတူၼ်သေ ၵိၼ်သၸ်ႉၸႃႇတီႈ ၼမ်ႉၵျွတ်ႈ ၵူၼ်း 31 ၵေႃႉ၊ တႅပ်းတတ်းဝႃႈတေဢဝ်ၶိုၼ်းမိူင်း ၵႃႈဢမ်ႇလႆႈဢမ်ႇၸူး။

Sao noi SYT

ၸိုဝ်ႈသေႃးၼၼ်ႇတၼႆႉ ဝၢႆးၼႆႉမႃးႁွင်ႉၽိတ်းပိူင်ႈသေ ပဵၼ်မႃးၸေႃးယၼ်ႇတ။ မိူဝ်ႈၼၼ်ႉ ၸဝ်ႈၾႃႉလူင် ၸဝ်ႈၸၢႆးလူင် တီႈၵဵင်းတုင် သမ်ႉပၼ်ဢၼုၺၢတ်ႈ ႁႂ်ႈမၼ်းၸႂ်ႉၸိုဝ်ႈၼွင်ႉၸၢႆးမၼ်း၊ ၵွပ်ႈၼၼ် ၸင်ႇပဵၼ်မႃးၸဝ်ႈၸၢႆးၼွႆႉ။ လုၵ်ႉတီႈၸဝ်ႈၸၢႆးၼွႆႉသေ ၸိုဝ်ႈပွတ်းမၼ်းပဵၼ်မႃး ၸဝ်ႈၼွႆႉ။ ၸဝ်ႈၼွႆႉၵေႃႈ ဢွၼ်ႁူဝ်သေႁဵတ်းသၢင်ႈမႃး။ ပေႃးႁဵတ်းသၢင်ႈမႃးယဝ်ႉ ၵူႈမူႇၵူႈၸုမ်း ၸင်ႇၶဝ်ႈမႃး၊ ဢမ်ႇဝႃႈၸုမ်းၵဵင်းတုင် ၸုမ်းပွတ်းႁွင်ႇ ၵူႈတီႈတီႈၵေႃႈၶဝ်ႈမႃး။

ၵူၺ်းၵႃႈ တႆးၼႆႉ ပေႃးဝႃႈမႃးယူႇႁူမ်ႈၵၼ်ယဝ်ႉ ပေႃးဢမ်ႇမီးပၵ်းပိူင်၊ ပေႃးဢမ်ႇမီးၽူႈဢွၼ်ႁူဝ် ဢၼ်ၵႅၼ်ႇၶႅင်တႄႉၵေႃႈ ဢမ်ႇႁိုင်ဢမ်ႇၼၢၼ်း မၼ်းၵေႃႈၸၢင်ႈတႅၵ်ႇၵၼ်။ ၵွပ်ႈၼၼ် ၸဝ်ႈၼွႆႉၼႆႉ မိူဝ်ႈမူႇၸုမ်းတိုၵ်ႉလဵၵ်ႉၼၼ်ႉ မၼ်းၸဝ်ႈၵေႃႈတိုၵ်ႉယိပ်းလႆႈယူႇ၊ ဝၢႆးမႃး ၽိူဝ်ႇမူႇၸုမ်းယႂ်ႇမႃးယဝ်ႉ မၼ်းၸဝ်ႈဢမ်ႇယိပ်းလႆႈယဝ်ႉ၊ မူႇၸုမ်းၵေႃႈတႅၵ်ႇပဵၼ်လၢႆမူႇလၢႆၸုမ်း တႄႇဢဝ်မိူဝ်ႈၼၼ်ႉမႃး။

ၵွပ်ႈပိူဝ်ႈၸိူင်ႉၼၼ် မိူဝ်ႈလဵဝ်ၼႆႉၵေႃႈ ဢဵၼ်းဢၢၼ်းလူင်ႁဝ်းၼႆႉ မၼ်းပဵၼ် တႃႇတေတိုၵ်းဢဝ်သုၼ်ႇလႆႈႁဝ်း။ တႃႇတိုၵ်းဢဝ်သုၼ်ႇလႆႈႁဝ်းၼႆႉ ႁဝ်းထုၵ်ႇလႆႈႁူမ်ႈၵၼ်ဢိူဝ်ႈၼႆ လၢႆမူႇလၢႆၸုမ်းၵေႃႈ တိုၵ်ႉၶတ်းၸႂ်ယူႇ။ ၶတ်းၸႂ်ႁဵတ်းလွင်ႈၽွမ်ႉႁူမ်ႈၼႆႉ ဢမ်ႇၸႂ်ႈပၵ်းတႃတူၺ်းတီႈတပ်ႉသိုၵ်းၵူၺ်း၊ တပ်ႉသိုၵ်းၽွမ်ႉႁူမ်ႈၵၼ်ယဝ်ႉ ၾၢႆႇၵၢၼ်မိူင်းသမ်ႉဢမ်ႇၽွမ်ႉႁူမ်ႈၵၼ်။ ၼွၵ်ႈသေၼၼ်ႉ ၾၢႆႇပၢႆးပၺ်ၺႃ၊ ၾၢႆႇပၢႆးသႃသၼႃ၊ ၾၢႆႇပၢႆးၾိင်ႈငႄႈႁိတ်ႈထုင်း၊ ၾၢႆႇလိၵ်ႈလၢႆး၊ ၵူၼ်းလူင်တင်းၵူၼ်းဢွၼ်ႇ၊ ၵူၼ်းၵႄႇတင်းၵူၼ်းၼုမ်ႇ ၸိူဝ်းၼႆႉၵေႃႈ ထုၵ်ႇလႆႈၽွမ်ႉႁူမ်ႈၵူႈၾၢႆႇၾၢႆႇ၊ ၵွပ်ႈဝႃႈ ၼင်ႇႁိုဝ်ပေႃးတေၽွမ်ႉႁူမ်ႈၵူႈၾၢႆႇၼႆႉ မၼ်းပဵၼ်ၵၢၼ်ႁဝ်းႁႃးတင်းသဵင်ႈ။

Noom suek harn ၼုမ်ႇသိုၵ်းႁၢၼ် ပၢၼ်ၸဝ်ႈၼွႆႉဢွၼ်ႁူဝ်

ၵွပ်ႈၼၼ် ဝၼ်းလုၵ်ႉၽိုၼ်ႉ လိူၼ်မေႊ 21 ပီၼႆႉ ႁႂ်ႈၵူၼ်းမိူင်းႁဝ်းၵူႈၾၢႆႇၾၢႆႇၽွမ်ႉႁူမ်ႈၵၼ်သေ ႁႂ်ႈတႅပ်းတတ်းလႆႈၵၢင်ၸႂ်ႁဝ်းတင်းသဵင်ႈ။ ပေႃးဢုပ်ႇၵၢၼ်မိူင်းၵၼ်တင်းမၢၼ်ႈမႃးၼႆႉ ဢၼ်ႁဝ်းၶႂ်ႈလႆႈတင်းသဵင်ႈၼႆႉ ပဵၼ်ဢၼ်ၼႆႉယဝ်ႉၼႆ ႁႂ်ႈပေႃးတုၵ်းယွၼ်းလႆႈ။

ၼင်ႇႁိုဝ်ပေႃးပဵၼ်မႃးၸိူင်ႉၼၼ်ၼႆႉ ႁဝ်းႁႃးတင်းသဵင်ႈ ထုၵ်ႇလႆႈတိုဝ်းၵမ်ႁဵတ်းၸွမ်း ၵႂၢမ်းသွၼ်ပုတ်ႉထ/ ၽြႃးပဵၼ်ၸဝ်ႈ 7 ၶေႃႈ (ဢပရိႁႃၼိယထမ်မ 7)။ 1.တေလႆႈၵုမ်ၵၼ်တႃႇသေႇ။ 2.ဢုပ်ႇၵုမ်ၵၼ်သေ ႁူမ်ႈၵၼ်တႅပ်းတတ်း။ 3.ႁဵတ်းၸွမ်းၶေႃႈတႅပ်းတတ်း၊ ႁဵတ်းၸွမ်းပၵ်းပိူင်။ 4.ၼပ်ႉထိုဝ်ၵူၼ်းထဝ်ႈၵူၼ်းၵႄႇ ၽူႈယႂ်ႇၵူၼ်းလူင်ၵဝ်ႇႁဝ်း ၸိူဝ်းထုၵ်ႇလီ ယုမ်ႇယမ်ၼပ်ႉထိုဝ်။ 5.ဢမ်ႇမီးလွင်ႈလူလၢႆလုၵ်ႈယိင်း ၼၢင်းသၢဝ်ပိူၼ်ႈ။ 6.မီးလွင်ႈႁၵ်ႉသႃပႂ်ႉပႃး လုမ်းလႃးၶူဝ်းၵဝ်ႇၶွင်မွၼ်၊ ႁၵ်ႉသႃဝႆႉၾိင်ႈထုင်းႁိတ်ႈႁွႆး (မိူၼ်ၼင်ႇၼပ်ႉထိုဝ် ၸဝ်ႈဝၢၼ်ႈၸဝ်ႈမိူင်း၊ ၸဝ်ႈႁိူၼ်းၸဝ်ႈယေး)၊ ႁဵတ်းၸွမ်းပိူင် ယူႇမိူင်းလႂ် ဢဝ်မႆႉမိူင်းၼၼ်ႉႁဵတ်းတွၵ်ႇ ဢဝ်မွၵ်ႇမိူင်းၼၼ်ႉပၵ်း။ 7.ပုၵ်ႉၵလၸိူဝ်းမီးသိလ်ထမ်း၊ မီးပႁုသုတ၊ မီးတၢင်းႁူႉၼမ်တၢင်းႁၼ်ၵႂၢင်ႈၼၼ်ႉ ထုၵ်ႇလီၼပ်ႉထိုဝ်ၶဝ်ၸဝ်ႈလႄႈ ႁႂ်ႈၶဝ်ၸဝ်ႈပဵၼ်တီႈၼပ်ႉထိုဝ်ႁဝ်း၊ ပဵၼ်တီႈၵိူဝ်းၵုမ် သင်ႇသွၼ်ႁဝ်း ၸိူဝ်းၼႆႉ။

သင်ၸိူဝ်ႉဝႃႈ ႁဝ်းႁဵတ်းၸွမ်းထမ်းၽွမ်ႉႁူမ်ႈ 7 ပိူင်ၼႆႉယူႇၸိုင် မီးတၢင်းၶိုၼ်ႈယႂ်ႇမႂ်ႇသုင်ၵူၺ်း၊ ဢမ်ႇမီးတၢင်းတူၵ်းတႅမ်ႇ။ ၼႃႈၵၢၼ်ႁဝ်းၵေႃႈ မီးလွင်ႈၶိုၼ်ႈယႂ်ႇမႂ်ႇသုင်၊ မီးလွင်ႈလီသေဢွၼ် တွၼ်းသေၵဝ်ႇၵူၺ်း၊ တိုၼ်းဢမ်ႇမီးလွင်ႈယူပ်ႈယွမ်း။ ပုတ်ႉထ/ၽြႃးပဵၼ်ၸဝ်ႈ ၵေႃးတမ သင်ႇသွၼ်ဝႆႉၼင်ႇၼႆ။

မိူဝ်ႈပၢၼ်ပုတ်ႉထ / ၽြႃးပဵၼ်ၸဝ်ႈၼၼ်ႉ ၵူၼ်းမိူင်းဝေသႃလီၶဝ် ႁဵတ်းၸွမ်းၵႂၢမ်းသင်ႇသွၼ် ပုတ်ႉထၸဝ်ႈ 7 ၶေႃႈၼႆႉသေ ၸဝ်ႈႁေႃၶမ်းဢၸႃတသၢတ်ႈ ၵႂႃႇတိုၵ်းၶဝ်ပဵၼ်လၢႆလၢႆပွၵ်ႈၵေႃႈ တိုၼ်းဢမ်ႇဢွင်ႇပေႉလႆႈ။ ၵူၺ်းၵႃႈ ဝၢႆးသေၶဝ်ၽိတ်းၵၼ်၊ ဢမ်ႇၵုမ်ၵၼ်မိူၼ်ၵဝ်ႇ၊ ဢမ်ႇမီးၶေႃႈတႅပ်းတတ်းသေ ႁဵတ်းၸွမ်းၶေႃႈတႅပ်းတတ်းမိူၼ်ၵဝ်ႇယဝ်ႉ မိူဝ်ႈၼၼ်ႉ ၶဝ်ၵေႃႈလႆႈထုၵ်ႇ ၸဝ်ႈဢၸႃတသၢတ်ႈ ၶဝ်ႈတိုၵ်းသေလူမ်ႉၵွႆၵႂႃႇ။

ၵွပ်ႈၼၼ် ၸိူဝ်ႉၶိူဝ်းတႆးႁဝ်းတင်းသဵင်ႈၵေႃႈ ထုၵ်ႇလီတိုဝ်းၵမ်ႁဵတ်းၸွမ်း ထမ်းပုတ်ႉထၸဝ်ႈ 7 ၶေႃႈၼႆႉ၊ ပေႃးၼၼ်ၸင်ႇ ၵၢၼ်ငၢၼ်းသင်ၵေႃႈ တိုၼ်းမီးလွင်ႈၶိုၼ်ႈယႂ်ႇမႂ်ႇသုင်၊ ဢမ်ႇမီးလွင်ႈယူပ်ႈယွမ်း။ ၵၢၼ်ၽွမ်ႉႁူမ်ႈႁဝ်းၵေႃႈ ၸင်ႇတေပဵၼ်ၵၢၼ်ယဝ်ႉတူဝ်ႈလႆႈ၊ ထိုင်တီႈယိူင်းမၢႆသုင်သုတ်းႁဝ်းလႆႈ။

ၽိုၼ်ဢိင်-