လိၵ်ႈၸဝ်ႈႁေႃၶမ်းထႆး ပၼ်ထိုင် လုၵ်ႈယိင်းၸဝ်ႈ

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

လုၵ်ႈယိင်းပေႃႈဢိူၺ်... တီႈၼႂ်းၵမ်ႇၽႃႇၼႆႉ လွင်ႈလႂ်သေဢမ်ႇဝႃႈ ဢိုၵ်းတိုၵ်းဢိုင်ႇတိုင်ႇ မၼ်းတိုၼ်းၵိုင်ႇၵၼ်မႃး ဢိုင်ႇတိုင်ႇဢိုၵ်းတိုၵ်း မၼ်းတိုၼ်းၵိုၵ်းၵၼ်ဝႆႉယူႇ။ လပ်းသိင်ႇ လႄႈ လႅင်းႁိူဝ်ႈ၊ ဝႃႈငၢႆႈ လႄႈ ဝႃႈယၢပ်ႇၸိူဝ်းၼႆႉယဝ်ႉ။ ပေႃးဝႃႈ တေလႆႈလိူၵ်ႈ ဢၼ်ၸဝ်ႈၵဝ်ႇ လႆႈၸႂ် ၼၼ်ႉၼႆၸိုင် ၵူၼ်းႁဝ်း ၽႂ်ၽႂ်ၵေႃႈ တေႃႈတေ လႆႈၸႂ် လႅင်းႁိူဝ်ႈယူႇ။ ၵူၺ်းၵႃႈ ဢၼ်ၸဝ်ႈၵဝ်ႇ လႆႈၸႂ်ၼၼ်ႉ ၶႂ်ႈလႆႈ ၸင်ႇၸၢင်ႈလႆႈဢိူဝ်ႈ။


တႃႇတေ ႁွတ်ႈထိုင်လႆႈ တီႈလႅင်းႁိူဝ်ႈ ဢမ်ႇၼၼ် ဢွင်ႈတီႈလီၼၼ်ႉ မၼ်းမီး လွၵ်းလၢႆးမၼ်းယဝ်ႉ။ လၢႆးဢၼ်ၼၼ်ႉတႄႉ ပဵၼ်လၢႆးႁၵ်ႉပႅင်း ပိူၼ်ႈ ၼၼ်ႉၵူၺ်း။ ၵွပ်ႈသင် ပေႃးၼႆၸိုင် ပေႃးလႆႈ တၢင်းႁၵ်ႉပႅင်း တီႈပိူၼ်ႈၸိုင် တေၵႄႈလိတ်ႈလႆႈ ပျသၼႃႇတင်းသဵင်ႈယူႇ။ တီႈၼႂ်းၵမ်ႇၽႃႇၼႆႉ သင်ဝႃႈ ၶႂ်ႈႁႂ်ႈမီး လွင်ႈသိူဝ်းသႃႇၵူၺ်း ၶႂ်ႈႁႂ်ႈမီး လွင်ႈငမ်းယဵၼ်ၵူၺ်း ၼႆၸိုင် လူဝ်ႇလႆႈ လွင်ႈတၢင်းႁၵ်ႉ တီႈၵူၼ်းၼၼ်ႉ ၸင်ႇတေပဵၼ်ယဝ်ႉ။


ပေႃႈ ၶႂ်ႈလၢတ်ႈၼႄလုၵ်ႈယိင်းဢိူဝ်ႈ...


1။ ဢတိတ်ႈမိူဝ်ႈပူၼ်ႉမႃးၼၼ်ႉသေဢမ်ႇဝႃႈ၊ ပတ်ႉၸုပ်ႉပၢၼ်ႇ မိူဝ်ႈလဵဝ်သေဢမ်ႇဝႃႈ၊ ဢၼႃၵတ်ႈ မိူဝ်းၼႃႈသေဢမ်ႇဝႃႈ တမ်ႈတီႈ ၼိူဝ်ၵူၼ်းတၢင်ႇၵေႃႉ ၸိူဝ်းၼၼ်ႉ တေလႆႈဝႆႉၸႂ်ဝႃႈ ၶဝ်ၵိူတ်ႇမႃး ႁူမ်ႈလူၺ်ႈ ၵဝ်၊ ၶဝ်ထဝ်ႈၵႂႃႇ ႁူမ်ႈလူၺ်ႈၵဝ်၊ ၶဝ်တေႃႈတေ တၢႆ ႁူမ်ႈလူၺ်ႈၵဝ်ၵူၺ်း ၼႆယူႇ။


2။ တူၺ်းႁၼ်လီ တီႈၼိူဝ်လေႃးၵတ။ ႁႂ်ႈႁၼ် လီလိူဝ်သေၼၼ်ႉၵွၼ်ႇတ။ တႃႇတေၵႄႈလိတ်ႈလႆႈ ပျသၼႃႇ တူၵ်းထုၵ်ႇမၢၼ်ႇမႅၼ်ႈၼၼ်ႉ ဢဝ်တၢင်းႁၼ်ထိုင် မၢၼ်ႇမႅၼ်ႈသေ တူၺ်းႁၼ်ထိုင် လေႃးၵတ။


3။ ၶတ်းၸႂ် ႁႂ်ႈမေႃယူႇသဝ်း ၼိမ်မၼ်ႈႁင်းၶေႃတ။ ၶႂ်ႈဝႃႈတႄႉၵေႃႈ ၸႂ်ၼႆႉ တေလႆႈဢိင်ပိုင်ႈ ပိုၼ်ႉထၢၼ် ဢၼ်ႁၢၼ်ႉၸႂ်ငၢႆႈ၊ မီးၵႃႈႁိုဝ် လႆႈမႃး တၢၼ်ႇႁိုဝ်ၵေႃႈ ႁၢၼ်ႉၸႂ်ၸွမ်း၊ ယႃႇပေ ႁႂ်ႈမီးၸႂ်ၸပ်းပႅၼ်း၊ မီးၵေႃႈလီ ဢမ်ႇမီးၵေႃႈ ဢမ်ႇၶီ တေလႆႈဝႆႉၸႂ် ၼင်ႇၼႆယဝ်ႉ။ တေလႆႈမေႃႁၢၼ်ႉၸႂ်ၸွမ်း သၢႆငၢႆၸဝ်ႈၵဝ်ႇ ဢၼ်ပဵၼ်ဝႆႉ မီးဝႆႉၼၼ်ႉယူႇ။


ၵွပ်ႈပိူဝ်ႈ လေႃးၽယႂ်ႇၼႃႇသေ ယႃႇပေႁႂ်ႈလႆႈ တုၵ်ႉၶ ၸိူင်ႉၼင်ႇ ဢိုင်းဢၢင်ႈၼၼ်ႉသေၵမ်း။ “ပွၵ်ႈၼိုင်ႈ ဢိုင်းဢၢင်ႈမႄႈလုၵ်ႈ လႆႈၵႂႃႇထူပ်းႁၼ် ဝူဝ်းတူဝ်ၼိုင်ႈ... ဢိုင်းဢၢင်ႈဢွၼ်ႇၼၼ်ႉဝႃႈ "ဝူဝ်းၼႆႉ တူဝ်ယႂ်ႇၵျၼေႃ မႄႈမႄ" ၼႆသေ ယွင်ႈယေႃး ဝူဝ်းယႂ်ႇၼၼ်ႉယဝ်ႉ။ ဢိုင်းဢၢင်ႈမႄႈလူင်ၼၼ်ႉၵေႃႈ ဢမ်ႇၶႂ်ႈၶၢမ်ႇသေ ၶိုၼ်းဝႃႈ "ၵဝ်ၵေႃႈ မေႃႁဵတ်းႁႂ်ႈ တူဝ်ၵဝ် ယႂ်ႇယူႇ" ၼႆသေ ဢဝ်တူဝ်မၼ်း ယႂ်ႇတိုင်ႇမႃးယဝ်ႉ။ မၼ်းလၢတ်ႈဝႃႈ "ယႂ်ႇတၢၼ်ႇၼႆႉ ယႂ်ႇတၢၼ်ႇၼႆ" ၼႆသေ ၵမ်းလိုၼ်း ၸူးဢဝ်ပုမ်မၼ်း တႅၵ်ႇတၢႆပႅတ်ႈ။

  • ၵၢၼ်ၼႆႉ ပႄႉလႆႈ တၢၼ်ႇႁိုဝ်ၵေႃႈ ႁၢပ်ႇ တၢၼ်ႇၼၼ်ႉၵူၺ်းတ၊ ယႃႇပေႁၢပ်ႇ ၵၢၼ်ဢၼ် ဢမ်ႇပႄႉလႆႈၼၼ်ႉ။
  • ႁဵတ်းၵၢၼ် ႁႃလဵင်ႉတွင်ႉ ဢၼ်ၵိုင်ႇငၢမ်ႇ သၢႆငၢႆၸဝ်ႈၵဝ်ႇၼၼ်ႉတ။


4။ ဝႆႉၸႂ် ႁႂ်ႈၼိမ်မၼ်ႈတ။ ႁႂ်ႈမေႃႁၼ် တၢမ်ႇ တၢင်းၽိတ်း လႄႈ ႁႂ်ႈမေႃႁၼ် သူးလၢပ်ႈ တၢင်းၶတ်းၸႂ်တ။ သင်ဝႃႈ လႆႈထူပ်းၺႃး ဢၼ်ဢမ်ႇမုင်ႈမွင်း ဝႆႉၼၼ်ႉၸိုင် ယႃႇပေၵုမ်ႇမိုင်ႉ ၶီငဝ်ၶေႃးၶူမ်ယူႇ။ ၶုၵ်းၸႂ်လႆႈ လေႃးၵထမ်ႇ ၸိူဝ်းပဵၼ် လၢပ်ႈယႂ်ႇလႄႈ ၵႅၼ်၊ ဢလုမ်းဢလၢင်း ၼမ်လႄႈ ဢေႇ၊ ပိူၼ်ႈယွင်ႈယေႃးလႄႈ ပိူၼ်ႈသႄႉၼႄး၊ လွင်ႈတုၵ်ႉၶလႄႈ လွင်ႈသိူဝ်းသႃႇၸိူဝ်းၼၼ်ႉသေ ဝႆႉၸႂ်ဝႃႈ တိူင်းမၼ်းလႃႈ ၼႆတ။


ၸဝ်ႈပေႃႈ ႁေႃၶမ်း

2004 လိူၼ်ဢွၵ်ႇထူဝ်ႇပိူဝ်ႇ 16 ဝၼ်း။

ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

  • A Letter from King Bhumibol Adulyadej to His Daughter
  • ၸဵင်ၶမ်းလႅင်း မၢႆ (24)၊ လိၵ်ႈၸဝ်ႈႁေႃၶမ်းထႆး ပၼ်ထိုင် လုၵ်ႈယိင်းၸဝ်ႈ၊ ၸဝ်ႈသုၶမ်း (တၢင်ႉယၢၼ်း)၊ ၼႃႈလိၵ်ႈ ( )၊ ပီ 2017