လူလွမ်လုမ်းလႃး ၽူႈၵေႃႉဢၼ်ဢမ်ႇယူႇလီ

မီးပွၵ်ႈၼိုင်ႈ ရႁၢၼ်းၸဝ်ႈၼိုင်ႈဢမ်ႇယူႇလီ ပဵၼ်ၵိၼ်းဝႆႉ။ ဢမ်ႇမီးႁႅင်းသေ ၼွၼ်းဢိူၵ်ႇယူႇၼႂ်းၽၢႆႈဢွၼ်ႇၽၢႆႈလူင်ၸဝ်ႈၵဝ်ႇဝႆႉ။ ၽွင်းယၢမ်းၼၼ် ၽြႃးပဵၼ်ၸဝ်ႈ တင်းၸဝ်ႈဢႃႇၼၼ်ႇတႃႇ လႄႇလဵပ်ႈတူၺ်းၼႂ်းဝၢင်းၵျွင်း။ ၽွင်းမိူဝ်ႈၽြႃးပဵၼ်ၸဝ်ႈ ၽႅဝ်ၵႂႃႇတီႈၸဝ်ႈသင်ႇၶႃႇၶဝ်ယူႇသဝ်းၼၼ်ႉ လႆႈၵႂႃႇႁၼ်မႅၼ်ႈရႁၢၼ်း ၸဝ်ႈဢၼ်ၼွၼ်းယူႇၼႂ်းၽၢႆႈၸဝ်ႈၵဝ်ႇၼၼ်ႉယဝ်ႉ။ ၸင်ႇၵႂႃႇၸူးႁိမ်းၸမ်သေ-
"ၸဝ်ႈလႆႈၶၢမ်ႇဝေႇတၼႃႇတၢင်းပဵၼ်ဢီႈသင်ႇလႃႇ"
"ၽြႃးပဵၼ်ၸဝ်ႈႁဝ်းတီႈၶႃႈ၊ တွင်ႉၶႃႈႁဝ်းၼႆႉ ဢမ်ႇလီၶႃႈ"
"ၸဝ်ႈဢမ်ႇမီးၵူၼ်းလုမ်းလႃးႁႃႉ"
"ဢမ်ႇမီးတီႈၶႃႈ"
"ရႁၢၼ်းၶဝ်တၢင်ႇၸဝ်ႈလူး ဢမ်ႇလုမ်းလႃးၸဝ်ႈႁႃႉ"
"ၽြႃးပဵၼ်ၸဝ်ႈတီႈၶႃႈ၊ ၶႃႈၶဝ်ၵေႃႈ ဢမ်ႇယၢမ်ႈတွၼ်ႉလုမ်းလႃးၽႂ်မႃးလႄႈ ၽႂ်ၵေႃႈ ဢမ်ႇလုမ်းလႃးၶႃႈၶဝ်ဢေႃႈ"

ယၢမ်းၼၼ် ၽြႃးပဵၼ်ၸဝ်ႈ ၸင်ႇဝႃႈတီႈၸဝ်ႈဢႃႇၼၼ်ႇတႃႇ "ဢႃႇၼၼ်ႇတႃႇ ၵႂႃႇတဵၵ်းၼမ်ႉမႃးလူး ႁႃးဢၢပ်ႇပၼ်ၼမ်ႉရႁၢၼ်းၼႆႉ" ပူင်လၢတ်ႈၼင်ႇၼႆယူႇယဝ်ႉ။

ၽြႃးပဵၼ်ၸဝ်ႈၼႆႉ ဢဝ်ၼမ်ႉတွင်ႈပၼ်ၸွမ်းတူဝ်ရႁၢၼ်း ဢၼ်ဢမ်ႇယူႇလီၼၼ်ႉသေ ၸဝ်ႈဢႃႇၼၼ်ႇတႃႇသမ်ႉ သုၵ်ႈသီပၼ် ႁႂ်ႈပေႃးမူတ်းသႂ်ယူႇယဝ်ႉ။ ဝၢႆးၼၼ်ႉ ၽြႃးပဵၼ်ၸဝ်ႈလႄႈ ၸဝ်ႈဢႃႇၼၼ်ႇတႃႇ ၶႃသွင်ၸဝ်ႈ ၸင်ႇယုၵ်ႉဢဝ်ၸဝ်ႈရႁၢၼ်းၼၼ်ႉ ၵႂႃႇတၢင်ႇဝႆႉပၼ်ၼိူဝ်ၵူႇၼွၼ်း။

ႁဵတ်းၼၼ်ယဝ်ႉ ၽြႃးပဵၼ်ၸဝ်ႈၸင်ႇႁႂ်ႈသင်ႇၶႃႇၶဝ်တုမ်ၵၼ်သေ ၽြႃးပဵၼ်ၸဝ်ႈၸင်ႇထၢမ်ဝႃႈ-
"ၸဝ်ႈရႁၢၼ်းၶဝ်၊ ၼႂ်းၵယွင်းၼႆႉ ၸွင်ႇမီးၸဝ်ႈရႁၢၼ်းဢၼ်ဢမ်ႇယူႇလီႁႃႉ"
"မီးၶႃႈဢေႃႈၸဝ်ႈႁဝ်း"
"ရႁၢၼ်းၶဝ် မၼ်းၸဝ်ႈပဵၼ်တၢင်းပဵၼ်ဝေႇတၼႃႇသင်"
"ၽြႃးပဵၼ်ၸဝ်ႈတီႈၶႃႈ - ရႁၢၼ်းၼၼ်ႉ မၼ်းပဵၼ်တၢင်းပဵၼ်တွင်ႉဝႆႉၶႃႈဢေႃႈ"
"ၸွင်ႇမီးၵူၼ်းလုမ်းလႃးပၼ်မၼ်းၸဝ်ႈႁိုဝ်"
"ဢမ်ႇမီးၶႃႈၸဝ်ႈ"
"ရႁၢၼ်းၶဝ်၊ ႁဵတ်းသင်လႄႈ သူဢမ်ႇလုမ်းလႃးမၼ်းၸဝ်ႈလႃႇ"
"ၽြႃးပဵၼ်ၸဝ်ႈတီႈၶႃႈ၊ မၼ်းၸဝ်ႈၼႆႉ တိုၼ်းဢမ်ႇလုမ်းလႃးပႂ်ႉမႃးၽူႈလႂ်ၶႃႈ၊ ၵွပ်ႈၼၼ်လႄႈ ၽႂ်ၵေႃႈ ဢမ်ႇလုမ်းလႃးပႂ်ႉပႃးမၼ်းၸဝ်ႈတီႈၶႃႈဢေႃႈ"
"ရႁၢၼ်းၶဝ်ဢိူၺ်း၊ သူၶဝ်ၼႆ့ ဢမ်ႇမီးပေႃႈမႄႈ ဢၼတေမႃးလုမ်းလႃးပၼ်သူ၊ ပေႃးသူၶဝ်ၼင်ႇၵၼ် ဢမ်ႇၶိုၼ်းလုမ်းလႃးၵၼ် ၽႂ်သမ်ႉတေၶိုၼ်းမႃးလုမ်းလႃးသူလႃႇ၊ ရႁၢၼ်းဢၼ်ဢမ်ႇယူႇလီၼၼ်ႉ ပဵၼ်သြႃႇသူၵေႃႈလီ၊ လုၵ်ႈၼွင်ႉသူၵေႃႈလီ၊ သင်ဝႃႈယူႇၸွမ်းသူယူႇၼႆ သူၶဝ်တေလႆႈလုမ်းလႃးပႂ်ႉပႃးတေႃႇမၼ်းပေႃးၸိုၼ်ႈၶႅၼ်းဢိူဝ်ႈ၊ သင်ဝႃႈဢမ်ႇလုမ်းလႃးရႁၢၼ်း ဢၼ်ဢမ်ႇယူႇလီ ဢမ်ႇလူလွမ်ပႂ်ႉပႃးၼႆၸိုင် မိူၼ်သူပူၼ်ႉပႅၼ်မႅၼ်ႈတၢမ်ႇၼၵ်းလူင်ယဝ်ႉ"။

"ရႁၢၼ်းၶဝ်ဢိူၺ်း၊ ၽူႈၵေႃႉလႂ် ထိူၵ်ႈပဵၼ်မေႃလုမ်းလႃးပေႃးၼႆၸိုင်-"
ပေႃးမီးၼမ်ႉၵတ်ႉ (႕) ပိူင်ၼင်ႇပႃႈတႂ်ႈၼႆႉ တဵမ်ထူၼ်ႈၸိုင် ထုၵ်ႇလီပဵၼ်မေႃလုမ်းပၼ်ရႁၢၼ်း ၸိူဝ်းဢမ်ႇယူႇလီယဝ်ႉ။
႑။ တေလႆႈႁူႉၸၵ်းယႃႈယႃလီလီ။
႒။ တေလႆႈႁူႉဝႃႈ ယႃႈယႃထုၵ်ႇလီပၼ်၊ ဢမ်ႇထုၵ်ႇလီပၼ်။ ဢၼ်ထုၵ်ႇၼၼ်ႉ ပၼ်သေ၊ ဢၼ်ဢမ်ႇထုၵ်ႇၼၼ်ႉ ယႃႇပေပၼ်။
႓။ ဢမ်ႇမၢင်ႇၽွၼ်းလီသင်သေ တေလႆႈလူလွမ်လုမ်းလႃး ၵေႃႉဢၼ်ဢမ်ႇယူႇလီၼၼ်ႉ။
႔။ တေဢမ်ႇလႆႈလီႁင်ႈ (ယင်ႈ)သေ တေလႆႈလၢင်ႉထွၵ်ႇၽၢႆႈလူင်၊ ၽၢႆႈဢွၼ်ႇ၊ ၶီႈၶၢၵ်ႇၶီႈတိူဝ်ႇ၊ ႁၢၵ်ႈၸိူဝ်းၼၼ်ႉ။
႕။ ပေႃးၽႅဝ်ၶၢဝ်းယၢမ်းဢၼ်သၢင်ႇတေႃႇ တေလႆႈလၢတ်ႈၼႄထမ်ႇမတြႃး၊ တေလႆႈပၼ်ႁႅင်းၵူၼ်းပဵၼ် ယႃႇႁႂ်ႈလႆႈၸႂ်တူၵ်းသေ တေလႆႈၶိုင်သၢင်ႈပၼ် ႁႂ်ႈၶဝ်ပေႃးဢဝ်ဢႃႇရုမ်ႇပၵ်းသႂ်ႇၼိူဝ် ထမ်ႇမတြႃးဢိူဝ်ႈ။

ယေႃး ꧤိၵ်ၶဝေႇ၊ မံ ဢုပꩦ်ꩧႁေယျ သေႃ ၵိလႃၼံ ဢုပꩦ်ꩧႁေယျ
"ၽူႈဢၼ်ၶႂ်ႈလုမ်းလႃးၵဝ်ၸဝ်ႈၼၼ်ႉ တေလႆႈလုမ်းလႃး ၵေႃႉဢၼ်ဢမ်ႇယူႇလီၼၼ်ႉဢိူဝ်ႈ"။

ၽိုၼ်ဢိင်

ၼႃႈလိၵ်ႈ ႗႙၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)