လွင်ႈယဵၼ်ႇငႄႈ မိူဝ်ႈဢွၵ်ႇၶၢဝ်းတၢင်း

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

လွင်ႈယဵၼ်ႇငႄႈ ၽွင်းဢွၵ်ႇၶၢဝ်းတၢင်း ဢၼ်ဝႃႈၼႆႉ မၼ်းပဵၼ် လွင်ႈယဵၼ်ႇငႄႈ ဢၼ်ပႃးၼႂ်း ယဵၼ်ႇငႄႈ သႅၼ်သမ်ႇ ဢၼ်ၼိုင်ႈယဝ်ႉ။ ယဵၼ်ႇငႄႈ ၽွင်းဢွၵ်ႇၶၢဝ်းတၢင်းၼႆႉ ပေႃးတူၺ်းၽတ်ႉၽဵင်ႇၵၼ်ၼႆ တေမီးယူႇ ႑႑ မဵဝ်းယဝ်ႉ။[1] ၸိူဝ်းၼၼ်ႉတႄႉ -

  1. ၽွင်းမိူဝ်ႈ ၶီႇလူတ်ႉလဵၼ်းလႄႈသင်၊ ၶီႇႁိူဝ်းသၢင်းၽေႃးလႄႈသင် ဢမ်ႇၼၼ် ၶီႇၶိူင်ႈၶီႇလူတ်ႉသေဢၼ်ဢၼ်သေ ဢွၵ်ႇၶၢဝ်းတၢင်းၼႆ တေဢမ်ႇလႆႈ ၽိုတ်ႉဢီးသေ ၼႅတ်ႈၶဝ်ႈၼႅတ်ႈဢွၵ်ႇ။ ထုၵ်ႇလီပၼ် သုၼ်ႇၵေႃႉႁႅင်းလဵၵ်ႉဢွၼ်တၢင်း။ (ၽွင်းဢွၵ်ႇၶၢဝ်းတၢင်းၼႆႉ ထုၵ်ႇလီၸွႆႈထႅမ်ပၼ် ၵူၼ်းႁႅင်းလဵၵ်ႉ/ဢူၼ်ႈဢွၼ်ႇ။ ႁူမ်ႈဝႃး ဢမ်ႇၸွႆႈသင်လႆႈၵေႃႈ ဢမ်ႇထုၵ်ႇႁႂ်ႈပိူၼ်ႈလႆႈၸႂ် သုၵ်ႉသၵ်ႉၸွမ်းယွၼ်ႉ ၸဝ်ႈၵဝ်ႇ။ ပိုတ်ႇပၼ်ၽၵ်းတူ၊ ဢဝ်ပၼ် ၶူဝ်းၶွင်သေဢၼ်ဢၼ်၊ ၸွႆႈထႅမ်ပၼ် တႃႇႁႂ်ႈလူင်းငၢႆႈ ၶိုၼ်ႈငၢႆႈ၊ ၸွႆႈထႅမ်ပၼ် လွင်ႈဝၢင်းၶိူင်ႈၶူဝ်းၼၵ်းၸၵႂႃႇၸိူဝ်းၼႆႉ မၼ်းပဵၼ်ၵၢၼ်ၸွႆႈထႅမ်ပၼ်ပိူၼ်ႈ ႁႂ်ႈပိူၼ်ႈမီးတၢင်းလူမ်ၸႂ်ယဝ်ႉ။
  2. ၸဝ်ႈၵဝ်ႇ ဢမ်ႇထုၵ်ႇလီဢဝ်တီႈယူႇ ၵႂၢင်ႈၵႂၢင်ႈ၊ ထုၵ်ႇလီဢဝ် ႁႂ်ႈမၼ်းၵုမ်ႇထူၼ်ႈတႃႇတူဝ်ၸဝ်ႈၵဝ်ႇၵေႃႈ လႆႈယဝ်ႉ။
  3. သင်ၸိူဝ်ႉဝႃႈ တုမ်ႉၺႃးတိူဝ်ႉၺႃးလႄႈသင်၊ ယွၼ်ႉလွင်ႈတၢင်းသေလွင်ႈလွင်ႈလႄႈ ပေႃးဝႃႈ ထုၵ်ႇလီယွမ်းတၢင်းၽိတ်း၊ ယွမ်းတူဝ်ၼႆၵေႃႈ ဢမ်ႇထုၵ်ႇလီၸၼ်ၶၢဝ်းယၢမ်းသေၵေႃႈ ယွမ်းတၢင်းၽိတ်း၊ ယွမ်းတူဝ်တေႃႇလႄႈ။
  4. ပေႃးထုၵ်ႇလၢတ်ႈၵႂၢမ်းၶွပ်ႈၸႂ်ၵေႃႈ လၢတ်ႈၵႂၢမ်းၶွပ်ႈၸႂ်၊ ပေႃးထုၵ်ႇလၢတ်ႈၵႂၢမ်း ၶႂၢင်းပၼ်ၵေႃႈ လၢတ်ႈၵႂၢမ်းၶႂၢင်းပၼ်၊ လၢတ်ႈယဵၼ်ႇယဵၼ်ႇငႄႈငႄႈလႄႈ။
  5. ၽွင်းတိုၵ်ႉလၢတ်ႇတေႃႇၵပ်းသိုပ်ႇၸူး ၵူၼ်းတၢင်းၼမ်ယူႇၼၼ်ႉ ယႃႇပေထူမ်ႇၼမ်ႉလၢႆး။ ယွၼ်ႉထူမ်ႇၼမ်ႉလၢႆးၼႆႉ မၼ်းပဵၼ် လွင်ႈႁၢင်ႈၸႃႉသေဢမ်ႇၵႃး မၼ်းၸၢင်ႈပၼ်ပႃး ၽေးၶဵၼ်လူးၵွၼ်ႇ။
  6. ၽွင်းလၢတ်ႇတေႃႇ ၵပ်းသိုပ်ႇၵူၼ်းတင်းၼမ် မိူဝ်ႈႁဝ်းတိုၵ်ႉ မီးယူႇ ၼႂ်းလူတ်ႉလဵၼ်း၊ ၼႂ်းႁိူဝ်းသၢင်းၽေႃး၊ ၼႂ်းလူတ်ႉၵႃးၼၼ်ႉ တေဢမ်ႇလႆႈလၢတ်ႈၵႂၢမ်း သဵင်ယႂ်ႇသဵင်လူင်၊ တေဢမ်ႇလႆႈ ႁွင်ႉပၢဝ်ႇသေ လၢတ်ႈ။ ထုၵ်ႇလီလၢတ်ႈ ႁႂ်ႈႁဝ်းၼင်ႇၵၼ် ငိၼ်းၵေႃႈလႆႈယဝ်ႉ။
  7. ၽွင်းၼႂ်းသူပ်းႁဝ်း တိုၵ်ႉမီးတၢင်းၵိၼ်သေဢၼ်ဢၼ် တေဢမ်ႇလႆႈလၢတ်ႈၵႂၢမ်း။ ယဝ်ႉၵေႃႈ တေဢမ်ႇၸႂ်ႉ ဢၢႆသႅဝ် မဵဝ်းဢၼ်ပိူၼ်ႈဢမ်ႇၶၢမ်ႇလႆႈ ဢၢႆမၼ်းၼၼ်ႉ။
  8. ၸေႈယွၵ်း၊ ၸေႈႁေႃႇၶဝ်ႈမုၼ်း၊ ပိူၵ်ႇမၢၵ်ႇမႆႉမၢၵ်ႇတွၵ်ႇ၊ ဢၼ်ၵိၼ်သေ ၵိုတ်းလိူဝ်ၸိူဝ်းၼႆႉ ယႃႇပေႁႂ်းမီး။
  9. ပေႃးဝႃႈ တေၶႂ်ႈဢႆ၊ တေၶႂ်ႈၶီႇၸၢမ်ၼႆ ယႃႇပေဢႆ၊ ၶီႇၸၢမ် ပႃႈၼႃႈၵူၼ်း။ လုၵ်ႉၵႂႃႇတၢင်ႇတီႈ ဢၼ်ၵႆၵူၼ်းသေ ဢႆ၊ ၶီႇၸၢမ်လႄႈ။ ပေႃးဝႃႈ တႃႇလုၵ်ႉၵႂႃႇတၢင်ႇတီႈ ဢမ်ႇမီးတိုဝ်ႉတၢင်းမၼ်းၼႆ ဢဝ်ၽႅၼ်ႇၽႃႈၸဵတ်ႉ တူမ်းသူပ်းသေၵေႃႈ ႁဵတ်းၵႂႃႇလႄႈ။ ယဝ်ႉၵေႃႈ ဢၼ်ႁၢဝ်ႁိူမ်ႉ ပႃႈၼႃႈပိူၼ်ႈၼၼ်ႉၵ​​ေႃႈ တေဢမ်ႇလႆႈႁဵတ်း။ ထုၵ်ႇလီၽၢင်ႉသေဝႄႈဢေႃႈ။
  10. တီႈတႃႈလူတ်ႉလဵၼ်း၊ တႃႈႁိူဝ်း၊ တႃႈလူတ်ႉ၊ တီႈႁူင်းတူၺ်းငဝ်းတူင်ႉ၊ ႁူင်းတူၺ်းၸၢတ်ႈ ၸိူဝ်းၼႆႉ ပေႃးဝႃႈ တေသိုဝ်ႉမႂ်တိုတ်းၼႆ ယႃႇပေဢီးယဝ်ႉဢီးတမ်ၵၼ်​၊ ၽိုတ်ႉၵၼ်၊ ႁိမ်ၵၼ်သေသိုဝ်ႉ။ ထုၵ်ႇလီၸႅၼ်ႇထႅဝ်သေ ၵေႃႉၼိုင်ႈယဝ်ႉ ၵေႃႉၼိုင်ႈ ထုၵ်ႇပႂ်ႉတေႃႇပေႃးၽႅဝ် ၵမ်းၸဝ်ႈၵဝ်ႇလႄႈ။ တီႈၸိူင်ႉၼႆၼႆႉ တွၼ်ႈတႃႇၸဝ်ႈၵဝ်ႇတေလႆႈ ဝႆးဝႆး၊ တႃႇတေၽႅဝ်ၽၢႆႇၼႃႈ ထႅဝ်ၵူၼ်းၼၼ်ႉ ၽိုတ်ႉသေ ၶၢမ်ႈၵႂႃႇ၊ ၶၢမ်ႈၵေႃႉဢၼ်ႁွတ်ႈဝႆႉထႃႈ ဢွၼ်တၢင်း၊ ႁိမ်တီႈယူႇဢၼ်ၶႅမ်ႉ၊ လိူၵ်ႈတီႈယူႇ၊ လွင်ႈဢၼ်ဢဝ်သုၼ်ႇလီ တႃႇတူဝ်ၵဝ်ႇၼႆႉ မၼ်းၵေႃႈဢမ်ႇၸႂ်ႈ လွင်ႈယဵၼ်ႇငႄႈ တႃႇၵူၼ်းမိူင်းလူင်ၶဝ်ၼႆ ထုၵ်ႇလီပွင်ႇၸႂ်ပွင်ႇၶေႃးဝႆႉယူႇ။
  11. တီႈဢၼ်ၵူၼ်းၵိုၼ်းၵိုၼ်းၼၼ်ႉ ဢၼ်ၵႂႃႇၽိုတ်ႉၵႄႈၼၢင်းယိင်း၊ ဢၼ်ၵႂႃႇၼႃႈလိူမ်ႈတႃပလၢတ်ႈသေ ယဝ်ႉယွၵ်ႇၼၢင်းၸိူဝ်းၼႆႉ ပဵၼ်လွင်ႈႁဵတ်းသၢင်ႈ ဢၼ်လိူင်း ဢၼ်ႁၢႆႉၸႃႉလႄႈ ပဵၼ်လွင်ႈဢၼ်လီဢၢႆတေႉယဝ်ႉ။

ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

  1. လိမ္မာ​ယဉ်ကျေး ပြည့်​ရင်သွေး၊ ပြည်​သူ့​နီ​တိ နှင့် လောက​နီ​တိ၊ မောင်⁠မောင်​တိုး။ (စာ​မျက်နှာ ၂​၁-၂​၃)