ဝိႁႃရဝိမႃၼဝတ်ထု၊ ၼၢင်းၽီ သႃထုလူၺ်ႈ လူႇၵျွင်း
6. ဝိႁႃရဝိမႃၼဝတ်ထု၊ ၼၢင်းၽီ သႃထုလူၺ်ႈ လူႇၵျွင်း
[မႄးထတ်း | မႄးထတ်းငဝ်ႈငႃႇ]- 729။ ၼၢင်းၽီ မိူၼ်ၼင်ႇလၢဝ်မႃမွင်း ႁိူဝ်ႈႁိူင်းလႅင်းပိူင်း ၵူႈပႃႈၵူႈၽၢႆႇၼင်ႇၼၼ် ငဝ်းတူဝ်မႂ်းၼၢင်း ဢၼ်လီႁၢၼ်ႉၸႂ်ၼႃႇၼၼ်ႉၵေႃႈ ႁိူဝ်ႈႁိူင်းပိူင်းလႅင်းၵႂႃႇ ၵူႈပႃႈၵူႈတၢင်းဝႆႉယူႇယဝ်ႉ။
- 730။ ၽွင်းမိူဝ်ႈ မႂ်းၼၢင်းၵႃႈၼၼ်ႉ တီႈတူဝ်ၶိင်းမႂ်းၼၢင်းၵူႈတီႈ ဢွၵ်ႇမႃး သဵင်ႁႆႇတိုင်ႈၽီၶဝ် ဢၼ်လီထွမ်ႇ လီငိၼ်း ဢၼ်ထုၵ်ႇၸႂ်ၼၼ်ႉ ၵူႈၶိင်ႇၵူႈၶၢဝ်းယူႇယဝ်ႉ။
- 731။ ၽွင်းမိူဝ်ႈ မႂ်းၼၢင်းၵႃႈၼၼ်ႉ တီႈတူဝ်ၶိင်းမႂ်းၼၢင်းၵူႈတီႈ ဢၢႆသႅဝ်ႁွမ်ၽီ ဢၼ်ထုၵ်ႇၸႂ်ၼၼ်ႉ ႁွမ် ၸွတ်ႇတူဝ်ႈၵႂႃႇယူႇယဝ်ႉ။
- 732။ ၼၢင်းၽီ ၽွင်းမိူဝ်ႈ မႂ်းၼၢင်း ၵိူင်းလိမ်ႇဝၢႆႇတူဝ်မႂ်းၼၢင်းၼၼ်ႉၸိုင် တၼ်းသႃႇ ဢၼ်သႂ်ႇဝႆႉ တမ်ႈတီႈ ၸွၵ်းႁူဝ်မႂ်းၼၢင်းၼၼ်ႉ လႆႈငိၼ်း မိူၼ်ၼင်ႇ သဵင်ႇတူႇရိယႃႇႁႃႈပိူင်ယဝ်ႉ။
- 733။ ယွၼ်ႉပိူဝ်ႈ လူမ်းထွင်းပဝ်ႇလႄႈ ပၢၼ်းၵုမ်းမႂ်း ဢၼ်ၶွၼ်းဝႆယူႇၼႂ်းလူမ်းၼၼ်ႉ လႆႈငိၼ်း မိူၼ်ၼင်ႇ သဵင်တူႇရိယႃႇ ႁႃႈပိူင်ယဝ်ႉ
- 734။ ဢၢႆႁွမ်မွၵ်ႇ ဢၼ်မီးဝႆႉ တီႈၼိူဝ်ႁူဝ်မႂ်းၼၢင်း ဢၼ်မီးဢၢႆသႅဝ်ႁွမ် ဢၼ်ႁဵတ်းႁႂ်ႈယဵၼ်ၸႂ် ဢၼ်မိူၼ် မွၵ်ႇၽီမိၼ်ႇသူႇၸၵၼၼ်ႉ ႁွမ်ၸွတ်ႇၵႂႃႇ ၵူႈပႃႈၵူႈၽၢႆႇယဝ်ႉ။
- 735။ ၼၢင်းၽီ မႂ်းၼၢင်းၼႆႉ ၵူၺ်းလႆႈၼူမ်သုတ်ႇ ဢၢႆႁွမ်မွၵ်ႇၼၼ်ႉၵူၺ်းယဝ်ႉ။ ၵူၺ်းလႆႈႁၼ် ႁၢင်ႈၽၢင် ႁၢင်ႈလီႁၢင်ႈငၢမ်းၽီၶဝ်ၵူၺ်းယဝ်ႉ။ ၽွၼ်းလီဢၼ်ၼႆႉ ပဵၼ်ၽွၼ်းလီၵုသူဝ်ႇဢၼ်လႂ်ၼေႃး။ ၵဝ်ထၢမ်မႂ်းၼၢင်းယဝ်ႉ။ တွပ်ႇပၼ်မႃးလူး (ၼႆ ၸဝ်ႈမွၵ်ႇၵလၢၼ်ႇထၢမ်ၵႂႃႇၼင်ႇၼႆယဝ်ႉ)။
- 736။ ၸဝ်ႈႁဝ်းတီႈၶႃႈ (ၼၢင်းဝိသႃႇၶႃႇ) ဢၼ်ပဵၼ်ဢူၺ်းလီၵဝ်ၶႃႈၼၢင်းၼၼ်ႉ (ပုၼ်ႈတႃႇ) သင်ႇၶႃႇၶဝ်ၸဝ်ႈ မၼ်းႁဵတ်းလူႇၵျွင်းပုပ်ႉပႃႇရူင်ႇယဝ်ႉ။ ၽွင်းမိူဝ်ႈ(ႁဵတ်းပွႆးပူႇၸေႃႇၵျွင်း)ၼၼ်ႉ ၵွပ်ႈပိူဝ်ႈ လႆႈႁၼ် ၵျွင်းလူင်ၼၼ်ႉလႄႈသင်၊ လႆႈႁူမ်ၸူမ်းၸွမ်း လွင်ႈပွႆးပူႇၸေႃႇၵျွင်းၼၼ်ႉလႄႈသင် မီးၸႂ်ၼပ်ႉယမ်သေ ႁူမ်ႁူမ်ၸူမ်းၸူမ်း သႃႇထုဢၼုမေႃးတၼႃႇၸွမ်းယဝ်ႉ။
- 737။ ၵွပ်ႈပိူဝ်ႈ ၽွၼ်းလီ လႆႈႁူမ်ၸူမ်းသႃထုဢၼုမေႃးတၼႃႇၸွမ်းၵူၺ်းလႄႈ ဢၼ်ဢမ်ႇတွၼ်ႉပဵၼ်ၵေႃႈ လႆႈပဵၼ်မႃး ၸင်ႇမႃးလႆႈႁေႃဝိမၢၼ်ႇလူင် ဢၼ်လီယဵမ်ႈလီတူၺ်း ဢၼ်သုင် သိပ်းႁူၵ်းယူႇၸၼႃႇၼၼ်ႉယဝ်ႉ။ ႁေႃဝိ မၢၼ်ႇၼၼ်ႉ ဢိင်ပိုင်ႈၽွၼ်းလီၶႃႈၼၢင်းသေ မိၼ်ၵႂႃႇလႆႈၼိူဝ်ၵၢင်ႁၢဝ်ဢေႃႈ။
- 738။ ႁေႃပြသၢတ်ႈဝိမၢၼ်ႇ ဢၼ်ႁၢင်ႈၽၢင်မိူၼ်ၵၼ်ၼၼ်ႉ ၽုတ်းဢွၵ်ႇမႃးၼႂ်းပၢၵ်ႇယူႇၸၼႃႇသေ ႁိူဝ်ႈႁိူင်း ပိူင်းသႂ်ဝႆႉယူႇယဝ်ႉ။
- 739။ တီႈႁေႃဝိမၢၼ်ႇၶႃႈၼၢင်းၼႆႉ ၼွင်ၼမ်ႉၸိူဝ်းၼၼ်ႉ ပဵၼ်တီႈမူၼ်ႈသိူဝ်းၸႂ်တႄႉတႄႉ။ ပဵၼ်တီႈ ပႃတင်းသဵင်ႈ လဵၼ်ႈမူၼ်ႈယဝ်ႉ။ မီးၼမ်ႉသႂ်လီတႄႉယဝ်ႉ။ ပိူင်လၢၵ်ႇမၼ်း ၼမ်ႉၸိုၼ်ႈသႂ်လီၸွၼ်းငွၼ်းယဝ်ႉ။ ပိုၼ်ႉမၼ်း ဢဝ်ၽွင်သၢႆးၶမ်း သိူဝ်ႇဝႆႉယဝ်ႉ။
- 740။ မွၵ်ႇမူဝ်ပတုမ်ႇမႃႇ ၵူႈပိူင်ပိူင် ပေႃးတဵမ်ၼွင်ဝႆႉယူႇယဝ်ႉ။ မွၵ်ႇမူဝ်ၶၢဝ် ၵူႈပိူင်ပိူင်ၵေႃႈ တဵမ်ၼွင်ဝႆႉယဝ်ႉ။ ပေႃးဝႃႈ လူမ်းယဵၼ်ဢွၼ်ႇထွင်းပဝ်ႇမႃးၸိုင် ဢၢႆသႅဝ်ႁွမ်ထုၵ်ႇမႅၼ်ႈၸႂ် ပေႃးၸွတ်ႇတူဝ်ႈၵႂႃႇ ၵူႈတီႈၵူႈတၢင်းသေ ထုၵ်ႇမႅၼ်ႈၸႂ်တႄႉတႄႉယဝ်ႉ။
- 741။ တီႈႁိမ်းႁေႃဝိမၢၼ်ႇၼႆႉ တူၼ်ႈမႆႉသပျေႇလႄႈသင်၊ မႆႉမၢၵ်ႇလၢင်းလႄႈသင်၊ တူၼ်ႈထၢၼ်လႄႈသင်၊ တူၼ်ႈမၢၵ်ႇပၢဝ်ႉလႄႈသင်၊ တူၼ်ႈလၢၵ်ႇလၢႆးၵူႈပိူင်ပိူင်လႄႈသင် ဢမ်ႇလႆႈၽုၵ်ႇသေတႃႉ ဢွၵ်ႇမႃးတင်းသဵင်ႈယဝ်ႉ။
- 742။ ၵေႃႉဢၼ်လႆႈၼွၼ်းၽၼ်ႁၼ် ႁေႃဝိမၢၼ်ႇၼႆ ဢၼ်မီးသဵင်တူႇရိယႃႇ ဢိုတ်ႇၼၼ်ႈဝႆႉ ဢၼ််မီးသဵင် ၵႂၢမ်းဝၢၼ်ၼၢင်းၽီဢွၼ်ႇၶဝ်ၼၼ်ႉၵေႃႈ ၶဝ်ပဵၼ်လွင်ႈႁၢၼ်ႉၸႂ်ဝႆႉယူႇယဝ်ႉ။
- 743။ ႁေႃဝိမၢၼ်ႇ ဢၼ်ဢမ်ႇယၢမ်ႈပဵၼ်ၵေႃႈပဵၼ်မႃး၊ ဢၼ်လီယဵမ်ႈလီတူၺ်း၊ ဢၼ်ႁိူဝ်ႈႁိူင်းပိူင်းသႂ်ၵႂႃႇ ၵူႈပႃႈပူႈၽၢႆႇၼၼ်ႉ ပဵၼ်မႃးၸွမ်းၵၢမ်ႇၶႃႈၼၢင်းယဝ်ႉ။ (ၵွပ်ႈၼၼ်) ၵိုင်ႇလီႁဵတ်းၵၢၼ်လီယူႇတီႈၶႃႈဢေႃႈ(ၼႆ လဝ်ႈ လၢတ်ႈၵႂႃႇၼင်ႇၼႆယဝ်ႉ)။
- 744။ ယွၼ်ႉပိူဝ်ႈ ၽွၼ်းလီ လႆႈႁူမ်ၸူမ်းသႃထုဢၼုမေႃးတၼႃႇဢွၼ်ႇဢၼ်လဵဝ်ၵူၺ်း မႂ်းၼၢင်းၼႆႉ လႆႈမႃး ၸၢမ်ႇပူၺ်ႈ ႁေႃဝိမၢၼ်ႇ ဢၼ်ဢမ်ႇယၢမ်ႈပဵၼ်ၵေႃႈပဵၼ်မႃး ဢၼ်လီယဵမ်ႈလီတူၺ်းၼၼ်ႉယဝ်ႉ။ ၵေႃႉဢၼ်ပဵၼ် ၼၢင်း ဝိသႃႇၶႃႇၼၼ်ႉ မၼ်းလူႇတၢၼ်းၵျွင်း(ပုပ်ႉပႃႇရူင်ႇ)ယဝ်ႉ။ ၼၢင်းဝိသႃႇၶႃႇၼၼ်ႉ ၵတိတီႈမၼ်းၵႂႃႇႁွတ်ႈၼၼ်ႉ ပဵၼ်တီႈ လႂ်ၼႆ လၢတ်ႈပၼ်လူး။ မၼ်း(ၼၢင်းဝိသႃႇၶႃႇ)ၼၼ်ႉ ၵႂႃႇႁွတ်ႈၽႅဝ်ၶူင်းလႂ်ၼေႃႈ (ၼႆ ၸဝ်ႈဢၼုရုတ်ႉထႃႇ ထၢမ်ၵႂႃႇယဝ်ႉ)။
- 745။ ၸဝ်ႈႁဝ်းတီႈၶႃႈ ၼၢင်းယိင်းဝိသႃႇၶႃႇၼၼ်ႉ ယၢမ်ႈပဵၼ်ဢူၺ်းလီၶႃႈၼၢင်းမႃးဢေႃႈ။ ၼၢင်းဝိသႃႇၶႃႇ ဢၼ်ႁူႉႁၼ် သတ်ႉၸႃႇသီႇပႃးၼၼ်ႉ ပုၼ်ႈတႃႇသင်ႇၶႃႇၸဝ်ႈၶဝ် မၼ်းၸႂ်ႉႁဵတ်းၵျွင်း(ပုပ်ႉပႃႇရူင်ႇ)လူႇယဝ်ႉ။ (သွမ်း၊ သၢင်ႇၵၢၼ်းၸိူဝ်းၼၼ်ႉ) လူႇတၢင်းလူႇတၢင်းၼမ်ယဝ်ႉ။ ၼၢင်းဝီသႃႇၶႃႇၼၼ်ႉ လႆႈမိူဝ်းပဵၼ်တမ်ႈတီႈ မိူင်းၽီၼိမ်ႇမႃႇၼရတိယဝ်ႉ။
- 746။ (တီႈမိူင်းၽီၼၼ်ႉ) လႆႈမိူဝ်းပဵၼ် ၼၢင်းႁေႃၶမ်းၽီ တမ်ႈတီႈ ၶုၼ်ၽီလူင်ၼိမ်ႇမႃႇၼရတိ ဢၼ်ၸိုဝ်ႈ ဝႃႈ သုၼိမ်မိတ ၼၼ်ႉယဝ်ႉ။ ၽွၼ်းလီၵၢမ်ႇၵုသူဝ်ႇမၼ်းၼၢင်းၼၼ်ႉ ဝူၼ်ႉၸွမ်းၵေႃႈ ဢမ်ႇၸၢင်ႈဝူၼ်ႉၸွမ်းယဝ်ႉ ၶႃႈ။ ၼၢင်းဝိသႃႇၶႃႇၼၼ်ႉ ၵႂႃႇႁွတ်ႈထိုင်ၶူင်းလႂ်ၼႆ ၸဝ်ႈႁဝ်းထၢမ်မႃးၼင်ႇၼႆယဝ်ႉ။ ၶေႃႈထၢမ်ၸဝ်ႈႁဝ်းၼၼ်ႉ ၶႃႈၼၢင်း တွပ်ႇလၢတ်ႈပၼ်ၵႂႃႇ ဢၼ်မၢၼ်ႇမႅၼ်ႈမၼ်းတီႈၶႃႈယဝ်ႉ။
- 747။ ၵွပ်ႈၼၼ် မီးၸႂ်ႁူမ်ႁူမ်ၸူမ်းၸူမ်းသေ ဢဝ်တၢင်းလူႇတၢင်းတၢၼ်း လူႇတၢၼ်းပၼ် တမ်ႈတီႈ သင်ႇၶႃႇ ၶဝ်ၸဝ်ႈတႃႉ။ မီးၼမ်ႉၸႂ် ၼပ်ႉယမ်ယႂ်ႇၼမ်သေ ထွမ်ႇတြႃးတႃႉ။ သူၸိူဝ်းၼႆႉ လႆႈဝႆႉဢၼ်လႆႈယၢပ်ႇ တႃႇတေပဵၼ် ၵူၼ်းၼၼ်ႉယဝ်ႉလႄႈ ဢွၼ်ၵၼ်တိုၵ်းသူၼ်းၶဝ် ႁႂ်ႈတိုဝ်းၵမ်(လွင်ႈလီ)တႃႉ။
- 748။ မုၼ်ၶမ်းၽြႃး ဢၼ်မီးသဵင်ဝၢၼ်ၸိူင်ႉၼင်ႇ သဵင်ၶုၼ်သၢင်၊ ဢၼ်မီးၽိဝ်ၼိူဝ်ႉၼင် မိူၼ်ၼင်ႇၶမ်း မဝ်ႈ၊ ၽူႈဢၼ်ဢဝ်ဢရိယႃႇမၢၵ်ႈသေ ပဵၼ်ၸိၵ်းၸွမ် ၽီလႄႈလေႃးၵတင်းသဵင်ႈၼၼ်ႉ ႁေႃးတြႃးၼႄပၼ် သဵၼ်ႈတႃႈ သၢႆတၢင်း တႃႇတေ ႁွတ်ႈထိုင် သုၵတိယဝ်ႉ။ မီးၸႂ်ႁူမ်ၸူမ်းသေ ႁႂ်ႈလူႇတၢၼ်းပၼ် သင်ႇၶႃႇၸဝ်ႈၶဝ်ယဝ်ႉ။ တၢင်းလူႇ ဢၼ်လူႇတၢၼ်း တမ်ႈတီႈ သင်ႇၶႃႇၸဝ်ႈၶဝ်ၼၼ်ႉ ၽွၼ်းလီမၼ်း ယႂ်ႇၵႂၢင်ႈတႄႇယဝ်ႉ။
- 749။ ၸိူဝ်းၶဝ် ဢၼ်ပဵၼ် ပုၵ်ႉၵူဝ်ႇပႅတ်ႇၵေႃႉၼၼ်ႉ ၽြႃး ပတ်ႉၸေႇၵပုတ်ႉထႃႇ ရႁၢၼ်းတႃႇၶဝ် ယွင်ႈယေႃးယူႇယဝ်ႉ။ ၶဝ်ၸိူဝ်းၼၼ်ႉ ပဵၼ်(မၢၵ်ႈပုၵ်ႉၵူဝ်ႇ သီႇၵေႃႉ ၽူဝ်ႇပုၵ်ႉၵူဝ်ႇသီႇၵေႃႉ) သီႇၵေႃႉၼိုင်ႈၵူႈၼၼ်ႉယဝ်ႉ။ ပုၵ်ႉၵူဝ်ႇ ၸိူဝ်းၶဝ် ဢၼ်ပဵၼ် တပႄးၽြႃးၼၼ်ႉ ၵိုင်ႇထိူၵ်ႈႁပ်ႉဢဝ် ၶူဝ်းလူႇ ဢၼ်ပိူၼ်ႈလူႇတၢၼ်းၼၼ်ႉယဝ်ႉ။ တၢင်းလူႇ ဢၼ်လူႇတၢၼ်းပၼ် ပုၵ်ႉၵူဝ်ႇၸိူဝ်းၶဝ်ၼၼ်ႉ ၽွၼ်းလီမၼ်း ယႂ်ႇၵႂၢင်ႈတႄႉယဝ်ႉ။
- 750။ မၢၵ်ႈပုၵ်ႉၵူဝ်ႇသီႇၵေႃႉ ဢၼ်တိုၵ်ႉတိုဝ်းၵမ်ယူႇၼၼ်ႉလႄႈသင်၊ ပုၵ်ႉၵူဝ်ႇသီႇၵေႃႉ ဢၼ်ႁွတ်ႈထိုင် ၽူဝ်ႇၼၼ်ႉလႄႈသင် ၸိူဝ်းၶဝ် ပႅတ်ႇၵေႃႉၼႆႉ လႆႈၶဝ်ႈသူႇပဵၼ် သင်ႇၶႃႇယဝ်ႉ။ ပၺ်ႇၺႃႇ သီႇလ တဵမ်ထူၼ်ႈယဝ်ႉ။
- 751။ ၵေႃႉဢၼ် လူႇတၢၼ်းၼၼ်ႉလႄႈသင်၊ သတ်ႉတဝႃႇ ဢၼ်တႂ်းမွင်းလွင်ႈလီသေ ႁဵတ်းၵၢၼ်တၢင်းလီ ဢၼ်တဵမ်ထူၼ်ႈ မီးၽွၼ်းလီ ‘ဢုပတိ’ၼၼ်ႉလႄႈသင် တၢင်းလူႇ ဢၼ်လူႇတၢၼ်း တမ်ႈတီႈ သင်ႇၶႃႇၸဝ်ႈၶဝ်ၼၼ်ႉ ၽွၼ်းလီမၼ်း ယႂ်ႇၵႂၢင်ႈတႄႉယဝ်ႉ။
- 752။ သင်ႇၶႃႇၸဝ်ႈၼၼ်ႉၵူၺ်းယဝ်ႉ မုၼ်းမၢၵ်ႈယႂ်ႇသုင်။ ႁွတ်ႈထိုင်တမ်ႈတီႈ ၵႅဝ်ႈမျၢတ်ႈယဝ်ႉ။ မိူၼ်ၼင်ႇ ၼမ်ႉသမုတ်ႉတရႃႇ ဢမ်ႇၸၢင်ႈၼပ်ႉဢၢၼ်ႇလႆႈ (တၢင်းၼမ်ၼမ်ႉ)ၼင်ႇၼၼ် သင်ႇၶႃႇၸဝ်ႈၼၼ်ႉ (ပေႃးဢဝ် ၵုင်ႇ မုၼ်ငဝ်းၶဝ်ဝႃႈၸိုင်) ဢမ်ႇၼပ်ႉဢၢၼ်ႇလႆႈ။ သင်ႇၶႃႇၸဝ်ႈ လုၵ်ႈႁၵ်ႉၽြႃး ဢၼ်မီးတၢင်းၶတ်းၸႂ် ယႂ်ႇၼမ် ဢၼ်မေႃ ဢဝ်တြႃးသင်ႇပွၼ်ႈသွၼ်ပၼ် တမ်ႈတီႈၼိူဝ်ၵူၼ်းၶဝ်၊ ဢၼ်မေႃႁဵတ်းပၼ် ႁႂ်ႈသၢႆလႅင်းပၺ်ႇၺႃႇၼၼ်ႉ မျၢတ်ႈတွၼ်း တႄႉယဝ်ႉ။
- 753။ ၵူၼ်းၸိူဝ်းၼၼ်ႉ ယိူင်းၸူး သင်ႇၶႃႇၸဝ်ႈသေ လူႇတၢၼ်းယဝ်ႉ။ တၢင်းလူႇၶဝ်ၼၼ်ႉ ပဵၼ်တၢင်းလူႇ လွင်ႈပူႇၸေႃႇ ဢၼ်လီယဝ်ႉ။ တၢင်းလူႇ ဢၼ်လူႇတၢၼ်းထိုင် တမ်ႈတီႈ သင်ႇၶႃႇၸဝ်ႈၶဝ်ၼၼ်ႉ မုၼ်ၶမ်းၽြႃး ဢၼ် ႁူႉႁၼ်လေႃးၵသၢမ်ၸိုင်ႈၼၼ်ႉ ယွင်ႈယေႃးထေႃးပၼႃႇယဝ်ႉ။
- 754။ တမ်ႈတီႈ ၼႂ်းလေႃးၵၼႆႉ ၵူၼ်းၸိူဝ်းၼၼ်ႉၸမ်ႉ မီးလွင်ႈတၢင်း ၸူမ်းသိူဝ်း ၶုၵ်းၶူၼ်ႉဝူၼ်ႉၶွပ်ႈ လွင်ႈတၢင်းလီ (ဢၼ်ၶဝ်ယိူင်းၸူးသင်ႇၶႃႇသေ လူႇတၢၼ်း)ၼၼ်ႉသေ ၵႂႃႇၵႂႃႇပႆပႆယူႇယဝ်ႉ။ ၵူၼ်းၸိူဝ်းၼၼ်ႉ ၶဝ်ပၢၵ်ႈပႅတ်ႈ ငဝ်ႈႁၢၵ်ႈ လွင်ႈၵဝ်ႇသဝ်ႈဝဝ်းလမ် ဢၼ်ထီႇၼဵဝ်ၼၼ်ႉယဝ်ႉလႄႈ တေဢမ်ႇလႆႈၶၢမ်ႇ လွင်ႈတၢင်းသႄႉၼႄး (ၽူႈမီးပၺ်ႇၺႃႇၶဝ်)သေ ႁွတ်ႈထိုင် မိူင်းၽီပုၼ်ႉယူႇယဝ်ႉ။
ဝိႁႃရဝိမႃၼဝတ်ထု ႁူဝ်ႁူၵ်း သုတ်းယဝ်ႉ
ၽိုၼ်ဢိင်
[မႄးထတ်း | မႄးထတ်းငဝ်ႈငႃႇ]- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ မၺ်ꧢိꩨ်ꩩဝၷ်၊ ဝိႁႃရဝိမႃၼဝတ်ထု