ဢုတ်တရႃဝိမႃၼဝတ်ထု၊ ၼၢင်းၽီ ငဝ်းတူဝ်လႅင်း

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

15-ဢုတ်တရႃဝိမႃၼဝတ်ထု၊ ၼၢင်းၽီ ငဝ်းတူဝ်လႅင်း[မႄးထတ်း | မႄးထတ်းငဝ်ႈငႃႇ]

  • 124။ ၼၢင်းၽီ မိူၼ်ၼင်ႇလၢဝ်မႃမွင်း ႁိူဝ်ႈႁိူင်းလႅင်းပိူင်း ၵူႈပႃႈၵူႈၽၢႆႇၼင်ႇၼၼ် ငဝ်းတူဝ်မႂ်း ၼၢင်း ဢၼ်လီႁၢၼ်ႉၸႂ်ၼႃႇၼၼ်ႉၵေႃႈ ႁိူဝ်ႈႁိူင်းပိူင်းလႅင်းၵႂႃႇ ၵူႈပႃႈၵူႈတၢင်းဝႆႉယူႇယဝ်ႉ။
  • 125။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းလႆႈမီး ဢူဢၢႆသၢႆငဝ်းႁိူဝ်ႈလႅင်းၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်လႄႈ တမ်ႈတီႈၼႆႈ မႂ်းၼၢင်းမႃးလႆႈၽွၼ်းလီ တဵမ်ထူၼ်ႈၼေႃး။ ယွၼ်ႉပိူဝ်ႈ ၵုသူဝ်ႇသင်သေ မႂ်းၼၢင်းမႃးလႆႈပူၺ်ႈၽီ တၼ်းၸႂ်ၼင်ႇၼႆၼေႃး။
  • 126။ ၼၢင်းၽီ ဢူမုၼ်ၽုင်းယႂ်ႇ ၵဝ်ထၢမ်မႂ်းယူႇယဝ်ႉ။ မိူဝ်ႈပဵၼ်ၵူၼ်းၼၼ်ႉ မႂ်းလႆႈႁဵတ်းၵုသူဝ်ႇ သင်မႃးၼေႃး။ ယွၼ်ႉပိူဝ်ႈ ၵုသူဝ်ႇဢၼ်လႂ်သေ မႃးလႆႈမီး ဢူဢၢႆသၢႆငဝ်းလႅင်းၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်းၵေႃႈ သမ်ႉပေႃး ႁိူဝ်ႈႁိူင်းမၢပ်ႈမိပ်ႈၵႂႃႇ ၵူႈပႃႈၵူႈၽၢႆႇၼေႃး။
  • 127။ ၵွပ်ႈပိူဝ်ႈ ၸဝ်ႈမွၵ်ႉၵလၢၼ်ႇထၢမ်လွင်ႈတၢင်းမၼ်းလႄႈ ၼၢင်းၽီၵေႃႈ ႁူမ်ႁူမ်ၸူမ်းၸူမ်း ၸင်ႇၶိုၼ်းတွပ်ႇလၢတ်ႈၼႄ လွင်ႈတၢင်းမၼ်းၵႂႃႇ ၸွမ်းၼင်ႇၶေႃႈထၢမ်ၼၼ်ႉယဝ်ႉ။
  • 128။ ၶႃႈၼၢင်း ပဵၼ်မႄႈၸဝ်ႈႁိူၼ်းသေတ လွင်ႈသူၺ်ႈၼိင်ႈပိူၼ်ႈ၊ လွင်ႈထီႇၼဵဝ်၊ လွင်ႈၶႄႉ ၶဵင်ႇၵုင်ႇမုၼ်ပိူၼ်ႈၼၼ်ႉ ဢမ်ႇပဵၼ်။ ၶႃႈၼၢင်း ဢမ်ႇဢွၵ်ႇၸႂ်လမ်။ တိုဝ်းၵမ်ႁဵတ်းၸွမ်း ၵၢင်ၸႂ်ၸဝ်ႈၽူဝ် ယဝ်ႉ။ လွင်ႈၵမ်သိၼ်ဢုပုတ်ႉၼၼ်ႉ ဢမ်ႇလိုမ်းသေပွၵ်ႈ။
  • 129။ ဝၼ်းလိူၼ်မႂ်ႇ လိူၼ်လွင်ႈ သိပ်းသီႇၶမ်ႈလႄႈသင် သိပ်းႁႃႈၶမ်ႈလႄႈသင်၊ ပႅတ်ႇၶမ်ႈလႄႈသင်၊ ဝၼ်းၽိတ်ႈလႄႈသင် ဝၼ်းဢွၵ်ႇသိၼ်လႄႈသင် ၶႃႈၼၢင်းတိုဝ်းၵမ်ႁပ်ႉသိၼ်ပႅတ်ႇဢုပုတ်ႉယဝ်ႉ။
  • 130။ ထိုဝ်(တိုဝ်းၵမ်)သိၼ်ဢုပုတ်ႉယဝ်ႉ။ ပႂ်ႉပႃးသိၼ်သီႇလ တႃႇသေႇယဝ်ႉ။ ၵွၼ်းထိင်း (တူဝ်လႄႈသူပ်း)ယဝ်ႉ။ ၸႅၵ်ႇၽႄသေ လူႇတၢၼ်းယဝ်ႉ။ (ၵွပ်ႈၵုသူဝ်ႇၼၼ်ႉလႄႈ) ၶႃႈၼၢင်းလႆႈမႃး ယူႇသဝ်း တမ်ႈတီႈ ႁေႃဝိမၢၼ်ႇၼႆႉယဝ်ႉ။
  • 131။ လွင်ႈဢဝ်တၢႆပိူၼ်ႈၼၼ်ႉ ၶႃႈၼၢင်း ငိူင်ႉဝႄႈယဝ်ႉ။ လွင်ႈလၢတ်ႈၵႂၢမ်း ဢမ်ႇၸိုဝ်ႈဢမ်ႇၸႂ်ႈ လႄႈသင်၊ လွင်ႈလၵ်ႉဢဝ် ၶူဝ်းဢၼ်ၸဝ်ႈပိူၼ်ႈဢမ်ႇပၼ်ၼၼ်ႉလႄႈသင်၊ ၶၢမ်ႈပူၼ်ႉၽူဝ်ၸဝ်ႈၵဝ်ႇသေ လွင်ႈၽိတ်းၽႅၵ်ႇလူၺ်ႈ ၵူၼ်းၸၢႆးတၢင်ႇၵေႃႉၼၼ်ႉလႄႈသင်၊ လွင်ႈၵိၼ်ၼမ်ႉလဝ်ႈၼမ်ႉမဝ်းၼၼ်ႉလႄႈသင် ၶႃႈၼၢင်း ငိူင်ႉဝႄႈၵႆၵႆယဝ်ႉ။
  • 132။ ၶႃႈၼၢင်း မူၼ်ႈလူၺ်ႈၸွမ်း သိၼ်ႁႃႈသဵၼ်ႈယဝ်ႉ။ လၵ်းလႅမ်ႈၸွမ်း ဢရိယႃႇသတ်ႉၸႃႇ ယဝ်ႉ။ ပဵၼ်ဢုပႃႇသိၵႃႇ မႄႈဢွၵ်ႇမုၼ်ၶမ်းၽြႃး ဢၼ်မီးမၢၵ်ႇတႃႁႃႈပိူင် ဢၼ်မီးၸိုဝ်ႈသဵင်လိုဝ်းလင် ဢၼ်မီးဢလုမ်းဢလၢင်းၼမ်ၼၼ်ႉယဝ်ႉ။
  • 133။ ဢဝ်လွင်ႈတၢင်း သိၼ်သီႇလၸဝ်ႈၵဝ်ႇသေလႄႈသင်၊ လွင်ႈတၢင်းဢလုမ်းဢလၢင်းၼမ်သေ လႄႈသင် ၶႃႈၼၢင်း မီးတၢင်း ၵုင်ႇမုၼ် ၸိုဝ်ႈသဵင်လိုဝ်းလင်ယဝ်ႉ။ လႆႈၸၢမ်ႇပူၺ်ႈလူၺ်ႈ (ၽွၼ်းလီ) တၢင်းလီၸဝ်ႈၵဝ်ႇယဝ်ႉ။ ဢမ်ႇမီးရေႃးၵႃႇတၢင်းပဵၼ်သင်သေ လႆႈႁွတ်ႈထိုင် တီႈသိူဝ်းသႃႇယဝ်ႉ။
  • 134။ ယွၼ်ႉပိူဝ်ႈ ၵုသူဝ်ႇၼႃးမုၼ်ဢၼ်ၼၼ်ႉသေ ၶႃႈၼၢင်းၸင်ႇမႃးမီး ငဝ်းတူဝ်ႁိူဝ်ႈလႅင်းပိူင်း ၼင်ႇၼႆယဝ်ႉ။ ၵွပ်ႈၵုသူဝ်ႇၼၼ်ႉသေ တမ်ႈတီႈၼႆႈ လႆႈ(သိူဝ်းသႃႇ)တဵမ်ထူၼ်ႈယဝ်ႉ။ ၵွပ်ႈပိူဝ်ႈ ၵုသူဝ်ႇဢၼ်ၼၼ်ႉလႄႈ ၶႃႈၼၢင်းၸင်ႇလႆႈပူၺ်ႈလီ(ၸီးၸိမ်ႇ) တင်းသဵင်ႈ ဢၼ်ပဵင်းဢူၵ်းပဵင်းၸႂ်ၼၼ်ႉယဝ်ႉ။
  • 135။ ၸဝ်ႈရႁၢၼ်း ၽူႈမီးၽုင်းယႂ်ႇတီႈၶႃႈ... ၶႃႈၼၢင်းတွပ်ႇလၢတ်ႈပၼ်ၸဝ်ႈႁဝ်း ၼင်ႇၼႆဢေႃႈ။ မိူဝ်ႈပဵၼ်ၵူၼ်းၼၼ်ႉ ၶႃႈၼၢင်းလႆႈႁဵတ်းတၢင်းလီၸိူဝ်းၼၼ်ႉမႃးဢေႃႈ။ ၵွပ်ႈၵုသူဝ်ႇၸိူဝ်းၼၼ်ႉသေ ၸင်ႇတေလႆႈမီး ဢူငဝ်းႁိူဝ်ႈႁိူင်းၼင်ႇၼႆဢေႃႈ။ ၵွပ်ႈၵုသူဝ်ႇၼၼ်ႉသေ ဢူငဝ်းၶႃႈႁဝ်းၼႆႉၵေႃႈ ႁိူဝ်ႈႁိူင်း ပိူင်းသႂ်ၵႂႃႇ ၵူႈပႃႈၵူႈၽၢႆႇၶႃႈဢေႃႈ... (လၢတ်ႈၵႂႃႇၼင်ႇၼႆယဝ်ႉ)။
  • 136။ ၸဝ်ႈႁဝ်းတီႈၶႃႈ ၶႃႈမႄႈဢွၵ်ႇ ဢၼ်ႁိၵ်ႈၸိုဝ်ႈဝႃႈ ဢုတ်ႉတရႃႇ ၼပ်ႉယမ်ၶုပ်ႉဝႆႈ တမ်ႈတီႈ တိၼ်မုၼ်ၶမ်းၽြႃးယူႇယဝ်ႉၼႆ ဢဝ်ၶေႃႈၵႂၢမ်းၶႃႈၼၢင်းသေ မိူဝ်းဝႆႈလဝ်ႈ တမ်ႈတီႈတိၼ် မုၼ်ၶမ်းၽြႃးသေၵမ်းတီႈၶႃႈ။ ၸဝ်ႈႁဝ်းတီႈၶႃႈ လွင်ႈဢၼ်မုၼ်ၶမ်းၽြႃး မွၵ်ႇလၢတ်ႈဝႃႈ ၶႃႈၼၢင်းၼႆႉ ပဵၼ်ၵေႃႉၽူႈ ယၼ်မၼ်ႈတီႈ သႃႇမၺ်ၺၽူဝ်ႇဢၼ်ၼိုင်ႈၼႆ ဢမ်ႇၸႂ်ႈလွင်ႈလီဢၢမ်းသင်ၶႃႈ (လၢတ်ႈၵႂႃႇ ၼင်ႇၼႆယဝ်ႉ)။

ၼၢင်းဢုတ်ႉတရႃႇၼၼ်ႉ မုၼ်ၶမ်းၽြႃးယၢမ်ႈလၢတ်ႈဝႃႈ ပဵၼ်ၵေႃႉယၼ်မၼ်ႈတီႈ သၵႃၻႃမိၽူဝ်ႇ ၼႆယဝ်ႉ။ ဢုတ်တရႃဝိမႃၼဝတ်ထု ႁူဝ်သိပ်းသီႇ သုတ်းယဝ်ႉ။

ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

  1. ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ပီၻဝၷ်ၷ၊ ဢုတ်တရဝိမႃၼဝတ်ထု