ဢုပေႃသထႃဝိမႃၼဝတ်ထု၊ ၼၢင်းၽီမီးသိၼ်
7- ဢုပေႃသထႃဝိမႃၼဝတ်ထု၊ ၼၢင်းၽီမီးသိၼ်
[မႄးထတ်း | မႄးထတ်းငဝ်ႈငႃႇ]- 229။ ၼၢင်းၽီ မိူၼ်ၼင်ႇလၢဝ်မႃမွင်း ႁိူဝ်ႈႁိူင်းလႅင်းပိူင်း ၵူႈပႃႈၵူႈၽၢႆႇၼင်ႇၼၼ် ငဝ်းတူဝ်မႂ်းၼၢင်း ဢၼ်လီႁၢၼ်ႉၸႂ်ၼႃႇၼၼ်ႉၵေႃႈ ႁိူဝ်ႈႁိူင်းပိူင်းလႅင်းၵႂႃႇ ၵူႈပႃႈၵူႈတၢင်းဝႆႉယူႇယဝ်ႉ။
- 230။ ၵွပ်ႈပိူဝ်ႈ ၵုသူဝ်ႇဢၼ်လႂ်သေ မႂ်းလႆႈမီး ဢူဢၢႆသၢႆငဝ်းႁိူဝ်ႈလႅင်းၼင်ႇၼႆၼေႃး။ ၵွပ်ႈပိူဝ်ႈ ၵုသူဝ်ႇသင်လႄႈ တမ်ႈတီႈၼႆႈ မႂ်းၼၢင်း မႃးလႆႈၽွၼ်းလီ တဵမ်ထူၼ်ႈၼေႃး။ ယွၼ်ႉပိူဝ်ႈ ၵုသူဝ်ႇသင်သေ မႂ်းၼၢင်း မႃးလႆႈပူၺ်ႈၽီ တၼ်းၸႂ်ၼင်ႇၼႆၼေႃး။
- 231။ ၼၢင်းၽီ ဢူမုၼ်ၽုင်းယႂ်ႇ ၵဝ်ထၢမ်မႂ်းယူႇယဝ်ႉ။ မိူဝ်ႈပဵၼ်ၵူၼ်းၼၼ်ႉ မႂ်းလႆႈႁဵတ်း ၵုသူဝ်ႇသင်မႃးၼေႃး။ ယွၼ်ႉပိူဝ်ႈ ၵုသူဝ်ႇဢၼ်လႂ်သေ မႃးလႆႈမီး ဢူဢၢႆသၢႆငဝ်းလႅင်း ၼင်ႇၼႆၼေႃး။ ယွၼ်ႉပိူဝ်ႈ ၵုသူဝ်ႇသင်သေ ငဝ်းတူဝ်မႂ်းၼၢင်းၵေႃႈ သမ်ႉပေႃး ႁိူဝ်ႈႁိူင်း မၢပ်ႈမိပ်ႈၵႂႃႇ ၵူႈပႃႈၵူႈၽၢႆႇၼေႃး။
- 232။ ၵွပ်ႈပိူဝ်ႈ ၸဝ်ႈမွၵ်ႉၵလၢၼ်ႇ ထၢမ်လွင်ႈတၢင်းမၼ်းလႄႈ ၼၢင်းၽီၵေႃႈ ႁူမ်ႁူမ်ၸူမ်းၸူမ်း ၸင်ႇၶိုၼ်းတွပ်ႇလၢတ်ႈၼႄ လွင်ႈတၢင်းမၼ်းၵႂႃႇ ၸွမ်းၼင်ႇၶေႃႈထၢမ်ၼၼ်ႉယဝ်ႉ။
- 234။ တမ်ႈတီႈ ဝဵင်းသႃႇၵေႇတၼၼ်ႉ ပိူၼ်ႈဢွၼ်ၵၼ် ႁူႉၸၵ်းၸိုဝ်ႈၶႃႈၼၢင်းဝႃႈ မႄႈဢွၵ်ႇ ဢုပေႃးသထႃႇၼႆယဝ်ႉ။ မီးၸႂ်သတ်ႉထႃႇ လွင်ႈယုမ်ႇယမ်၊ မီးသိၼ်မၼ်ႈ လွင်ႈတိုဝ်းၵမ် တဵမ်ထူၼ်ႈဝႆႉယဝ်ႉ။ မူၼ်ႈၸႂ်လူၺ်ႈၸွမ်း လွင်ႈၸႅၵ်ႇၽႄ ယိုၼ်ႈမႅင်ႇပိူၼ်ႈၼၼ်ႉယူႇ တီႈၶႃႈဢေႃႈ။
- 235။ ဝိသဵတ်ႇမၼ်း မီးၸႂ်ၸိုၼ်ႈသႂ်သေ လႆႈဢဝ်ၽႃႈၽႅၼ်ႇလႄႈသင်၊ သွမ်းလႄႈသင်၊ တီႈၼွၼ်း တီႈယူႇလႄႈသင်၊ ၽႆးလႅင်းလႄႈသင် လူႇတၢၼ်းပၼ် တမ်ႈတီႈ ၸဝ်ႈရႁၢၼ်းၶဝ် ဢၼ်သိုဝ်ႈယူဝ်း ၼၼ်ႉယဝ်ႉ။
- 236။ မိူဝ်ႈဝၼ်းၽိတ်ႈ လိူၼ်မႂ်ႇသိပ်းသီႇၶမ်ႈ လိူၼ်လပ်းသိပ်းသီႇၶမ်ႈလႄႈသင်၊ ဝၼ်းသိပ်း ႁႃႈၶမ်ႈလႄႈသင်၊ ဝၼ်းပႅတ်ႈၶမ်ႈလႄႈသင် ဝၼ်းၽိတ်ႈပႅတ်ႇၶမ်ႈလႄႈသင် ဝၼ်းဢွၵ်ႇသိၼ်ၼၼ်ႉလႄႈသင် ၶႃႈၼၢင်းၼႆႉ တိုဝ်းၵမ်သိၼ်ပႅတ်ႇ ႁႂ်ႈတဵမ်ထူၼ်ႈမႃးၶႃႈဢေႃႈ။
- 237။ ႁပ်ႉသိၼ်ဢုပုတ်ႈယဝ်ႉ။ သိၼ်သီႇလၵေႃႈ ႁႂ်ႈမၼ်ႈၵိုမ်းမႃး တႃႇသေႇယဝ်ႉ။ ပႂ်ႉပႃး(တူဝ် လႄႈသူပ်း)ယဝ်ႉ။ ၸႅၵ်ႇၽႄလူႇတၢၼ်းမႃးယဝ်ႉ။ (ၵွပ်ႈၵုသူဝ်ႇၼၼ်ႉသေ) ၶႃႈၼၢင်း လႆႈယူႇသဝ်း တီႈႁေႃဝိမၢၼ်ႇၼႆႉယဝ်ႉ။
- 238။ ၶႃႈၼၢင်းၼႆႉ လွင်ႈဢဝ်တၢႆသၢႆၸႂ်ပိူၼ်ႈၵႄႃႈ ငိူင်ႉဝႄႈယဝ်ႉ။ လွင်ႈလၢတ်ႈမၢပ်ႇပႅတ်ႉလႅၼ် ၼၼ်ႉလႄႈသင်၊ လွင်ႈလၵ်ႉဢဝ် ၶူဝ်းဢၼ်ၸဝ်ႈပိူၼ်ႈ ဢမ်ႇပၼ်လႄႈသင်၊ လွင်ႈပူၼ်ႉပႅၼ် ၽူဝ်သေ ၵႂႃႇၵူတ်ႉ ၵူၼ်းၸၢႆးတၢင်ႇၵေႃႉၼၼ်ႉလႄႈသင်၊ လွင်ႈၵိၼ်လဝ်ႈမဝ်းၵႅပ်ႇလႄႈသင် ငိူင်ႉဝႄႈၵႆၵႆယူႇယဝ်ႉ။
- 239။ ၶႃႈၼၢင်းၼႆႉ မူၼ်ႈသူဝ်းလူၺ်ႈ သိၼ်ႁႃႈသိၼ်ႈယဝ်ႉ။ လၵ်းလႅမ်ႁူႉႁၼ် ဢရိယႃႇသတ်ႉၸႃႇယဝ်ႉ။ ပဵၼ်ဢုပႃႇသိၵႃႇ မုၼ်ၶမ်းၽြႃး ဢၼ်မီးၸၵ်ႉၶုႁႃႈပိူင် ဢၼ်မီး ဢလုမ်းဢလၢင်းၼမ်ၼၼ်ႉယဝ်ႉ။
- 240။ ၵွပ်ႈပိူဝ်ႈ ၵုသူဝ်ႇလၢၵ်ႇလၢႆးၼၼ်ႉသေ ၶႃႈၼၢင်းၸင်ႇတေမႃးမီး ဢူငဝ်းၸိူင်ႉၼင်ႇၼႆ ယဝ်ႉ။ပ။ ၵွပ်ႈပိူဝ်ႈ ၵုသူဝ်ႇလၢၵ်ႇလၢႆးၼၼ်ႉသေ ဢူဢၢႆသၢႆငဝ်းၶႃႈၼၢင်းၵေႃႈ ႁိူဝ်ႈႁိူင်းပိူင်းၸွတ်ႇၵႂႃႇ ၵူႈၼႃႈၵူႈပႃႈယဝ်ႉ။
- 241။ သူၼ်သိူဝ်းၼၼ်ႇတဝၼ်ႇၼၼ်ႉ လႆႈငိၼ်း(ၶၢဝ်ႇငၢဝ်း)တႃႇသေႇလႄႈ ၵၢင်ၸႂ်ၶႃႈၼၢင်း ၶႂ်ႈမိူဝ်းပဵၼ် တီႈသူၼ်သိူဝ်းၼၼ်ႇတဝၼ်ႇၼၼ်ႉယဝ်ႉ။ ယွၼ်ႉပိူဝ်ႈ ၸႂ်ၶႃႈၼၢင်း တႂ်းမွင်းသူၼ်သိူဝ်း ၼၼ်ႇတဝၼ်ႇလႄႈ ၸင်ႇလႆႈမႃးပဵၼ် တမ်ႈတီႈသူၼ်သိူဝ်းၼၼ်ႇတဝၼ်ႇ တီႈမိူင်းတႃႇဝတိမ်ႇသႃႇယဝ်ႉ။
- 242။ ၶေႃႈၵႂၢမ်းမုၼ်ၶမ်းၽြႃး ၸဝ်ႈၽူႈႁူႉႁၼ်သတ်ႉၸႃႇသီႇပိူင် ၸဝ်ႈၽူႈ ပဵၼ်ဢူၺ်းလီၶုၼ်ဝၼ်း လၢတ်ႈဝႃႈ (ရႁၢၼ်းၶဝ် လွင်ႈၸႂ်ၸပ်းပႅၼ်းၽဝႃႉၼၼ်ႉ ဢိတ်းဢွၼ်ႇဢွတ်းၼိုင်ႈၵေႃႈ ၵဝ်တေႃႈ ဢမ်ႇယွင်ႈယေႃး)ၼႆၼၼ်ႉ ၶႃႈၼၢင်းဢမ်ႇႁဵတ်းၸွမ်းတီႈၶႃႈ။ ၶႃႈၼၢင်းၼႆႉ ၸႂ်ၵႂႃႇၸပ်းပႅၼ်း တမ်ႈတီႈ ၽဝႃႉယုတ်ႈမႂ်ႈၵူၺ်းလႄႈ ဝၢႆးမႃး ၸင်ႇလႆႈပဵၼ်ၵေႃႉၼႅင်ၸႂ်ယူႇယဝ်ႉ (လၢတ်ႈၵႂႃႇၼင်ႇၼႆ)။
- 243။ ၼၢင်းၽီ ဢၼ်ႁိၵ်ႈၸိုဝ်ႈဝႃႈ ဢုပေႃးသထႃႇ တမ်ႈတီႈ ႁေႃဝိမၢၼ်ႇၼႆႉ မႂ်းၼၢင်းတေလႆႈ ယူႇသဝ်းႁိုင်ထႅင်ႈၵႃႈႁိုဝ်။ သင်ဝႃႈ ႁူႉဢႃႇယုမႂ်းၸိုင် တွပ်ႇလၢတ်ႈပၼ် ၶေႃႈတွပ်ႇၵဝ်ၼၼ်ႉတႃႉ (ၼႆ ၸဝ်ႈမွၵ်ႉၵလၢၼ်ႇလၢတ်ႈၵႂႃႇယဝ်ႉ)။
- 244။ ၸဝ်ႈရႁၢၼ်း ၶႃႈၼၢင်းၼႆႉ တေလႆႈယူႇသဝ်း တမ်ႈတီႈ မိူင်းၽီၼႆႉ သၢမ်ၵုတေႇႁူၵ်း မိုၼ်ႇပီမိူင်းသေ ပေႃးတၢႆသေၸၢတ်ႈၼႆႉ တေလႆႈၵႂႃႇႁွတ်ႈထိုင် ၼႂ်းၵႄႈၵၢင်ၵူၼ်းယဝ်ႉ (ၼႆယဝ်ႉ)။
- 245။ ၼၢင်းၽီ ဢၼ်ႁိၵ်ႈၸိုဝ်ႈဝႃႈ ဢုပေႃးသထႃႇ ယႃႇပေၵူဝ်။ မုၼ်ၶမ်းၽြႃးလၢတ်ႈဝႃႈ ႁွတ်ႈၽႅဝ် ၸၼ်ႉသေႃးတႃႇပၼ်ႇယဝ်ႉၼႆယဝ်ႉ။ မႂ်းၼၢင်းၼႆႉ ပၢၵ်ႈပႅတ်ႈၽဝႃႉတုၵ်ႉၵတိယဝ်ႉယဝ်ႈ (ၼႆယဝ်ႉ)။
ဢုပေႃသထႃဝိမႃၼဝတ်ထု ႁူဝ်ၸဵတ်းသုတ်းယဝ်ႉ။
ၽိုၼ်ဢိင်
[မႄးထတ်း | မႄးထတ်းငဝ်ႈငႃႇ]- ↑ ၶုၻ်ၻၵ ၼိၵႃယ၊ ဝိမႃၼဝတ်ထုပႃႇလိၸဝ်ႈ၊ ဢိၻ်ꩪိဝိမႃၼ၊ ၸိတ်တလတႃဝၷ်၊ ဢုပေႃသထႃဝိမႃၼဝတ်ထု