ၶိုၼ်းယေႃးၶိင်းမႃး တိူင်းမႃႇၵထ

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

ၼေႃႇၶမ်းၸဝ်ႈသိတ်ႉထတ်ႉထၼႆႉ ပၼ်ၵႂၢမ်းမၼ်ႈဝႆႉတီႈၶုၼ်ႁေႃၶမ်း ပိမ်ႇမိသႃႇရဝႃႈ ပေႃးလႆႈၺၢၼ်ႇသပ်ႉပၺ်ႇၺုတယဝ်ႉ တေယေႃးၶိင်းမႃးဝဵင်းရႃႇၸၵျူဝ်ႇ တိူင်းမႃႇၵထၼႆႉယူႇယဝ်ႉ။ ၵွပ်ႈၼၼ်လႄႈ ၽြႃးပဵၼ်ၸဝ်ႈၼႆႉ ပႃးဢဝ်တင်းသင်ႇၶႃႇ (႑႐႐႓) ၸဝ်ႈသေ ၸင်ႇယေႃးၶိင်းမႃး ဝဵင်းရႃႇၸၵျူဝ်ႇယူႇယဝ်ႉ။ ၶုၼ်ႁေႃၶမ်းပိမ်ႇပိသႃႇရၵေႃႈ ပေႃးဝႃႈလႆႈငိၼ်းၶၢဝ်ႇငၢဝ်းဢၼ်ၼႆႉယဝ်ႉ တင်းၶႃႈဝၢၼ်ႈၵူၼ်းမိူင်းသေ ၵႂႃႇပႂ်ႉႁပ်ႉႁွင်းၽြႃးပဵၼ်ၸဝ်ႈယူႇယဝ်ႉ။

ၵူၼ်းတိူင်းမႃႇၵထၶဝ်ၵမ်ႈၼမ်ၼႆႉ ပဵၼ်လုၵ်ႈၼွင်ႉ ဢုရုဝေႇလၵသ်သပယဝ်ႉ။ ၼႂ်းၸႂ်ၶဝ် ပဵꧣ်ဢၼ်ဢမ်ႇသၢင်းလၢင်းဝႆႉ။ ၶဝ်ဝူၼ်ႉဝႃႈ - ရႁၢၼ်းၵေႃးတမၼႆႉ ပဵၼ်လုၵ်ႈၼွင်ႉဢုရုၵသ်သပႁႃႉ၊ ဢမ်ႇၼၼ် ဢုရုၵသ်သပၼႆႉ ထႃႁူဝ်သေ ပဵၼ်လုၵ်ႈၼွင်ႉ ရႁၢၼ်းၵေႃးတမၵႂႃႇယဝ်ႉႁိုဝ် ၼႆယူႇ။

လွင်ႈၼႆႉ ၽြႃးပဵၼ်ၸဝ်ႈၸင်ႇထၢမ်ၼႄတီႈ ဢုရုဝေႇလၵသ်သပ မၼ်းၸင်ႇႁွမ်းမိုဝ်းဝႆႈသႃယဝ်ႉ "ၶႃႈႁဝ်းၼႆႉ ပဵၼ်လုၵ်ႈၼွင်ႉ ၽြႃးပဵၼ်ၸဝ်ႈတီႈၶႃႈဢေႃႈ၊ ပွႆႇၽႃႈၼႃႈႁိူဝ်းသေ မႃးႁဵတ်းရသေးယဝ်ႉၵေႃႈ ယင်းပႆႇတိုတ်းၶၢတ်ႇလႆႈ ဢႃႇရုမ်ႇၵႃႇမၵုၼ်ႇ၊ တႃႇၸၢတ်ႈတေမႃး တေလႆႈၽႅဝ်မိူင်းၽီ ၸၢမ်ႇပူၺ်ႈ ၵႃႇမၵုၼ်ႇၶဝ်ၼၼ်ႉ ၸင်ႇလႆႈႁဵၻ်းလၢႆးပူႇၸေႃႇၵူႈပိူင်ပိူင်ယဝ်ႉ။ ၵူၺ်းၵႃႈ ဝၢႆးသေ လႆႈႁူပ်ႉထူပ်းၽြႃးပဵၼ်ၸဝ်ႈယဝ်ႉ ယွၼ်ႉတၢင်းသင်ႇသွၼ်ၽြႃးပဵၼ်ၸဝ်ႈသေ ၶႃႈႁဝ်းၼႆႉ တိုတ်းၶၢတ်ႇပႅတ်ႈလႆႈ ၸႂ်ၵႃႇမၵုၼ်ႇသေဢမ်ႇၵႃး ပၢႆတိုတ်းၶၢတ်ႇလႆႈပႃး လေႃးၽ၊ တေႃးသ၊ မေႃးႁလႄႈ ဢတ်ႉတၸိူဝ်းၼၼ်ႉၵွၼ်ႇၶႃႈဢေႃႈ။ ၵွပ်ႈပိူဝ်ႈၼၼ်လႄႈ ၽြႃးပဵၼ်ၸဝ်ႈၵေႃးတမၼႆႉ ပဵၼ်သြႃႇၶႃႈၸဝ်ႈၶဝ် ဢၼ်မီးမႁႃႇၵရုၼႃႇၼၼ်ႉသေ ၶႃႈႁဝ်းၵေႃႈ ပဵၼ်လုၵ်ႈၼွင်ႉ ဢၼ်မေႃႁူႉၵေးၸူးတြႃးၼၼ်ႉၶႃႈဢေႃႈ။ ယွၼ်ႉၶေႃႈသင်ႇသွၼ်ပုတ်ႉထၸဝ်ႈသေ ၶႃႈႁဝ်းၼႆႉ လႆႈၸုၵ်းမၼ်းၼိူဝ် သီႇလ၊ သမႃႇထိ၊ ပၺ်ႇၺႃႇသေ လႆးပဵၼ်ရႁၢၼ်းတႃႇ ၵိုမ်းမၼ်ႈလူၺ်ႈ ပၺ်ႇၺႃႇယူႇၼၼ်ႉၶႃႈယဝ်ႉ။ တေႃႈလဵဝ် ပုၼ်ႈတႃႇၵႃႇမၵုၼ်ႇဢႃႇရုမ်ႇၼၼ်ႉ ဢမ်ႇႁဵတ်းဢွင်ႈပူႇၸေႃႇသေဢမ်ႇၵႃး ၸႂ်ဢၼ်မိုတ်ႈမၵ်ႉၵႃႇမၵုၼ်ႇၼၼ်ႉၵေႃႈ ယင်းဢမ်ႇမးသေပႅၵ်ႉၶႅၵ်းလႅင်ယဝ်ႉၶႃႈ။ ၵၢင်ယၢၼ်တင်း လွင်ႈတိတ်းႁွႆႈ ဢၼ်ဝႃႈၵဝ် လုၵ်ႈၼွင်ႉၵဝ် ၼႆၼၼ်ႉသေ ၵၢင်းယၢၼ်တင်း လွင်ႈယုင်ႈယၢင်ႈယွၼ်ႉၸႂ်တိတ်းႁွႆႈၵဝ်၊ ၶွင်ၵဝ်ၸိူဝ်းၼၼ်ႉယဝ်ႉလႄႈ လႆႈပဵၼ်ရႁၢၼ်းတႃႇ ၵေႃႉဢၼ်ၸုၵ်းမၼ်ႈၼိူဝ်ပၺ်ႇၺႃႇ၊ ၵေႃႉဢၼ်လႆႈၶုၺ်ႉႁၼ်ၸၢမ်ႇပူၺ်ႈ လွင်ႈငမ်းယဵၼ်ယူႇၼၼ်ႉၶႃႈယဝ်ႉ"။

ယၢမ်းၼၼ် ၶုၼ်ႁေႃၶမ်းပိမ်ႇပိသႃႇရ တင်းၶႃႈဝၢၼ်ႈၵူၼ်းမိူင်းၶဝ် ၸင်ႇလႆႈႁူႉဝႃႈ ၵေႃႉဢၼ်ၶဝ်ၼပ်ႉယမ် ဢၼ်ၸိုဝ်ႈလိုဝ်းလင် ဢၼ်ပဵၼ်ဢုရုဝေႇလၵသ်သပၼႆႉ ၸွမ်းဢဝ်ၶေႃႈသင်ႇသွၼ်ပုတ်ႉထၽြႃးၸဝ်ႈသေ လႆႈပဵၼ်ရႁၢၼ်းတႃႇၵႂႃႇယဝ်ႉ - ၼႆယူႇယဝ်ႉ။

ၶုၼ်လူင်ၸင်ႇၽိတ်ႈပၢင်းပုတ်ႉထၸဝ်ႈလႄႈ တင်းသင်ႇၶႃႇ တႃႇမႃးဢဝ် သွမ်းယူႇယဝ်ႉ။ ဝၢႆးၵိၼ်သွမ်းယဝ်ႉ ၸင်ႇႁေႃးပၼ်တြႃးတီႈ ၶုၼ်ႁေႃၶမ်းလႄႈ ၶႆႇသႅင်ၾၼ်းၶမ်း ဢိၵ်ႇပႃးၵူၼ်းၼႂ်းႁၢင်ႈႁေႃယူႇယဝ်ႉ။ ၶုၼ်ႁေႃၶမ်းၼႆႉ ၶႂ်ႈႁႂ်ႈၽြႃးပဵၼ်ၸဝ်ႈလႄႈ သင်ႇၶႃႇၶဝ်ယူႇသဝ်းတီႈဝဵင်းရႃႇၸၵျူဝ်ႇလႄႈ ၸင်ႇလဝ်ႈလၢတ်ႈ ႁႂ်ႈလူႇၶၢမ်ႇဢဝ်သူၼ်ဝေႇလုဝုၼ်ႇၼႆယူႇယဝ်ႉ။ ၵွပ်ႈၼၼ်လႈ သူၼ်လူင်ဝေႇလုဝၼ်ႇၵေႃႈ ၸင်ႇပဵၼ်ဝိႁၢရ်ႇလူင်တႃႇ ၽြႃးပဵၼ်ၸဝ်ႈလႄႈ ရႁၢၼ်းၶဝ် ဢွၼ်တၢင်းသုတ်းယဝ်ႉ။

ၽြႃးပဵၼ်ၸဝ်ႈၼႆႉ ၸင်ႇဢဝ်ဝႃႇထူၼ်ႈသွင် တမ်ႈတီႈဝိႁၢရ်ႇဝေႇလုဝၼ်ႇၼၼ်ႉယူႇယဝ်ႉ။

ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

ၼႃႈလိၵ်ႈ ႓႘၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)