ၼွမ်းႁူဝ်ဝႆႈသႃတီႈ တိၼ်ၽြႃးပဵၼ်ၸဝ်ႈ

ၶုၼ်လူင်ပသေႇၼတီႇၵေႃးသလၼႆႉ ဢႃႇယုၵေႃးၸမ်ပႅတ်ႇသိပ်းယဝ်ႉ။ လႆႈယူႇၸမ်ႁိမ်းၽြႃးပဵၼ်ၸဝ်ႈၶၢဝ်းတၢင်းသီႇသိပ်းပီယဝ်ႉ လႆႈဝႆႈသႃထွမ်ႇငိၼ်းထမ်ႇမတေႇသၼႃႇ ၽြႃးပဵၼ်ၸဝ်ႈတႃႇသေႇယူႇ။ ၵျၢင်ႉၵမ်ၸွမ်း ထမ်ႇမတေႇသၼႃႇလႄႈ လႆႈတၢင်းသိူဝ်းသႃႇ ၼႂ်းၸူဝ်ႈပၢၼ်မၼ်းတႄႉတႄႉႉ။ လႆႈႁူပ်ႉထူပ်းယူႇၸမ်တင်းၽိၵ်ႉၶု၊ တႃႇယၵႃႇ၊ တႃႇယိၵႃႇ ဢၼ်ပဵၼ်လုၵ်ႈၼွင်ႉသႃႇဝၵ ၽြႃးပဵၼ်ၸဝ်ႈယူႇယဝ်ႉ။

ၼၢင်းယိင်းဢၼ်လႆႈၸိုဝ် သုၼ်ႇတရီႇၼႆႉ ပွႆႈပႅတ်ႈၼႃႈႁိူၼ်းမႃးသေ သမ်ႉလႆႈထုၵ်ႇတၢင်းဢဝ်တၢႆလႄႈ ၸင်ႇဢွၼ်ၵၼ်မႃးႁႃ တီႈၵျွင်း ဢၼ်ၽြႃးပဵၼ်ၸဝ်ႈယူႇသဝ်းၼၼ်ႉ။ ၵဵဝ်ႇလွင်ႈၼႆႉသေ ၽြႃးပဵၼ်ၸဝ်ႈ ဢမ်ႇတိူဝ်ႉၼိူဝ်ႉသင်။ ထႅင်ႈဝူင်ႈၼိုင်ႈ ၺွပ်းလႆႈ ၵူၼ်းဢၼ်ၶႃႈႁႅမ်သုၼ်ႇတရီႇလႄႈ ၸင်ႇမွတ်ႇလႆႈလွင်ႈၼႄးသႂ်ႇၽြႃးပဵၼ်ၸဝ်ႈလႄႈ ၽိၵ်ႉၶုသင်ႇၶႃႇၶဝ်ၸိူဝ်းၼၼ်ႉယူႇယဝ်ႉ။

ၽွင်းမိူဝ်ႈၶုၼ်လူင်ပသေႇၼတီႇၵေႃးသလလႄႈ ၵူၼ်ႈၼမ်တိုၵ်ႉၵုမ်ၵၼ် ပႃႈၼႃႈၽြႃးပဵၼ်ၸဝ်ႈၼၼ်ႉ ၸိၼ်ႇၸႃႇၼၽႅဝ်မႃးႁိၼႄး မၢပ်ႇမႂ်သႂ်ႇၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈတေႃႇၽြႃးပဵၼ်ၸဝ်ႈယူႇယဝ်ႉ။ ၵူၺ်းၵႃႈ မႆႉပွတ်းဢၼ်ဢဝ်ႁဵတ်းႁၢင်ႈပႃးတွင်ႉပုမ်လူင်ၼၼ်ႉ ဢဝ်မႃႇယႃႇသေ ႁဵတ်းဝႆႉၼၼ်ႉ ယၢတ်ႇတူၵ်းမႃးမႅတ်ႈလႄႈ လွင်ႈမၢပ်ႇမႂ်မၼ်းၼၢင်း ဢမ်ႇပဵၼ်ၵၢၼ်။ ပဵၼ်လွင်ႈမၢပ်ႇလႅၼ်ၵွႆးၼႆ ႁူႉၸႅင်ႈလႅင်းလီၼႃႇယဝ်ႉ။

ၶုၼ်လူင်ပသေႇၼတီႇၵေႃးသလၼႆႉ လႆႈႁူႉလႆႈႁၼ် လွင်ႈပဵၼ်ၸိူဝ်းၼႆႉသေ တၢင်းယုမ်ႇယမ်ၼိူဝ်ၽြႃးပဵၼ်ၸဝ်ႈၼၼ်ႉ ယိုင်ႈၶႅၼ်းမၼ်ႈၵိုမ်းမႃးယူႇယဝ်ႉ။ ၶေႃႈၵႂၢမ်း ဢၼ်ၶုၼ်လူင်လၢတ်ႈၼၼ်ႉၵေႃႈ ပဵၼ်မႃးလွင်ႈတၢင်းဢၼ်လမ်ႇလွင်ႈသေ တိူဝ်ႉယမ်တႄႉတႄႉယဝ်ႉ။

မီးပွၵ်ႈၼိုင်ႈ ၶုၼ်လူင်ပသေႇၼတီႇၼႆႉ ၽႅဝ်မႃးမေႇထလမ်ႇပ ဢၼ်ပဵၼ်လိၼ်မိူင်းၶိူဝ်းသၵျၶဝ်၊ ယၢမ်းၼၼ်ႉ ၽြႃးပဵၼ်ၸဝ်ႈၵေႃႈ ၽႅဝ်ဝႆႉယူႇလႄႈ ၸင်ႇၵႂႃႇၸူးၽြႃးပဵၼ်ၸဝ်ႈယဝ်ႉ။ ပေႃးၽႅဝ်တီႈၵျွင်းဢၼ်ၽြႃးပဵၼ်ၸဝ်ႈ ယူႇသဝ်းၼၼ်ႉၵေႃႈ ဢဝ်မိုဝ်းမၼ်း ပွတ်ႈတိၼ်ၽြႃးပဵၼ်ၸဝ်ႈ၊ ၼူမ်တိၼ်ၽြႃးပဵၼ်ၸဝ်ႈလႄႈ ၽြႃးပဵၼ်ၸဝ်ႈၸင်ႇထၢမ်ဝႃႈ "ဢေႃး ၶုၼ်လူင်၊ ႁဵတ်းသင်လႄႈ ၸဝ်ႈၵဝ်ႇၼႆႉ ပႄႉမႃးၼွမ်းတူဝ် ၵူဝ်ယမ် ၵိူဝ်းလီပေႃးတၢၼ်ႇၼႆႉလႃႇ" ၼႆယူႇယဝ်ႉ။

ၶုၼ်လူင်ၵေႃးသလၸင်ႇတွပ်ႇဝႃႈ "ၽြႃးပဵၼ်ၸဝ်ႈတီႈၶႃႈ၊ ၶႃႈႁဝ်းႁူႉဝႃႈ ၽြႃးပဵၼ်ၸဝ်ႈႁဝ်းၼႆႉ ပဵၼ်သမ်ႇမႃႇသမ်ႇပုတ်ႉထ ဢၼ်တြႃးထမ်ႇမပေႃးၸုမ်ႇၵူႈတဵမ်ထူၼ်ႈၼၼ်ႉ လီၼႃႇၶႃႈဢေႃႈ၊ တြႃးဢၼ်ပဵၼ်ၸဝ်ႈ ႁေႃးၼၼ်ႉၵေႃႈ ၸႅင်ႈလႅင်းလီၼႃႇ၊ သင်ႇၶႃႇၸဝ်ႈ ၸိူဝ်းပဵၼ်လုၵ်ႈၼွင်ႉသႃႇဝၵၽြႃးပဵၼ်ၸဝ်ႈႁဝ်းၸိူဝ်းၼၼ်ႉၵေႃႈ ဢွၼ်ၵၼ်ပႆယၢင်ႈႁဵတ်းၸွမ်းသဵၼ်ႈတၢင်းဢၼ်ၸိုဝ်ႈၸႂ်ႈ ၼႆၶႃႈဢေႃႈ"

"ၽြႃးပဵၼ်ၸဝ်ႈႁဝ်းတီႈၶႃႈ၊ ၵူၼ်းၼႂ်းလုမ်ႈၾႃႉလေႃးၵလူင်ၼႆႉ ဢၼ်ပေႃးမီးၵႂႃႇၸွတ်ႇၵူႈတီႈၼၼ်ႉ ၶဝ်ၼင်ႇၵၼ် ၵႆႉၵႆႉထဵင်ၵၼ်၊ ၵႆႉၵႆႉတိုၵ်းၵၼ်ၼႆသေတႃႉၵေႃႈ လုၵ်ႈၼွင်ႉသႃႇဝၵၽြႃးပဵၼ်ၸဝ်ႈႁဝ်း ၸိူဝ်းပဵၼ်သင်ႇၶႃႇၸဝ်ႈၶဝ်တႄႉ ဢမ်ႇထဵင်ၵၼ်၊ ဢမ်ႇတိုၵ်းၷၼ် လႆႈႁၼ်ယူႇ ၵတ်းၵတ်းယဵၼ်ယဵၼ်၊ ၽဵင်ႇၽဵင်ႇပဵင်းပဵင်းဝႆႉၶႃႈဢေႃႈ"။ "ၽြႃးပဵၼ်ၸဝ်ႈတီႈၶႃႈ၊ မိူဝ်ႈၽြႃးပဵၼ်ၸဝ်ႈႁဝ်း ႁေႃးတြႃးၸဝ်ႈၼၼ်ႉၵေႃႈ သင်ႇၶႃႇၸဝ်ႈၶဝ် ဢၢၼ်ႇႁူဝ်ႁဵင်မၼ်း ဢွၼ်ၵၼ်ဢဝ်ဢႃႇရုမ်ႇပၵ်းသႂ်ႇသေ ယူႇတဵတ်ႇတဵတ်ႇဝႆႉၶႃႈဢေႃႈ၊ သဵင်ဢႆၵွႆးၵေႃႈ သမ်ႉပေႃးဢမ်ႇငိၼ်း၊ မီးပၵ်းပိူင်သေ ၼပ်ႉယမ်ထွမ်ႇငိၼ်းဢဝ်ၼၼ်ႉ လီဢၢမ်းတႄႉတႄႉဢေႃႈ"

"ၽြႃးပဵၼ်ၸဝ်ႈတီႈၶႃႈ၊ ၽြႃးပဵၼ်ၸဝ်ႈၼႆႉ လုၵ်ႉတီႈၸၢဝ်းၶိူဝ်းၶတ်ႉတိယသေမႃး၊ ၶႃႈၵေႃႈ ပဵၼ်ၸၢဝ်းၶိူဝ်းၶတ်ႉတိယၼင်ႇၵဝ်ႇၶႃႈဢေႃႈ၊ ၽြႃးပဵၼ်ၸဝ်ႈႁဝ်းယူႇတီႈတိူင်းၵေႃးသလ၊ ၶႃႈႁဝ်းၵေႃႈ ယူႇတီႈတိူင်းၵေႃးသလ၊ ၽြႃးပဵၼ်ၸဝ်ႈႁဝ်းၼႆႉ တေႃႈလဵဝ် ဢႃႇယုပေႃးမီးပႅတ်ႇသိပ်းယဝ်ႉ၊ ၶႃႈႁဝ်းၵေႃႈ မီးပႅတ်ႇသိပ်းယဝ်ႉၼင်ႇၵဝ်ႇၶႃႈဢေႃႈ။ ၵွပ်ႈလွင်ႈတၢင်းၸိူင်ႉၼၼ်သေ ၸင်ႇမႃးၼွမ်းတူဝ်ၵူဝ်ယမ်ၵိူဝ်းလီၼင်ႇၼႆၶႃႈဢေႃႈ"။

ၶုၼ်လူင်ၼႆႉ လဵပ်ႈပၼ်ႇပူႇၸေႃႇၽၢႆႇၶႂႃၽြႃးပဵၼ်ၸဝ်ႈယဝ်ႉ ၶိုၼ်းဢွၵ်ႇၵႂႃႇၶိုၼ်းယူႇယဝ်ႉ။

ၽိုၼ်ဢိင်

ၼႃႈလိၵ်ႈ ႑႐႓၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)