တၢင်ႇသင်ႇၵႃႇယၼႃႇပွၵ်ႈၵမ်းထီႉၼိုင်ႈ

ရႁၢၼ်းၶဝ် ၸိူဝ်းပႆႇၵၢင်းရႃႇၵၸိူဝ်းၼၼႉ ပေႃးဝႃႈလႆႈငိၼ်းၽြႃးပဵၼ်ၸဝ်ႈဢဝ်ပရိၼိပ်ႉပၢၼ်ႇယဝ်ႉၼႆၵေႃႈ ဢွၼ်ၵၼ်တမ်ႇၼွႆႉမွင်ၸႂ်သေ ဢိုတ်ႇႁႆႈယူႇယဝ်ႉ။ ရႁၢၼ်းၸိူဝ်းၵၢင်းရႃႇၵၶဝ်သမ်ႉ ၽႄႈတိူၼ်းၽႃႇဝၼႃႇႁူႉႁၼ်ၸွမ်း သင်ႇၶႃႇရတြႃးဢၼ်ဢမ်ႇမၼ်ႈၵိုမ်း၊ ဢၼ်လူႉဢၼ်လႅဝ်ၼၼ်ႉသေ ယူႇတဵတ်ႇတဵတ်ႇယဵၼ်ယဵၼ်။ မိူဝ်ႈၼၼ်ႉ ရႁၢၼ်းလူင် သုꧤတ်ႉတ ဢၼ်ဢႃႇယုယႂ်ႇယဝ်ႉ ၸင်ႇမႃးႁဵတ်းရႁၢၼ်းၼၼ်ႉ "ၸဝ်ႈၶဝ်ယႃႇပေႁႆႈ၊ တေႃႈလဵဝ်ၼႆႉ ႁဝ်းလွတ်ႈဢွၵ်ႇၼႂ်းလွင်ႈၵုမ်းၵမ်သမၼေႇ ၸဝ်ႈၵေႃးတမယဝ်ႉ၊ ႁဝ်းၶႂ်ႈႁဵတ်းသင်ၵေႃႈ ႁဵတ်းလႆႈယဝ်ႉ" ဝႃႈၼႆ။

ၸဝ်ႈမႁႃႇၵသ်သပၼႆႉ ပေႃႈဝႃႈလႆႈငိၼ်းၶေႃႈၵႂၢမ်းၼၼ်ႉၵေႃႈ ပဵၼ်ဢၼ်ဢၢမ်းလူင်ၵႂႃႇယဝ်ႉ။ ၽြႃးပဵၼ်ၸဝ်ႈ ဢဝ်ပရိၼိပ်ႉပၢၼ်ႇသေ ၶၢပ်ႈတူဝ်ၸဝ်ႈယင်းတိုၵ်ႉမီးယူႇ။ ရႁၢၼ်းဢၼ်ဢမ်ႇလၵ်းလႅမ်၊ ဢမ်ႇႁူႉသင်ၼၼ်ႉ တေႁဵတ်းႁႂ်ႈၶေႃႈသင်ႇသွၼ်ၽြႃးပဵၼ်ၸဝ်ႈယူပ်ႈယွမ်းယဝ်ႉ၊ တေထွၼ်ပႅတ်ႈ ဢၼ်ၶဝ်ဢမ်ႇသူင်ၸိူဝ်းၼၼ်ႉသေ ဢဝ်ၶဝ်သူင်ၸိူဝ်းၼၼ်ႉသမ်ႉ တေဢဝ်မႃးလေႃးယဝ်ႉ၊ တေပဵၼ်တၢင်းယႃႉၵဝ်းပုတ်ႉထသႃႇသၼႃႇ မၼ်ႈၵိုမ်းယိုၼ်းယၢဝ်းယဝ်ႉ ထမ်ႇမဢၼ်ပွမ် တေဢွၵ်ႇမႃးယဝ်ႉ။

ၶေႃႈၵႂၢမ်းငဝ်ႈတိုၼ်း ၽြႃးပဵၼ်ၸဝ်ႈတေႁၢႆလၢႆသေ ပရိယတ်ႉတိ၊ ပတိပတ်ႉတိ ဢၼ်ပဵၼ် သဵၼ်တၢင်းဢွၵ်ႇလွတ်ႈလေႃးၵၼၼ်ႉ တေၵိုတ်းတီႈလႂ်ၵွႆးယဝ်ႉ၊ လွင်ႈၽွၼ်းလီသိူဝ်းသႃႇ တႃႇလေႃးၵ ဢၼ်တႄႉတႄႉမၼ်းတေႁၢႆလၢႆယဝ်ႉ။

ၵွပ်ႈၼၼ်လႄႈ ၸဝ်ႈမႁႃၵသ်သပၼႆႉ တိူင်ႇပၢင်ႇရႁၢၼ်း ႕႐႐ ၶဝ်သေ ဢဝ်ၶေႃႈတူၵ်းလူင်းၵၼ်တင်းသဵင်ႈယဝ်ႉ ဝၢႆးသေၽြႃးပဵၼ်ၸဝ်ႈဢဝ်ပရိၼိပ်ႉပၢၼ်ႇလႆႈသၢမ်လိူၼ် ၸင်ႇႁဵတ်းပဵၼ်ပၢင်ပွႆးတၢင်ႇသၢင်ႇၵႃႇယၼႃႇ ပွၵ်ႈၵမ်းထီႉၼိုင်ႈယူႇယဝ်ႉ။

ပၢင်ပွႆးတၢင်ႇသၢင်ႇၵႃႇယၼႃႇၼႆႉ ဢဝ်တၢင်းၸွႆႈထႅမ်လွင်ႈၸၢတ်းၵၢၼ်ၵုမ်းထိင်း ၶုၼ်ႁေႃၶမ်းဢၸႃႇတသၢတ်ႈသေ ႁဵတ်းသၢင်ႈတီး ၵူင်ထမ်ႈသတ်ႉတပၼ်ႇၼီႇ မိူင်းရႃႇၸၵျူဝ်ႇၼၼ်ႉယူႇယဝ်ႉ။ ထတ်းထွင် ထမ်ႇမလႄႈ ဝိၼယ ဢၼ်ၽြႃးပဵၼ်ၸဝ်ႈႁေႃးမႃးၼႂ်းၶၢဝ်းတၢင်း သီႇသိပ်းႁႃႈဝႃႇၼၼ်ႉယူႇယဝ်ႉ။

ဢဝ်ၸဝ်ႈဢႃႇၼၼ်ႇတႃႇ ၶဝ်ႈပႃးၼႂ်းပၢင်ပွႆးတၢင်ႇသင်ႇၵႃႇယၼႃႇၼႆႉ ပဵၼ်ဢၼ်ထိုင်တီႈတႄႉတႄႉ။ ၵွပ်ႈပိူဝ်ႈ ၸဝ်ႈၼႆႉ ပဵၼ်ၽူႈဢၼ်လုမ်းလႃးၽြႃးပဵၼ်ၸဝ်ႈသၢဝ်းႁႃႈပီ ယူႇၸွမ်းၼင်ႇၵေႃႉငဝ်းၸဝ်ႈယဝ်ႉ။ ၺၢၼ်ႇလႅတ်းၽၢႆသေ ဢူမ်သူပ်းလႆႈ ထမ်ႇမတေႇသၼႃႇ၊ ၵူၺ်းၵႃႈ ပၢင်ပွႆးၼႆႉ ပဵၼ်ရႁၢၼ်းတႃႇၶဝ်ၸဝ်ႈၵွႆးၶဝ်ႈပႃး၊ ဢႃႇၼၼ်ႇတႃႇသမ်ႉ တိုၵ်ႉပဵၼ်သေႃးတႃႇပၢၼ်ႇၵွႆး၊ ၵွပ်ႈၼၼ်လႄႈ တႃႇတေၶဝ်ႈပႃးၼၼ်ႉ ပဵၼ်တၢင်းယၢပ်ႇၽိုတ်ႇဝႆႉ၊ ၵွပ်ႈၼၼ်လႄႈ ၸဝ်ႈဢႃႇၼၼ်ႇတႃႇၸင်ႇၶတ်းၸႂ်ၼင်ႈၵၢၼ်တြႃးတင်းၶိုၼ်းသေ ထိုင်ၵၢင်ၼႂ်ၸဝ်ႈၼၼ်ႉလႆႈပဵၼ်ရႁၢၼ်းတႃႇယဝ်ႉ ၸင်ႇလႆႈၶဝ်ႈပႃးၼႂ်းပၢင်ၵုမ်လူင်ယူႇယဝ်ႉ။

ပၢင်ပွႆးတၢင်ႇသင်ႇၵႃႇယၼႃႇ ပွၵ်ႈၵမ်းၼိုင်ႈၼႆႉ ၵဵဝ်ႇၵပ်းလူၺ်ႈထမ်ႇမသေ ၸဝ်ႈမႁႃႇၵသ်သပတွင်ႈထၢမ်ယဝ်ႉ ၸဝ်ႈဢႃႇၼၼ်တႃႇ တွပ်ႇၵႄႈႁူဝ်ယွႆႈမၼ်း၊ မိူၼ်ၼၼ်ၼင်ႇၵဝ်ႇ ၵဵဝ်ႇၵပ်းဝိၼယသေ ၸဝ်ႈမႁႃႇၵသ်သပတွင်ႈထၢမ်သေ ၸဝ်ႈဢုပႃႇလိတွပ်ႇၵႄႈ။ ၸဝ်ႈရႁၢၼ်းတႃႇလူင်ၶဝ် ငူပ်ႉငိမႄးထတ်းထွင်ယဝ်ႉ ပေႃးတင်းသဵင်လႆႈၸႂ်ၵေႃႈ ဢွၼ်ၽွမ်ႉၵၼ်ဝႃး "သင်ႇၵႃႇယၼႃႇ" ၼႆယဝ်ႉ။ ရႁၢၼ်းတႃႇၶဝ်ႁႃႈပၢၵ်ႇၸဝ်ႈမၵ်းမၼ်ႈတၢင်ႇၽိုၼ်လွတ်ႈႁေႃးသေ တၢင်ႇသင်ႇၵႃႇယၼႃႇလႄႈ "ပၼ်ꩡသတိၵႃ သမ်ၷီတီ" ၼႆၵေႃႈႁွင်ႉယဝ်ႉ။ မႁႃႇသင်ႇၵီႇပွၵ်ႈထီႉၼိုင်ႈၼႆႉ ထိင်းသိမ်းဢဝ်ငဝ်ႈတိုၼ်းသႃႇသၼႃႇၽြႃးပဵၼ်ၸဝ်ႈယူႇယဝ်ႉ။

သုတ်တၼ်တေသု ဢသၼ်တေသု၊ ပမုၻ်ၻေ ဝိၼယမ်မိၸ၊
တမေႃ ꧤဝိသ်တိ လေႃၵေ၊ သူရိယေ ဢတ်ထင်ၷတေ ယထႃ။
(ဢၻ်ꩪ ႑၊ ၼႃႈ ႗႒၊ မၢႆပုၵ်ႈ ႑႓႐)

တၢင်ႇသင်ႇၵႃႇယၼႃႇ ပွၵ်ႈၵမ်းထီႉသွင်

မိူဝ်ႈပၢင်ပွႆးတၢင်ႇသင်ႇၵႃႇယၼႃႇ ပွၵ်ႈၵမ်းထီႉၼိုင်ႈၼၼ်ႉ မိူဝ်ႈၽြႃးပဵၼ်ၸဝ်ႈ ပႆႇဢဝ်ပရိၼိပ်ႉပၢၼ်ႇသင်ႇဝႆႉဝႃႈ သိၵ်ႉၶႃႇပုတ်ႉ ဢၼ်လဵၵ်ႉၼွႆႉၸိူဝ်းၼၼ်ႉ ၶႂ်ႈထွတ်ႇထွၼ်ၵေႃႈလႆႈယူႇ ၼႆယဝ်ႉ။ ၵူၺ်းၵႃႈ ၵဵဝ်ႇလူၺ်ႈၶေႃႈသင်ႇဢၼ်ၼၼ်ႉသေ ၸဝ်ႈဢႃႇၼၼ်ႇတႃႇယင်းဢမ်ႇလႆႈတွင်ႈထၢမ်ၽြႃးပဵၼ်ၸဝ်ႈသေၶႃႈ ၼႆ၊ လွင်ႈဢမ်ႇလႆႈတွင်ႈထၢမ်ၼၼ်ႉၵေႃႈ ပွင်ႇၸႂ်ဝႃႈ ဢမ်ႇတၢပ်ႈလူဝ်ႇထွတ်ႇထွၼ်သိၵ်ႈၶႃႇပုတ်ႉဢၼ်လႂ် ၼႆယဝ်ႉ။ မိူဝ်ႈတၢင်ႇသင်ႇၵႃႇယၼႃႇပွၵ်ႈၵမ်းထီႉၼိုင်ႈၼၼ်ႉ သိၵ်ႉၶႃႇပုတ်ႉ ဢၼ်တေလႆႈထွတ်ႇထွၼ်ပဵၼ်ဢၼ်လႂ်ၼႆ ဢုပ်ႇၵုမ်ၵၼ်ယဝ်ႉ ဢမ်ႇမီးသိၵ်ႉၶႃႇပုတ်ႉ ဢၼ်တေလႆႈထွတ်ႇထွၼ်ၼႆလႄႈ ၸင်ႇတႅပ်းတတ်း ဢမ်ႇထွတ်ႇထွၼ်ဢၼ်လႂ်သေ ဢွၼ်ၵၼ်ၵျၢင်ႉၵမ်ၵႂႃႇၸွမ်းပၵ်းၵဝ်ႇပိူင်ၵဝ်ႇမၼ်းၵွႆးၼႆယူႇယဝ်ႉ။

ၵူၺ်းၵႃႈဝၢႆးသေ တၢင်ႇသင်ႇၵႃႇယၼႃႇပွၵ်ႈၵမ်းထီႉၼိုင်ႈယဝ်ႉ ရႁၢၼ်းၵမ်ႈၽွင်ႈ (ဢထမ်ႇမဝႃႇတီႇ) ဢဝ်ဝိၼီးဢၼ်ယွမ်းယၢၼ်းတင်းၼမ်ၸိမ်ၶဝ်ႈမႃးသေ ၵျၢင်ႉၵမ်ႁဵတ်းၸွမ်းယူႇယဝ်ႉ။

ရႁၢၼ်းၶဝ် ၸိူဝ်းၵျၢင်ႉၵမ်ၸွမ်းဝိၼီးၸဝ်ႈၼၼ်ႉ ၸင်ႇဢွၼ်ၵၼ်ႁႄႉႁၢမ်ႈႁၢဝ်ႈႁၢဝ်ႈႁႅင်းႁႅင်းယဝ်ႉ။ ၵွပ်ႈၼၼ်လႄႈ ရႁၢၼ်းၶဝ်ၼင်ႇၵၼ် လႆႈထဵင်ၵၼ်မေႃးၵၼ်မႃးယဝ်ႉ။ ၼင်ႇႁိုတေၸၢင်ႈၵႄႈလိတ်ႈ ဢထမ်ႇမဝႃႇတီႇၶဝ်ၼၼ်ႉ ဢဝ်တၢင်ႈၵမ်ႉၸွႆႈၶုၼ်ႁေႃၶမ်းမိူင်းဝေႇသႃႇလီႇ ၵႃႇလႃႇသေႃးၵသေ ႁဵတ်းသၢင်ႈပၢင်ပွႆးတၢင်ႇသင်ႇၵႃႇယၼႃႇပွၵ်ႈၵမ်းထီႉသွင်ယူႇယဝ်ႉ။ တီႈပၢင်ပွႆးၼၼ်ႉ လိူၵ်ႈဢဝ်ရႁၢၼ်း ႗႐႐ တူၼ်သေ ၸဝ်ႈယသဢွၼ်ႁူဝ်ၼၢမ်းၼႃႈယဝ်ႉ တၢင်ႇသင်ႇၵႃႇယၼႃႇလႄႈ ၸင်ႇႁွင်ႉဝႃႈ "သတ်ႉတသတီႇသင်ႇၵႃႇယၼႃႇ" ၼႆယူႇယဝ်ႉ။

ရႁၢၼ်းဝိတ်ႉၸီႇ ၸိူဝ်းၸုမ်းသၢၼ်ၶတ်းၶဝ်သမ်ႉ ဢမ်ႇယိုၼ်ႁပ်ႉႁဵတ်းၸွမ်းၼင်ႇ ဢၼ်ပၢင်တၢင်ႇသင်ႇၵႃႇယၼႃႇ ပွၵ်ႈၵမ်းသွင်တႅပ်းတတ်းၼၼ်ႉ။ ဢွၼ်ဢဝ်ရႁၢၼ်းဝၸီႇႁဵင်ၼိုင်ႈသေ ၸင်ႇတၢင်ႇသင်ႇၵႃႇယၼႃႇႁင်းၶဝ်ၵွႆးၶေႃၶေႃယူႇယဝ်ႉ။ ပၢင်တၢင်ႇသင်ႇၵႃႇယႃၼႃႇၶဝ်ၼၼ်ႉ ယွၼ်ႉပိူဝ်ရႁၢၼ်းၼမ်လႄႈ ၸင်ႇတၢင်ႇၸိုဝ်ႈဝႃႈ "မႁႃႇသင်ႇၵီႇတိ ၵိူင်းမႁႃႇသင်ႇၵိၵ" ၼႆယူႇယဝ်ႉ။

တၢင်ႇသင်ႇၵႃႇယၼႃႇပွၵ်ႈၵမ်းထီႉသၢမ်

ၶုၼ်လူင်ဢႃႇသေႃးၵၼႆႉ လႆႈထူပ်းႁၼ်သႃႇမၼေႇ ၸဝ်ႈဢၼ်ပဵၼ်ၼွင်ႉၸၢႆးမၼ်း သုမၼၼၼ်ႉသေ ပွင်ႇၸႂ်တြႃးၽြႃးပဵၼ်ၸဝ်ႈမႃး။ ဝၢႆးၼၼ်ႉ တိုၵ်းသိုၵ်းတေႃႇမိူင်းၵလင်ႇၵသေ လႆႈထူပ်းႁၼ်လွင်ႈလူႉသုမ်းၵူၼ်းမိူင်းသေ မၼ်းၸဝ်ႈၸင်ႇတူၵ်းၸႂ်ၵႂႃႇ။ ဝၢႆးမႃးတေဢမ်ႇတိုၵ်းသိုၵ်းတေႃႇမိူင်းလႂ်ယဝ်ႉၼႆ တႅပ်းတတ်းၸႂ်မၼ်း။ ဝၢႆးၼၼ်ႉ သွၼ်ႁဵၼ်းဢဝ် ပရိယတ်ႉတိတီးၸဝ်ႈမႁႃႇမွၵ်ႉၵလိပုတ်ႉတတိသ်သသေ သွၼ်ႁဵၼ်းဢဝ် ပရိပတ်ႉတိတီး ၸဝ်ႈဢုပၵုတ်ႉတလႄႈ ၵျၢင်ႉၵမ်ၵႂႃႇၸွမ်းလႄႈ လႆႈပဵၼ်ရႁၢၼ်းတႃႇၵႂႃႇ။ ယၢမ်းၼၼ်ႉ ၼႂ်းၸႂ်မၼ်းၼႆႉ "ဢေႁိပသ်ဝိၵေႃ" သၽႃႇဝထမ်ႇမလုၵ်ႉတိုၼ်ႇမႃးလႄႈ ၸင်ႇၶပ်းၶိုင်ႁႂ်ႈၶႃႈဝၢၼ်းၵူၼ်းမိူင်းပေႃးလႆႈပွင်ႇၸႂ်ၼိူဝ်ထမ်ႇမတြႃးၵႂႃႇယူႇယဝ်ႉ။

ဢဝ်တၢင်းၵမ်ႉပၢမ်ႉၶုၼ်လူင် ဢႃႇသေႃးၵသေ ၸဝ်ႈမႁႃႇမွၵ်ႉၵလိပုတ်ႉတတိသ်သ ဢွၼ်ႁူဝ်ယဝ်ႉ ၸင်ႇတၢင်ႇသင်ႇၵႃႇယၼႃႇပွၵ်ႈၵမ်းသၢမ် တီႈၵျွင်းဢႃႇသေႃးၵႃႇရုင်ႇ မိူင်းပႃႇတလိပုတ်ႉၼၼ်ႉယူႇယဝ်ႉ။

ဝၢႆးသေ ပၢင်ပွႆးတၢင်ႇသင်ႇၵႃႇယၼႃႇပွၵ်ႈၵမ်းသွင်ယဝ်ႉ သႃႇသၼႃႇဝွတ်ႈဝွႆးမႃးသေ ထမ်ႇမဢၼ်ပွမ်မၼ်းၸင်ႇၽုတ်းငွၵ်ႈႁူဝ်မႃးယူႇယဝ်ႉ။

ၽြႃးပဵၼ်ၸဝ်ႈဝႃႈ "ပေႃးဝႃႈထမ်ႇမဢၼ်ပွမ်မၼ်းၽုတ်းပေႃႇမႃးၼႆ ထမ်ႇမဢၼ်ၸႅတ်ႈဢၼ်ၸိုဝ်ႈၸႂ်ႈမၼ်းတေၸူမ်ႁၢႆၵႂႃႇဢိူဝ်ႈ" ၼႆယူႇယဝ်ႉ။

(သံ၊ ၼီ၊ ႒.႕.႑႖႕၊ ၵသ်သပသံယုတ်တ)

ၸဝ်ႈမႁႃႇမွၵ်ႉၵလိပုတ်ႉတတိသ်သၼႆႉ ၼင်ႇႁိုဝ်တေတိုတ်ႉၸၼ်လႆႈ ၸိူဝ်းပႆၼိူဝ်တၢင်းၽိတ်းၼၼ်ႉ ၸင်ႇတႅမ်ႈၽိုၼ်ပပ်ႉ "ၵထႃႇဝတ်ႉထု" ယဝ်ႉ။ ၽိုၼ်ပပ်ႉဢၼ်ၼႆႉ ဢဝ်ၵိုၵ်းႁွမ်းပႃးၸွမ်း မိူဝ်ႈတၢင်ႇသင်ႇၵႃႇယၼႃႇပွၵ်ႈၵမ်းထီႉသၢမ်ၼၼ်ႉယဝ်ႉ။ တီႈပၢင်တၢင်ႇသင်ႇၵႃႇယၼႃႇၼၼ်ႉ ၶဝ်ႈပႃးရႁၢၼ်းႁဵၼ်ၼိုင်ႈယူႇယဝ်ႉ။ ဝၢႆးသေပၢင်ပွႆးယဝ်ႉ မထေႇၶဝ်ၸဝ်ႈ ၸင်ႇႁႂ်းဢွၵ်ႇႁႃပိုၼ်ၽႄႈသႃႇသၼႃႇၵဝ်ႈတိူင်း ၵဝ်ႈမိူင်းၼင်ႇပႃႈတႂ်ႈၼႆႉယူႇယဝ်ႉ။

႑။ ꧤတ်ႉၻၼ်တမꩡ်ၸုၼ်တိၵ - မိူင်းၵသ်မီရလႄႈ ၵၼ်ထႃႇရ
႒။ ꧤတ်ႉၻၼ်တမႁႃၻေဝ - မႁိဝၵမၼ်တလ
႓။ ꧤတ်ႉၻၼ်တတရၵ်ၶိတ - ဝၼဝႃသီ
႔။ ꧤတ်ႉၻၼ်တမႁႃꩪမ်မရၵ်ၶိတ - မႁႃရသျ
႕။ ꧤတ်ႉၻၼ်တရၵ်ၶိတ - တိူင်းယေႃၼၵလေႃၵ
႖။ ꧤတ်ႉၻၼ်တမꩡ်ၸိမ၊ ၵသ်သပၷုတ်တ - ႁိမဝၼ်တႃ ဢꩮၵၻေဝ၊ ၻုၼ်ၼုၵိသ်သရ၊ မႁႃၻေဝ
႗+႘။ ꧤတ်ႉၻၼ်တသေႃꧣ၊ ဢုတ်တရ - သုဝꧣ်ꧣၽုမိ (ထႆး+မၢၼ်ႈ)
႙။ ꧤတ်ႉၻၼ်တမႁိၼ်တ - တမ်ပပꧣ်ꧣိ (သီရိလင်းၵႃ)

ၸဝ်ႈရႁၢၼ်းတႃႇမထေႇၶဝ်ႈၸဝ်ႈၼႆႉ ပုၼ်ႈတႃႇသႃႇသၼႃႇတေႁိူဝ်ႈႁိူင်းပိူင်းသႂ်ၵူႈတီႈၵူႈမိူင်းၼၼ်ႉ ဢွၼ်ၵၼ်ၶတ်းၸႂ်သႂ်ႇႁႅင်းတႄႉတႄႉဝႃႈဝႃႈယဝ်ႉ။ လွင်ႈၶတ်းၸႂ်ၸဝ်ႈဢုတ်ႉတရလႄႈ မႁိၼ်ႇတၶဝ်ၼႆႉ ၵိုမ်းမၼ်ႈၵႂႃႇသေ ပဵၼ်ၽွင်းလီတႄႉတႄႉ။ မိူင်းၸိူဝ်းဢၼ် ၶဝ်ၸဝ်ႈပိုၼ်ၽႄႈသႃႇသၼႃႇမႃးၼၼ်ႉ သႃႇသၼႃႇၸဝ်ႈၼႆႉ တိုၵ်ႉႁိူဝ်ႈႁိူင်းပိူင်းသႂ်သေ ၵိုမ်းမၼ်ႈဝႆႉယူႇတေႃႇယၢမ်းလဵဝ်ယဝ်ႉ။

ၽိုၼ်ဢိင်

ၼႃႈလိၵ်ႈ ႑႐႘၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)