မႁႃႇမႃႇယႃႇတေႇဝီႇ ၼွၼ်းၾၼ်

လုၵ်ႉတီႈ ဝီႇၶီႇၽီးတီးယႃး ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉမႃး

ၸွမ်းၼင်ႇၽြႃးပဵၼ်ၸဝ်ႈတီႇပင်ႇၵရႃႇ ပၼ်ပျႃႇတိတ်ႉၼၼ်ႉသေ ၽွင်းယၢမ်းလၢႆၵမ်ႇၽႃႇ ဢၼ်ဢေႃးဢမ်ႇၼပ်ႉဢၢၼ်ႇလႆႈၼၼ်ႉ လႆႈပဵၼ်ၸူဝ်ႈပၢၼ်ၽဝ ဢမ်ႇၼပ်ႉဢၢၼ်ႇလႆႈသေ ထႅမ်သၢင်ႈပႃႇရမီႇသိပ်းပိူင် (ပုၼ်ႈတႃႇလွတ်ႈဢွၵ်ႇသမ်ႇသရႃႇၼၼ်ႉ ထႅမ်သၢင်ႈပႃႇရီႇ ႁႂ်ႈပေႃးတဵမ်ထူၼ်ႈသေ ၼမ်ႉၵတ်ႉၸိူဝ်းၼၼ်ႉ) ၵေႃႈ တဵမ်ထူၼ်ႈသေ ၸဝ်ႈရသေးသုမေႇထႃႇၼႆႉ လႆႈၵႂႃႇပဵၼ်ၶုၼ်ၽီ သေတၵေတု တီႈမိူင်းၽီၼၼ်ႉ ၸဝ်ႈၼိုင်ႈယူႇယဝ်ႉ။

ပႃႇရမီႇသိပ်းပိူင် ဢၼ်ၸဝ်ႈထႅမ်သၢင်ႈမႃးတႄႉ

  1. တႃႇၼပႃႇရမီႇ
  2. သီႇလပႃႇရမီႇ
  3. ၼိၵ်ႉၶမပႃႇရမီႇ
  4. ပၺ်ႇၺႃႇပႃႇရမီႇ
  5. ဝီႇရိယပႃႇရမီႇ
  6. ၶၼ်ႇတီႇပႃႇရမီႇ
  7. သတ်ႉၸႃႇပႃႇရမီႇ
  8. ဢတိတ်ႉထၢၼ်ႇပႃႇရမီႇ
  9. မႅတ်ႉတႃႇပႃႇရမီႇ
  10. ဢုပႅၵ်ႉၶႃႇပႃႇရမီႇ ၸိူဝ်းၼၼ်ႉယူႇယဝ်ႉ။


တႃႇတေပဵၼ်ၽြႃးသပ်ႉပၺ်ႇၺုတၼၼ်ႉ ထႅမ်သၢင်ႈပႃႇရမီႇသိပ်းပိူင် ဢၼ်လူဝ်ႇၼၼ်ႉယဝ်ႉတူဝ်ႈသေ ဝၢႆးၽဝၶုၼ်ၽီယဝ်ႉ ၽဝၼေႃႇၶမ်းၽြႃးၸဝ်ႈၼႆႉ ပဵၼ်ၽဝၵမ်းလိုၼ်းသုတ်း ၼႂ်းသမ်ႇသရႃႇယဝ်ႉ။ လွင်ႈတၢင်းမၼ်းတႄႉ ယွၼ်ႉပိူဝ်ႈၽဝၼၼ်ႉ တေလႆႈပဵၼ်ၽြႃး သမ်ႇမႃႇသမ်ႇပေႃးထိ ဢၼ်လႆႈသပ်ႉပၺ်ႇၺုတၺၢၼ်ႇႁင်းၵွႆးသေ တေလွတ်ႈဢွၵ်ႇပူၼ်ႉသမ်ႇသရႃႇ ဢၼ်လႆႈၵိူတ်ႇလႆႈတၢႆၼၼ်ႉယူႇယဝ်ႉ။

ၶုၼ်ၽီသေႇတၵေတုၼႆႉ လိူၵ်ႈႁႃဢွင်ႈတီႈ၊ လိူၵ်ႈႁႃၸိူဝ်ႉၶိူဝ်း၊ လိူၵ်ႈႁႃၶၢဝ်းယၢမ်း ပုၼ်ႈတႃႇၽဝၵမ်းလိုၼ်းသုတ်းၸဝ်ႈၵဝ်ႇသေ လိူၵ်ႈႁႃတႃႇတေ ၶဝ်ႈယူႇၼႂ်းၵူင်တွင်ႉမႄႈၸဝ်ႈ တႃႇၼေႃႇၶမ်းၸဝ်ႈယူႇယဝ်ႉ။

ၼၢင်းၶၢဝ်းႁူဝ် ၸဝ်ႈႁေႃၶမ်းလူင် သီႇရိသုတ်ႉထေႃးတၼ ၶိူဝ်းသၵျ သႃႇၵီႇဢၼ်ပဵၼ်မႁႃႇမႃႇယႃႇတေႇဝီႇၼႆႉ ၼွၼ်းယူႇၼႂ်းၶွင်ႉၼွၼ်းၸဝ်ႈၼၢင်းၼၼ်ႉ။ မိူဝ်ႈၽွင်းၼွၼ်းလပ်းယူႇၼၼ်ႉ ၸင်ႇၼွၼ်းၾၼ်ႁၼ်ၼင်ႇပႃႈတႂ်ႈၼႆႉယူႇယဝ်ႉ။

ၸၢင်ႉၽိူၵ်ႇလူင် ဢၼ်မီးၾၢင်ႁၢင်ႈၶုၼ်ၸၢင်ႉသတ်ႉတၢၼ်ႇတဵမ်ထူၼ်ႈတူဝ်ၼိုင်ႈၼၼ်ႉ ဢဝ်ငူင်းမၼ်းယုၵ်ႉဢဝ်မွၵ်ႇမူဝ်ၶၢဝ် ဢၼ်ႁၢင်ႇလီၼႃႇၸိူဝ်းၼၼ်ႉ ၽႅဝ်မႃးၼႂ်းၶွင်ႉၼွၼ်းသေ ပၼ်ႇလဵပ်ႈၸဝ်ႈၼၢင်းမႁႃႇမႃႇယႃႇတေႇဝီႇသၢမ်ႁွပ်ႈယဝ်ႉ ၶုပ်ႉၶဝ်ႇၸူးၸဝ်ႈၼၢင်းယူႇ၊ ဝၢႆးၼၼ်ႉ ၸင်ႇၼွမ်းႊႁူဝ်ၸူးၸဝ်ႈၼၢင်းသေ ၶဝ်ႈၵႂႃႇၼႂ်းၵူင်တွင်ႉၸဝ်ႈၼၢင်းမႁႃႇမႃႇယႃႇတေႇဝီႇ ၼၼ်ႉယူႇယဝ်ႉ။

ပုၼ်ႈတႃႇလႆႈလႄႇသၼ်ႇထေႇၼႂ်းၵူင်တွင်ႉပွၵ်ႈၼႆႉ ပဵၼ်ပွၵ်ႈၵမ်းလိုၼ်းသုတ်း တႃႇၼေႃႇၶမ်းၽြႃးပုတ်ႉထၸဝ်ႈယဝ်ႉ။ ၽွင်းယၢမ်းမီးယူႇၼႂ်း သၼ်ႇထေႇၼၼ်ႉ ၸဝ်ႈၼၢင်းမႁႃႇမႃႇယႃႇတေႇဝီႇၼႆႉ ဝႄႈၵမ်လွင်ႈၶုၼ်ႉႁၼ်ၵႃႇမဢႃႇရုမ်ႇ တင်ႈလူင်သေ ၸွမ်းပၵ်းပိူင်ပိင်းၺၢပ်ႈၵူႈဢၼ် ဢၼ်ထုၵ်ႇလီလႆႈၸွမ်းၼၼ်ႉသဵင်ႈသဵင်ႈယူႇယဝ်ႉ။ ၵၢၼ်ၼမ်ႉသႃမူးၸႃး ႁဵတ်းဝၢတ်ႈ ဢၼ်ပဵၼ်ထုင်းၾိင်ႈ ၸၢဝ်းၶိူဝ်းသႃႇမၼ ၶဝ်ၸိူဝ်းၼၼ်ႉၵေႃႈ ၵိုတ်းယိုဝ်းဝႆႉတင်းမူတ်း။ ၸဝ်ႈၼၢင်းမႁႃႇမႃႇယႃႇတေႇဝီႇၼႆႉ လူင်ႉလႅၼ်ႇ လူလွမ် လုမ်းလႃးလုၵ်ႈလၢင်းၸဝ်ႈၼၢင်း ဢၼ်လႆႈပႃးဝႆႉ သိပ်းလိူၼ်လုမ်းလုမ်းၼၼ်ႉယူႇယဝ်ႉ။


ၽိုၼ်ဢိင်[မႄးထတ်း | မႄးထတ်းငဝ်ႈငႃႇ]

ၼႃႈလိၵ်ႈ ႙၊ ပပ်ႉ - ႁၢင်ႈပိုၼ်းပုတ်ႉထၸဝ်ႈ| တႅမ်ႈ - သြႃႇလူင်ဢူးၵူဝ်ႇဢိင်ႇၵႃႇ (ၽူႈၼႄတြႃးဝိပသ်သၼႃႇလုမ်ႈၾႃႉ)