ၼမ်ႉၵဵဝ်

ၼမ်ႉၵဵဝ်
ၶူဝ်ႇမႂ်ႇၼမ်ႉၵဵဝ် (ယတၼႃႇပူင်ႇ) ဢၼ်မီးတီႈ ၸေႈၵႅင်း၊ မီးၽၢႆတူၵ်း ၶူဝ်ဢႃႇဝႃႉ။
တၢင်းယၢဝ်း	1350 -လၵ်း
ထုင်ႉ ၸိူဝ်းလတ်းလူင်းမႃး	ၸႄႈမိူင်းၶၢင်၊ ၸႄႈတိူင်းတႃႈလိူဝ်ႇ၊ ၸႄႈတိူင်းၸေႈၵႅင်း၊ ၸႄႈတိူင်းမၵူၺ်း၊ ၸႄႈတိူင်းဢေႇယႃႇဝတီႇ၊ ၸႄႈတိူင်းတႃႈၵုင်ႈ
ၵဵင်ႇမႄႈၼမ်ႉ	ၼမ်ႉတႃပၢင်ႇ၊ ၼမ်ႉတူ၊ ၼမ်ႉမၢဝ်း၊ ၼမ်ႉမူး၊ ၼမ်ႉၶၢင်တွင်း၊
တၢင်းၵႂၢင်ႈသၢႆမႄႈၼမ်ႉလူင်း	158700-လွၵ်းလၵ်း (411000-လွၵ်းၶီႇလူဝ်ႇမီႇတႃႇ)
တီႈလိူၼ်ႈၶဝ်ႈၸူး	ပၢင်ႇလၢႆႇမုၵ်ႉတမ၊ ပၢင်ႇလၢႆၵပ်ႉပလီႇ၊

ၼမ်ႉၵဵဝ် ဢၼ်လႆႈတၢင်ႇၸိုဝ်ႈဝႃႈ ပဵၼ်သၢႆၸႂ်လိူတ်ႈ မိူင်းမၢၼ်ႈၼၼ်ႉ ပဵၼ်ဢၼ်တိုၼ်ႈမႃးလွႆးလွႆးယူႇယဝ်ႉ။

မႄႈၼမ်ႉၵဵဝ် (မၢၼ်ႈ: ဧရာဝတီမြစ်), ဢၼ်ဢၢင်းၵိတ်ႉၶဝ်ႁွင်ႉဝႃႈ (ဢိင်းၵလဵတ်ႈ: Irrawaddy) ဢမ်ႇၼၼ် Ayeyarwady ၼၼ်ႉ လုၵ်ႉဢဝ်ပွတ်းႁွင်ႇ မိူင်းမၢၼ်ႈ လိူၼ်ႈလူင်းၸူး ပွတ်းၸၢၼ်းယဝ်ႉ။ မႄႈၼမ်ႉၵဵဝ်ၼႆႉ ပဵၼ်မႄႈၼမ်ႉ ဢၼ်ယႂ်ႇသေပိူၼ်ႈ၊ ဢၼ်ယၢဝ်းသေပိူၼ်ႈ လႄႈ ဢၼ်ၶဝ်ႈတၢင်းတိုဝ်းသေပိူၼ်ႈ ၼႂ်းမိူင်းမၢၼ်ႈယဝ်ႉ။ လုၵ်ႉတီႈ မႄႈၼမ်ႉဢင်ႇမႂ်ႇၶ (မေႇၶ) လႄႈ မလိၶ (မႄႈၼမ်ႉ မိူဝ်းၶႃႈ၊ မဝ်လီၶႃႈ)မႄႈၼမ်ႉ သွင်ဢၼ် ႁူမ်ႈၵၼ်သေ ပဵၼ်မႃး မႄႈၼမ်ႉၵဵဝ်သေ မၼ်းလုၵ်ႉ ပွတ်းႁွင်ႇ လႆလူင်း ပွတ်းၸၢၼ်းသိုဝ်ႈသိုဝ်ႈသေ လတ်းၶၢမ်ႈ ၵုၼ်သူပ်းမႄႈၼမ်ႉသေၵေႃႈ လႆၶဝ်ၸူး ပၢင်ႇလၢႆႇ ၵပ်ႉပလီႇယူႇယဝ်ႉ။ တီႈၵႂၢင်ႈၼမ်ႉလႆလူင်းမၼ်း မီးယူႇ ၶီႇလူဝ်ႇမီႇတိူဝ်ႇ 413,000 ပတ်ႇႁွပ်ႈယဝ်ႉ။ တႄႇမိူဝ်ႈ ဢေႇတီႇ (6) ပၢၵ်ႇပီမိူင်းၼၼ်ႉ မႄႈၼမ်ႉၵဵဝ်ၼႆႉ မၼ်းပဵၼ် သၢႆမႄႈၼမ်ႉ ဢၼ်လႆႈၸႂ်ႉ တွၼ်ႈတႃႇ သၢႆတၢင်းၵႃႉၶၢႆၵုၼ်ႇမႃႈ။ ပၢၼ်ၶူဝ်ႇလူဝ်ႇၼီႇ ဢင်းၵိတ်ႉမႃးၵေႃႈ လႆႈႁဵတ်းၽၢႆ တွၼ်ႈတႃႇပၢႆးၽုၵ်ႇသွမ်ႈသေ လႆႈမီးၼမ်ႉတွၼ်း တွၼ်ႈတႃႇ ၵၢၼ်ၽုၵ်ႇသွမ်ႈမႃးယူႇ။ တေႃႇထိုင်ဝၼ်းမိူဝ်ႈၼႆႉၵေႃႈ မႄးၼမ်ႉၼႆႉ တိုၵ်ႉၶဝ်ႈတင်းတိုဝ်း ၶိုၵ်ႉၶိုၵ်ႉၶမ်ႇၶမ်ႇဝႆႉယူႇ။ ၵုၼ်သူပ်းမႄႈၼမ်ႉၵဵဝ်ၼႆႉ မၼ်းပဵၼ် ထုင်ႉၽုၵ်ႇသွမ်ႈၶဝ်ႈ ၸိုဝ်ႈသဵင်ယႂ်ႇ ဢၼ်ၼိုင်ႈယဝ်ႉ။ လွင်ႈလၢၵ်ႇလၢႆး မႄႈၼမ်ႉၵဵဝ်တႄႉ တီႈပွတ်းၽၢႆၼိူဝ် ၼမ်ႉၵဵဝ်ၼႆႉ မၼ်းမီး ပႃၼူမ်းၼၢင်းၵဵဝ် ၶဝ်ယူႇသဝ်းႁႃၵိၼ်ဝႆႉ ၼႆယဝ်ႉ။ ဢၼ်ပဵၼ် ပႃၼူမ်းၼၢင်းၵဵဝ်ႇၼႆႉ ယၢမ်းလဵဝ် ယွၼ့်မၼ်းပဵၼ် ပႃဢၼ်ၼၢၼ်းႁၼ်၊ ဢၼ်ၵိုတ်းဢေႇယဝ်ႉလႄႈ လႆႈႁၼ် ၽိုၼ်ႇၽၢဝ်ႇ တႃႇၵႅတ်ႇၶႄႁေႉၵင်ႈပၼ် ၶဝ်ယူႇ။

ၸိုဝ်ႈတႄႇပဵၼ်မႃး

ဧရာဝတီနှင့် ယင်း၏မြစ်လက်တက်များ

ၼမ်ႉၵဵဝ်ၼႆႉ ၽၢႆႇမၢၼ်ႈလႄႈ ၵူၼ်းၼႂ်းၵမ်ႇၽႃႇ ဢွၼ်ၵၼ် ႁွင်ႉဝႃႈ ဢေႇရႃႇဝတီႇၼႆသေ လုၵ်ႉတီႈ ၶေႃႈၵႂၢမ်း သၼ်းသၶရိၵ်ႉမႃး၊ တီႈပွင်ႇမၼ်းဝႃႈ ၼမ်ႉၸၢင်ႉၼႆယဝ်ႉ။ ၽၢႆႇတႆးတႄႉ ဢွၼ်ၵၼ် ႁွင်ႉဝႃႈ ၼမ်ႉၵဵဝ်ၼႆသေတႃႉ သဵင်ဢွၵ်ႇတႆးၶမ်းတီႈ ဢၼ်ယူႇထုင်ႉၼမ်ႉၵဵဝ်ပွတ်းၼိူဝ်ၼၼ်ႉတႄႉ ၶဝ်ႁွင်ႉဝႃႈ ၼမ်ႉၵဵဝ်းၼႆယဝ်ႉ။ "ၵဵဝ်း" ဢၼ်ဝႃႈၼၼ်ႉ ပွင်ႇဝႃႈ "ၵႅဝ်ႈ" ၼႆၵူၺ်းၼင်ႇၵဝ်ႇ၊ ၶေႃႈၵႂၢမ်းဢၼ်ဝႃႈ ၵႅဝ်ႈၼႆႉ တႆးၼိူဝ် တႆးမၢဝ်း ဢွၵ်ႇသဵင်ဝႃႈ "ၵဵဝ်ႈ" ၼႆယူႇ။ ၵွပ်ႈၼႆ ၵဵဝ်၊ ၵဵဝ်း၊ ၵဵဝ်ႈ၊ ၵႅဝ်ႈ ၸိူဝ်းၼႆႉ မီးတီႈပွင်ႇဝႃႈ "ရတၼႃႇ" ၼႆယူႇ။ ၼမ်ႉၵဵဝ်ဢၼ်ဝႃႈၼၼ်ႉ ပွင်ႇဝႃႈ ၼမ်ႉဢၼ်မီးရတၼႃႇ၊ ၼမ်ႉဢၼ်မီး ၵႃႈၶၼ်ယႂ်ႇၼႆယဝ်ႉ။

မႄႈၼမ်ႉ ၸိုဝ်ႈမိူၼ်ၵၼ်

မိူဝ်ႈၵွၼ်ႇ ႁိုင်လွၼ်ႇၼၼ်ႉတႄႉ ၸိုဝ်ႈမႄႈၼမ်ႉ ဢၼ်ႁွင်ႉဝႃႈ ဢေႇရႃႇဝတီႇၼႆႉ မီးသွင်မႄႈၼမ်ႉ။ မႄႈၼိုင်ႈ ႁွင်ႉဝႃႈ ပႃႇရုသျေႇၼီႇ (Parushani) သေ ပဵၼ်ဢေႇရႃႇဝတီႇ ၼမ်ႉၵဵဝ်ၼင်ႇၵဝ်ႇ။ ၼမ်ႉၼၼ်ႉ ယၢမ်းလဵဝ် လုၵ်ႉတီႈ မိူင်းဢိၼ်ႇတိယသေ ၶဝ်ႈၸူးၼႂ်းမိူင်း ပႃႇၵိတ်ႉၸတၢၼ်ႇ။ ယၢမ်းလဵဝ် ၵူၼ်းၸိူဝ်းယူႇၸွမ်း သၢပ်ႇၼမ်ႉၼၼ်ႉ ဢဝ်ၸွမ်းၼင်ႇ ၽႃႇသႃႇတီႈၵိူဝ်းယမ်သေ ႁွင်ႉဝႃႈ "ရႃႇဝီႇ" ၼႆယဝ်ႉ။

မႄႈၼမ်ႉၶွႆႈ သူပ်းပွင်ႇၼမ်ႉၵဵဝ်

ၼမ်ႉၵဵဝ် ဢေႇရႃႇဝတီႇၼႆႉ တၢင်းယၢဝ်းမၼ်းမီးယူႇ 1300 လၵ်းလိူဝ်လိူဝ်သေ လုၵ်ႉတီႈ ၸႄႈမိူင်းၶၢင် လႆလူင်းမႃး။ ၽၢႆႇမၢၼ်ႈတႄႉ မၵ်းမၢႆဝႃႈ ၼမ်ႉမိူဝ်းၶႃႈ (မေႇၶ) လႄႈ ၼမ်ႉမလီၶႃႈ (မလိၶ) သွင်မႄႈ မႃးႁွမ်းၵၼ် ၽၢႆႇၼိူဝ်ဝဵင်းမျိတ်ႉၵျီးၼႃးသေ ပဵၼ်မႃး မႄႈၼမ်ႉဢေႇရႃႇဝတီႇၼႆယဝ်ႉ။ ဢွင်ႈတီႈ သူပ်းပွင်ႇၼမ်ႉၵဵဝ် ဢၼ်ႁွင်ႉဝႃႈ ၼမ်ႉၶွႆႈၵၼ်ၼၼ်ႉ ၵတ်းၸိုၼ်ႈလီတႄႉ။ ယွၼ်ႉၼမ်ႉတိုၼ်ႈလႄႈ လႆႈႁၼ်ပိုၼ်ႉၼမ်ႉသေ ပႃၸိူဝ်းၼႆႉၵွၼ်ႇ။ ႁၢတ်ႇႁိၼ် တီႈသူပ်းၼမ်ႉၵဵဝ်ၵေႃႈ ႁၢင်ႈလီတႄႉတႄႉသေ ပေႃးတၢၼ်ႇ တင်ႈၸႂ်ၶပ်ႉၵၼ်ဝႆႉယဝ်ႉ။

ၼမ်ႉၵဵဝ်ၼႆႉ ပေႃးၽႅဝ်တီႈႁိမ်း ၸႄႈၼႃးၼၼ်ႉ ၵႂၢင်ႈဝႆႉ မွၵ်ႈႁႃႈပၢၵ်ႇဝၢႆႈၼႆႉယဝ်ႉ။ တီႈၼၼ်ႈၼၼ်ႉ မီးၽင်ႇႁိုၵ်းဢၼ်လိုၵ်ႉဝႆႉသေ တီႈၼိူဝ်ၽင်ႇ ၽင်ႇႁိုၵ်းၼၼ်ႉ ပႃႇထိူၼ်ႇပႃႇမႆႉ ဢွၵ်ႇပေႃးၶဵဝ်ဝႆႉယူႇယဝ်ႉ။ ပေႃးလုၵ်ႉတီႈ ၸႄႈၼႃး လွင်ႈၸွမ်းသၢႆတၢင်း တႃႇ 48 လၵ်း တီႈႁိမ်း ဝၢၼ်ႈတႃႈႁူဝ်ၼႃးၼၼ်ႉ တီႈဢၼ်သႅင်ၶဵဝ် လႄႈ ပယိၼ်းဢွၵ်ႇ တေလႆႈႁၼ် ဢၼ်ပဵၼ် ႁွင်ႈဢွၼ်ႇမိူင်းၵွင်း ဢၼ်မႃးႁူမ်ႈၸူး ၼမ်ႉၵဵဝ်ၼၼ်ႉယဝ်ႉ။ ပေႃးလုၵ်ႉတီႈၼၼ်ႉ ၶိုၼ်းလွင်ႈလႆလူင်းၼႆ မႄႈၼမ်ႉၼႆ့ တီႈၵူတ်ႉတီႈငေႃးမၼ်းၼမ်လိူဝ်မႃးယဝ်ႉ။ တီႈႁိမ်းဝၢၼ်ႈမၢၼ်ႈၽႂႃႇၼၼ်ႉ လွႆမၢၵ်ႇႁိၼ်ၸိူဝ်းၼႆႉ ၽူတ်းပေႃႇဝႆႉတီႈၼိူဝ်ၼမ်ႉယဝ်ႉ။ ၼမ်ႉပၼ်ႇၽၼ်ၸိူဝ်းၼႆႉၵေႃႈ ပဵၼ်ဝႆႉယဝ်ႉ။

ၵူတ်ႉၵႅပ်ႈမၢႆၼိုင်ႈ

ပေႃးပူၼ်ႉဝၢၼ်ႈသိၼ်ႇပူဝ်ႇယဝ်ႉၼႆ ၼမ်ႉၸႅဝ်ႈႁႅင်းမႃးယဝ်ႉ။ ပေႃးပူၼ်ႉ ဝၢၼ်ႈမျိၼ်ႇတႃႇမႃးယဝ်ႉ သၢႆတၢင်းမႄႈၼမ်ႉၵေႃႈ တိူဝ်းၵႅပ်ႈမႃးယဝ်ႉ။ ၼိုင်ႈသၢႆတၢင်းၵႅပ်ႈမႃး ၼမ်ႉတိူဝ်းၶွၼ်ႈၵၼ်မႃးယဝ်ႉ။ တင်းၽင်ႇသွင်ၽၢႆႇၼႆႉ ယၢၼ်ၵၼ်မွၵ်ႈ (50) ဝၢႆႈၼႆႉၵူၺ်းယဝ်ႉ။ ၼမ်ႉဢၼ်လုၵ်ႉတင်းၼိူဝ်သေ လေႃႈလႆလူင်းမႃးၼၼ်ႉ မႃးၽင်ႇၽၢပ်ႈသႂ်ႇလွႆမၢၵ်ႇႁိၼ်ၼၼ်ႉႁႅင်းႁႅင်းသေ ၽွင်ၼမ်ပေႃးၽူင်ႉၽိူၵ်ႇဝႆႉယဝ်ႉ။ သဵင်ၼမ် မေႃးဝေႃးဝေႃးၵေႃႈ ပေႃးယူႇတီႈၵႆသေ ငိၼ်းထွမ်ႇလႆႈယဝ်ႉ။ ဢၼ်ပဵၼ်ၽႃႁိၼ် ၸိူဝ်းမီးတီႈ ၽင်ႇၽၢႆႇပုၼ်ႉၽၢႆႇၼၼ်ႉၵေႃႈ မိူၼ်မၼ်း ႁႄႉၼမ်ႉတီႈၼၼ်ႈ တီႈၼႆႈယူႇယဝ်ႉ။ မၢၵ်ၵမ်း တီႈၼႂ်းၵၢင်သၢႆတႃၼၼ်ႉ လႆႈႁၼ်မိူၼ်လွႆလူင် ႁႄႉဝႆႉသေ သမ်ႉပေႃးလႆးထၢင်ႇဝႃႈ သၢႆတၢင်းမႄႈၼမ်ႉ ႁၢႆၵႂႃႇယဝ်ႉ။ ႁိူဝ်းၸိူဝ်းဢၼ်လႆလေႃႈလူင်းမႃးၸွမ်း သၢႆတၢင်းၼမ်ႉၼၼ်ႉ မိူၼ်ၼင်ႇပေႃးတေ ယဝ်ႈသႂ်ႇလွႆမၢၵ်ႇႁိၼ်ၼၼ်ႉသေ ၸမ်တေၽႅဝ် ၽၢႆသၢႆႉၽၢႆႇၶႂႃ လႆႈႁၼ် သၢႆတၢင်းၼမ်ႉသေ လႆႈငွၵ်းလႆႈငႅၵ်းႁူဝ်ႁိူဝ်းယဝ်ႉ။ ပေႃးဝႃႈပူၼ်ႉ ဝၢၼ်ႈမျႃႉၸေႇတီႇ ဢၼ်မီး ၽင်ႇၽၢႆႇတူၵ်းၼၼ်ႉၵေႃႈ ၵူတ်ႉမႄႈၼမ်ႉၼႆႉ ၶိုၼ်းၵႂၢင်ႈမႃးလွႆးလွႆးယဝ်ႉ။ ဢၼ်ၼႆႉၼႆႉ ပဵၼ်တီႈသုတ်း မႄႈၼမ်ႉၵူတ်းမၢႆၼိုင်ႈ ဢၼ်မီးတၢင်းယၢဝ်း 33 လၵ်းၼၼ်ႉယဝ်ႉ။

လုၵ်ႉတီႈၼၼ်ႉသေ လႆလွင်ႈၸွမ်းမႃးၸူး မၢၼ်ႈမေႃႇ မႄႈၼမ်ႉၵဵဝ်ၼႆႉ ပေႃးၽႅဝ်ႁိမ်းမၢၼ်ႈမေႃႇ လႆႈလတ်းၶၢမ်ႈ ထုင်ႉဝူဝ်ႇလိၼ်ၼုမ်ယဝ်ႉ။ ၽိဝ်ၼႃႈၼမ်ႉၼႆႉ ၵႂၢင်ႈမွၵ်ႈ ၸမ်သွင်လၵ်းၼၼ်ႉယဝ်ႉ။ တီႈႁိမ်း ၽၢႆႇၼိူဝ် ဝဵင်းမၢၼ်ႈမေႃႇၼၼ်ႉ ဢၼ်ပဵၼ် မႄႈၼမ်ႉတႃႈပဵင် ဢၼ်လုၵ်ႉတီႈ သၼ်လွႆသုင်ယူႇၼၢၼ်ႇသေ လႆႈလူင်းမႃးၼၼ်ႉ မႃးႁူမ်ႈသႂ်ႇတီႈၼႂ်း မႄႈၼမ်ႉၵဵဝ်ယူႇယဝ်ႉ။

ၵူတ်ႉၵႅပ်ႈမၢႆသွင်

ပေႃးလုၵ်ႉတီႈ မၢၼ်ႈမေႃႇသေ လွင်ႈလူင်းမႃး ယၢၼ် 18 လၵ်းသေ ပေႃးပူၼ်ႉဝၢၼ်ႈၸိၼ်းၵၢၼ်းၼႆ ၵူတ်ႉၵႅပ်ႈမၢႆသွင် တႄႇယဝ်ႉ။ သၢႆမႄႈၼမ်ႉၼႆ လုၵ်ႉတၢင်းဢွၵ်ႇလႆလူင်းတၢင်းတူၵ်းယူႇယဝ်ႉ။ လုၵ်ႉဢဝ်တီႈဝၢၼ်ႈၸိၼ်းၵၢၼ်းတေႃႇပေႃးထိုင် ဝၢၼ်ႈဢိင်းပေႃးဝိၼ်း ဢၼ်မီးၽၢႆႇၼိူဝ် ဝဵင်းသူၺ်ႇၵူႇၼၼ််ႉ ပဵၼ် တီႈ ၵူတ်ႉၵႅပ်ႈမၢႆသွင်ယဝ်ႉ။ တၢင်းယၢဝ်းမီးမွၵ်ႈ 14 လၵ်းသေ တၢင်းၵႂၢင်ႈၵူၺ်းမီး 150 ဝၢႆႈၼႆႉယဝ်ႉ။ သၢႆမႄႈၼမ်ႉၼႆႉ လႆႈလႆလူင်းၼႂ်းၵႄႈ ၽင်ႇႁိုၵ်းသုင်ယဝ်ႉ။ ပေႃးထိုင်ႁိမ်း ဝဵင်းသူၺ်ႇၵူႇၼႆ တေလႆႈႁၼ် ၵုၼ်ႁၢတ်ႇသၢႆး တီႈၼႂ်းၵၢင်ၼမ်ႉလႄႈသင် တေလႆႈႁၼ်ၵွင်းမူး ၸိူဝ်းတႄႇဝႆႉ တီႈၼိူဝ်ၵုၼ်ၼၼ်ႉလႄႈသင်ယဝ်ႉ။ သၢႆမႄႈၼမ်ႉတႄႉ သိုပ်ႇလႆလူင်းၸူး တၢင်းတူၵ်းယူႇယဝ်ႉ။ လုၵ်ႉတီႈၼၼ်ႉ သိုပ်ႇလွင်ႈလႆၵႂႃႇၼႆ တေၽႅဝ်ထိုင် ဝဵင်းၵၢတ်ႇသႃ ဢၼ်မီးဝႆႉတီႈၼိူဝ် ၽင်ႇၽၢႆႇတူၵ်းၼၼ်ႉယဝ်ႉ။ တီႈႁိမ်း ၽၢႆႇတႂ်ႈ ဝဵင်းၵၢတ်ႇသႃ ၼၼ်ႉ ဢၼ်ပဵၼ်ၼမ်ႉမၢဝ်းၼႆႉ လႆၶဝ်ႈၸူး ၼမ်ႉၵဵဝ်ယူႇယဝ်ႉ။ တေလႆႈႁၼ် ဢၼ်ဢဝ်မႆႉႁဵတ်းပေးသေၵေႃႈ လွင်ႈၸွမ်းလူင်းမႃးယူႇယဝ်ႉ။ ပေႃးပူၼ်ႉ ၵၢတ်ႇသႃယဝ်ႉ ၼမ်ႉၵဵဝ်ၼႆႉ ၶိုၼ်ႈပိၼ်ႇဝၢႆႇၽၢႆႇၸၢၼ်းသေၵေႃႈ လႆလူင်းယူႇယဝ်ႉ။ လုၵ်ႉဢဝ်ဝဵင်းၵၢတ်ႇသႃ တေႃႇ ဝဵင်းထီးၶျႅင်ႉ၊ လုၵ်ႉတီႈၼၼ်ႈတေႃႇပေႃးထိုင် ထုင်ႉၵၢင်မိူင်းၼၼ်ႉ ဢၼ်ပဵၼ် ၶိူဝ်းသၵျၶဝ် ယၢမ်ႈမႃးဢုပ်ႉပိူင် ပၵ်းႁၢင်ႈပၵ်းႁေႃ တီႈဢၼ်ဝႃႈ ဢၼ်ပဵၼ် ဝဵင်းတႃႈၵွင်၊ လုၵ်ႉတီႈၼၼ်ႈ ယၢၼ်ထႅင် သီႇသိပ်းလၵ်း ထိုင်တီႈ ဝၢၼ်ႈမလႄႇၼၼ်ႉယဝ်ႉ။

သၢႆငၢႆၼႃႈလိၼ်

ၵိင်ႇမႄႈၼမ်ႉ

ၶႅပ်းႁၢင်ႈ

• 
  River Irrawaddy with Mandalay Hill on the east bank
• 
  Travelling on the great river
• 
  Traditional rivercraft on the Irrawaddy
• 
  Buffalo pulling logs from the Irrawaddy at Mandalay
• 
  The great river at Mingun
• 
  An island village on the Irrawaddy stays above water on stilts during the monsoons
• 
  Bamboo rafts by the Irrawaddy
• 
  Market on the west bank at Mingun
• 
  Bamboo raft sailing down the Irrawaddy
• 
  Woman sailing in small boat along the west bank at Mingun